Go Hwetša Tsela Lewatleng le Legolo

DIHLAKAHLAKA tša Marshall di bopilwe ke dihlakahlaka tše fetago 1 200 tše dikgolo le tše dinyenyane tšeo bontši bja tšona di phagametšego lewatle ka dimithara tše ka bago tše tshela. Ge motho a tšwele ka lewatleng ka monabo o monyenyane ga di bonagale. Lega go le bjalo, basesiši ba bogologolo ba Marshall ba ile ba kgona go sesa ka karolong ya disekwere-khilomithara tše 650 000 ka Lewatleng la Pacific ka diketswana tša bona tše dinyenyane, tšeo di nago le meselana ye e di thušago go phaphamala, go tloga sehlakahlakeng se senyenyane go ya sehlakahlakeng se sengwe se senyenyane. Ba kgonne bjang? Ba be ba hlahlwa ke “mebapa” yeo ba bego ba e diriša e bonolo, lega go le bjalo e le yeo e tlogago e šoma, yeo e bitšwago mebapa ya mahlokwa.

Ka diphihlelo, basesiši ba Marshall ba ile ba ithuta gore ge e ba go e-na le sehlakahlaka dikhilomithara tše 30 go tloga go bona, go be go e ba le mohuta o swanago wa maphoto. Go be go e-na le mehuta e mentši ya maphoto yeo ba bego ba swanetše go ithuta yona, ka gona mebapa ya mahlokwa e be e ba thuša go e gopola. Mebapa ya mahlokwa e be e le bjang? Ka ge o ka bona mo seswantšhong, mahlokwa ao a dirilwego ka diripana tša medu ya pandanus goba ka matlakala a mekhokhonate a be a kgokaganywa gotee gore a logagane gomme a bonagale eka ke maphoto. Dikgapetla tša dikgopa tša lewatle di be di kgokelelwa bakeng sa go swaya mo sehlakahlaka se hwetšwago gona.

Ka nywaga e mentši, go sesa ka tlhahlo ya mebapa ya mahlokwa e be e le sephiri seo se bego se utollelwa feela batho ba sego kae. Mosesiši yo mofsa o be a ithuta bjang go diriša mmapa wa mahlokwa? Ke feela ka go hlahlwa le ka go itlwaetša. Mosesiši yo a nago le tsebo o be a ruta mosesiši yo mofsa ka sephiring, mohlomongwe ka go ya le yena dihlakahlakeng tša kgaufsi. Ge mosesiši yo mofsa a ithutile go lemoga mosepelo wa maphoto, o be a ikholofela gore a ka kgona go diriša mmapa wa mahlokwa. Ka morago, o be a ka kgona go sesa a nnoši ka lewatleng.

Ka tsela e swanago, Lentšu la Modimo e lego Beibele, le ka šoma bjalo ka mohlahli tseleng ya rena ya bophelo. Mathomong, motho yo mongwe a ka re thuša gore re hwetše kwešišo ya motheo ka Mangwalo. Ka morago, ge re tšwela pele re ithuta Lentšu la Modimo le go diriša melao ya lona ya motheo, re thoma go holofela seo le se bolelago. Jošua, moetapele wa Baisiraele, o ile a botšwa gore a tšwele pele a bala Lentšu la Modimo e le gore a tle a “kxônê xo hlôkômêla tšohle tše di ngwadilwexo mo xo [lona].” Modimo o ile a botša Jošua ka morago ga moo gore: “Ké mo O tl’o xo ba le mahlatse ditseleng tša xaxo, ké mo O tl’o xo lêtlêxêlwa.” (Jošua 1:8) Ee, Beibele e ka re bulela tsela ya kgonthe ya bophelo le yeo e atlegago.

[Mothopo wa Seswantšho go letlakala 32]

© Greg Vaughn