Bafsa—Phegelelang Dipakane Tšeo dD Godišago Modimo

“O itlwaetše boineelo go Modimo e le se o ikemišeditšego sona.”—1 TIMOTHEO 4:7.

1, 2. (a) Ke ka baka la’ng Paulo a ile a reta Timotheo? (b) Bafsa lehono ba ‘itlwaetša bjang boineelo go Modimo e le se ba ikemišeditšego sona’?

“GA KE na yo mongwe yo a nago le kgopolo e swanago le ya gagwe yo a tlago go hlokomela e le ka kgonthe dilo tše di lego mabapi le lena. . . . O ile a hlankela le nna go tšwetšeng pele ditaba tše dibotse go swana le ngwana a e-na le tatagwe.” (Bafilipi 2:20, 22) Moapostola Paulo o akareditše theto ye e borutho lengwalong la gagwe le le yago go Bakriste ba lekgolong la pele la nywaga ba Filipi. O be a bolela ka mang? O be a bolela ka Timotheo, e lego mosepedi-gotee le yena yo monyenyane. Timotheo o swanetše go ba a ile a kgothatšwa gakaakang ke kgonthišetšo ye ya Paulo ya lerato la gagwe le potego!

² Bafsa bao ba ratago dilo tša moya bjalo ka Timotheo e be e dutše e le ditho tše bohlokwa gare ga batho ba Jehofa. (Psalme 110:3) Lehono, mokgatlo wa Modimo o šegofaditšwe ka bafsa ba bantši bao ba hlankelago bjalo ka babulamadibogo, baromiwa, le baithapi ba tša meago gotee le badudi ba Bethele. Ba bangwe gape bao ba retwago kudu ke bao ba tšeago karolo ka mafolofolo medirong ya phuthego ba dutše ba hlokomela mediro e mengwe. Bafsa ba bjalo ba na le kgotsofalo ya kgonthe yeo e tlišwago ke go phegelela dipakane tšeo di godišago Tatago rena wa legodimong, Jehofa. Ka kgonthe, ba ‘itlwaetša boineelo go Modimo e le se ba ikemišeditšego sona.’—1 Timotheo 4:7, 8.

3. Ke dipotšišo dife tšeo di tlago go ahlwa-ahlwa sehlogong se?

³ Bjalo ka mofsa, na o katanela go fihlelela dipakane tše itšego tša moya? O ka hwetša kae thušo le kgothatšo ya go dira bjalo? O ka ganetša bjang kgateletšo ya lefase le leo le ratago dilo tše di bonagalago? O ka lebelela go hwetša ditšhegofatšo dife ge e ba o phegelela dipakane tšeo di godišago Modimo? Anke re hwetšeng dikarabo tša dipotšišo tše ka go ela hloko bophelo le tsela yeo Timotheo a e kgethilego bophelong.

Setlogo sa Timotheo

4. Hlalosa ka boripana bophelo bja Timotheo bjalo ka Mokriste.

⁴ Timotheo o goletše Lisitara, toropo e nyenyane profenseng ya Roma ya kua Galatia. O swanetše go ba a ile a ithuta ka Bokriste ge a be a le mahlalagading, ge Paulo a be a dira boboledi kua Lisitara mo e ka bago ka 47 C.E. Kapejana Timotheo o ile a ba le botumo bjo bobotse gare ga bana babo rena ba Bakriste ba gona moo. Ge Paulo a be a boela Lisitara nywaga e mebedi ka morago gomme a e-kwa ka tšwelopele ya gagwe, o ile a kgetha Timotheo gore a hlankele e le moromiwa-gotee le yena. (Ditiro 14:5-20; 16:1-3) Ge Timotheo a gola, o ile a fiwa boikarabelo bjo bogolo le go feta, go akaretša le masolo a bohlokwa a go matlafatša bana babo rena. Ge Paulo a be a ngwalela Timotheo a le kgolegong kua Roma mo e ka bago ka 65 C.E., Timotheo o be a hlankela bjalo ka mogolo wa Mokriste kua Efeso.

