Dika Tšeo re Swanetšego go di Phegelela

“O phegelele toko, boineelo go Modimo, tumelo, lerato, kgotlelelo le moya wa boleta.”—1 TIM. 6:11.

1. Bontšha seo se bolelwago ke lentšu “phegelela.”

KE’NG seo o se naganago ge o e-kwa lentšu “phegelela”? * Mohlomongwe o nagana ka mehla ya Moše nakong ya ge madira a Egipita a be a “šala [Baisiraele] moraxo,” eupša a feleletša ka go wela kotsing Lewatleng le Lehwibidu. (Ek. 14:23) Goba o ka nagana ka kotsi yeo mmolai yoo a bolailego motho ka phošo a bego a lebana le yona Isiraeleng ya bogologolo. O be a swanelwa ke go tšhabela kapejana go o mongwe wa metse e tshelelago e kgethilwego ya botšhabelo, gore “mo-lefetša-madi a se mo hlômarêle pelo ya xaxwe è sa tuka boxale, xomme a mo swara . . . a mmolaya.”—Doit. 19:6.

2. (a) Ke moputso ofe woo Modimo a laleditšego Bakriste ba bangwe gore ba o phegelele? (b) Ke tebelelo efe yeo Jehofa a dirago gore Bakriste ba bantši ba be le yona lehono?

² Ka go fapana le mehlala ya Beibele yeo e lego ka mo godimo, ela hloko boemo bjo bobotse bja kgopolo bjoo moapostola Paulo a bego a e-na le bjona: “Ke phegelela pakaneng ya moputso wa pitšo ya godimo ya Modimo ka Kriste Jesu.” (Bafil. 3:14) Beibele e bontšha gore palo-moka ya Bakriste ba tloditšwego ba 144 000, go akaretša le Paulo, ba  hwetša moputso woo wa bophelo bja legodimong. Ba tla buša lefase ba e-na le Jesu Kriste nakong ya Pušo ya gagwe ya Nywaga e Sekete. A pakane e botse gakaakang yeo Modimo a laleditšego batho ba bjalo gore ba e phegelele! Lega go le bjalo, palo e kgolo kudu ya Bakriste ba therešo lehono e na le kholofelo goba pakane e fapanego. Ka lerato, Jehofa o ba nea seo Adama le Efa ba se lahlilego, e lego tebelelo ya bophelo bjo bo sa felego bjo bo phethagetšego lefaseng la paradeise.—Kut. 7:4, 9; 21:1-4.

3. Re ka bontšha bjang gore re leboga botho bja Modimo?

³ Batho ba sebe ba ka se ke ba hwetša bophelo bjo bo sa felego ka maiteko a bona a sa phethagalago a go dira se se nepagetšego. (Jes. 64:6) Go hwetša bophelo bjo bo sa felego go kgonega feela ka go ba le tumelo tokišetšong ya Modimo e lerato ya phološo ka Jesu Kriste. Re ka dira’ng go bontšha gore re leboga botho bjoo bja Modimo? Selo se sengwe seo re ka se dirago, ke go kwa taelo ye yeo e rego: “O phegelele toko, boineelo go Modimo, tumelo, lerato, kgotlelelo le moya wa boleta.” (1 Tim. 6:11) Go ela hloko dika tše go ka thuša yo mongwe le yo mongwe wa rena go ba le boikemišetšo bjo bogolo bja go di phegelela “ka botlalo kudu.”—1 Bathes. 4:1.

“O Phegelele Toko”

4. Ke ka baka la’ng re ka kgodišega gore go phegelela “toko” go bohlokwa, gomme ke megato efe ya mathomo yeo motho a swanetšego go e gata?

⁴ Mangwalong a gagwe a mabedi ao a a ngwaletšego Timotheo, moapostola Paulo o lokeleditše dika tšeo di swanetšego go phegelelwa, gomme nako le nako o be a thoma ka “toko.” (1 Tim. 6:11; 2 Tim. 2:22) Go oketša moo, Beibele ditemaneng tše dingwe e re kgothaletša leboelela go phegelela toko. (Die. 15:9; 21:21; Jes. 51:1) Tsela ya go thoma go dira bjalo ke ka gore re “hwetše tsebo ka . . . Modimo a nnoši wa therešo le ka yo [a] mo romilego, Jesu Kriste.” (Joh. 17:3) Go phegelela toko go tla tutueletša motho go gata mogato—go itshola dibeng tša nakong e fetilego le go ‘sokologa’ e le gore a dire thato ya Modimo.—Dit. 3:19.

