Phihlelo

Jehofa o Nthušitše go Lebeletšana ka Katlego le Mathata a Bophelo

KA GE GO ANEGA DALE IRWIN

“BA SESWAI BA LEKANE! BOTHATA BO GOLA GE BA E-TLA E LE BA BANE KA NAKO E TEE.” Ke seo se ilego sa gatišwa e le sehlogo sa kuranta ya lefelong la gešo seo se tsebišago ka koketšego ya masea a mane lapeng la rena la banenyana ba bane. Ge ke be ke sa le lesogana, ke be ke sa ikemišetša go nyala, re sa bolele ka taba ya go ba le bana. Lega go le bjalo, bona—ke tate wa ba seswai!

KE BELEGWE ka 1934 motseng wa Mareeba, kua Australia. Ke be ke le phejane baneng ba bararo. Ka morago lapa lešo le ile la hudugela Brisbane, moo mma a bego a ruta sekolong sa Sontaga kerekeng ya Methodist.

Mathomong a 1938, dikuranta tša lefelong la gešo di ile tša bega gore go ka direga gore Joseph F. Rutherford yo a tšwago ntlong-kgolo ya lefase ya Dihlatse tša Jehofa a ganetšwe go tsena Australia. Mma ka morago o ile a botšiša Hlatse yeo e ilego ya re etela gore: “Ke ka baka la’ng ba mo dira bjalo?” Hlatse yeo e arabile ka gore: “Na Jesu ga se a ka a re batho ba tla tlaiša balatedi ba gagwe?” Ke moka mma o ile a amogela pukwana ya Cure, yeo e bego e bontšha ditsela tšeo ka tšona bodumedi bja therešo bo fapanego le bja maaka. * A kgahlilwe ke pukwana ye, mma o ile a ya le rena bana sebokeng sa Dihlatse tša Jehofa ka Sontaga se se ilego sa latela. Mathomong, tate o be a ganetša kudu, eupša nako le nako o be a ngwala lelokelelo la dipotšišo tša Beibele e le gore mma a ka di nea yo mongwe wa bana babo rena. Ke moka ngwanabo rena o be a ngwalela mma dikarabo tša Mangwalo gore a di nee tate.

Ka Sontaga se sengwe, tate o ile a ya dibokeng le rena ka maikemišetšo a go yo bolela gore ga a  kgotsofatšwe ke Dihlatse. Lega go le bjalo, ka morago ga go bolela le molebeledi wa mosepedi yo a bego a etetše phuthego ka nako yeo, tate o ile a fetoša kgopolo ya gagwe gomme a ba a dumela gore legae la gešo le dirišwe e le lefelo la go swarela thuto ya Beibele ya beke le beke, mo go bego go e-tla bao ba thabelago ba tikologong ya gešo.

Batswadi ba-ka ba kolobeditšwe ka September 1938. Nna le bagolwane ba-ka re kolobeditšwe ka December 1941 kopanong e kgolo yeo e bego e swaretšwe Hargreave Park kua Sydney, New South Wales. Ke be ke e-na le nywaga e šupa. Ka morago ga moo, ke be ke tšea karolo ka mehla bodireding bja tšhemo le batswadi ba-ka. Mehleng yeo, Dihlatse di be di sepela le dikeramafomo ge di e-ya ka ntlo le ntlo gomme di bapalela beng ba dintlo dithero tša Beibele tše di gatišitšwego.

Hlatse e nngwe yeo ke e gopolago gabotse ke Bert Horton. O be a e-na le koloi e nago le segodiša-modumo (amplifier) se matla le sekwatša-modumo (speaker) se se bofeletšwego ka godimo ga yona. Go šoma le Bert go be go thabiša, kudu-kudu go mošemane yo a lekanago le nna. Ka mohlala, ge re be re tsebatša polelo ya Beibele re eme tlhoreng ya mmoto, gantši re be re bona koloi ya maphodisa e lebile moo re bego re le gona. Kapejana Bert o be a tima ditlabakelo tša gagwe, gomme re sepele ka koloi go ya mmotong o mongwe o lego kgole, gomme a bapala kgatišo e nngwe. Bert le bana babo rena ba bangwe bao ba botegago go swana le yena ba nthutile mo gontši mabapi le go bota Jehofa le go ba sebete.—Mateo 10:16.

