Thabela Lefase la Rena le Lebotse

DITSEBI tša tša dinaledi di lemogile gore legae la batho e no ba feela thorwana e nyenyane yeo e lego karolong e kgolo kudu ya legohle le legolo leo le se nago magomo. Legohleng ka moka leo le bonalago, ga go na mo gongwe moo go nago le bophelo. Ke feela polaneteng ya Lefase mo go nago le maemo a swanetšego a thekgago bophelo.

Go feta moo, re thabela go phela mo lefaseng le lebotse la nkgokolo. Go thabiša gakaakang go ruthetšwa ke letšatši ge go tonya! Ke mang go rena yo a sa thabišwego ke go hlaba le go dikela mo go kgahlišago ga letšatši? Goba gona, letšatši la rena le na le mohola o mogolo go feta wa go fo re thabiša. Le bohlokwa bakeng sa go ba gona ga rena.

Ka nywaga e dimilione tše sa balegego, matlakgogedi a letšatši a be a dutše a dira gore lefase le dipolanete tše dingwe di dule di tsepame ge di dikologa. Le gona, bjalo ka ge barutwana ba ithuta sekolong, tshepedišo ya setšatši (letšatši le dipolanete tšeo di le dikologago) ka moka e dikologa bogare bja molalatladi wa rena wa dinaledi wa Milky Way. Eupša molalatlading wa rena wa dinaledi, letšatši e no ba feela naledi e tee ya dinaledi tše dingwe tše dimilione tše dikete tše 100 tšeo di dikologago ka mokgwa woo.

Molalatladi wa dinaledi wa Milky Way o gare ga sehlopha sa melalatladi ya dinaledi e ka bago e 35. Dihlopha tše dikgolo di na le melalatladi e dikete ya dinaledi. Tshepedišo ya setšatši sa rena e be e ka se tsepame ka tsela ye ge nkabe e be e le sehlopheng se segolo seo se nago le melalatladi e mentši ya dinaledi yeo e pitlaganego. Eupša bjalo ka ge Guillermo Gonzalez le Jay W. Richards ba bolela ka pukung ya bona ya The Privileged Planet, ka mo go lego ka gona ke dikarolo tše sego kae feela legohleng tšeo di “swanelago bophelo bjo bo raraganego go swana le bja rena.”

Na bophelo mo polaneteng bo bile gona ka kotsi yeo e tšweletšego nakong ya seo go thwego ke mothuthupo o mogolo? Goba na go na le morero o mogolo wa bophelo mo polaneteng ye e botse ya Lefase?

Batho ba bantši ba fihleletše phetho ya gore legae la rena la lefaseng le be le bopetšwe go dira gore bophelo bo kgonege. * Nywaga-kgolo e fetilego, sereti sa Moheberu se ile sa hlahloba lefase le legodimo. Se ngwadile gore: “Xe ke bôna lexodimo lé la xaxo, medirô ya menô ya xaxo, kxwedi le ’naledi tšé, O di beilexo, Ke re motho ké eng.” (Psalme 8:3, 4) Sereti se se be se dumela gore go swanetše go ba go e-na le Mmopi. Na yeo ke phetho e kwagalago mo mehleng ya rena, yeo e nago le tsebo e ntši ya thutamahlale?

[Mongwalo wa ka tlase]

[Seswantšho go letlakala 3]

The Illustrated Science Encyclopedia—Amazing Planet Earth e re: “Lefase ge le le kgole le phadima bjalo ka lebenyabje le letala-lerata leo le lego lefsifsing la sebaka-bakeng.”

[Mothopo]

Globe: U.S. Fish & Wildlife Service, Washington, D.C./NASA