Na o a Gopola?

Na o thabetše go bala ditokollo tša morago bjale tša Morokami? Ge e ba go le bjalo, bona ge e ba o ka kgona go araba dipotšišo tše di latelago:

• Mangwalo a Bakriste a Segerika a diriša lentšu “phuthego” ka ditsela dife tše nne?

Tirišo ya motheo ya lentšu le ke go Bakriste ba tloditšwego e le sehlopha (ditemaneng tše dingwe Kriste o a akaretšwa). Ka dinako tše dingwe, “phuthego ya Modimo” e šupa go Bakriste bao ba phelago ka nako e itšego. Tirišo ya boraro e šupa go Bakriste ka moka lefelong le itšego. Mafelelong, lentšu le le ka dirišwa go šupa bao ba bopago phuthego e tee feela ya lefelong le itšego.—4/15, matlakala 21-3.

• Go kgethwa ga Bakriste gore ba be le kholofelo ya go phela legodimong go fela neng?

Beibele ga e nee karabo e lebanyago. Go kgethwa moo go thomile ka 33 C.E. gomme go tšwela pele le mehleng yeno. Ka morago ga 1935 go ba mafolofolo modirong wa go dira barutiwa go ile gwa feleletša ka go kgoboketšwa ga lešaba le legolo. Ba bangwe ba bao ba kolobeditšwego ka morago ga 1935 ba ile ba hlatselwa ke moya o mokgethwa gore ba na le kholofelo ya go phela legodimong, ka gona re ka se kgone go bea letšatši le le lebanego la go fela ga go bitšwa moo. Batlotšwa ba kgonthe ga ba na moya wa Modimo o montši kudu, e bile ga ba inyakele tlhokomelo e kgethegilego. Go sa šetšwe gore ba na le kholofelo efe, Bakriste ka moka ba swanetše go botega le go dula ba dira thato ya Modimo.—5/1, matlakala 30-1.

• Na Jefeta o be a ikemišeditše go direla Modimo sehlabelo ka morwedi’agwe, ge a be a dira keno?

Aowa. Jefeta o be a e-ra gore o tla neela motho yo a bego a tla gahlana le yena tirelong ya Modimo feela, e lego e nngwe ya ditokišetšo tša Molao wa Moše. (1 Samuele 2:22) Go dira ka go dumelelana le keno yeo, morwedi’a Jefeta o ile a dula a hlankela tabarenakeleng, e lego sehlabelo se segolo ka gobane se be se bolela gore o be a ka se tsoge a nyetšwe.—5/15, matlakala 9-10.

• Codex e kgathile tema efe Bokristeng bja pele?

Go bonala Bakriste ba be ba diriša kudu lengwalo la go phuthwa bonyenyane go fihla mo e ka bago mafelelong a lekgolo la pele la nywaga C.E. Lekgolong le le latetšego la nywaga, go ile gwa ba le kgohlano magareng ga baemedi ba codex le ba lengwalo la go phuthwa. Ditsebi di dumela gore go diriša ga Bakriste codex go kgathile tema e bohlokwa go amogelweng ga yona ke batho ba bantši.—6/1, matlakala 14-15.

• Tšhupamabaka ya Getsere ke eng?

Ke letlapa le lenyenyane la phaphathi la motaga leo le utolotšwego ka 1908 ka thoko ga motse wa Getsere. Ba bantši ba nagana gore letlapa leo ke mošomo wa gae wa ngwana wa sekolo. Phaphathi yeo e na le phetolelo e nolofaditšwego ya ngwaga wa temo, goba modikologo, woo o bego o thoma ka puno kgweding yeo e sepedišanago le September/October, e bile e bolela ka dimela tše di fapa-fapanego le mediro ya temo.—6/15, letlakala 8.

• Go dira sebe kgahlanong le moya o mokgethwa go bolela’ng?

Go dira sebe kgahlanong le moya o mokgethwa wa Jehofa go a kgonega, e lego sebe se se ka se lebalelwego. (Mateo 12:31) Modimo ke yena yoo a bonago ge e ba re dirile sebe se se sa lebalelwego, gomme a ka re amoga moya wa gagwe. (Psalme 51:11) Ge e ba sebe se re swabiša e le ruri, seo se bontšha gore re ka ba re itshola e le ka kgonthe gomme ka go rialo ga se ra dira sebe kgahlanong le moya.—7/15, matlakala 16-17.

• Ke ka baka la’ng Kgoši Saulo a ile a botšiša Dafida gore ke morwa wa mang, mola a ile a dirišana le Dafida peleng? (1 Samuele 16:22; 17:58)

Saulo o be a sa fo nyaka go tseba leina la tatago Dafida. Ka ge a be a bone gore Dafida e be e le motho yo a nago le tumelo le sebete yoo a bego a sa tšwa go fenya Goliata, Saulo o be a nyaka go tseba mohuta wa motho yo a godišitšego mošemane yo. Saulo a ka be a be a naganne ka go tsenya Isai goba yo mongwe wa ditho tša lapa la gagwe madireng a ntwa.—8/1, letlakala 31.