Kamoo Dipolelo tša Jesu di Tlišago Lethabo

“[Jesu] a rotogela thabeng; . . . barutiwa ba gagwe ba tla go yena; . . . a thoma go ba ruta.”​—MAT. 5:1, 2.

1, 2. (a) Jesu o neile Thuto ya gagwe ya Thabeng ka tlase ga maemo afe? (b) Jesu o ile a thoma polelo ya gagwe bjang?

NGWAGA ke wa 31 C.E. Jesu o aroga go se nene leetong la gagwe la go yo dira boboledi Galilea e le gore a be gona Pasekeng kua Jerusalema. (Joh. 5:1) Ge a boela Galilea, o rapela bošego ka moka go kgopela Modimo gore a mo hlahle ge a kgetha baapostola ba 12. Letšatšing le le latelago, lešaba le a kgobokana ge Jesu a fodiša balwetši. A e-na le barutiwa ba gagwe gotee le batho ba bangwe, o dula fase thabeng gomme o thoma go ruta.—Mat. 4:23–5:2; Luka 6:12-19.

² Jesu o thoma polelo ya gagwe—Thuto ya Thabeng—ka go bontšha gore lethabo le tlišwa ke go ba le tswalano e botse le Modimo. (Bala Mateo 5:1-12.) Lethabo ke ‘boemo bja boiketlo bjo bo tlogago go kgotsofalo go ya go lethabo le le tseneletšego.’ Dilo tše senyane tše di tlišago lethabo tšeo Jesu a boletšego ka tšona di bontšha lebaka leo ka lona Bakriste ba thabilego, gomme dipolelo tše di sa na le mohola lehono go fo swana le ge di be di e-na le mohola nywageng e nyakilego go ba e 2 000 e fetilego. Anke ga bjale re ahla-ahleng e nngwe le e nngwe ya tšona.

“Bao ba Lemogago go Nyaka ga Bona Dilo tša Moya”

3. Ke’ng seo se bolelwago ke go lemoga go nyaka ga rena dilo tša moya?

³ “Go thaba bao ba lemogago go nyaka ga bona dilo tša moya, ka ge mmušo wa magodimo e le wa bona.” (Mat. 5:3) “Bao ba lemogago go nyaka ga bona dilo tša moya” ba lemoga gore ba nyaka tlhahlo ya Modimo le kgaugelo ya gagwe.

4, 5. (a) Ke ka baka la’ng bao ba lemogago go nyaka ga bona dilo tša moya ba thabile? (b) Senyakwa sa rena sa moya se ka kgotsofatšwa bjang?

⁴ Bao ba lemogago go nyaka ga bona dilo tša moya ba a thaba, “ka ge mmušo wa magodimo e le wa bona.” Go amogela gore Jesu ke Mesia go ile gwa bulela barutiwa ba gagwe ba lekgolong la pele la nywaga kgonagalo ya go ka buša le yena Mmušong wa Modimo wa legodimong. (Luka 22:28-30) Go sa šetšwe gore re na le kholofelo ya go ba bajabohwa-gotee le Kriste legodimong goba re lebeletše pele go phela ka mo go sa felego lefaseng la paradeise ka tlase ga pušo ya Mmušo, re ka thaba ge e ba re lemoga e le ka kgonthe gore re nyaka dilo tša moya e bile re lemoga ka mo go feletšego gore re ka se phele ka ntle le Modimo.

⁵ Ga se batho ka moka bao ba lemogago go nyaka ga bona dilo tša moya, ka gobane ba bantši ga ba na tumelo e bile ga ba tšeele dilo tše kgethwa godimo. (2 Bathes. 3:1, 2; Baheb. 12:16) Ditsela tša go kgotsofatša senyakwa sa rena sa moya di akaretša go ithuta Beibele ka mafolofolo, go ba mafolofolo modirong wa go dira barutiwa le go ba gona ka mehla dibokeng tša Bokriste.—Mat. 28:19, 20; Baheb. 10:23-25.

