“Bao ba Nago le Tshekamelo e Swanetšego” ba a Arabela

“Bohle bao ba nago le tshekamelo e swanetšego ka bophelo bjo bo sa felego ba fetoga badumedi.”—DIT. 13:48.

1, 2. Bakriste ba pele ba ile ba arabela bjang boporofeteng bja Jesu bja gore ditaba tše dibotse di be di tla bolelwa lefaseng ka moka leo go agilwego go lona?

PUKU ya Beibele ya Ditiro e hupere pego e kgahlišago ya mabapi le kamoo Bakriste ba pele ba ilego ba arabela ka gona boporofeteng bja Jesu bja gore ditaba tše dibotse tša Mmušo di be di tla bolelwa lefaseng ka moka leo go agilwego go lona. (Mat. 24:14) Baboledi ba fišegago ba ile ba bea mohlala bakeng sa bohle bao ba bego ba tla ba latela. Ka baka la go nea bohlatse ka phišego ga barutiwa ba Jesu kua Jerusalema, batho ba dikete, go akaretša le “lešaba le legolo la baperisita,” ba ile ba kgeregela ka phuthegong ya lekgolong la pele la nywaga.—Dit. 2:41; 4:4; 6:7.

² Baromiwa ba pele ba ile ba thuša ba bantši ka mo go oketšegilego gore ba amogele Bokriste. Ka mohlala, Filipi o ile a ya Samaria, moo mašaba a ilego a theetša seo a bego a se bolela. (Dit. 8:5-8) Paulo o ile a ya dinageng tša kgole a e-na le badirišani ba fapa-fapanego, a bolela molaetša wa Bokriste Tsipero, dikarolong tša Asia Minor, Matsedonia, Gerika le Italia. Metseng yeo a ilego a dira boboledi go yona, mašaba a Bajuda le a Bagerika a ile a fetoga badumedi. (Dit. 14:1; 16:5; 17:4) Tito o ile a dira bodiredi kua Kereta. (Tito 1:5) Petro o be a swaregile kua Babilona, gomme nakong ya ge a be a ngwala lengwalo la gagwe la pele, mo e ka bago ka 62-64 C.E., modiro wa Bakriste o be o tsebja kudu kua Ponto, Galatia, Kapadosia, Asia le Bithinia. (1 Pet. 1:1; 5:13) Tšeo e be e le dinako tše kgahlišago gakaakang! Baboledi bao ba lekgolong la pele la nywaga ba Bakriste e be e le ba fišegago kudu moo manaba a bona a ilego a bolela gore ba be ba ‘ferekantše lefase le go agilwego go lona.’—Dit. 17:6; 28:22.

3. Bagoeledi ba Mmušo ba ba le mafelelo afe lehono medirong ya bona yeo e sepedišanago le boboledi, gomme seo se dira gore o ikwe bjang?

³ Mehleng ya lehono le gona, phuthego ya Bokriste e šegofaditšwe ka koketšego e makatšago. Na ga o kgothatšwe ke go bala pego ya ngwaga le ngwaga ya Dihlatse tša Jehofa le go bona mafelelo ao a fihlelelwago lefaseng ka bophara? Na ga o thabišwe ke go tseba gore bagoeledi ba Mmušo ba ile ba swara dithuto tša Beibele le batho ba fetago dimilione tše tshela ngwageng wa tirelo wa 2007? Go oketša moo, palo ya bao ba bilego gona Segopotšong sa lehu la Jesu Kriste ngwagola e bontšha gore batho ba e ka bago ba dimilione tše lesome bao e sego Dihlatse tša Jehofa ba ile ba kgahlegela ditaba tše dibotse ka mo go lekanego gore ba be gona segopotšong se se bohlokwa. Se se laetša gore go sa dutše go e-na le modiro o mogolo wo o swanetšego go dirwa.

4. Ke bomang bao ba arabelago gabotse molaetšeng wa Mmušo?

⁴ Lehono, go swana le lekgolong la pele la nywaga, “bohle bao ba nago le tshekamelo e swanetšego ka bophelo bjo bo sa felego” ba arabela gabotse molaetšeng wa therešo. (Dit. 13:48) Jehofa o gogela batho ba bjalo ka gare ga mokgatlo wa gagwe. (Bala Hagai 2:7.) Re swanetše go dula re e-na le boemo bofe bja kgopolo ka bodiredi bja Bokriste e le gore re sepedišane ka botlalo le modiro wo wa go kgoboketša?

