O se ke wa Aroganya Seo Modimo a se Tlemagantšego Jokong

“Ga e sa le ba babedi, eupša ke nama e tee. Ka baka leo, se Modimo a se tlemagantšego jokong go se be le motho yo a se aroganyago.”—MATEO 19:6.

1, 2. Ke ka baka la’ng e le ga Mangwalo le mo go kwagalago gore banyalani ba letele go ba le mathata ka dinako tše dingwe?

AKANYA o ikemišeditše go tšea leeto le letelele ka koloi. Na o tla kopana le mathata tseleng? Go nagana gore go ka se be bjalo e tla ba ga bošilo! Ka mohlala, o ka lebeletšana le maemo a sa kgahlišego a leratadima, ao a tlago go go dira gore o fokotše lebelo le go sepela ka šedi. Lebakeng le lengwe, koloi ya gago e ka no ba le bothata bjoo wena o ka se kgonego go bo lokiša, bjoo bo ka nyakago gore o emiše koloi ka thoko ga tsela le go tsoma thušo. Na maemo a bjalo a swanetše go go dira gore o phethe ka gore go tšea leeto leo ke phošo le gore o swanetše go lahla koloi yeo? Aowa. Ge o tšea leeto le letelele, o lebeletše go kopana le mathata le go tsoma ka bohlale ditsela tša go a rarolla.

² Seo ke therešo le ka lenyalo. Mathata ga a phemege, gomme e tla ba ga bošilo gore bao ba naganago go nyalana ba lebelele gore ba tla dula ba thabile. Go 1 Bakorinthe 7:28, Beibele e bolela ka go lebanya gore banna le basadi bao ba lego lenyalong ba tla ba le “tlaišego nameng.” Ke ka baka la’ng go le bjalo? Ge e bewa ka go lebanya, ke ka gobane banna le basadi ba ba lego lenyalong ga se ba phethagala le gona re phela ‘dinakong tše di hlobaetšago tšeo go lego thata go lebeletšana le tšona.’ (2 Timotheo 3:1; Baroma 3:23) Ka baka leo, gaešita le balekane bao ba swanetšanago le ba nago le pono ya Modimo ka dilo, ba tla lebeletšana le mathata ka dinako tše dingwe.

3. (a) Batho ba bantši lefaseng ba lebelela lenyalo bjang? (b) Ke ka baka la’ng Bakriste ba katanela go boloka manyalo a bona?

³ Lefaseng la lehono ge balekane ba bangwe ba kopana le mathata, karabelo ya bona ya pele ke go kgaotša lenyalo. Dinageng tše dintši, tlhalo e oketšega go feta le ge e le neng pele. Lega go le bjalo, Bakriste ba therešo ba rarolla mathata go e-na le go a tšhabela. Ka baka la’ng? Ka gobane ba lebelela lenyalo e le mpho e kgethwa e tšwago go Jehofa. Jesu o boletše mabapi le banyalani gore: “Se Modimo a se tlemagantšego jokong go se be le motho yo a se aroganyago.” (Mateo 19:6) Ke therešo gore ga se ka mehla go phela ka tekanyetšo yeo go lego bonolo. Ka mohlala, ba leloko le ba bangwe—go akaretša le baeletši ba manyalo—bao ba sa tsebego melao ya motheo ya Beibele gantši ba kgothaletša banyalani go arogana goba go hlalana mo go sego gwa thewa mangwalong. * Eupša Bakriste ba a tseba gore go kaone kudu go rarolla mathata lenyalong le go le boloka, go e na le go fo kitimela go le fediša. Ee, go bohlokwa go ikemišetša go dira dilo ka tsela ya Jehofa di sa tloga fase—e sego go ya ka keletšo ya ba bangwe.—Diema 14:12.

Go Fenya Mathata

4, 5. (a) Ke mathata afe ao a swanetšego go rarollwa lenyalong? (b) Ke ka baka la’ng melao ya motheo yeo e lego ka Lentšung la Modimo e šoma e le ka kgonthe gaešita le ge mathata a tsoga lenyalong?