5. Go ya ka 2 Timotheo 3:14, 15, ke dilo dife tše pedi tšeo di tutueleditšego phetho ya Timotheo ya go phegelela dipakane tša moya?

⁵ Go molaleng gore Timotheo o ile kgetha go phegelela dipakane tša moya. Eupša ke’ng seo se  mo tutueleditšego go dira bjalo? Lengwalong la gagwe la bobedi leo le yago go Timotheo, Paulo o boletše ka dilo tše pedi tšeo di mo tutueleditšego go dira bjalo. O ngwadile gore: “Tšwela pele dilong tše o ithutilego tšona gomme wa kgodišwa gore o di dumele, o tseba batho bao o ithutilego tšona go bona le gore go tloga boseeng o tsebile mangwalo a makgethwa.” (2 Timotheo 3:14, 15) Anke re thomeng ka go ela hloko tutuetšo yeo Bakriste ba bangwe ba bilego le yona dikgethong tša Timotheo.

Go Holwa ke Ditutuetšo tše Botse

6. Timotheo o ile a hwetša tlwaetšo efe, le gona o ile a arabela bjang?

⁶ Timotheo o godišeditšwe ka lapeng leo le bego le arogane ka bodumedi. Tatagwe e be e le Mogerika, gomme mmagwe, Yunise, le makgolo’agwe Loisa e be e le Bajuda ka setlogo. (Ditiro 16:1) Yunise le Loisa ba rutile Timotheo ditherešo tša Mangwalo a Seheberu go tloga boseeng bja gagwe. Ka morago ga go sokologela Bokristeng, ka ntle le pelaelo ba ile ba thuša ka go mo tutueletša go dumela dithuto tša Bokriste. Go molaleng gore Timotheo o ile a holwa kudu ke tlwaetšo ye e botse. Paulo o boletše gore: “Ke gopola tumelo yeo e lego go wena e se nago boikaketši, yeo pele e bego e le go makgolo’ago Loisa le mmago Yunise, eupša e le yeo ke kgodišegilego gore le go wena e gona.”—2 Timotheo 1:5.

7. Bafsa ba bantši ba šegofaditšwe bjang, gomme se se ka ba hola bjang?

⁷ Lehono, bafsa ba bantši ba šegofaditšwe ka batswadi gotee le bo-makgolo le bo-rakgolo bao ba boifago Modimo bao ba lemogago bohlokwa bja dipakane tša moya go swana le Loisa le Yunise. Ka mohlala, Samira o sa gopola dipoledišano tše ditelele tšeo a bilego le tšona le batswadi ba gagwe ge a be a sa le mahlalagading. O anega ka gore: “Mma le tate ba ile ba nthuta gore ke be le pono ya Jehofa ka dilo le gore ke etiše modiro wa boboledi pele bophelong bja-ka. Ba be ba dula ba ntšhušumeletša go phegelela tirelo ya nako e tletšego.” Samira o arabetše ka tsela e kgahlišago kgothatšong ya batswadi ba gagwe gomme gona bjale o na le tokelo ya go hlankela bjalo ka setho sa lapa la Bethele nageng ya gabo. Ge e ba batswadi ba gago ba go kgothaletša go lebiša tlhokomelo dipakaneng tša moya, naganišiša ka keletšo ya bona ka kelohloko. Ba go kganyogela tše dibotse.—Diema 1:5.