Bao ba Hlokofetšego ba a “Thaba”

6. “Bao ba hlokofetšego” ke bomang, gona ke ka baka la’ng ba ‘thabile’?

⁶ “Go thaba bao ba hlokofetšego, ka ge ba tla homotšwa.” (Mat. 5:4) “Bao ba hlokofetšego” ke mohuta wa batho “bao ba lemogago go nyaka ga bona dilo tša moya.” Ga ba hlokofale ka kgopolo ya go belaelela ka kabelo ya bona bophelong. Go hlokofala ga bona ke ga go nyamišwa ke boemo bja bona bja sebe le maemo ao a lego gona ka baka la go se phethagale ga batho. Ke ka baka la’ng batho ba bjalo ba hlokofetšego ba ‘thabile’? Ke ka gobane ba na le tumelo go Modimo le go Kriste e bile ba homotšwa ke go ba le tswalano e botse le Jehofa.—Joh. 3:36.

7. Re swanetše go ikwa bjang ka lefase la Sathane?

 ⁷ Na rena re a hlokofala ka baka la go hloka toka moo go atilego lefaseng la Sathane? Ge e le gabotse re ikwa bjang ka seo lefase le le se holofetšago? Moapostola Johane o ngwadile gore: “Dilo tšohle tše di lego lefaseng—kganyogo ya nama le kganyogo ya mahlo le pontšho ya bompogeng ya dilo tša motho tša boiphedišo—ga di tšwe go Tate.” (1 Joh. 2:16) Eupša go thwe’ng ge e ba re lemoga gore boemo bja rena bja moya bo fokodišwa ke “moya wa lefase,” e lego matla a tutuetšago ao a laolago moloko wa batho wo o aroganego le Modimo? Ka gona a re rapeleng ka pelo ka moka, re ithute Lentšu la Modimo gomme re tsome thušo ya bagolo. Ge re dutše re batamela Jehofa, re tla ‘hwetša khomotšo,’ go sa šetšwe seo se re gateletšago.—1 Bakor. 2:12; Ps. 119:52; Jak. 5:14, 15.

Ruri “ba Moya o Boleta” ba a Thaba!

8, 9. Go ba le moya o boleta go bolela’ng, gona ke ka baka la’ng ba moya o boleta ba thabile?

⁸ “Go thaba ba moya o boleta, ka ge ba tla ja bohwa bja lefase.” (Mat. 5:5) “Moya o boleta” ga o re gore motho ke yo a fokolago goba yo a itirago yo botho. (1 Tim. 6:11) Ge e ba re e-na le moya o boleta, re tla bontšha boleta ka go dira thato ya Jehofa le ka go amogela tlhahlo ya gagwe. Moya o boleta o tla bonagala gape tseleng yeo re dirišanago le badumedi-gotee le rena le ba bangwe. Boleta bjo bjalo bo dumelelana le keletšo ya moapostola Paulo.—Bala Baroma 12:17-19.

⁹ Ke ka baka la’ng ba moya o boleta ba thabile? Jesu yo a nago le moya o boleta o itše ke ka gobane “ba tla ja bohwa bja lefase.” Ke Mojabohwa yo mogolo wa lefase. (Ps. 2:8; Mat. 11:29; Baheb. 2:8, 9) Lega go le bjalo, “bajabohwa-gotee le Kriste” ba nago le moya o boleta le bona ba ja bohwa bja lefase. (Baroma 8:16, 17) Nakong ya ge Mmušo wa Jesu o buša lefase, ba bantši ba nago le moya o boleta ba tla phela ka mo go sa felego.—Ps. 37:10, 11.

10. Go hloka ga rena moya o boleta go ka kgoma bjang ditokelo tša rena tša tirelo gotee le ditswalano tša rena le ba bangwe?