⁴ Taba ke gore lenyalo le lengwe le le lengwe le nyaka tlhokomelo nako le nako. Mabakeng a mantši, seo se tla akaretša go rarolla go se kwešišane mo go nyenyane. Lega go le bjalo, manyalong a mangwe go ka ba le mathata a magolo kudu ao a ka beago motheo wa tswalano yeo kotsing.  Ka dinako tše dingwe, go ka nyakega gore o kgopele thušo go mogolo yo a nyetšego wa Mokriste yo a nago le phihlelo. Lega go le bjalo, maemo a ga a re gore go padile ka lenyalo la lena. A fo ba a gatelela bohlokwa bja go diriša melao ya motheo ya Beibele ge go rarollwa mathata.

⁵ Ka ge Jehofa e le Mmopi wa moloko wa batho le Mothomi wa lenyalo, o tseba go feta le ge e le mang seo re se nyakago e le gore re ka ba le tswalano ya lenyalo e atlegilego. Potšišo ke gore, Na re tla theetša keletšo e hwetšwago ka Lentšung la gagwe le go e diriša? Ruri re tla holega ge e ba re dira bjalo. Jehofa o boditše batho ba gagwe ba bogologolo gore: “Mola O ka be O theeditše xe ke Xo laêla, moláô wa xaxo o ka be o swana le noka, xo loka xa xaxo xo ka be xo etša maphoto a lewatlê.” (Jesaya 48:18) Go kgomarela tlhahlo yeo e lego ka Beibeleng go ka dira gore lenyalo le atlege. Sa pele a re eleng hloko keletšo yeo Beibele e e neago banna bao ba lego lenyalong.

“Tšwelang Pele le Rata Basadi ba Lena”

6. Mangwalo a eletša banna bjang?

⁶ Lengwalo la moapostola Paulo le le yago go Baefeso le hupere tlhahlo e kwagalago e yago go banna. Paulo o ngwadile gore: “Banna, tšwelang pele le rata basadi ba lena go etša ge Kriste le yena a ratile phuthego gomme a ikgafela yona. Ka tsela ye banna ba swanetše go rata basadi ba bona bjalo ka mebele ya bona. Yo a ratago mosadi wa gagwe o a ithata, gobane ga go na motho yo a kilego a hloya nama ya gagwe; eupša o a e fepa le go e babalela, go etša ge Kriste le yena a dira phuthego bjalo. Lega go le bjalo, gape yo mongwe le yo mongwe wa lena ka noši a rate mosadi wa gagwe bjalo ka ge a ithata.”—Baefeso 5:25, 28, 29, 33.

7. (a) Ke’ng seo e swanetšego go ba karolo ya motheo wa lenyalo la Bakriste? (b) Banna ba tšwela pele bjang ba rata basadi ba bona?

⁷ Paulo ga a bolele ka bothata bjo bongwe le bjo bongwe bjoo bo ka rotogago magareng ga monna le mosadi bao ba lego lenyalong. Go e na le moo, o bolela ka mothopo wa taba ka go šupa seo e swanetšego go ba karolo e kgolo ya motheo wa lenyalo le lengwe le le lengwe la Bakriste—lerato. Ge e le gabotse, go bolelwa ga tshela ka lerato ditemaneng tše tša ka mo godimo. Ela hloko gape gore Paulo o botša banna gore: “Tšwelang pele le rata basadi ba lena.” Ka ntle le pelaelo, Paulo o ile a lemoga gore go thoma go rata motho go be go tla ba bonolo kudu go feta go dula o rata motho. Se se bjalo kudu-kudu mo “mehleng ya bofelo,” ge ba bantši e le “baithati” le “ba ba sa ikemišetšago go amogela tumelelano le ge e le efe.” (2 Timotheo 3:1-3) Dika tše bjalo tše di sa kgahlišego di senya manyalo a mantši lehono, eupša monna yo a nago le lerato a ka se dumelele mekgwa ya lefase ya boithati e tutuetša monagano wa gagwe le ditiro tša gagwe.—Baroma 12:2.

O ka Hlokomela Mosadi wa Gago Bjang?

8, 9. Monna wa Mokriste o hlokomela mosadi wa gagwe ka ditsela dife?