5. Re swanetše go dira’ng gore re hlagolele le go kgomarela boemo bjo bo lokilego go Modimo?

⁵ Ba dimilione bao ba tlogago ba phegelela toko ba neetše maphelo a bona go Jehofa gomme ba bonagaditše seo ka go kolobetšwa meetseng. Ge e ba ga bjale o le Mokriste yo a kolobeditšwego, na o kile wa nagana ka taba ya gore bophelo bja gago bo swanetše go, e bile bo ka ba bo, bontšha gore o tšwela pele o phegelela toko? Tsela e nngwe ya go dira se ke ka go diriša Beibele go lemoga “se se nepagetšego le se se fošagetšego” ge o lebane le go dira diphetho bophelong. (Bala Baheberu 5:14.) Ka mohlala, ge e ba o le Mokriste yo a sego lenyalong eupša o le nywageng ya go ka tsenela lenyalo, na o ikemišeditše ka mo go feletšego go phema go hlagolela ditswalano tša lerato le motho yo e sego Mokriste yo a kolobeditšwego? O ikemišeditše ge e ba o phegelela toko.—1 Bakor. 7:39.

6. Go phegelela toko e le ka kgonthe go akaretša’ng?

⁶ Go ba yo a lokilego go fapana le go ipona o le moloki goba go ba “moloki wa paala.” (Mmo. 7:16) Jesu o lemošitše malebana le go bontšha toko ka tsela ya bomponeng ka morero wa go nyaka go bonagala o le kaone go feta ba bangwe. (Mat. 6:1) Go phegelela toko e le ka kgonthe go akaretša pelo—go phošolla dikgopolo tše fošagetšego, mekgwa,  maikemišetšo le dikganyogo. Ge e ba re dula re katanela go dira se, re ka kgona go se dire dibe tše dikgolo. (Bala Diema 4:23; bapiša le Jakobo 1:14, 15.) Go feta moo, Jehofa o tla re šegofatša e bile o tla re thuša ge re dutše re phegelela dika tše dingwe tše bohlokwa tša Bokriste.

“O Phegelele . . . Boineelo go Modimo”

7. “Boineelo go Modimo” ke’ng?

⁷ Boineelo bo akaretša go ikgafa ka mo go feletšego le go botega ka go se kwanantšhe. Pukuntšu e nngwe ya Beibele e re lentšu la Segerika leo le fetoletšwego e le “boineelo go Modimo” le hlalosa “mokgwa o mobotse wa go šetša gore re se ke ra felelwa ke go boifa ga rena Modimo.” Gantši Baisiraele ba be ba palelwa ke go bontšha boineelo bjo bjalo, go etša ge go bonwa ditirong tša bona tša go se kwe gaešita le ka morago ga ge Modimo a ba lokolotše Egipita.

8. (a) Sebe sa Adama se rotošitše potšišo efe? (b) Karabo ya “sephiri [se] se sekgethwa” e utolotšwe bjang?

⁸ Nywaga e dikete ka morago ga ge monna yo a phethagetšego Adama a dirile sebe, go sa dutše go ka rotoga potšišo e rego, “Na motho le ge e le ofe a ka bonagatša boineelo bjo bo feletšego go Modimo?” Go theoša le nywaga-kgolo, ga go motho wa sebe yo a kilego a kgona go phela bophelo bjo bo phethagetšego bja boineelo go Modimo. Eupša ka nako ya gagwe e swanetšego, Jehofa o ile a utolla karabo ya “sephiri [se] se sekgethwa.” O ile a fetišetša bophelo bja Morwa wa gagwe wa legodimong yo a tswetšwego a nnoši ka popelong ya Maria gore a belegwe e le motho yo a phethagetšego. Bophelong bja gagwe ka moka bja lefaseng go akaretša le lehu la gagwe le le kokobetšago, Jesu o bontšhitše seo se bolelwago ke go ba yo a ineetšego ka mo go feletšego le go botegela Modimo wa therešo ka botlalo le ka go se kwanantšhe. Dithapelo tša gagwe di be di bontšha gore o hlompha Tatagwe yo lerato wa legodimong. (Mat. 11:25; Joh. 12:27, 28) Ka baka leo, Jehofa o ile a budulela Paulo go bolela ka “boineelo go Modimo” ge a hlalosa bophelo bja Jesu bjo bo beago mohlala.—Bala 1 Timotheo 3:16.