Ge ke be ke e-na le nywaga e 12, ka mehla ke be ke nea bohlatse ke le noši ge ke e-tšwa sekolong. Ka nako e nngwe, ke ile ka kopana le lapa la ga Adshead. Ge nako e dutše e e-ya, batswadi ka bobedi, bana ba bona ba seswai le ditlogolo tša bona tše dintši ba ile ba ithuta therešo. Ke leboga Jehofa ge a ile a ntumelela gore ke tsebatše therešo ya Beibele go lapa le leo le kgahlišago, gaešita le ge ke be ke le mošemanyana.—Mateo 21:16.

Ditokelo tša Tirelo ge ke sa le yo Monyenyane

Ge ke e-na le nywaga e 18, ke ile ka ba modiredi wa nako e tletšego gomme ka abelwa go ya kua Maitland, New South Wales. Ka 1956, ke ile ka laletšwa gore ke hlankele ofising ya lekala ya Australia kua Sydney. Go batho ba 20 bao ba bego ba šoma moo, mo e ka bago tee-tharong ya bona e be e le batlotšwa, ba e-na le kholofelo ya go buša le Kriste Mmušong wa gagwe wa legodimo. Ruri e be e le tokelo go šoma le bona!—Luka 12:32; Kutollo 1:6; 5:10.

Boikemišetšo bja-ka bja go dula ke sa nyala bo ile bja hwelela ge ke be ke kopana le Judy Helberg, kgaetšedi yo mobotse wa mmulamadibogo yo a bego a laleditšwe go tla ka nakwana ofising ya lekala gore a tle a nthuše ka modiro o mogolo. Ke ile ka ratana le Judy, gomme ra nyalana ka morago ga nywaga e mebedi. Ka morago ga moo, re ile ra thoma modiro wa tikologo, wo o bego o akaretša go etela phuthego e tee ya Dihlatse tša Jehofa beke e nngwe le e nngwe bakeng sa go kgothatša bana babo rena le dikgaetšedi.

Ka 1960, Judy o belege morwedi wa rena wa mathomo e lego Kim. Lehono, go ba le ngwana go be go tla bolela go tlogela modiro wa tikologo le go hwetša mo o ka dulago gona. Eupša seo se ilego sa re makatša kudu ke gore re ile ra kgopelwa gore re tšwele pele re etela diphuthego. Ka morago ga go rapela kudu, re ile ra amogela kgopelo yeo, gomme dikgweding tše šupa tše di latetšego, Kim o ile a sepela le rena dikhilomithara tše 13 000 ka pese, ka sefofane le ka setimela ge re dutše re hlankela diphuthego tše di lego kgole kua Queensland le Tšhemo ya ka Leboa. Re be re se na koloi ka nako yeo.

Ka mehla re be re dula magaeng a bana babo rena le dikgaetšedi. Ka baka la boemo bja leratadima  bja molatšatšing, phapoši ya marobalo mehleng yeo gantši e be e e-na le digareteine e sego mejako, e lego seo se bego se re tshwenya ge Kim a be a lla bošego. Mafelelong, boikarabelo bja go hlokomela ngwana le kabelo ya rena bo ile bja bonagala bo le thata kudu. Ke moka re ile ra yo dula Brisbane, gomme ka thoma go šoma mošomo wa go penta maswao a bokgabo, e lego mohuta wa maswao a kgwebo. Nywageng e mebedi ka morago ga go belegwa ga Kim, re ile ra ba le morwedi yo mongwe e lego Petina.

Go Lebeletšana le Mathata

Ka 1972, ge banenyana ba ba be ba e-na le nywaga e 12 le e 10, Judy o ile a bolawa ke bolwetši bja Hodgkin, e lego mohuta o itšego wa bolwetši bja madi. Go be go bonagala go sa kgonege gore lapa la rena le lebeletšane le tahlegelo ye. Lega go le bjalo, nakong ya ge Judy a babja le ka morago ga lehu la gagwe, Jehofa o ile a re matlafatša ka Lentšu la gagwe, ka moya wa gagwe o mokgethwa le ka bana babo rena. Le gona re ile ra matlafatšwa ke makasine wa Morokami wo re o hweditšego nakwana ka morago ga bothata bjo. O be o e-na le sehlogo se se bego se le mabapi le diteko tšeo motho a kopanago le tšona, go akaretša le go hwelwa, gomme wa bontšha kamoo diteko di ka re thušago ka gona go hlagolela dika tše di kgahlišago Modimo, tše bjalo ka kgotlelelo, tumelo le potego. *—Jakobo 1:2-4.