 Dira Boboledi o sa Bebe Sefahlego

5. Ke batho ba mohuta ofe bao ba amogelegago go Jehofa?

⁵ Bakriste ba lekgolong la pele la nywaga ba be ba kwešiša gore “Modimo ga a bebe sefahlego, eupša setšhabeng se sengwe le se sengwe motho yo a mmoifago gomme a dira go loka o a amogelega go yena.” (Dit. 10:34, 35) Taba ya ge e ba motho a e-na le tswalano e botse le Jehofa goba go se bjalo, e ithekgile ka go ba ga gagwe le tumelo sehlabelong sa Jesu sa topollo. (Joh. 3:16, 36) Le gona ke thato ya Jehofa gore “mehuta yohle ya batho e phološwe gomme e fihle tsebong e nepagetšego ya therešo.”—1 Tim. 2:3, 4.

6. Baboledi ba Mmušo ba swanetše go itiša malebana le eng, gona ka baka la’ng?

⁶ E be e tla ba mo go fošagetšego gore bagoeledi ba ditaba tše dibotse ba ahlole batho e sa le pele motheong wa morafo wa bona, maemo a bona setšhabeng, ponagalo ya bona, setlogo sa bodumedi goba dika le ge e le dife tše dingwe. Anke o nagane go se nene: Na ga o leboge gore motho yo a boletšego le wena la mathomo ka ditherešo tša Mangwalo ga se a ka a go kgetholla? Ka gona ke ka baka la’ng o dika-dika go bolela le motho le ge e le ofe yoo a kago go theetša ka molaetša wo o nago le matla a go phološa bophelo?—Bala Mateo 7:12.

7. Ke ka baka la’ng re swanetše go phema go ahlola bao re dirago boboledi go bona?

⁷ Jehofa o kgethile Jesu gore e be Moahlodi; ka gona ga re na tshwanelo ya go ahlola motho le ge e le ofe. Se ke se se swanetšego, ka ge—ka go se swane le Jesu—re ka ahlola feela go ya “ka mo mahlô [a rena] a bônaxo” goba “ka mo ’tsêbê [tša rena] di kwilexo,” mola Jesu yena a kgona go tseba dikgopolo tše di tseneletšego le dikakanyo tša pelo.—Jes. 11:1-5; 2 Tim. 4:1.

8, 9. (a) Saulo e be e le motho wa mohuta mang pele a fetoga Mokriste? (b) Phihlelo ya moapostola Paulo e swanetše go re ruta’ng?

⁸ Batho ba tšwago mo e nyakilego e ka ba ditlogong ka moka ba fetogile bahlanka ba Jehofa. Mohlala o mongwe o lemogegago ke wa Saulo wa Tareso, yoo ka morago a ilego a tsebja e le moapostola Paulo. Saulo, Mofarisei, o be a ganetša Bakriste o šoro. Go dumela ga gagwe ka potego gore ba be ba fošitše go ile gwa mo dira gore a tlaiše phuthego ya Bokriste. (Bagal. 1:13) Go ya ka pono ya motho, o swanetše go ba a ile a bonala e le motho yo go bego go sa letelwa gore a ka fetoga Mokriste. Lega go le bjalo, Jesu o ile a bona selo se itšego se sebotse ka pelong ya Saulo gomme a mo kgetha gore a phethagatše thomo e kgethegilego. Ka baka leo, Saulo o ile a ba yo mongwe wa ditho tše mafolofolo kudu le tše di fišegago tša phuthego ya Bokriste ya lekgolong la pele la nywaga.

⁹ Phihlelo ya moapostola Paulo e re ruta’ng? Mohlomongwe tšhemong ya rena go na le dihlopha tša batho tšeo go bonagalago di hloile molaetša woo re o bolelago. Gaešita le ge go ka bonala eka ga go le ge e le bafe ba dihlopha tšeo bao ba ka tsogago ba bile Bakriste ba therešo, ga se ra swanela go kgaotša go leka go boledišana le bona. Ka dinako tše dingwe gaešita le batho bao ba tlogago ba sa holofetše ba feleletša ba amogela molaetša. Thomo ya rena ke ya go tšwela pele re bolela go bohle re “sa kgaotše.”—Bala Ditiro 5:42.

Bao ba Dirago Boboledi “ba sa Kgaotše” ba tla Šegofatšwa

10. Ke ka baka la’ng re sa swanela go dika-dika go dira boboledi go batho bao ba ka bonagalago ba boifiša? Laodiša diphihlelo tša lefelong la geno.