9. Re ka phegelela bjang boineelo go Modimo?

⁹ Bjalo ka batho ba sebe, re ka se kgone go bonagatša boineelo go Modimo ka mo go phethagetšego. Eupša re ka bo phegelela. Se se nyaka gore re latele mohlala wa Kriste kgaufsi kudu ka mo go kgonegago. (1 Pet. 2:21) Ka go rialo, re ka se swane le baikaketši bao “ba nago le sebopego sa boineelo go Modimo eupša ba latola matla a bjona.” (2 Tim. 3:5) Se ga se bolele gore boineelo bja kgonthe go Modimo ga bo tswalane le ponagalo ya ka ntle. Bo tloga bo tswalana le yona. Ka mohlala, go sa šetšwe gore re kgetha lešira goba re dira phetho ya gore re tla apara’ng ge re e-ya mabenkeleng, ka mehla ponagalo ya rena e swanetše go dumelelana le seo re se bolelago ge re re re “hlompha Modimo.” (1 Tim. 2:9, 10) Ee, go phegelela boineelo go Modimo go nyaka gore re ele hloko ditekanyetšo tša Modimo tša go loka maphelong a rena a letšatši le letšatši.

“O Phegelele . . . Tumelo”

10. Re swanetše go dira’ng go boloka tumelo ya rena e tiile?

¹⁰ Bala Baroma 10:17. Gore Mokriste a be le tumelo e tiilego le go e kgomarela, o swanetše go dula a naganišiša ka ditherešo tše bohlokwa tše di hwetšwago ka Lentšung la Modimo. “Mohlanka yo a botegago le wa temogo” o re neile dikgatišo tše dintši tše dibotse. Dipuku tše tharo tše di kgethegilego ke ya Motho yo a Phagamego Kudu yo a Kilego a Phela, Ithute go Morutiši yo Mogolo le ya “Come Be My Follower,” e lego dibolumo tšeo di hlametšwego go re thuša go tseba Kriste gakaone gomme ka go rialo ra ba boemong bjo bobotse bja go kgona go mo ekiša. (Mat. 24:45-47) Sehlopha sa mohlanka se rulaganya gape le diboka, dikopano tše dinyenyane le tše dikgolo, tšeo bontši bja tšona  bo gatelelago “lentšu le le lego mabapi le Kriste.” Na go na le tsela le ge e le efe yeo ka yona o ka holwago ka botlalo ke ditokišetšo tše ge o dutše o “[hlokomela] go feta ka mo go tlwaelegilego” seo Modimo a se neago?—Baheb. 2:1.

11. Thapelo le go kwa di kgatha tema efe go phegeleleng ga rena tumelo?

¹¹ Thapelo le yona e ka re thuša go hlagolela tumelo e tiilego. Balatedi ba Jesu ba kile ba mo kgopela ka gore: “Re nee tumelo e oketšegilego.” Le rena re ka kgopela Modimo ka boikokobetšo gore a dire se se swanago. (Luka 17:5) Gore re fihlelele seo, re swanetše go rapelela thušo ya moya o mokgethwa; tumelo ke se sengwe sa “dienywa tša moya.” (Bagal. 5:22) Go feta moo, go kwa ditaelo tša Modimo go matlafatša tumelo ya rena. Ka mohlala, re ka ikemišetša go tšea karolo ka mo go oketšegilego modirong wa boboledi. Go bonagala seo se tla dira gore re thabe kudu. Ge re dutše re naganišiša ka ditšhegofatšo tšeo di tlišwago ke go “tsoma mmušo pele le toko ya [Modimo],” tumelo ya rena e tla gola.—Mat. 6:33.

“O Phegelele . . . Lerato”

12, 13. (a) Taelo e mpsha ya Jesu ke efe? (b) Re swanetše go phegelela lerato le le swanago le la Kriste ka ditsela dife tše bohlokwa?