⁸ Ge e le gore o monna wa  Mokriste yo a lego lenyalong, o ka ganetša bjang ditshekamelo tša boithati gomme wa bontšha mosadi wa gago lerato la kgonthe? Mantšung a gagwe a yago go Baefeso ao a tsopotšwego pejana, Paulo o bontšhitše dilo tše pedi tšeo o swanetšego go di dira—hlokomela mosadi wa gago, gomme o mmabalele bjalo ka mmele wa gago. O ka hlokomela molekane wa gago bjang? Tsela e nngwe ke ka dilo tše di bonagalago—go hlokomela dinyakwa tša mosadi wa gago tša nama. Paulo o ngwaletše Timotheo gore: “Ka kgonthe ge e ba motho a sa babalele bao e lego ba gabo, kudu-kudu ditho tša ntlo ya gagwe, o latotše tumelo gomme ke yo mobe go feta motho yo a se nago tumelo.”—1 Timotheo 5:8.

⁹ Lega go le bjalo, go na le dilo tše dintši tšeo di akaretšwago go feta go fo mo hlokomela ka dijo, diaparo le bodulo. Ka baka la’ng? Ka gobane monna a ka kgona go hlokomela dinyakwa tša mosadi wa gagwe tša dilo tše di bonagalago gomme a palelwa ke go mo kgotsofatša maikwelong le moyeng. Go mo hlokomela dinyakweng tše go sa tšwago go bolelwa ka tšona go bohlokwa. Ke therešo gore banna ba bantši ba Bakriste ba swaregile kudu ka go hlokomela dilo tšeo di sepedišanago le phuthego. Eupša go ba le boikarabelo bjo bontši ka phuthegong ga go re gore monna o swanetše go hlokomologa go phethagatša ditaelo tšeo a di filwego ke Modimo bjalo ka hlogo ya lapa. (1 Timotheo 3:5, 12) Ge o be o bolela ka taba ye, makasine wo o boletše nywageng e fetilego gore: “Ka go dumelelana le melao ya Beibele, go ka bolelwa gore ‘bodiši bo thoma ka gae.’ Ge e ba mogolo a hlokomologa lapa la gagwe, a ka bea go kgethwa ga gagwe kotsing.” * Ke mo go kwagalago gore o gapeletšega go hlokomela mosadi wa gago—nameng, maikwelong gomme go feta tšohle, moyeng.

Go Babalela Mosadi wa Gago go Bolela’ng?

10. Monna a ka babalela mosadi wa gagwe bjang?

¹⁰ Ge o babalela mosadi wa gago, o mo hlokomela gabotse ka gobane o mo rata. Go na le ditsela tše dintši tšeo o ka dirago se ka tšona. Sa pele, fetša nako e lekanego le molekane wa gago. Ge e ba o hlokomologa mosadi wa gago tabeng ye, lerato leo a go ratago ka lona le ka fola. Le gona, ela hloko gore seo o naganago gore mosadi wa gago o a se nyaka ge e le mabapi le nako le go elwa hloko, e ka no se be seo a se nyakago. Ga se taba ya go fo re o babalela molekane wa gago. Mosadi wa gago o swanetše go ikwa a babalelwa. Paulo o ngwadile gore: “Anke yo mongwe le yo mongwe a tšwele pele a tsoma, e sego seo se holago yena a nnoši, eupša seo se holago motho yo mongwe.” (1 Bakorinthe 10:24) Bjalo ka monna yo lerato, o swanetše go kgonthišetša gore o tseba seo ge e le gabotse mosadi wa gago a se nyakago.—Bafilipi 2:4.

11. Tswalano ya monna le Modimo gotee le phuthego e kgongwa bjang ke tsela yeo a swarago mosadi wa gagwe ka yona?

¹¹ Tsela e nngwe yeo o ka bontšhago ka yona gore o babalela mosadi wa gago ke ka go mo swara ka tsela e borutho, bobedi ka dipolelo le ka ditiro. (Diema 12:18) Paulo o ngwaletše Bakolose  gore: “Lena banna, tšwelang pele le rata basadi ba lena gomme le se ke la ba galefela o šoro.” (Bakolose 3:19) Go ya ka puku e nngwe, karolo ya mafelelo ya mantšu a Paulo e ka bewa ka seka-polelo gore “o se ke wa mo swara bjalo ka moledi” goba “o se ke wa mo dira lekgoba.” Monna yo e lego mphenyašilo—e ka ba ka sephiring goba phatlalatša—ruri ga a bontšhe gore o babalela mosadi wa gagwe. Ka go swara mosadi wa gagwe makgwakgwa, a ka kgoma tswalano ya gagwe le Modimo. Moapostola Petro o ngwaletše banna gore: “Tšwelang pele le dula le [basadi ba lena] ka mokgwa wo o swanago go ya ka tsebo, le ba nea kgodišo go etša sebjana se fokolago, se setshadi, ka ge le bile le le bajabohwa le bona ba kgaugelo e sa swanelego ya bophelo, e le gore dithapelo tša lena di se ke tša šitišwa.” *—1 Petro 3:7.

