“Melaô ya Xaxo ke e Rata Xakaka’ng!”

PSALME 119 ke kopelo yeo e tšweletšago maikwelo a mongwadi mabapi le molaetša wa Modimo wo o buduletšwego, goba lentšu la gagwe. Mopsalme o opela ka gore: “Pelong ya-ka ke boloka thutô ya xaxo.” “Ke tlo iphsina ka mekxwa ya xaxo.” “Môya wa-ka o xoletšwe ke xo hloloxêlwa moahlolêlô w’axo mehla yohle.” “Mabohlatse a xaxo ké ôna a nthabišaxo.” “Nna ke hloloxetšwe ditaêlô tš’axo.” “Malaeledi a xaxo ke a a thabêla, ké ôna a ke a rataxo.” “Ke xopola ditaêlô tš’axo.” “Melaô ya xaxo ke e rata xakaka’ng! Ke eleletša yôna mehla yohle.” (Mongwalo o sekamego ke wa rena.)—Psalme 119:11, 16, 20, 24, 40, 47, 48, 97.

A tebogo e kgolo gakaakang yeo mopsalme a bego a e-na le yona lentšung la Modimo leo le utolotšwego! Na o ikwa ka tsela ye ka molaetša wa Lentšu la Modimo e lego Beibele? Na o ka rata go hlagolela lerato leo? Ge e ba go le bjalo, sa pele o swanetše go hlagolela mokgwa wa go bala Beibele ka mehla, letšatši le letšatši ge go kgonega. Jesu Kriste o boletše gore: “Motho a ka se phele ka senkgwa feela, eupša o tla phela ka polelo e nngwe le e nngwe e tšwago molomong wa Jehofa.” (Mateo 4:4) Sa bobedi, o swanetše go naganišiša ka seo o se balago. Go naganišiša ka ditherešo tša mabapi le Modimo, dika tša gagwe, thato ya gagwe le morero wa gagwe, go tla dira gore o leboge Beibele. (Psalme 143:5) Sa bohlokwa le go feta, diriša dikeletšo tša yona tšeo di kwagalago bophelong bja gago bja letšatši le letšatši.—Luka 11:28; Johane 13:17.

O ka holwa bjang ke go hlagolela lerato la seo Beibele e se rutago? Psalme 119:2 e re: “Ba lehlôxônôlô ké ba-lôta-mabohlatse-’axwe [Modimo].” Dikgopotšo tše di hwetšwago ka Beibeleng di tla go thuša go lebeletšana ka katlego le mathata a bophelo. (Psalme 1:1-3) O tla ba le bohlale, temogo le kwešišo, tšeo di tlago go go thuša go ‘ilela dinao tša gago tsela e kgopo.’ (Psalme 119:98-101) Go tseba therešo ka Modimo le ka morero wa gagwe ka lefase go tla dira gore bophelo bja gago bo be le morero o kwagalago kudu le gona go tla dira gore kholofelo ya gago ka bokamoso e phadime.—Jesaya 45:18; Johane 17:3; Kutollo 21:3, 4. 

Dihlatse tša Jehofa di tloga di thabela go thuša ba bangwe gore ba tsebe Beibele gakaone le gore ba rate molaetša wa yona. Ka borutho re go laletša gore o arabele taletšong e latelago.