¹² Bala 1 Timotheo 5:1, 2. Paulo o neile keletšo e šomago mabapi le kamoo Bakriste ba ka bontšhanago lerato ka gona. Boineelo bja rena go Modimo bo swanetše go akaretša go kwa taelo e mpsha ya Jesu ya gore re “ratane” go etša ge a re ratile. (Joh. 13:34) Moapostola Johane o boletše gore: “Mang le mang yo a nago le dilo tša lefase le, tša go thekga bophelo gomme a bona ngwanabo a hloka, fela a mo tswalelela mojako wa lešoko la gagwe le bonolo, ke ka tsela efe lerato la Modimo le dulago le le go yena?” (1 Joh. 3:17) Na o ka gopola dinako tšeo ka tšona o ilego wa bontšha lerato ka tsela e šomago?

¹³ Tsela e nngwe yeo ka yona re phegelelago lerato ke ka go ba bao ba lebalelago, e sego ba bolokago dikgopi kgahlanong le bana babo rena. (Bala 1 Johane 4:20.) Go e na le moo, re nyaka go latela keletšo ye yeo e buduletšwego, e rego: “Tšwelang pele le kgotlelelana gomme le lebalelana ka bolokologi ge e ba motho a e-na le lebaka la go ba le pelaelo ka yo mongwe. Go etša ge Jehofa a le lebaletše ka bolokologi, le lena le dire bjalo.” (Bakol. 3:13) Na ka phuthegong go na le motho yoo o ka dirišago keletšo ye go yena? Na o tla mo lebalela?

“O Phegelele . . . Kgotlelelo”

14. Re ka ithuta’ng phuthegong ya Filadelefia?

¹⁴ Go katanela go fihlelela pakane ya nakwana go fapana kudu le go katanela pakane yeo go lego thata go e fihlelela goba yeo e lego kgole go feta kamoo re bego re lebeletše ka gona. Ka ntle le pelaelo, go phegelela pakane ya bophelo bjo bo sa felego go nyaka kgotlelelo. Morena Jesu o boditše phuthego ya Filadelefia gore: “Gobane o bolokile seo ke se boletšego mabapi le kgotlelelo, le nna ke tla go lota nakong ya moleko.” (Kut. 3:10; mongwalo wa tlase wa NW.) Ee, Jesu o rutile mabapi le go nyakega ga kgotlelelo—e lego seka seo se re thušago gore re se ke ra langwa ge re lebane le diteko. Bana babo rena phuthegong ya lekgolong la pele la nywaga ya Filadelefia ba swanetše go ba ba ile ba bonagatša kgotlelelo e beago mohlala ditekong tše dintši tša tumelo. Ka gona, Jesu o ile a ba kgonthišetša gore o tla tšwela pele a ba thuša nakong ya teko e kgolo yeo e bego e sa tla.—Luka 16:10.

15. Jesu o rutile’ng mabapi le kgotlelelo?

¹⁵ Jesu o be a tseba gore balatedi ba gagwe ba be ba tla lebeletšana le lehloyo le le tšwago go ba leloko bao ba sa dumelego le go lefase ka kakaretšo, ka gona bonyenyane mabakeng a mabedi, o ba kgothaditše ka tsela ye: “Yo a kgotleletšego go fihla bofelong ke yena a tlago go phološwa.” (Mat. 10:22; 24:13) Jesu o ile a ba a bontšha kamoo barutiwa ba gagwe ba bego ba tla hwetša matla a nyakegago a go kgotlelela ka nako yeo. Papišong e nngwe, o bapišitše  mobu wa lekgwara le batho bao ‘ba amogelago lentšu la Modimo ka lethabo’ eupša ba wago ge ba lebeletšane le diteko tša tumelo. Lega go le bjalo, o ile a bapiša balatedi ba gagwe le mobu o mobotse ka gobane ba ‘boloka’ lentšu la Modimo gomme ba “enywa dienywa ka kgotlelelo.”—Luka 8:13, 15.

16. Ke tokišetšo efe e lerato yeo e thušitšego ba dimilione go kgotlelela?

¹⁶ Na o lemogile sephiri sa kgotlelelo? Re swanetše go ‘boloka’ lentšu la Modimo, re le boloke le phela ka dipelong tša rena le menaganong. Go ba le New World Translation of the Holy Scriptures—phetolelo ya Beibele e nepagetšego le e balegago ga bonolo—ka maleme a mantši-ntši go dirile gore go dira bjalo go be bonolo e bile go kgonege. Go naganišiša ga rena ka karolo ya Lentšu la Modimo letšatši le letšatši go tla re thuša go hwetša matla a nyakegago gore re tšwele pele re enywa dienywa “ka kgotlelelo.”—Ps. 1:1, 2.