8. Timotheo o hotšwe bjang ke bogwera bjo bo agago bja Bokriste?

⁸ E bile go bohlokwa gore o tsome bogwera bjo bo agago borwarreng bja Bokriste. Timotheo o ile a tsebja kudu ke bagolo ba Bakriste ba phuthego ya gabo le ba kua Ikonia, yeo e lego bokgoleng bja dikhilomithara tše ka bago tše 30. (Ditiro 16:1, 2) O ile a hlagolela bogwera bja kgaufsi le Paulo, motho yo a nago le mafolofolo. (Bafilipi 3:14) Mangwalo a Paulo a bontšha gore Timotheo o ile a amogela keletšo le gore o be a ekiša mehlala ya tumelo kapejana. (1 Bakorinthe 4:17; 1 Timotheo 4:6, 12-16) Paulo o ngwadile gore: “O latetše thuto ya-ka kgaufsi, tsela ya-ka  ya bophelo, morero wa-ka, tumelo ya-ka, bopelotelele bja-ka, lerato la-ka, kgotlelelo ya-ka.” (2 Timotheo 3:10) Ee, Timotheo o latetše mohlala wa Paulo kgaufsi. Ka mo go swanago, ge e ba o batamela batho bao ba tiilego moyeng ka phuthegong, o tla thušwa go ba le dipakane tše di kwagalago tša moya.—2 Timotheo 2:20-22.

Ithute “Mangwalo a Makgethwa”

9. Ka ntle ga go kgetha bagwera ba nepagetšego, ke’ng seo o swanetšego go se dira go ‘itlwaetša boineelo go Modimo e le se o ikemišeditšego sona’?

⁹ Na go phegelela dipakane tša moya e fo ba feela taba ya go kgetha bagwera ba nepagetšego? Aowa. Go swana le Timotheo, o swanetše go hlahloba “mangwalo a makgethwa” ka kelohloko. Go ithuta e ka no se be selo seo o se ratago, eupša gopola gore Timotheo o ile a swanelwa ke go ‘itlwaetša boineelo go Modimo e le se a ikemišeditšego sona.’ Bo-ramabelo gantši ba itlwaetša ka thata ka dikgwedi tše dintši e le gore ba tle ba kgone go fihlelela pakane ya bona. Ka mo go swanago, go fihlelela dipakane tša moya go nyaka boikgafo le maiteko a tseneletšego. (1 Timotheo 4:7, 8, 10) O ka botšiša gore, ‘Eupša go ithuta Beibele go ka nthuša bjang go fihlelela dipakane tša-ka?’ Anke re eleng hloko ditsela tše tharo.

10, 11. Ke ka baka la’ng Mangwalo a tla go tutueletša go phegelela dipakane tša moya? Nea mohlala.

¹⁰ Ya pele, Mangwalo a tla go tutuetša ka tsela e nepagetšego. A utolla semelo se se kgahlišago sa Tatago rena wa legodimong, tiro ya gagwe e phagamego kudu yeo a re diretšego yona ya lerato le tšhegofatšo ya ka mo go sa felego yeo a e holofetšago bahlanka ba gagwe ba ba botegago. (Amosi 3:7; Johane 3:16; Baroma 15:4) Ge tsebo ya gago ka Jehofa e gola, le lerato leo o mo ratago ka lona gotee le kganyogo ya gago ya go ineela go yena di tla gola.

¹¹ Bafsa ba bantši ba Bakriste ba bolela gore thuto ya ka mehla ya Beibele e be e dutše e le selo se bohlokwa kudu seo se ba thušago gore ba tšeele therešo godimo. Ka mohlala, Adele o goletše ka lapeng la Bakriste eupša o be a se a ka a ipeela dipakane tša moya. O anega ka gore: “Batswadi ba-ka ba be ba e-ya le nna Holong ya Mmušo, eupša ke be ke se na thuto ya motho ka noši e bile ke sa theetše dibokeng.” Ka morago ga ge mogolo’agwe a kolobeditšwe, Adele o ile a thoma go tšeela therešo godimo kudu. “Ke ile ka ikemišetša go bala Beibele ka moka. Ke be ke bala karolo e nyenyane ke moka ke ngwala ditlhaloso tša seo ke bego ke sa tšwa go bala ka sona. Ke sa na le dintlha tšeo ke bego ke di ngwala ka moka. Ke ile ka bala Beibele ka moka ka ngwaga.” Ka baka la seo, Adele o ile a tutueletšega go neela bophelo bja gagwe go Jehofa. Go sa šetšwe bothata bjo bogolo bja go se itekanele mmeleng, gona bjale ke mmulamadibogo, goba moebangedi wa nako e tletšego.

