Thuto Mabapi le Boikgogomošo le Boikokobetšo

TIRAGALO yeo e ilego ya direga bophelong bja Kgoši Dafida e bontšha phapano magareng ga boikokobetšo bja kgonthe le boikgogomošo. E diregile ka morago ga gore Dafida a fenye Jerusalema le go e dira motse-mošate. Dafida o be a tšea Jehofa e le Kgoši ya kgonthe ya Isiraele, ka gona o ile a lokišetša gore Areka, yeo e bego e swantšhetša go ba gona ga Modimo e tlišwe motseng. Tiragalo ye e be e le ya bohlokwa go Dafida ka ge a ile a bontšha bohle lethabo la gagwe ge a be a šetše baperisita bao ba bego ba rwele Areka morago. Baagi ba Jerusalema ba bone kgoši ya bona e “xobêla” e bile “[e] bina ka matla a [yona] ka moka.”—1 Koronika 15:15, 16, 29; 2 Samuele 6:11-16.

Lega go le bjalo, mosadi wa Dafida e lego Mikala, ga se a ka a ba molokelokeng woo wa lethabo. O be a ba lebeletše ka lefasetere, gomme go e na le go reta tsela ya Dafida ya go tumiša Jehofa, o ile “a mo nyatša pelong ya xaxwe.” (2 Samuele 6:16) Ke ka baka la’ng Mikala a ile a ikwa ka tsela ye? Go molaleng gore o be a nagana kudu ka maemo a gagwe e le morwedi wa kgoši ya pele ya Isiraele, Saulo, gomme bjale e le mosadi wa kgoši ya bobedi ya Isiraele. Mohlomongwe o be a nagana gore monna wa gagwe, kgoši, o be a se a swanela go inyenyefatša ka go itheolela boemong bja batho ba tlwaelegilego le go kopanela le bona monyanyeng. Maikwelo a bjalo a boikgogomošo a bonagetše ka tsela yeo a ilego a dumediša Dafida ka yona ge a be a boa gae. Ka go kodutla o itše: “Lehono kxoši ya Isiraele e be e thathankxa è hlobotše è bônwa ke balata ba yôna ba basetsana le ba masoxana, è hlobotše wa dikobaobane.”—2 Samuele 6:20.

Dafida o ile a arabela bjang lenyatšong leo? Dafida o ile a kgala Mikala ka go bolela gore Jehofa o lahlile tatagwe Saulo, gomme a kgetha yena legatong la gagwe. Dafida o okeditše ka gore: “Ke sa tlo ikokobetša xo fetiša fá kè ithsema e monyane. Xe e le basetsana bao O ba boletšexo, bôná ke tlo xodišwa le bôná, ra xodišwa bohle.”—2 Samuele 6:21, 22.

Ee, Dafida o be a ikemišeditše go tšwela pele a hlankela Jehofa ka boikokobetšo. Boitshwaro bjo bo re thuša gore re kwešiše lebaka leo Jehofa a biditšego Dafida gore ke “monna yo a kwanago le pelo ya-ka.” (Ditiro 13:22; 1 Samuele 13:14) Ge e le gabotse, Dafida o be a latela mohlala o mobotse wa boikokobetšo—wa Jehofa Modimo ka boyena. Ka mo go kgahlišago, polelo yeo Dafida a e dirišitšego ge a be a re go Mikala, “kè ithsema e monyane” e tšwa modung wa lediri la Seheberu leo le dirišwago go hlalosa pono ya Modimo ka batho. Le ge Jehofa e le Motho yo mogolo kudu legohleng, Psalme 113:6, 7 e mo hlalosa gore “Ó ukametše [go itheola ga motho boemong bjo bo phagamego e le gore a dirišane le motho wa tlasana] maxodimo le lefase, ó di bòna di le tlase, A tsoša babôtlana leroleng, a nthša modiidi ’thšileng.”

Ka ge Jehofa a ikokobeditše, ga go makatše gore o hloile “mahlô-maikxanthši” a batho ba go ikgogomoša. (Diema 6:16, 17) Ka go bontšha mediro e mebe le ya go hlompholla yo Modimo a mo kgethilego e le kgoši, Mikala o ile a ganetšwa tokelo ya go belegela Dafida morwa. O hwile a se na ngwana. A thuto ya bohlokwa gakaakang go rena! Bohle bao ba nyakago kamogelo ya Modimo ba swanetše go ela hloko mantšu a: “Itlemeng ka go kokobela ga monagano yo mongwe go yo mongwe, gobane Modimo o ganetša baikgogomoši, eupša o nea baikokobetši botho bjo bo sa swanelago.”—1 Petro 5:5.