“Nteke, Jehofa”

“MO-LEKA-PELO ké Morêna.” (Diema 17:3) Ka moka ga rena re swanetše go tloga re kgothatšwa ke seo. Ka baka la’ng? Gobane ka go se swane le batho bao ba ahlolago feela ka seo ba se bonago ka mahlo, Tatago rena wa legodimong “ó bôna pelo.”—1 Samuele 16:7.

Ge e le gabotse, gaešita le rena re palelwa ke go fo hlahloba maikemišetšo a rena le ditshekamelo tša rena tša ka gare-gare gakaone. Ka baka la’ng? Ka gobane ‘pelo ya rena ke yona mmata-mano-mabe, ke yona lešaedi; e hlathwa ke mang?’ Lega go le bjalo, Modimo o a e tseba, ka gobane o boletše gore: “E hlathwa ke Nna Morêna, ke fêtlaxo letswalô [dipshio, PK].” (Jeremia 17:9, 10) Ee, Jehofa o kwešiša “pelo”—go akaretša le maikemišetšo a rena a ka gare-gare—gotee le “dipshio,” e lego dikgopolo le maikwelo a rena a ka gare-gare.

Ke ka Baka La’ng ba Lekwa?

Ka gona, ga go makatše ge Kgoši Dafida wa bogologolo a ile a botša Modimo gore: “Nteke, Jehofa, gomme o ntsomešeše, sekiša dipshio tša-ka le pelo ya-ka.” (Psalme 26:2, PK) Na ditiro le dipolelo tša Dafida di be di hlwekile ka mo go feletšego, moo a bego a ka se boife selo ge Jehofa a be a mo leka? Ga go bjalo le gatee! Dafida, go swana le rena, o be a se a phethagala e bile o be a sa kgone go latela ditekanyetšo tša Modimo ka mo go phethagetšego. Ka baka la mafokodi a gagwe, Dafida o ile a dira diphošo tše mmalwa tše dikgolo, eupša lega go le bjalo o ile a ‘sepela ka pelo-bolo.’ (1 Dikxoši 9:4) Bjang? Ka go amogela tsholo le ka go lokiša tsela ya gagwe. Ka go rialo o ile a bontšha gore o be a rata Jehofa e le ka kgonthe. O be a ineetše go Jehofa ka mo go feletšego.

Go thwe’ng ka rena lehono? Jehofa o tseba gore ga ra phethagala le gore re ka dira sebe ka polelo le ka ditiro. Lega go le bjalo, ga a diriše bokgoni bja gagwe bja go tseba bokamoso bja rena e sa le pele go re direla phetho ya gore re phele bjang. O re bopile re e-na le tokologo ya boikgethelo, gomme o hlompha tokologo ya rena—mpho yeo a re filego yona ka botho.

Lega go le bjalo, ka dinako tše dingwe Jehofa o leka motho yoo re lego yena ka gare ka tsela e itšego, go akaretša le maikemišetšo a rena. A ka dira se ka go re dumelela go utolla boemo bja pelo ya rena. Gape, a ka dumelela maemo a fapa-fapanego goba ditlhohlo go utolla ditshekamelo tša rena tša ka gare-gare. Se se re fa sebaka sa go bontšha Jehofa kamoo re ineetšego ka gona le go mmotegela ka go se kwanantšhe. Diteko tše bjalo tšeo di dumeletšwego ke Jehofa di ka bontšha gore tumelo ya rena e tiile gakaakang, ge e ba re le “ba feletšego le ba hlaphogetšwego dilong ka moka, le [ba] sa [hlokego] selo.”—Jakobo 1:2-4.

Teko ya Bogologolo ya Tumelo

Diteko tša go leka tumelo le maikemišetšo ga se tšeo bahlanka ba Jehofa ba sa di tsebego. Ela hloko mopatriareka Aborahama. “Modimo ó lekile Aborahama.” (Genesi 22:1) Ge mantšu ao a be a bolelwa, tumelo ya Aborahama go Modimo e be e šetše e lekilwe. Nywaga-some pele ga moo, Jehofa o ile a kgopela Aborahama gore a huduge le lapa la gagwe motseng o atlegilego wa Uri go ya nageng yeo a sa e tsebego. (Genesi 11:31; Ditiro 7:2-4) Aborahama, yoo a ka bego a be a e-na le ngwako wa gagwe ka noši kua Uri, ga se a ka a reka lefelo la sa ruri la bodulo kua Kanana, e lego moo a ilego a phela  gona ka nywaga-some. (Baheberu 11:9) Boemo bja Aborahama bja go ba mohloka-šope bo ile bja bea yena le lapa la gagwe kotsing ya go welwa ke tlala, go hlaselwa ke dihlopha tša baitlhami le dikgoši tša baheitene tša lefelong leo. Nakong ye ka moka, tumelo ya Aborahama e ile ya itlhatsela e le e tiilego kudu.