“O Phegelele . . . Moya wa Boleta” le Khutšo

17. (a) Ke ka baka la’ng “moya wa boleta” o le bohlokwa gakaakaa? (b) Jesu o bontšhitše bjang gore o be a e-na le moya wa boleta?

¹⁷ Ga go na motho yo a thabelago go latofatšwa ka selo seo a sa kago a se bolela goba go se dira. Go gana ka bogale ke tsela e tlwaelegilego yeo batho ba arabelago ka yona ge ba swawa diphošo ka tsela e se nago toka. Ruri go kaone kudu go bontšha “moya wa boleta”! (Bala Diema 15:1.) Go bontšha moya o boleta go nyaka boiteko bjo bogolo ge re swawa diphošo go sa swanela. Jesu Kriste o beile mohlala o phethagetšego tabeng ye. “Ge a be a rogwa, ga se a ka a ithogela. Ge a be a tlaišega, ga se a ka a tšhošetša, eupša o ile a dula a ikgafetše yo a ahlolago ka go loka.” (1 Pet. 2:23) Re ka se ke ra letela gore re tla kgona go dira gabotse go swana le Jesu tabeng ye, eupša na re ka katanela go oketša bokgole bjoo re fihlago go bjona ge re bonagatša moya wa boleta?

18. (a) Moya wa boleta o dira botse bofe? (b) Re kgothaletšwa go phegelela seka sefe se sengwe?

¹⁸ Ka go ekiša Jesu, anke ‘ka mehla re be ba loketšego go lwela’ ditumelo tša rena, re “dira bjalo ka moya o boleta le ka tlhompho e tseneletšego.” (1 Pet. 3:15) Ee, go ba ga rena le moya o boleta go ka dira gore go se kwane ga rena ka dikgopolo go se ke gwa fetoga dingangišano tše šoro, e ka ba ge re bolela le batho bao re kopanago le bona bodireding bja rena le badumedi-gotee le rena. (2 Tim. 2:24, 25) Moya wa boleta o dira gore re be le khutšo. Mohlomongwe ke ka baka leo Paulo, lengwalong la gagwe la bobedi le le yago go Timotheo, a ilego a lokeletša “khutšo” gare ga dika tšeo di swanetšego go phegelelwa. (2 Tim 2:22; bapiša le 1 Timotheo 6:11.) Ee, “khutšo” ke seka se sengwe seo Mangwalo a re kgothaletšago go se phegelela.—Ps. 34:14; Baheb. 12:14.

19. Ka morago ga go ahla-ahla dika tše šupa tša Bokriste, o ikemišeditše go phegelela’ng, gona ka baka la’ng?

¹⁹ Re ahla-ahlile dika tše šupa tša Bokriste tšeo re kgothaletšwago go di phegelela—toko, boineelo go Modimo, tumelo, lerato, kgotlelelo, moya wa boleta le khutšo. Ke tšhegofatšo e le ruri phuthegong e nngwe le e nngwe ge bana babo rena le dikgaetšedi ba katanela go bonagatša dika tše ka botlalo! Se se tla iša kgodišo go Jehofa gomme sa dira gore a kgone go bopa yo mongwe le yo mongwe bakeng sa gore a tumišwe.

[Mongwalo wa tlase]

Dikgopolo Bakeng sa go Naganišiša

• Go phegelela toko le boineelo go Modimo go akaretša’ng?

• Ke’ng seo se ka re thušago go phegelela tumelo le kgotlelelo?

• Lerato le swanetše go kgoma ditirišano tša rena le ba bangwe bjang?

• Ke ka baka la’ng re swanetše go phegelela moya wa boleta le khutšo?

[Dipotšišo tša Thuto]

[Seswantšho go letlakala 12]

Jesu o lemošitše malebana le go bontšha toko ka morero wa go kgahla batho

[Seswantšho go letlakala 13]

Re ka phegelela tumelo ka go naganišiša ka ditherešo tša Lentšu la Modimo

[Seswantšho go letlakala 15]

Re ka phegelela lerato le moya wa boleta