12, 13. (a) Ke diphetogo dife tšeo thuto ya Beibele e ka thušago mofsa go di dira, le gona bjang? (b) Nea mehlala ya bohlale bjo bo šomago bjoo Lentšu la Modimo le bo huperego.

¹² Ya bobedi, Beibele e tla go thuša go dira diphetogo tše di nyakegago semelong sa gago. Paulo o boditše Timotheo gore “mangwalo a makgethwa” a “hola ka go ruta, go sola, go lokiša dilo, go laya ka toko, gore motho wa Modimo a swanelege  ka botlalo, a hlangwe ka mo go feletšego bakeng sa modiro o mongwe le o mongwe o mobotse.” (2 Timotheo 3:16, 17) Ka go dula o naganišiša ka ditaba tšeo di sepedišanago le Lentšu la Modimo gotee le go diriša melao ya motheo ya Beibele, o tla dumelela moya wa Modimo o lokiša semelo sa gago. O tla tšweletša dika tše bohlokwa ka go wena, tše bjalo ka boikokobetšo, kgotlelelo, go šoma ka thata le go rata Bakriste-gotee le wena ka tsela ya kgonthe. (1 Timotheo 4:15) Timotheo o be a e-na le dika tše, gomme di ile tša mo dira motho yo a nago le mohola go Paulo le ka phuthegong yeo Timotheo a bego a hlankela go yona.—Bafilipi 2:20-22.

¹³ Ya boraro, Lentšu la Modimo ke bobolokelo bja bohlale bjo bo šomago. (Psalme 1:1-3; 19:7; 2 Timotheo 2:7; 3:15) Le tla go thuša go kgetha bagwera ka bohlale, go kgetha boithabišo bjo bo agago le go lebeletšana le mathata a mantši ka katlego. (Genesi 34:1, 2; Psalme 119:37; 1 Bakorinthe 7:36) Go dira diphetho tše bohlale gona bjale go bohlokwa go fihleleleng ga gago dipakane tša moya.

“E-lwa Ntwa e Botse”

14. Ke ka baka la’ng go phegelela dipakane tša moya e se tsela e bonolo?

¹⁴ Go etiša pele dipakane tšeo di godišago Jehofa ke tsela e bohlale kudu eupša ga se e bonolo le gatee. Ka mohlala, ge o kgetha tsela ya bophelo, o ka lebeletšana le kgateletšo e kgolo go tšwa go ba leloko, dithaka gotee le barutiši bao ba go kganyogelago tše dibotse bao ba dumelago gore thuto e phagamego le mošomo wa maemo a godimo ke senotlelo sa katlego ya kgonthe le lethabo. (Baroma 12:2) Go swana le Timotheo, o tla swanelwa ke go ‘lwa ntwa e botse’ e le gore o tle o “sware o tiiše bophelo bjo bo sa felego” bjoo Jehofa a go swaretšego bjona.—1 Timotheo 6:12; 2 Timotheo 3:12.

15. Timotheo a ka ba a ile a lebeletšana le kganetšo efe?

¹⁵ Ge ba leloko bao ba sa dumelego ba ganetšana le dikgetho tša gago, teko yeo e ka ba e kgolo kudu. Mohlomongwe Timotheo le yena o ile a lebeletšana le kganetšo e bjalo. Go ya ka puku e nngwe ya tšhupetšo, mohlomongwe lapa labo Timotheo le be le “wela legorong la malapa a dirutegi le a bahumi.” Tatagwe a ka no ba a be a lebeletše gore o tla tsoma thuto e phagamego le go tšwetša pele kgwebo ya lapa. * Nagana kamoo tatago Timotheo a ka bago a ile a arabela ka gona ge a lemoga gore Timotheo o be a bona go le kaone go tsenela modiro wa boromiwa le Paulo woo o bego o e-na le dikotsi gotee le go se kgonthišege ka tša ditšhelete!