Ka morago ga lehu la Judy, ke ile ka ba le tswalano ya kgaufsi kudu le barwedi ba-ka. Eupša gona ke therešo gore e be e le tlhohlo e kgolo go leka go ba tate le go ba mma. Lega go le bjalo, barwedi ba-ka ba babedi ba babotse ba dirile gore modiro wo o be bonolo kudu.

Go Nyala Gape le go Oketšega ga Lapa

Ge nako e dutše e e-ya, ke ile ka nyala gape. Nna le mosadi wa-ka yo mofsa e lego Mary, re be re swana ka dilo tše dintši. Monna wa gagwe le yena o be a bolailwe ke bolwetši bja Hodgkin. Le gona o be a e-na le barwedi ba babedi—Colleen le Jennifer. Colleen e be e le yo monyenyane go Petina ka nywaga e ka bago e meraro. Ka baka leo, lapa la rena le be le e-na le barwedi ba bane, ba nywaga e 14, 12, 9 le 7.

Mathomong nna le Mary re ile ra phetha ka gore yo mongwe le yo mongwe o tla laya bana ba gagwe go fihlela bana ba bangwe ba ikwa ba lokologile go amogela tlhahlo e tšwago go motswadi yo e sego wa madi. Ditswalanong tša rena ka noši bjalo ka monna le mosadi, nna le Mary re be re e-na le melao e mebedi ya bohlokwa. Wa pele, re be re ka se ngangišane pele ga bana, gomme wa bobedi, ka go dumelelana le molao wa motheo wo o begilwego go Baefeso 4:26, re be re bolela go fihlela re rarolotše bothata—gaešita le ge seo se be se ka tšea diiri tše dintši!

Se se makatšago ke gore yo mongwe le yo mongwe o ile a dira diphetogo gabotse bophelong bja lapa la motswadi o tee yo e sego wa madi le yo e lego wa madi, eupša go gopola ditahlegelo tša rena ga se gwa fela le semeetseng. Ka mohlala, bošego bja Mošupologo e be e le “bošego bja go lla” go Mary. Ka morago ga thuto ya rena ya lapa, ge barwedi ba rena ba robetše, Mary o be a tšholla maikwelo a gagwe ao a bego a a bolokile ka gare.

Mary o be a nyaka gore re be le ngwana wa rena. Ka manyami, o ile a senyegelwa ke mpa. Ge Mary a be a ima gape, re be re sa tsebe gore go be go e-na le selo seo se bego se tla re makatša. Motšhene wa  ultrasound o utolotše gore o be a sa ima ngwana o tee eupša o be a imile ba bane! Ke ile ka šala ke ahlame. Ke re ke be ke e-na le nywaga e 47, gomme go se go ye kae ke be ke tla ba tate wa bana ba seswai! Bana ba bane ba ile ba belegwa ka tsela ya gore mmago bona a buiwe ka February 14, 1982, ka morago ga dibeke tše 32 a imile. Masea a e be e le Clint, wa boima bja dikhilograma tše 1,6; Cindy, wa boima bja dikhilograma tše 1,9; Jeremy, wa boima bja dikhilograma tše 1,4; le Danette, wa boima bja dikhilograma tše 1,7. Ba be ba sa swane.

Ka morago ga go belegwa ga bana ba, ngaka ya Mary e ile ya tla ya dula kgaufsi le nna.

E botšišitše gore: “Na o tshwenyegile gore o tla hlokomela bana ba bjang?”

Ke ile ka re: “Goba gona, ga se ka ka ka ba boemong bjo bo swanago le bjo.”

Mantšu ao e ilego ya a bolela ka morago a ile a ntšhoša le go nkgothatša e le ruri.

