Le se ke la Boifa—Jehofa o na le Lena!

NYWAGA ya ka godimo ga e 50 e fetilego, nakwana ka morago ga ge dipomo tša pele tša nuclear di thuthupile, rathutamahlale yo a thopilego sefoka sa Nobel e lego Harold C. Urey o boletše ka bokamoso gore: “Re tlo ja poifo, ra robala poifo, ra phela ka poifo le go hwa ka poifo.” Ee, lefase la rena lehono le poifong e kgolo, gomme seo ga se makatše! Letšatši le letšatši, dikuranta di tsebatša dipego tše di tšhošago tša botšhošetši, bosenyi bjo bošoro le malwetši a makatšago.

Ka ge re le Bakriste, re tseba seo se bolelwago ke maemo a bjalo. A bontšha gore re phela “mehleng ya bofelo” ya tshepedišo ye e kgopo, yeo Beibele e boletšego e sa le pele ka yona gore e tla swawa ke “dinako tše di hlobaetšago tšeo go lego thata go lebeletšana le tšona.” (2 Timotheo 3:1) Ka gona, kholofelo ya rena e matlafatšwa ke gore Jehofa Modimo kgaufsinyane o tla tliša lefase le lefsa leo go lona go tla agago toko. (2 Petro 3:13) Lega go le bjalo, na rena ga bjale re ka se welwe ke poifo?

Pono ya Bahlanka ba Modimo ka Poifo

Jakobo, Dafida le Eliya ba be ba le gare ga bahlanka ba Jehofa bao ba ilego ba welwa ke poifo ge ba be ba lebeletšane le maemo a kotsi. (Genesi 32:6, 7; 1 Samuele 21:11, 12; 1 Dikxoši 19:2, 3) Ga se gore banna ba ba be ba se na tumelo. Eupša ba ile ba ithekga ka go tia ka Jehofa. Lega go le bjalo, Jakobo, Dafida le Eliya e be e le batho; ka go rialo, ba be ba ka welwa ke poifo. Morutiwa Jakobo o ngwadile gore: “Eliya e be e le motho yo a nago le maikwelo a swanago le a rena.”—Jakobo 5:17.

Le rena re ka welwa ke poifo ge re nagana ka lepheko leo re lebeletšanego le lona gona bjale goba leo re ka lebeletšanago le lona nakong e tlago. Poifo e bjalo e a kwešišega. Le gona, Beibele e bolela gore Sathane Diabolo o ikemišeditše “go lwa” le bao “ba bolokago ditaelo tša Modimo gomme ba e-na le modiro wa go nea bohlatse ka Jesu.” (Kutollo 12:17) Le ge mantšu ao a šoma ka mo go kgethegilego go Bakriste ba tloditšwego, Paulo o ngwadile gore: “Bohle bao ba ratago go phela ka boineelo go Modimo tswalanong le Kriste Jesu le bona ba tla hlomarwa.” (2 Timotheo 3:12) Lega go le bjalo, ga se ra swanela go boifa ge re lebeletšane le mathata. Ka baka la’ng?

“Modimo-Mophološi”

Mopsalme Dafida o ngwadile gore: “Yêna Modimo, xo rena ké Modimo-Mophološi.” (Psalme 68:20) Jehofa o bontšhitše leboelela gore o na le bokgoni bja go phološa batho ba gagwe, e ka ba ka go ba ntšha maemong a kotsi goba ka go ba nea matla a go kgotlelela. (Psalme 34:17; Daniele 6:22; 1 Bakorinthe 10:13) Ka ge o ithuta Beibele, ke ditiragalo tše kae tše bjalo tše o di gopolago tšeo go tšona Modimo a ilego a ‘phološa’ batho?

O diriša Watch Tower Publications Index, * ke ka baka la’ng o sa nyakišiše ka ditiragalo tša kgonthe tše bjalo ka Meetse-fula a lefase ka moka a mehleng ya Noa, go phološwa ga Lota le barwedi ba gagwe go tšwa Sodoma le Gomora, go Huduga ga Baisiraele Egipita le go sepela go phatša Lewatle le Lehwibidu goba maano-mabe a Hamani a go nyaka go fediša Bajuda? Go bala le go naganišiša ka dipego tše tše di kgahlišago go tla matlafatša tumelo ya gago tabeng ya gore Jehofa Modimo ke mophološi. Ka morago, se se tla go thuša go lebeletšana le diteko tša tumelo ya gago o sa boife.