16. Mofsa yo mongwe o ile a swaragana bjang le kganetšo ya batswadi?

¹⁶ Bafsa ba Bakriste lehono ba lebeletšana le ditlhohlo tše di swanago. Matthew, yo a hlankelago ofising ya lekala ya Dihlatse tša Jehofa, o gopola ka gore: “Ge ke be ke thoma go hlankela bjalo ka mmulamadibogo, tate o ile a nyama kudu. O be a bona eka ke sentše thuto ya-ka ka go amogela mošomo wa go ba mohlwekiši bakeng sa go iphediša bodireding bja-ka. O be a nkwera, a nkgopotša gore ke be ke tla gola bokae ge ke be nka šoma mošomo wa nako e tletšego.” Matthew o ile a swaragana bjang le kganetšo yeo? “Ke ile ka ba le lenaneo leo le tsepamego la go bala Beibele le go rapela ka mehla, kudu-kudu dinakong tšeo ke bego nka ferekana gabonolo.” Boikemišetšo bja Matthew bo ile bja putswa. Ge nako e dutše e e-ya, tswalano ya gagwe le tatagwe e ile ya kaonefala. Matthew o ile a ba a batamela kgaufsi kudu le Jehofa. Matthew o re: “Ke bone Jehofa a ntlhokomela, a nkgothatša le go ntšhireletša gore ke se dire diphetho tše sego bohlale. Nkabe ke se ka lemoga le setee sa dilo tše ge nkabe ke sa ka ka phegelela dipakane tša moya.”

Dula o Tsepamišeditše Kgopolo Dipakaneng tša Moya

17. Ke bjang ba bangwe ka phošo ba ka se kgothatšego bao ba nyakago go tsenela tirelo ya nako e tletšego? (Mateo 16:22)

¹⁷ Gaešita le badumedi-gotee ba ka no se go kgothaletše go phegelela dipakane tša moya. Ba bangwe ba ka botšiša gore, ‘Ke ka baka la’ng o  nyaka go ba mmulamadibogo? O ka iphelela bophelo bjo bo tlwaelegilego gomme wa kgona go tšea karolo modirong wa boboledi. O ka ikhweletša mošomo o mobotse gomme wa kgonthišetša gore o šireletšegile ka tša ditšhelete.’ Ye e ka bonagala e le keletšo e kwagalago, eupša na ruri o be o tla be o itlwaetša boineelo go Modimo e le se o ikemišeditšego sona ge o be o ka e latela?

18, 19. (a) O ka tsepamišetša bjang kgopolo ya gago dipakaneng tša moya? (b) Hlalosa boikgafo bjoo wena, bjalo ka mofsa, o bo dirago ka baka la Mmušo.

¹⁸ Go bonagala Bakriste ba bangwe ba mehleng ya Timotheo ba be ba nagana ka tsela e swanago. (1 Timotheo 6:17) Go thuša Timotheo gore a tsepelele dipakaneng tša moya, Paulo o mo kgothaditše ka gore: “Ga go na motho yo a hlankelago e le mohlabani yo a itsenyago medirong ya kgwebo ya bophelo, e le gore a tle a amogelwe ke yo a mo ngwadišitšego e le mohlabani.” (2 Timotheo 2:4) Mohlabani yo a šomago ka mafolofolo a ka se fapošwe ke mediro ya motseng. Bophelo bja gagwe le maphelo a ba bangwe a ithekgile ka go dula ga gagwe a ikemišeditše go phetha ditaelo tša tona ya gagwe. Bjalo ka mohlabani yo a lego ka tlase ga tlhahlo ya Kriste, o swanetše go ba le kgopolo e tsepamego ka mo go swanago gomme o pheme go itata ka mediro e sa nyakegego ya dilo tše di bonagalago yeo e ka go thibelago go phetha tirelo ya gago ka botlalo yeo e phološago maphelo.—Mateo 6:24; 1 Timotheo 4:16; 2 Timotheo 4:2, 5.