E itše: “Phuthego ya gabo lena e ka se go lahle. O tla fo swanelwa ke go ethimola gomme o tla newa disakatuku tše dintši!”

Ka baka la thušo ya mmelegiši le sehlopha sa gagwe sa tša kalafo, bana ba bane bao ba itekanetšego ba boetše gae ba e-tšwa sepetlele ka morago ga dikgwedi tše pedi feela.

Tlhohlo ya go Godiša Masea a Mane

E le gore dilo di dirwe ka thulaganyo, nna le Mary re ile ra rulaganya lenaneo la diiri tše 24. Banenyana ba bane bao ba šetšego ba gotše ba be ba thuša kudu tabeng ya go hlokomela masea a. Le gona mantšu a ngaka e bile a therešo—go fo “ethimola” go ile gwa dira gore phuthego e re thuše. Pejana, John MacArthur yo ke ilego ka gwerana le yena ka nako e telele, o be a rulagantše Dihlatse tšeo di bego di e-na le bokgoni gore di katološe ntlo ya rena. Ge masea a be a fihla, sehlopha sa banenyana se ile sa thuša ka go a hlokomela. Botho bjo ka moka e be e le ponagatšo ya go šoma ga lerato la Bokriste.—1 Johane 3:18.

Bana ba ba bane e be e le “masea a phuthego” ka tsela e itšego. Go ba go fihla le lehono, ba lebelela bana babo rena le dikgaetšedi ba bantši bao ba ilego ba re thuša ba le bjalo ka ditho tša lapa. Ge e le Mary, o ile a ipontšha e le mosadi yo bohlokwa le mma yo a bego a hlokomela bana ba gagwe ka tsela e se nago boithati. O ile a tloga a diriša seo a ithutilego sona Lentšung la Modimo le mokgatlong wa gagwe. Ga go na keletšo e kaone go feta yeo!—Psalme 1:2, 3; Mateo 24:45.

Diboka tša Bokriste le modiro wa boboledi e ile ya dula e le karolo ya bohlokwa ya lenaneo la rena la beke le beke, gaešita le ge go be go le thata go hlokomela bana ba bane. Tšhegofatšo yeo re bego re e-na le yona ka nako yeo e be e le dithuto tša Beibele tšeo re bego re di swara le dihlopha tše pedi tša banyalani, bao ka botho ba bego ba e-tla legaeng la rena. Gaešita le ge se se be se re nolofaletša dilo, ka dinako tše dingwe Mary o be a lapa kudu mo a bego a robala nakong ya thuto, ngwana a robetše ka matsogong a gagwe. Mafelelong, dihlopha tšeo tše pedi tša banyalani di ile tša ba bana babo rena le dikgaetšedi.

Tlwaetšo ya Moya ge e sa le ba Banyenyane

Gaešita le pele ga ge bana ba ka thoma go sepela, nna, Mary le banenyana bao ba šetšego ba gotše re be re e-ya le bona bodireding bja tšhemo. Nakong ya ge ba be ba ithuta go sepela, ke be ke tšea ba babedi le Mary a tšea ba babedi, gomme ba be ba sa re imele. Ge e le gabotse, e be e le bona ba re thušago go thoma dipoledišano tša bogwera le beng ba dintlo. Ka letšatši le lengwe ke ile ka kopana le monna yo a bego a bolela gore ge o ka ba o belegwe ka letšatši la naletšana e itšego, semelo sa gago se be se tla sekamela ka lehlakoreng le itšego. Ga se ka mo ganetša, eupša ke ile ka mo kgopela ge e ba nka boa ka moragonyana mesong yeo. O ile a dumela, ke moka ke ile ka boa le masea a mane. Ge a be a ntebeletše a maketše, ke ile ka a dudiša ka go latelelana ga ona ka tswalo. Ke moka re ile ra ba le poledišano ya bogwera, e sego feela ka go fapana ga  ona mo go lego molaleng mmeleng eupša gape le ka phapano e kgolo dimelong tša ona, e lego seo se ilego sa phumola thuto ya gagwe. O itše: “Go bonagala go sa kwagale gore ke ile ka go botša thuto ye. Ke tla swanelwa ke go dira nyakišišo e oketšegilego, na ga go bjalo?”