12. Ke’ng seo monna wa Mokriste a ka ithutago sona tseleng yeo Jesu a ilego a swara phuthego ya Bokriste ka yona?

¹² O se ke wa tšeela lerato la mosadi wa gago fase. Mo kgonthišetše gore o tla dula o mo rata. Jesu o beetše banna ba Bakriste mohlala ka tsela yeo a ilego a swara phuthego ya Bokriste ka yona. O be a le bonolo, botho e bile e le yo a lebalelago—gaešita le ge balatedi ba gagwe ba be ba bonagatša dika tše di sa kgahlišego leboelela. Ka baka leo, Jesu o be a ka botša ba bangwe gore: “Tlang go nna, . . .gobane ke wa moya o boleta e bile ke wa pelo e ikokobeditšego, gomme le tla hweletša meoya ya lena tapologo.” (Mateo 11:28, 29) Ka go ekiša Jesu, monna wa Mokriste o swara mosadi wa gagwe go swana le kamoo Jesu a ilego a swara phuthego. Monna yoo a babalelago mosadi wa gagwe e le ka kgonthe, a bontšha se ka mantšu le mediro, ruri o tla ba mothopo wa gagwe wa tapologo.

Basadi Bao ba Phelago ka Melao ya Motheo ya Beibele

13. Beibele e hupere melao efe ya motheo yeo e ka thušago basadi?

¹³ Beibele gape e hupere melao ya motheo yeo e ka thušago basadi. Baefeso 5:22-24, 33 e re: “Basadi ba ikokobeletše banna ba bona go etša ge ba ikokobeletša Morena, gobane monna ke hlogo ya mosadi wa gagwe go etša ge Kriste le yena e le hlogo ya phuthego, e le yena mophološi wa mmele wo. Ge e le gabotse, go etša ge phuthego e ikokobeletša Kriste, basadi le bona ba ikokobeletše banna ba bona dilong tšohle. . . . Mosadi o swanetše go ba le tlhompho e tseneletšego go monna wa gagwe.”

14. Ke ka baka la’ng molao wa motheo wa Mangwalo wa mabapi le boikokobetšo e le o sa nyakego mo gontši go basadi?

¹⁴ Ela hloko kamoo Paulo a gateletšego ka gona boikokobetšo le tlhompho. Mosadi o gopotšwa gore a ikokobeletše monna wa gagwe. Se se dumelelana le tokišetšo ya Modimo. Diphedi ka moka legodimong le lefaseng di na le yoo di ikokobeletšago yena. Gaešita le Jesu o ikokobeletša Jehofa Modimo. (1 Bakorinthe 11:3) Ke therešo gore monna yoo a dirišago bohlogo bja gagwe ka tsela e nepagetšego o tla dira gore mosadi wa gagwe a nolofalelwe ke go dula a ikokobeletša yena.

15. Beibele e hupere keletšo efe e nngwe yeo e yago go basadi bao ba nyetšwego?

¹⁵ Paulo gape o boletše gore mosadi “o swanetše go ba le tlhompho e tseneletšego go monna wa gagwe.” Mosadi yo a nyetšwego wa Mokriste o swanetše go bonagatša “moya o homotšego le  o boleta,” gomme a se ke a hlohla monna wa gagwe ka manganga goba a dira dilo ka tsela yeo go ratago yena. (1 Petro 3:4) Mosadi yo a boifago Modimo o šoma ka thata go hola lapa le go hlompha hlogo ya gagwe. (Tito 2:4, 5) O tla katanela go bolela gabotse ka monna wa gagwe gomme ka go rialo a se dire selo seo se ka dirago gore batho ba bangwe ba nyatše monna wa gagwe. Gape o tla šoma ka thata go dira gore diphetho tša monna wa gagwe di atlege.—Diema 14:1.