Mehlala ya Mehleng Yeno

Na o ka nagana ka mehlala ya mehleng yeno ya bao ba ilego ba kgotlelela motseng wa geno? E ka ba motho yo a ilego a golegwa ka baka la go botegela Modimo. O ka ba o tseba Mokriste yo a tšofetšego yo a hlankelago Jehofa go sa šetšwe go fokola mmeleng. Goba nagana ka bafsa bao ba dulago  ba arogile lefaseng go sa šetšwe kgateletšo e kgolo e tšwago go bao ba tsenago le bona sekolo. Le gona, go na le batswadi bao ba se nago balekane bao ba godišago bana ba bona ba nnoši, goba batho bao ba sego lenyalong bao ba ka bago ba hlankela Jehofa go sa šetšwe gore ba lewa ke bodutu. O ithuta’ng bathong ba bjalo? Go naganišiša ka go botegela ga bona Modimo go ka go thuša gore o kgotlelele le gore o dule o sa boife go sa šetšwe diteko le ge e le dife tšeo di ka go welago.

Go se boife ga go nyakege feela ge re lebeletšane le kganetšo le tlaišo eupša gape go nyakega ge re thoma go belaela gore Jehofa o a re rata. Re swanetše go hlagolela kholofelo ya gore sehlabelo sa Kriste se šoma go rena re le motho ka o tee ka o tee. (Bagalatia 2:20) Ke moka, re ka batamela Jehofa re bontšha poifo goba letšhogo le le swanetšego. Ge e ba re ikwa re sa swanelwe ke lerato la Jehofa, re ka naganišiša ka mantšu ao Jesu a a boditšego balatedi ba gagwe a rego: “Na dithaga tše pedi ga di rekišwe ka tšhelete ya tšhipi ya theko e nyenyane? Lega go le bjalo, ga go le e tee ya tšona yeo e tlago go wela fase Tatago lena a sa tsebe. Eupša yona meriri ye ya dihlogo tša lena e badilwe ka moka. Ka gona, le se ke la boifa: Le bohlokwa go feta dithaga tše dintši.”—Mateo 10:29-31.

Dimakasine tša Morokami le tša Phafoga! gantši di gatiša diphihlelo tša Dihlatse tša Jehofa tša mehleng yeno tšeo di ilego tša lebeletšana le mathata a mantši di sa boife. Se ga se bolele gore ga se tša ka tša nyamišwa ke mathata a tšona. Eupša ga se tša ka tša dumelela go nyama mo go bjalo go di thibela go hlankela Jehofa. Dipego tša tšona tše di gatišitšwego di ka go thuša gore le wena o kgotlelele o sa boife. Ela hloko mehlala e mebedi.

Kgobalo e Fetošitše Bophelo bja Gagwe

Tokollo ya Phafoga! ya May 8, 2003, e be e e-na le sehlogo se se rego, “Kamoo Kgobalo e Fetošitšego Bophelo Bja-ka ka Gona.” Sehlogong seo, Stanley Ombeva, yo mongwe wa Dihlatse tša Jehofa tša Kenya, o hlalosa mathata ao a ilego a lebeletšana le ona ka morago ga go thulwa ke koloi yeo e bego e kitima ka lebelo le legolo. Ge boemo bja gagwe bja tša maphelo bo dutše bo mpefala, o ile a lahlegelwa ke mošomo wa gagwe le mehola ya wona ka moka. Pegong ya gagwe, Ngwanabo Rena Ombeva o dumela gore: “Ge ke be ke thoma go lemoga go ba thata ga boemo bja-ka, ke ile ka ba le maikwelo a fošagetšego, ke le moithati gomme ke selekega feela. Ka dinako tše dingwe, ke be ke galefa e bile ke le šoro.” Go sa šetšwe bothata bja gagwe, monna yo wa Mokriste o ile a dula a sa boife. Ga se a ka a dumelela go nyama go mo laola gomme go mo dira gore a itlhoboge ka mo go feletšego. Go e na le moo, o ile a ithekga ka Jehofa. Ngwanabo Rena Ombeva o re: “[Jehofa] ka mehla o be a nthekga go tšohle tšeo ke bego ke lebeletšana le tšona—kudu-kudu, mo e lego gore ka dinako tše dingwe ke be ke inyatša. Ke ile ka dira boikemišetšo bjo matla bja go bala le go naganišiša ka mangwalo ao ke bego ke tseba gore a ka nkhomotša boemong bjo ke lego go bjona.”

Ditlhaloso tše di lebanyago tša Ngwanabo Rena Ombeva di ile tša dira gore ba bangwe ba bantši ba kgotlelele mathata ba sa boife. Kgaetšedi yo mongwe wa Mokriste o ngwadile gore: “Ke ile ka lla ge ke be ke bala sehlogo se. Ke be ke nagana gore ka sehlogo se Jehofa o be a mpontšha botho bja gagwe le tlhokomelo ya gagwe e lerato le gore o be a nkhomotša.” Hlatse e nngwe e ngwadile gore: “Dihlogo tše di swanago le se di nea kgothatšo e kgolo kudu go ba bangwe ba rena bao ba lebeletšanego le maemo a swanago le bao ba hwelago ka gare.”