Ge e sa le bana bao ba sa ithutago go sepela, ka bone bja bona ba be ba laiwa ge ba be ba itshwara gampe e le sehlopha, gomme re be re ba laya ka o tee ka o tee. Lega go le bjalo, ba ile ba ithuta gore melao e swanago e šoma go bohle. Ge ba be ba lebeletšana le ditaba tšeo di nyakago gore ba diriše letswalo sekolong, ba ile ba dula ba tiile melaong ya motheo ya Beibele gomme ba thekgana, Cindy e le mmoleledi wa bona. Go se go ye kae batho ba ile ba lemoga gore sehlopha sa bana ba ba bane se a thekgana!

Nna le Mary re bile le mathata a tlwaelegilego a go thuša bana gore ba dule ba botegela Jehofa ge ba le nywageng ya mahlalagadi. Re ka bolela gore modiro wo o be o tla ba thata kudu ge nkabe e be e se ka thekgo ya phuthego e lerato le motlalo wa dijo tša moya tšeo re di amogetšego karolong e bonagalago ya mokgatlo wa Jehofa. Re ile ra katanela go ba le thuto ya ka mehla ya legae ya Beibele le go boloka mekero ya poledišano e bulegile, gaešita le ge se se be se se bonolo ka mehla. Lega go le bjalo, maiteko a rena a ile a atlega ka gobane bana ba rena ka moka ba seswai ba kgethile go hlankela Jehofa.

Go Lebeletšana le Botšofadi

Go theoša le nywaga, ke thabetše ditokelo tše dintši tša moya: go ba mogolo wa phuthego, molebeledi wa motse le molebeledi wa tikologo wa go thuša. Le gona ke hlanketše ke le setho sa Komiti ya go Hloma Kwano le Dipetlele ya lefelong la gešo, yeo mošomo wa yona e lego go thuša dingaka gore di dirišane gabotse le balwetši bao e lego Dihlatse ge go tsoga kgang ya go tšhela madi. Le gona ke bile le tokelo ya go hlankela ke le monyadiši ka nywaga e 34. Ke nyadišitše banyalani ba ka bago 350, go akaretša le barwedi ba-ka ba tshelelago.

Ke dula ke leboga Jehofa ka thekgo e botegago yeo ke e hweditšego, ya pele ke e hweditše go Judy gomme ga bjale ke e hwetša go Mary. (Diema 31:10, 30) Ge ba be ba dutše ba nthekga modirong wa-ka ke le mogolo wa phuthego, ba be ba bile ba bea mohlala o mobotse bodireding le go nthuša go hlagolela dika tša moya baneng ba rena.

Ka 1996, ke ile ka swarwa ke bolwetši bja bjoko bjo bo bakago go thothomela ga diatla le bjo bo dirago gore ke se ke ka tsepama. Ka baka leo, ga ke sa kgona go penta maswao. Lega go le bjalo, ke sa dutše ke thaba kudu tirelong ya Jehofa, gaešita le ge ke dira dilo ka go nanya. Se se thabišago ke gore ke thomile go ba le kwelobohloko kudu go bao ba godilego.

Ge ke lebelela morago bophelong bja-ka, ke leboga Jehofa ge ka mehla a be a thuša nna le lapa la-ka gore re lebeletšane le mathata a rena a mantši ka lethabo. (Jesaya 41:10) Nna le Mary, gotee le bana ba rena ba seswai, re leboga kudu lapa le lebotse la bana babo rena ba moya le dikgaetšedi leo le neago thekgo. Ka moka ga bona ba bontšhitše lerato la bona ka ditsela tše dintši kudu.—Johane 13:34, 35.

[Mengwalo ya ka tlase]

[Seswantšho go letlakala 12]

Ke e-na le mma, mogol’a-ka Garth le kgaetšedi ya-ka Dawn, re itokišeleditše go tšea leeto la go ya kopanong ya selete kua Sydney ka 1941

[Seswantšho go letlakala 13]

Ke e-na le Judy le ngwana wa rena Kim ge ke be ke le modirong wa tikologo kua Queensland

[Seswantšho go letlakala 15]

Ka morago ga go belegwa ga masea a mane, barwedi ba rena ba bagolo ba bane le phuthego ba be ba ikemišeditše go re thuša