¹⁹ Go e na le go ipeela pakane ya go phela bophelo bja boiketlo, hlagolela moya wa boikgafo. “Ikemišetše go phela bophelo bjo se nago boiketlo, bjalo ka yo mongwe wa bahlabani ba Kriste Jesu.” (2 Timotheo 2:3, The English Bible in Basic English) Ge a be a sepela le Paulo, Timotheo o ile a ithuta sephiri sa go kgotsofala gaešita le ka tlase ga maemo a thata kudu. (Bafilipi 4:11, 12; 1 Timotheo 6:6-8) Le wena o ka dira seo se swanago. Na o ikemišeditše go ikgafa ka baka la Mmušo?

Ditšhegofatšo Gona Bjale le Nakong e Tlago

20, 21. (a) Hlalosa tše dingwe tša ditšhegofatšo tšeo di tlišwago ke go phegelela dipakane tša moya. (b) Ke’ng seo o ikemišeditšego go se dira?

²⁰ Timotheo o šomile gotee le Paulo ka nywaga e ka bago e 15. Timotheo o ile a bona ka boyena go hlongwa ga diphuthego tše difsa ge ditaba tše dibotse di be di phatlalala mo e nyakilego go ba tikologong ka moka ya ka leboa la Mediterranean. Bophelo bja gagwe e be e le bjo bo kgahlišago kudu le bjo bo kgotsofatšago go feta kamoo bo bego bo tla ba ka gona ge nkabe a be a sa kgetha go phela bophelo bjo go thwego ke bjo bo tlwaelegilego. (2 Bakorinthe 11:26, 27) Ka go phegelela dipakane tša moya, le wena o tla hwetša meputso e bohlokwa kudu ya moya. O tla batamela kgaufsi le Jehofa gomme wa ratwa le go hlompšha ke Bakriste-gotee. Go e na le go kwa bohloko le go gakanega moo go tlišwago ke go phegelela dilo tše di bonagalago, o tla ba le lethabo la kgonthe leo le tlišwago ke go nea mo go se nago boithati. Se bohlokwa le go feta, o tla ‘swarelela ka go tia bophelong bja kgonthe’—bophelo bjo bo sa felego lefaseng la paradeise.—1 Timotheo 6:9, 10, 17-19; Ditiro 20:35.

²¹ Ka gona ge e le gore ga se wa hlwa o dira bjalo, re go kgothaletša ka borutho gore o thome le semeetseng go itlwaetša boineelo go Modimo e le se o ikemišeditšego sona. Batamela kgaufsi le batho ba ka phuthegong bao ba ka go thušago go phegelela dipakane tša moya gomme o tsome tlhahlo ya bona. Etiša pele thuto ya motho ka noši ya Lentšu la Modimo. Ikemišetše go ganetša moya wa go rata dilo tše di bonagalago wa lefase le. Gomme o dule o gopola gore Modimo “yo a re neago dilo tšohle ka mo go humilego gore re ipshine ka tšona” o go holofetša gore o ka hwetša ditšhegofatšo tše di humilego gona bjale le nakong e tlago ge e ba o kgetha dipakane tšeo di mo godišago.—1 Timotheo 6:17.

[Mengwalo ya ka tlase]

Na o a Gopola?

• Bafsa ba ka hwetša thušo kae gore ba phegelele dipakane tša moya?

• Ke ka baka la’ng go ithuta Beibele ka kelohloko go le bohlokwa gakaakaa?

• Bafsa ba ka ganetša bjang tutuetšo ya dilo tše di bonagalago ya lefase le?

• Go tsoma dipakane tša moya go na le mehola efe?

[Dipotšišo tša Thuto]

[Seswantšho go letlakala 24]

Timotheo o ile a phegelela dipakane tše dibotse

[Seswantšho go letlakala 25]

Ke ditutuetšo dife tše di holago tšeo di ilego tša thuša Timotheo?

[Seswantšho go letlakala 26]

Na o phegelela dipakane tša moya?