Ke moka Jehofa o ile a leka Aborahama ka teko e kgolo kudu. “Tšea morwa wa xaxo e lexo o tee, yo O mo rataxo, yêna Isaka, . . . O mo dirê sehlabêlô.” (Genesi 22:2) Go Aborahama, Isaka e be e se morwa feela. E be e le morwa a nnoši wa Aborahama le mosadi wa gagwe, Sara. Isaka e be e le morwa wa kholofetšo, kholofelo e nnoši ya Aborahama ya gore “peu” ya gagwe e tla hwetša naga ya Kanana e le bohwa gomme ya ba tšhegofatšo go ba bantši, go ya ka kholofetšo ya Modimo. Ge e le gabotse, Isaka e be e le yena morwa yoo go bego go lebeletšwe gore Aborahama a be le yena, yoo a ilego a belegwa ka mohlolo o tšwago go Modimo!—Genesi 15:2-4, 7.

O ka akanya kamoo go bego go le thata ka gona gore Aborahama a kwešiše taelo ye. Na Jehofa ruri o be a ka kgopela go direlwa sehlabelo ka motho? Ke ka baka la’ng Jehofa a ile a dira gore Aborahama a thabele go ba le morwa botšofading bja gagwe e le feela gore a tle a mo kgopele go dira sehlabelo ka yena morwa yo? *

Aborahama o ile a kwa gaešita le ge a be a se na dikarabo tše di kwagalago tša dipotšišo tše. Go mo tšere matšatši a mararo gore a fihle thabeng yeo e bego e kgethilwe. O ile a aga aletare moo gomme a bea dikgong godimo ga yona. Bjale gwa fihla seremo sa teko. Aborahama o tšere thipa ya go bolaya, eupša ge a be a sa re o bolaya morwa wa gagwe, Jehofa o ile a mo thibela a diriša morongwa gomme a re: “Byale ke lemoxile xore O boifa Modimo, xomme xa wa ka wa xana xo nneêla morwa wa xaxo o tee eo.” (Genesi 22:3, 11, 12) Nagana gore Aborahama o ile a putswa ka mo go humilego gakaakang ka baka la go kwa moo! Tumelo yeo Jehofa a bego a nagana gore Aborahama o na le yona e be e le  therešo. (Genesi 15:5, 6) A le gona fao, Aborahama o dirile sehlabelo ka kgapa yeo e ilego ya tšeela Isaka legato. Ke moka Jehofa ile a tiišetša dikholofetšo tša kgwerano mabapi le peu ya Aborahama. Ka mo go kwešišegago, Aborahama o ile a tsebja e le mogwera wa Jehofa.—Genesi 22:13-18; Jakobo 2:21-23.

Tumelo ya Rena le Yona e a Lekwa

Ka moka re lemoga gore bahlanka ba Modimo lehono ba ka se kgone go tšhabela diteko. Lega go le bjalo, re ka ba re lekwa kudu ke seo Jehofa a dumelelago gore se direge go feta seo a re botšago gore re se dire.

Moapostola Paulo o ngwadile gore: “Bohle bao ba ratago go phela ka boineelo go Modimo tswalanong le Kriste Jesu le bona ba tla hlomarwa.” (2 Timotheo 3:12) Tlhomaro e bjalo e ka tšwa go bao o tsenago le bona sekolo, bagwera, ba leloko, baagišani, goba balaodi ba mmušo bao ba boditšwego maaka. E ka akaretša go gobošwa ka mantšu, mmeleng gotee le go šitišana le tsela ya Mokriste ya go iphediša. Bakriste ba therešo le bona ba lebeletšana le mathata ao a tlwaelegilego bathong—bolwetši, manyami le ditiro tša go hloka toka. Diteko tše bjalo ka moka di leka tumelo ya motho.

Moapostola Petro o gateletše mehola e tlišwago ke go lekwa ga tumelo ya motho ka gore: “Le kwešitšwe bohloko ke meleko e fapa-fapanego . . . e le gore boemo bjo bo lekilwego bja tumelo ya lena bja bohlokwa bjo bogolo kudu go feta gauta ye e onalago go sa šetšwe go lekwa ga yona ka mollo, bo ka hwetšwa e le lebaka la tumišo le la letago le la kgodišo kutollong ya Jesu Kriste.” (1 Petro 1:6, 7) Ee, mafelelo a diteko a swantšhwa le go hlwekišwa ga gauta ka mollo. Tlhwekišo e tšweletša seo se sekilego ya ba ya tloša ditšhila. Go direga bjalo le ka tumelo ya rena ge re lebeletšana le diteko.