¹⁰ Ponagalo ya ka ntle e ka ba e forago. Ka mohlala, Ignacio * o ile a thoma go ithuta Beibele le Dihlatse tša Jehofa ge a be a le kgolegong nageng e nngwe ya Amerika Borwa. O be a boifša ka baka la go ba ga gagwe yo šoro. Ka baka leo, bagolegwa-gotee le yena bao ba bego ba e-na le dilo tšeo ba itirelago tšona gomme ba di rekišetša bagolegwa ba bangwe, ba be ba diriša Ignacio gore e be yena a yago go ba latela tšhelete go bao ba bego ba diega go lefa. Lega go le bjalo, ge Ignacio a be a dutše a tšwela pele moyeng gomme a diriša seo a bego a ithuta sona, motho yo yoo e kilego ya ba mphenyašilo yo šoro o ile a ba yo botho. Ga go sa hlwa go e-na le yo a mo dirišago go lata tšhelete, lega go le bjalo Ignacio o kgotsofatšwa ke gore ditherešo tša Beibele le moya wa Modimo di fetotše semelo sa gagwe. E bile o leboga go se bebe sefahlego ga bagoeledi ba Mmušo bao ba dirilego boiteko bja go ithuta le yena.

11. Ke ka baka la’ng re dula re dira maeto a go boela bathong?

¹¹ Le lengwe la mabaka ao ka ona re tšwelago pele re dira maeto a go boela bathong bao re šetšego  re boletše le bona ka ditaba tše dibotse, ke ka gobane maemo a bona le boemo bja bona bja kgopolo di ka fetoga e bile di a fetoga. Ga e sa le go tloga nakong ya ge re be re etetše la mafelelo, ba bangwe ba ka ba ba ile ba swarwa ke bolwetši bjo šoro, ba lahlegelwa ke mošomo goba mohlomongwe ba kgomilwe ke lehu la motho yo ba mo ratago. (Bala Mmoledi 9:11.) Ditiragalo tša lefase di ka šušumeletša batho gore ba naganišiše ka mo go tseneletšego ka bokamoso bja bona. Ditiragalo tše bjalo di ka dira gore motho yo pele a bego a sa iše felo ka molaetša—goba e bile a o ganetša—a arabele gabotse. Ka gona, ga se ra swanela go dika-dika go bolela ditaba tše dibotse le ba bangwe lebakeng le lengwe le le lengwe le le swanetšego.

12. Re swanetše go lebelela bjang batho bao re dirago boboledi go bona, gomme ka baka la’ng?

¹² Go bonala e le tshekamelo ya batho go arola batho ba bangwe ka magoro le go ba ahlola. Lega go le bjalo, Jehofa o bona batho ka o tee ka o tee. O bona bokgoni bja go dira botse bjoo yo mongwe le yo mongwe a nago le bjona. (Bala 1 Samuele 16:7.) Re swanetše go katanela go dira se se swanago bodireding bja rena. Diphihlelo tše dintši di bontšha botse bjo bo tlišwago ke go ba le pono e nepagetšego ka bohle bao re dirago boboledi go bona.

13, 14. (a) Ke ka baka la’ng mmulamadibogo a ile a arabela ka mo go fošagetšego go mosadi yo a kopanego le yena bodireding? (b) Re ka ithuta’ng phihlelong ye?

¹³ Sandra, kgaetšedi yo e lego mmulamadibogo, o be a swaregile bodireding bja ntlo le ntlo sehlakahlakeng se sengwe sa Caribbean ge a be a kopana le Ruth, yo a bego a nweletše kudu meletlong ya dipapadi ya carnival. Ruth o ile a rwešwa diala ka makga a mabedi bjalo ka naletšana ya setšhaba ya meletlo ya carnival. O ile a bontšha kgahlego e sa tlwaelegago go seo Sandra a bego a se bolela, ka gona go ile gwa rulaganywa thuto ya Beibele. Sandra o a gopola: “Ge ke be ke tsena ka phapošing ya gagwe ya bodulo, ke ile ka gahlanetšwa ke seswantšho se segolo sa Ruth a feletše ka diaparo tša moletlo wa carnival, gaešita le difoka tšeo a di thopilego. Ke ile ka ba le kgopolo e fošagetšego ya gore motho yo a bego a tumile gakaakaa le yo a bego a nweletše gakaakaa meletlong ya carnival o be a ka se kgahlegele therešo. Ka gona ke ile ka kgaotša go mo etela.”