16. Basadi ba nyetšwego ba Bakriste ba ka ithuta’ng mohlaleng wa Sara le wa Rebeka?

¹⁶ Go ba le moya o homotšego le o boleta ga go re gore mosadi wa Mokriste ga a na tsela yeo a bonago dilo ka yona goba gore dikgopolo tša gagwe ga di bohlokwa. Basadi ba boifago Modimo ba bogologolo, ba bjalo ka Sara le Rebeka, ba ile ba gata mogato wa pele wa go bolela ka ditaba tšeo di ba tshwenyago, gomme Beibele e bega gore Jehofa o ile a kwana le ditiro tša bona. (Genesi 21:8-12; 27:46–28:4) Basadi ba Bakriste le bona ba ka bolela maikwelo a bona. Lega go le bjalo, ba swanetše go dira bjalo ka tsela e bontšhago go naganela, e sego ka segalo seo se nago le lenyatšo. Ba ka lemoga gore poledišano e bjalo e tla ba e kgahlišago le e šomago.

Tema e Kgathwago ke Boitlamo

17, 18. Ke ditsela dife tše dingwe tšeo ka tšona banna le basadi bao ba lego lenyalong ba ka ganetšago maiteko a Sathane a go senya tlemo ya lenyalo?

¹⁷ Lenyalo ke tlemo ya bophelo ka moka. Ka baka leo, monna le mosadi ba swanetše go tloga ba kganyoga go atlegiša lenyalo la bona. Go se boledišane ka bolokologi go ka mpefatša mathata le go feta. Gantši kudu, banyalani ba kgaotša go boledišana ge mathata a rotoga gomme mafelelo ya ba sekgopi. Balekane ba bangwe ba nyaka le ditsela tša go kgaotša tswalano ye, mohlomongwe ka go thoma go rata bao ba sego ba nyalana le bona. Jesu o lemošitše ka gore: “Yo mongwe le yo mongwe yo a tšwelago pele a lebeletše mosadi e le gore a mo kganyoge o šetše a hlotlotše le yena pelong ya gagwe.”—Mateo 5:28.

¹⁸ Moapostola Paulo o eleditše Bakriste ka moka go akaretša le banyalani ba Bakriste gore: “Galefang, eupša le se ke la dira sebe; letšatši le se ke la sobela le galefile, le gona le se ke la nea Diabolo sebaka.” (Baefeso 4:26, 27) Lenaba la rena le legolo e lego Sathane, le nyaka go ikhola ka diphapano tšeo di bago gona magareng ga Bakriste. Le se ke la mo dumelela a atlega! Ge mathata a rotoga, dirang nyakišišo ya kamoo Jehofa a ikwago ka gona ka maemo, le diriša dikgatišo tše di theilwego Beibeleng. Bolelang ka mathata ao ka moya wa tlase le ka potego. Dumelelanyang ditiro tša lena le melao ya motheo ya Jehofa. (Jakobo 1:22-25) Ge go tliwa lenyalong la lena, ikemišetšeng go tšwela pele le sepela le Jehofa bjalo ka banyalani, gomme le se ke la dumelela motho le ge e le ofe goba selo le ge e le sefe se kgaoganya seo a se tlemagantšego jokong!—Mika 6:8.

[Mengwalo ya ka tlase]

Na o a Gopola?

• Ke ka baka la’ng gaešita le manyalo a Bakriste a ka bago le mathata?

• Monna a ka hlokomela mosadi wa gagwe le go bontšha go mmabalela bjang?

• Mosadi a ka dira’ng go bontšha gore o hlompha monna wa gagwe ka mo go tseneletšego?

• Monna le mosadi ba ka matlafatša tlemo ya bona bjang?

[Dipotšišo tša Thuto]

[Seswantšho go letlakala 20]

Monna o swanetše go hlokomela mosadi wa gagwe gabotse, e sego feela nameng, eupša gape le moyeng

[Seswantšho go letlakala 21]

Monna yo a babalelago mosadi wa gagwe ke mothopo wa gagwe wa tapologo

[Seswantšho go letlakala 23]

Basadi ba Bakriste bao ba lego lenyalong ba bolela kamoo ba ikwago ka gona ka tsela e bontšhago tlhompho