Go Lebeletšana ka Katlego le Kgateletšo ya Maikwelo

Phihlelo e nngwe e kgothatšago ke ya Herbert Jennings, yeo e anegilwego ka sehlogong se se rego, “Ga le Tsebe Gore Bophelo bja Lena bo tla  ba Bjang Gosasa.” * Ngwanabo Rena Jennings o swerwe ke bolwetši bja tšharakano ya tshepedišo ya megalatšhika. Ge a lebelela morago matšatšing a mathomo a bolwetši bja gagwe o re: “E be e le bothata bja kgonthe go ba gona dibokeng tša Bokriste. Lega go le bjalo, ke be ke kgodišegile ka mo go feletšego ka bohlokwa bja borwarre bja moya. Bakeng sa go lebeletšana le se, gantši ke be ke tsena Holong ya Mmušo ka morago ga ge mašaba a dudišegile le go tloga pele ga ge a thoma go emelela mafelelong a lenaneo.”

Go dira boboledi le gona go be go le thata. Ngwanabo Rena Jennings o laodiša gore: “Ka dinako tše dingwe, gaešita le ka morago ga go fihla ntlong, ke be ke sa kgone go rapa sebete sa go kokota. Lega go le bjalo, ke be nka se tlogele ka gobane ke ile ka lemoga gore bodiredi bja rena bo bolela phološo go rena le go mang le mang yo a arabelago gabotse. (1 Timotheo 4:16) Ka morago ga lebakanyana, ke be ke kgona go laola maikwelo a-ka, ke ye ntlong e latelago gomme ke leke gape. Ka go tšwela pele ke e-ba le karolo bodireding, ke ile ka boloka boemo bja moya bjo bo leka-lekanego gomme seo se ile sa oketša bokgoni bja-ka bja go lebeletšana le bothata.”

Pego ya Ngwanabo Rena Jennings e lebanyago e thušitše babadi ba bantši gore ba lebeletšane le dikgateletšo tša bona tše di swanago ba sa boife. Ka mohlala, kgaetšedi yo mongwe wa Mokriste o ngwadile gore: “Nywageng e 28 yeo ka yona ke bego ke dutše ke bala dimakasine tša Morokami le Phafoga!, ga se ka ka ka kgothatšwa kudu go feta kamoo ke ilego ka kgothatšwa ka gona ke sehlogo se. Ke ile ka swanelwa ke go tlogela tirelo ya-ka ya nako e tletšego gomme ka ikwa ke le molato kudu, ke nagana gore ge nkabe ke be ke e-na le tumelo e matla nkabe ke ile ka tšwela pele. Go bala kamoo Ngwanabo Rena Jennings a ilego a swanelwa ke go tlogela kabelo e le gore a yo oka bolwetši bja gagwe go ile gwa nthuša go lebelela boemo bja-ka ka tsela e leka-lekanego. Ye ruri e be e le karabo ya dithapelo tša-ka!”

Ka mo go swanago, ngwanabo rena yo mongwe wa Mokriste o ngwadile gore: “Ka morago ga go hlankela ke le mogolo ka phuthegong ka nywaga e lesome, ke ile ka swanelwa ke go tlogela tokelo ya-ka ka baka la bolwetši bja monagano. Go ikwa ga-ka ke paletšwe gantši go be go ntira gore ke nyame kudu ge ke bala diphihlelo, tšeo gantši di bego di hlalosa dilo tše di makatšago tšeo di fihleletšwego ke batho ba Jehofa. Eupša kgotlelelo ya Ngwanabo Rena Jennings e ile ya nkgothatša kudu. Ke badile sehlogo se gantši.”

Go Tšwela Pele ka Kgodišego

Go etša Ngwanabo Rena Ombeva le Ngwanabo Rena Jennings, Dihlatse tša Jehofa tše dintši di tšwela pele go rapela Jehofa Modimo di sa boife go sa šetšwe mapheko a thata ao di lebeletšanago le ona. Ge e ba o le gare ga tšona, o swanetše go retwa. Kgodišega gore: “Modimo ga se yo a sa lokago moo a ka lebalago modiro wa lena le lerato leo le le bontšhitšego leineng la gagwe, ka ge le diretše bakgethwa e bile le tšwela pele le ba direla.”—Baheberu 6:10.

Go etša ge Jehofa a ile a thuša batho ba gagwe ba botegago ba mehleng ya bogologolo gore ba fenye manaba a bona, a ka go thuša gore o fenye lepheko le ge e le lefe leo o ka lebeletšanago le lona. Ka gona, gopola mantšu ao Jehofa a a boletšego ka moporofeta wa gagwe Jesaya ge a re: “O se boifê xobane ke na le wene. O se kê wa thšoxa, xobane Modimo wa xaxo ké Nna. Ke a Xo tiiša; ke a Xo thuša; ke Xo hlêka ka letsôxô la-ka le letona le-ya-ka-tokô.”—Jesaya 41:10.

[Mengwalo ya ka tlase]

[Diswantšho go letlakala 16]

Go etša Stanley Ombeva (ka godimo) le Herbert Jennings (ka go le letona), ba bantši ba hlankela Jehofa ba sa boife

[Mothopo wa Seswantšho go letlakala 14]

USAF photo