Ka mohlala, kotsi ya senamelwa goba kotsi ya tlhago e ka feleletša ka mathata. Lega go le bjalo, bao ba nago le tumelo ya kgonthe ga ba belaele ka tsela e sa kwagalego. Ba homotšwa ke kgonthišetšo ya Jehofa e rego: “Le ka mohla nka se ke ka le tlogela le ge e le go le lahla.” (Baheberu 13:5) Ba tšwela pele ba etiša dilo tša moya pele, ba kgodišegile gore Jehofa Modimo o tla šegofatša maiteko a bona a go hwetša seo ba tlogago ba se tsoma. Tumelo ya bona e a ba matlafatša dinakong tša mathata le go ba phemiša go mpefatša boemo ka go tshwenyega go sa nyakege.

Taba ya gore diteko di ka utolla mafokodi a tumelo ya rena le yona e ka re hola ge e ba re bona gore go dira ditokišo go a nyakega. Motho o swanetše go ipotšiša gore: ‘Nka matlafatša tumelo ya-ka bjang? Na ke swanetše go fetša nako e oketšegilego ke ithuta le go naganišiša ka Lentšu la Modimo? Na ke diriša ka botlalo ditokišetšo tša go ba gona dibokeng le badumedi-gotee? Na ke ithekga ka matla a-ka mola ke swanetše go botša Jehofa Modimo dilo tšeo di ntshwenyago?’ Lega go le bjalo, boitlhahlobo bjo bjalo e fo ba e le mathomo-mayo.

Go matlafatša tumelo ya motho go ka nyaka gore motho a kaonefatše kganyogo ya gagwe ya dilo tša moya, a bontšhe “kganyogo ya go kganyoga mafsi a sa tswakwago a lentšu.” (1 Petro 2:2; Baheberu 5:12-14) Re swanetše go katanela go swana le monna yoo mopsalme a mo hlalositšego ka gore: “Sa xaxwe [ke] xo thabêla molaô wa Morêna, molaô woo a o akanya mosexare le bošexo.”—Psalme 1:2.

Se se tsoma gore go dirwe seo se fetago go fo bala Beibele. Go bohlokwa go nagana ka seo Lentšu la Modimo le re botšago sona le go diriša temošo yeo le e neago. (Jakobo 1:22-25) Mafelelong, lerato la rena la go rata Modimo le tla gola, dithapelo tša rena e tla ba tše di lebanyago  kudu le go ba tša motho ka noši, gomme tumelo ya rena go yena e tla tia le go feta.

Bohlokwa bja Tumelo e Lekilwego

Temogo ya gore tumelo ke senyakwa se segolo sa gore re amogelwe ke Modimo ke tšhušumetšo e matla ya go e matlafatša. Beibele e re gopotša gore: “Ka ntle le tumelo go kgahliša Modimo gabotse ga go kgonege, gobane yo a batamelago Modimo o swanetše go dumela gore o gona le gore e ba moputsi wa bao ba mo tsomago ka phišego.” (Baheberu 11:6) Ka baka leo, re swanetše go ikwa bjalo ka monna yoo a ilego a kgopela Jesu gore: “Nthuše moo ke hlokago tumelo!”—Mareka 9:24.

Go lekwa ga tumelo ya rena go ka thuša le ba bangwe. Ka mohlala, ge Mokriste a lahlegelwa ke yoo a mo ratago ka lehu, go ba ga gagwe le tumelo e tiilego kholofetšong ya Modimo ya tsogo go a mo matlafatša. O a lla, eupša ga a “[hlokofale] go etša ba bangwe ka moka ba se nago kholofelo.” (1 Bathesalonika 4:13, 14) Ba bangwe bao ba bonago matla a tiišago a tumelo ya Mokriste ba ka feleletša ba lemoga gore o na le selo se bohlokwa e le ka kgonthe. Se se ka dira gore ba be le kganyogo e tšwago pelong ya go ba le tumelo e swanago, go ba tutueletša go ithuta Lentšu la Modimo le go ba barutiwa ba Jesu Kriste.

Jehofa o a tseba gore tumelo e lekilwego e na le mohola o mogolo kudu. Go oketša moo, diteko tša tumelo di re kgontšha go bona ge e ba tumelo ya rena e e-na le matla. Re thušwa go lemoga mafokodi tumelong ya rena, le go re kgontšha go a lokiša. Mafelelong, go lebeletšana ga rena le diteko ka katlego go ka thuša ba bangwe gore e be barutiwa ba Jesu. Ka gona anke re direng seo re ka se kgonago go dula re e-na le tumelo e tiilego—tumelo yeo ka morago ga go lekwa e kago “hwetšwa e le lebaka la tumišo le la letago le la kgodišo kutollong ya Jesu Kriste.”—1 Petro 1:7.

[Mongwalo wa ka tlase]

[Mothopo wa Seswantšho go letlakala 12]

From the Illustrated Edition of the Holy Scriptures by Cassell, Petter, & Galpin

[Seswantšho go letlakala 13]

Mediro ya Aborahama ya tumelo e mo dirile mogwera wa Jehofa

[Diswantšho go letlakala 15]

Diteko di ka hlatsela gore tumelo ya rena e tiile e le ka kgonthe