¹⁰ Go swana le Jesu, le rena re swanetše go ba le moya o boleta. Eupša go thwe’ng ge e ba re tsebja re le bo-ntwa-dumela? Mokgwa o bjalo wa pefelo le bogale o ka dira gore batho ba re katoge. Ge e ba re le banna bao ba kganyogago go ba le boikarabelo ka phuthegong, mokgwa wo o dira gore re se ke ra swanelega. (1 Tim. 3:1, 3) Paulo o boditše Tito gore a tšwele pele a gopotša Bakriste ba Kereta gore “e se be bo-ntwa-dumela, e be ba leka-lekanego, ba bontšha boleta bjohle go batho ka moka.” (Tito 3:1, 2) Ruri moya o bjalo o boleta ke tšhegofatšo go ba bangwe!

Ba Swerwe ke Tlala ya “Toko”

11-13. (a) Go swarwa ke tlala ya toko le go e nyorelwa go bolela’ng? (b) Bao ba swerwego ke tlala ya toko le go e nyorelwa ba “kgotsofatšwa” bjang?

¹¹ “Go thaba bao ba swerwego ke tlala ya toko le bao ba e nyoretšwego, ka ge ba tla kgotsofatšwa.” (Mat. 5:6) “Toko” yeo Jesu a bego a naganne ka yona ke seka sa go dira selo se se nepagetšego ka go dumelelana le thato ya Modimo le ditaelo tša gagwe. Mopsalme o boletše gore o be a “xoletšwe ke xo hloloxêlwa” dikahlolo tše di lokilego tša Modimo. (Ps. 119:20) Na re tšeela godimo kudu toko moo e lego gore re swarwa ke tlala ya yona le go e nyorelwa?

¹² Jesu o itše bao ba swerwego ke tlala ya toko e bile ba e nyoretšwego ba tla thaba ka gobane ba tla “kgotsofatšwa,” goba go kgotsofala ka mo go  feletšego. Se se ile sa kgonega ka morago ga Pentekoste ya 33 C.E., ka gobane moya o mokgethwa wa Jehofa ka nako yeo o ile wa thoma go “nea lefase bohlatse bjo bo kgodišago mabapi le . . . toko.” (Joh. 16:8) Ka moya o mokgethwa, Modimo o buduletše banna go kgoboketša Mangwalo a Bakriste a Segerika, ao a holago kudu ka “go laya ka toko.” (2 Tim. 3:16) Moya wa Modimo gape o re kgontšha go “[apara] motho yo mofsa yo a bopilwego go ya ka thato ya Modimo tokong ya therešo.” (Baef. 4:24) Na ga se mo go homotšago go tseba gore bao ka boitsholo ba tsomago tebalelo ya dibe tša bona motheong wa sehlabelo sa Jesu sa topollo ba ka lebelelwa ke Modimo ba lokile?—Bala Baroma 3:23, 24.

¹³ Ge e ba re e-na le kholofelo ya go phela lefaseng, tlala ya rena ya toko le lenyora la yona di tla kgotsofatšwa ka mo go feletšego ge re hwetša bophelo bjo bo sa felego ka tlase ga maemo a toko lefaseng. Eupša gona bjale a re ikemišetšeng go phela ka go dumelelana le ditekanyetšo tša Jehofa. Jesu o itše: “Tšwelang pele le tsoma mmušo pele le toko ya [Modimo].” (Mat. 6:33) Go dira bjalo go tla re thuša go ba le mo gontši mo re go dirago modirong wa Modimo e bile go tla re nea lethabo la kgonthe.—1 Bakor. 15:58.

Lebaka Leo ka Lona “Bagaugedi” ba Thabago

14, 15. Re ka bontšha bjang kgaugelo, gona ke ka baka la’ng “bagaugedi” ba thabile?

¹⁴ “Go thaba bagaugedi, ka ge ba tla bontšhwa kgaugelo.” (Mat. 5:7) “Bagaugedi” ba tutuetšwa ke kwelobohloko le go šokela ba bangwe. Jesu o ile a imolla ba bantši ditlaišegong tša bona ka mohlolo ka gobane a ba šokela. (Mat. 14:14) Kgaugelo e bontšhwa ka tsela ya boahlodi ge batho ba lebalela bao ba ba fošeditšego, go fo swana le ge Jehofa ka kgaugelo a lebalela bao ba itsholago. (Ek. 34:6, 7; Ps. 103:10) Re ka bontšha kgaugelo ka tsela e bjalo le ka mantšu a rena a botho le ditiro tšeo di imollago batho bao ba tshwenyegago. Tsela e kaone ya go bontšha kgaugelo ke ka go botša ba bangwe ditherešo tša Beibele. Ka go šokela lešaba, Jesu o ile “a thoma go le ruta dilo tše dintši.”—Mar. 6:34.