¹⁴ Nako e itšego ka morago, Ruth o ile a tla Holong ya Mmušo, gomme ka morago ga seboka o ile a botšiša Sandra gore, “Go re’ng o se sa hlwa o e-tla go ithuta le nna?” Sandra o ile a kgopela tshwarelo gomme a rulaganya go tšwetša thuto pele. Ruth o ile a dira tšwelopele ka lebelo, a tloša diswantšho tša gagwe tša meletlo ya carnival, a thoma go kopanela medirong ka moka ya phuthego, gomme a neela bophelo bja gagwe go Jehofa. Therešo ke gore Sandra o ile a lemoga ka morago gore tsela yeo a arabetšego ka yona mathomong e be e fošagetše.

15, 16. (a) Go nea bohlatse ga mogoeledi yo mongwe go wa leloko go feleleditše ka eng? (b) Ke ka baka la’ng setlogo sa wa leloko se sa swanela go re šitiša go mo nea bohlatse?

¹⁵ Ba bantši bao ba ilego ba nea bohlatse go ditho tša malapa a bona tšeo e sego badumedi le bona ba ile ba ba le mafelelo a mabotse, gaešita le ge go ile gwa bonala go sa holofetše gore ba be ba tla arabela gabotse. Tšea ka mohlala phihlelo ya Joyce, kgaetšedi ya Mokriste ya kua United States. Molamo wa gagwe e be e le motho wa go tsena a e-tšwa kgolegong ga e sa le go tloga e sa le mofsa wa mahlalagading. Joyce o laodiša ka gore: “Batho ba be ba bolela gore bophelo bja gagwe e be e le bjo bo sa rego selo, ka gobane o be a rekiša dihlare-tagi, e le lehodu, gomme a dira dilo tše dingwe tše  dintši kudu tše mpe. Lega go le bjalo, go sa šetšwe mathata ka moka ao ke kopanego le ona, ke ile ka tšwela pele ke boledišana le yena ka ditherešo tša Beibele ka nywaga e 37.” Maiteko a gagwe a go se fele pelo a go leka go thuša molamo wa gagwe a ile a putswa kudu ge mafelelong molamo wa gagwe a thoma go ithuta Beibele le Dihlatse tša Jehofa gomme a dira diphetogo tše dikgolo bophelong bja gagwe. Morago bjale, molamo wa Joyce o ile a kolobetšwa kopanong ya selete kua California, U.S.A., a e-na le nywaga e 50. Joyce o re: “Ke ile ka tšwa megokgo ya lethabo. Ke tloga ke thabile kudu gore ga se ka ka ka mo hloboga!”

¹⁶ Mohlomongwe o ka dika-dika go bolela le ba itšego ba leloko la geno ka ditherešo tša Beibele ka baka la setlogo sa bona. Lega go le bjalo, Joyce ga se a ka a šitišwa go bolela le molamo wa gagwe ke go dika-dika mo go bjalo. Moka gona, motho a ka tseba bjang seo se lego ka pelong ya motho yo mongwe? Motho yoo a ka ba a tsoma therešo ya bodumedi ka potego. Ka gona o se ke wa dika-dika go mo nea sebaka sa gore a e hwetše.—Bala Diema 3:27.

Thušo e Atlegago ya go Ithuta Beibele

17, 18. (a) Dipego tše di tšwago lefaseng ka bophara di laetša eng ka bohlokwa bja puku ya Ke Eng Seo ge e le Gabotse Beibele e se Rutago? (b) Ke diphihlelo dife tše di kgothatšago tše o bilego le tšona ge o diriša puku ye?

¹⁷ Dipego tše di tšwago dinageng go dikologa lefase di bontšha gore batho ba bantši ba dipelo tše di botegago ba arabela gabotse pukung ya go thuša go ithuta Beibele ya Ke Eng Seo ge e le Gabotse Beibele e se Rutago? Penni, yo e lego kgaetšedi wa mmulamadibogo kua United States, o ile a thoma dithuto tše mmalwa a diriša kgatišo ye. Tše pedi tša tšona o di thomile le batho ba bagolo bao e bego e le ditho tše botegago kudu tša dikereke tša bona. Penni o be a sa tsebe gore ba be ba tla arabela bjang ditherešong tša Mangwalo tšeo di neilwego ka pukung ya Seo Beibele e se Rutago. Lega go le bjalo, o ngwala gore, “Ka baka la tsela e kwagalago, e nago le tlhaologanyo le e kopana yeo tsebišo e neilwego ka yona, ba ile ba amogela gabonolo seo ba bego ba ithuta sona e le therešo, ka ntle le go phega kgang goba go huduega maikwelong.”

