Di Bohlokwa Kudu go Feta go Tseba Boemo bja Leratadima

MO E ka bago ditšhaba ka moka di na le diema tša mabapi le boemo bja leratadima: Leratadima le le hwibitšego bošego le thabiša mosesiši; lefaufau le hwibitše, mosesiši phafoga. Ditsebi tša boemo bja leratadima lehono di nea mabaka ao a ithekgilego ka maemo a gore boemo bja leratadima bo ka fetoga go etša ge seema se se bolela.

Mehleng ya Jesu, batho le bona ba be ba e-na le motlwae wa go ithuta ka leratadima le go hlatholla ponagalo ya lona. Jesu o boditše Bajuda ba bangwe gore: “Ge e e-ba mantšiboa le tlwaetše go re, ‘Go tla sa gabotse, gobane leratadima le hwibitše wa mollo’; gomme mesong le re, ‘Go tla tonya, gwa na pula lehono, gobane leratadima le hwibitše wa mollo, eupša le lebelelega le fsifetše.’ Le tseba go hlatholla ponagalo ya leratadima, eupša . . . ” Eupša eng? Jesu o ile a tšwela pele a bolela mantšu a makatšago, a re: “Dipontšho tša mehla ga le kgone go di hlatholla.”—Mateo 16:2, 3.

‘Dipontšho tše tša mehla’ e be e le eng? E be e le dilo tše dintši tše di lego molaleng tšeo di bontšhago gore Jesu e be e le Mesia wa kgonthe yo a romilwego ke Modimo. Ditiro tša gagwe di be di bonagala gabotse go swana le go hubala ga leratadima. Lega go le bjalo, bontši bja Bajuda bo ile bja hlokomologa dipontšho tšeo di bego di bontšha gore Mesia o tlile—tiragalo e bohlokwa kudu go feta boemo bja leratadima.

Le lehono, go na le pontšho yeo go lego bohlokwa kudu go e kwešiša go feta mmala wa leratadima. Jesu o boletše e sa le pele gore lefase le le kgopo le be le tla fedišwa e le gore go thome lefase le kaone. O ile a bolela ditiragalo tše mmalwa tšeo ka moka di bego di tla bontšha ge phetogo ye e le kgaufsi le go direga. Gare ga tšona, ke dintwa tša lefase ka bophara le ditlala. Jesu o itše ge dilo tše di bonwa, nako ya gore Modimo a tsene ditaba gare e kgaufsi.—Mateo 24:3-21.

Na o bona “dipontšho tša mehla”?