Ketelo Yeo e Bakilego Phetogo e Kgolo

“KE BE ke fagahletše go botša ba lapa la-ka ka ‘barongwa’ ba babedi bao Modimo a ilego a ba romela go nna.” Ke kamoo go ngwadilego monna yo mongwe yo a ilego a etelwa ke dikgarebe tše pedi tša Dihlatse tša Jehofa. Dibeke tše mmalwa pejana ga ketelo ya tšona, monna yo o be a hwetšwe ke mosadi yo a bego a nyalane le yena ka nywaga e 45. O be a hlafetšwe. Bana ba gagwe ba bagolo ba ile ba mo kgothatša, eupša ba be ba dula kgole. Go be go se na bagwera le baagišani bao ba mo etelago.

Monna yo o ile a botša dikgarebe tše ge di mo etetše gore: “Ga ke rapele Modimo.” Lega go le bjalo, di be di mo kwela bohloko gomme di ile tša mo tlogelela pampišana yeo e theilwego Beibeleng ya sehlogo se se rego Kholofelo ke Efe ka Baratiwa Bao ba Hwilego? O e badile bošegong bjona bjoo gomme a homotšega.

Nakwana ka morago, dikgarebe tše tše pedi tša Bakriste di ile tša mo etela gape. Di be di gopola gore ketelong ya tšona ya pele monna yo o be a nyamile gomme di be di tlile go mo hlola gore o tsoga bjang. Monna yo o ngwadile ka moragonyana gore, “ke be ke maketše kudu gore batho ba babedi bao ke sa ba tsebego le gatee ba be ba nkwela bohloko le gona ba be ba tshwenyegile ka gore ke phela bjang.” O ile a kgothatšwa ke mantšu ao ba ilego ba mmotša wona go tšwa Beibeleng. Dikgarebe di ile tša re di tla boa gape. Monna yo o be a thabile gomme a tutueletšega go ngwala tlhaloso ye e lego ka mo godimo ka lengwalong leo a le rometšego Holong ya Mmušo ya Dihlatse tša Jehofa ya lefelong leo.

Pele a ka hudugela tikologong ya kgaufsi le yo mongwe wa bana ba gagwe, monna yo o ile a ba gona sebokeng sa Bokriste sa Dihlatse tša Jehofa, gomme a ya go ja dijo gotee le lapa la gabo yo mongwe wa dikgarebe tše. O ngwadile gore: “Ke a huduga lefelong le, eupša ka mehla ke tla dula ke gopola bafsa bao le kereke ya lena dithapelong tša-ka. Ee, gona bjale ke a rapela—kudu le gona. Ke fetogile ka mo go feletšego. Ke thušitšwe ke bafsa bao, gomme ke tla dula ke ba leboga ka mehla.”