¹⁸ Pat, e lego mogoeledi wa kua Brithania, o ile a thoma go ithuta Beibele le mosadi yo mongwe yo e bego e le mofaladi yo a tšwago nageng e nngwe ya Asia. Mosadi yoo o ile a gapeletšega go tšhaba nageng ya gabo ka morago ga ge monna wa gagwe le barwa ba gagwe ba ile ba tšewa ke mašole a marabele, gomme ya ba e le ge a laetše go ba bona. O be a tšhošetšwa ka gore o tla bolawa, legae la gagwe le ile la fišwa, gomme o ile a katwa ke sehlopha sa banna. Tše ka moka di ile tša mo dira gore a ikwe a sa tsebe gore o phelela’ng, gomme o ile a nagana ka go ipolaya ka makga a mmalwa. Lega go le bjalo, thuto ya Beibele e ile ya mo nea kholofelo. Pat o ngwala gore: “Ditlhaloso le diswantšho tše bonolo tšeo di lego ka pukung ya Seo Beibele e se Rutago, di ile tša mo kgoma ka mo go tseneletšego.” Morutwana yo o ile a dira tšwelopele ka pela  kudu, a swanelegela go ba mogoeledi yo a sa kolobetšwago, gomme a bolela gore o kganyoga go kolobetšwa kopanong e latelago. Ke lethabo le legolo gakaakang go thuša batho ba botegago gore ba kwešiše le go thabela kholofelo yeo e newago ke Mangwalo!

“Anke re se ke ra Langwa go Dira Botse”

19. Ke ka baka la’ng modiro wa boboledi e le o akgofilego gakaakaa?

¹⁹ Ge letšatši le lengwe le le lengwe le dutše le feta, go akgofa ga thomo ya rena ya go dira boboledi le go dira barutiwa go akgofa le go feta. Ba dikete bao ba nago le tshekamelo e swanetšego ba arabela boboleding bja rena ngwaga le ngwaga. Lega go le bjalo, “letšatši le legolo la Jehofa le kgaufsi,” e lego seo se bolelago gore bao ba tšwelago pele ba le lefsifsing la moya ba ‘thekeselela polaong.’—Tsef. 1:14, PK; Die. 24:11, NW.

20. Ke’ng seo yo mongwe le yo mongwe wa rena a swanetšego go ikemišetša go se dira?

²⁰ Re sa dutše re ka thuša batho ba bjalo. Eupša e le gore re kgone go dira bjalo, e tla ba gabohlokwa gore re ekiše Bakriste ba lekgolong la pele la nywaga, bao “ba [ilego] ba tšwela pele ba sa kgaotše ba ruta e bile ba tsebatša ditaba tše dibotse ka Kriste, Jesu.” (Dit. 5:42) Latela mohlala wa bona ka go kgotlelela go sa šetšwe mathata, ka go ela hloko ‘bokgoni bja gago bja go ruta’ le ka go dira boboledi go bohle ka ntle le go beba sefahlego! “Anke re se ke ra langwa go dira botse,” ka gobane ge re kgotlelela, re tla buna ditšhegofatšo tše dintši tša go ba ba amogelegago go Modimo.—2 Tim. 4:2; bala Bagalatia 6:9.

[Mongwalo wa tlase]

O be o tla Araba Bjang?

• Ke bomang bao ba arabelago ditabeng tše dibotse?

• Ke ka baka la’ng re swanetše go phema go ahlola e sa le pele bao re dirago boboledi go bona?

• Ke mafelelo afe ao a fihlelelwago ka puku ya Ke Eng Seo ge e le Gabotse Beibele e se Rutago?

[Dipotšišo tša Thuto]

[Diswantšho go letlakala 13]

Batho ba dikete ba dipelo tše botegago ba arabela gabotse

[Diswantšho go letlakala 15]

Re ka ithuta’ng diphetogong tšeo di dirilwego ke moapostola Paulo?

[Diswantšho go letlakala 16]

Bagoeledi ba ditaba tše dibotse ga ba ahlole batho e sa le pele