Go Thabela “Phenyo le Kwana”

LENGWALONG leo a le ngwadilego ka 1971, Carey W. Barber o boletše ka nywaga ya gagwe e 50 ya mathomo ya tirelo ya gagwe go Modimo wa therešo gore: “Nywaga tirelong ya Jehofa e bile e mebotse ka tsela e sa tlwaelegago. Go gwerana le batho ba gagwe; go šireletšwa go badiradibe ba lefase la Sathane; tebelelo ya phenyo le Kwana, Jesu Kriste; le bohlatse bja lerato la Jehofa ge di kopana di tšweletša khutšo e kgahlišago le maikwelo a kgotsofalo ao a šireletšago dipelo le go nea kholofelo e kgonthišeditšwego ya phenyo ya mafelelo.”

Nywaga e tshela ka morago, Ngwanabo rena Barber, e lego Mokriste yo a tloditšwego ka moya, o ile a thoma go hlankela e le setho sa Sehlopha se Bušago sa Dihlatse tša Jehofa. Ge a hlankela moo, nywageng e 30 e latetšego, o ile a tšwela pele a lebeletše pele ‘phenyong le Kwana.’ O ile a fihlelela seo ka go dula a botega go fihlela ge a e-hwa a e-na le nywaga e 101 ka Sontaga, April 8, 2007.—1 Bakorinthe 15:57.

Carey Barber, yo a belegetšwego Engelane ka 1905, o ile a kolobetšwa kua Winnipeg, Canada, ka 1921. Nywaga e mebedi ka morago, yena le morwarragwe yo e lego lefahla, Norman, ba ile ba hudugela Brooklyn, New York, bakeng sa go yo thuša ka modiro o mofsa. Ka nako yeo, batho ba Jehofa ba be ba le kgaufsi le go tšweletša dipuku tša bona ka noši bakeng sa go tsebatša ditaba tše dibotse tša Mmušo “lefaseng ka moka le go agilwego go lona.” (Mateo 24:14) E nngwe ya dikabelo tša mathomo tša Ngwanabo rena Barber e be e le go šomiša motšhene o monyenyane wa go gatiša. Magareng ga dilo tšeo di bego di gatišwa go be go e-na le mangwalo a molao a melato yeo e bego e išwa Kgorong-Kgolo ya Tsheko ya United States. Ge nako e dutše e e-ya, Ngwanabo rena Barber o ile a thoma go šoma Lefapheng la Tirelo, a lebiša tlhokomelo ditabeng tša phuthego le modirong wa boboledi nageng ka moka.

Ka ge a be a e-na le phihlelo yeo, Ngwanabo rena Barber o be a swanelega gabotse ge ka 1948 a be a abelwa go ba modiredi wa mosepedi, a etela dikopano le diphuthego karolong ka moka ya ka bodikela bja United States. O ile a bolela gore o be a thabela kudu go ba ka ntle modirong wa go bolela phatlalatša. Kabelo ye e ile ya dira gore bana babo rena le dikgaetšedi ba bantši ba tsebe Ngwanabo rena Barber. Go dula ga gagwe a phafogile monaganong le go ba mafolofolo bodireding go ile gwa bonagala go e-na le mohola kudu ge ka morago a be a e-ya go tsena sehlopheng sa bo-26 sa Sekolo sa Beibele sa Watchtower sa Gilead. Sehleng sa sekolo, o ile a ratana le morutwana-gotee le yena yo a tšwago Canada, e lego Sydney Lee Brewer. Ka morago ga go aloga, ba ile ba nyalana gomme ba fetša matšatši a bona a maikhutšo a ka morago ga lenyalo leetong le lekopana la go hlankela diphuthego tša tikologong ya Chicago, kua Illinois. Kgaetšedi Barber o ile a ipontšha e le molekane yo bohlokwa le mothekgi yo mogolo wa monna wa gagwe nakong ya nywaga-some e mebedi modirong wa bosepedi.

Bao ba ilego ba kopana le Ngwanabo rena Barber le go tsebana le yena nywaga-someng yeo a e feditšego e le molebeledi wa selete goba wa tikologo goba nywageng e 30 yeo a e feditšego a hlankela le go ba etela e le setho sa Sehlopha se Bušago, ba tla dula ba gopola dipolelo tša gagwe le ditlhaloso tša gagwe tše di kwagalago. Ka kgonthe re na le mabaka a go thabela go ba ga gagwe ‘phenyong le Kwana.’