¹⁵ Re na le lebaka la go dumelelana le mantšu a Jesu a rego: “Go thaba bagaugedi, ka ge ba tla bontšhwa kgaugelo.” Ge e ba re swara ba bangwe ka kgaugelo, gantši ba ka arabela ka tsela e swanago. Go ka direga gore kgaugelo yeo re e bontšhitšego ba bangwe e dire gore ge Modimo a re ahlola, a se ke a re ahlola gabohloko. (Jak. 2:13) Tebalelo ya dibe le bophelo bjo bo sa felego ke tša bagaugedi.—Mat. 6:15.

Lebaka Leo ka Lona “Bao ba Sekilego Pelong” ba Thabilego

16. Ke’ng seo se bolelwago ke go ba ba “sekilego pelong,” gomme bao ba nago le seka se ba “bona Modimo” bjang?

¹⁶ “Go thaba bao ba sekilego pelong, ka ge ba tla bona Modimo.” (Mat. 5:8) Ge e ba re le ba “sekilego  pelong,” tshekego e tla bonagala dilong tšeo re di ratago, dikganyogong le maikemišetšong a rena. Re tla bontšha “lerato le le tšwago pelong e hlwekilego.” (1 Tim. 1:5) Ge re hlwekile ka gare ga rena, re tla “bona Modimo.” Se ga se re gore re tla bona Jehofa ka mahlo a rena, ka gobane “motho a ka se kê a [bona Modimo] a phela.” (Ek. 33:20) Lega go le bjalo, ka ge a bonagaditše semelo sa Modimo ka mo go phethagetšego, Jesu o be a ka re: “Yo a bonego nna o bone le Tate.” (Joh. 14:7-9) Bjalo ka barapedi ba Jehofa ba lefaseng, re ka “bona Modimo” ka go bona ge a re šireletša. (Jobo 42:5) Bakeng sa Bakriste ba tloditšwego, go bona Modimo go fihla seremong sa gona ge ba tsošetšwa go ba dibopiwa tša moya gomme ba bona Tatago bona wa legodimong ka go lebanya.—1 Joh. 3:2.

17. Go ba ba sekilego pelong go tla ba le mafelelo afe go rena?

¹⁷ Ka gobane pelo e sekilego e hlwekile boitshwarong le moyeng, ga e dule dilong tše sa hlwekago mahlong a Jehofa. (1 Kor. 28:9; Jes. 52:11) Ge e ba re sekile pelong, seo re se bolelago le go se dira e tla ba seo se sekilego, gomme go ka se be le boikaketši tirelong ya rena go Jehofa.

“Bao ba Nago le Khutšo” e ba Barwa ba Modimo

18, 19. “Bao ba nago le khutšo” ba itshwara bjang?

¹⁸ “Go thaba bao ba nago le khutšo, ka ge ba tla bitšwa ‘barwa ba Modimo.’” (Mat. 5:9) “Bao ba nago le khutšo” ba bonwa ka seo ba tlago go se dira le ka seo ba ka se se dirego. Ge e ba re le batho bao Jesu a bego a naganne ka bona, re na le khutšo gomme ga re ‘lefetše bobe ka bobe go yo mongwe.’ Go e na le moo, ‘ka mehla re phegelela go dira botse go ba bangwe.’—1 Bathes. 5:15.

¹⁹ Lentšu la Segerika leo le fetoletšwego e le “bao ba nago le khutšo” go Mateo 5:9 ka go lebanya le bolela “badira-khutšo.” Gore re be gare ga “bao ba dirago khutšo,” re swanetše go dula re etiša khutšo pele. Badira-khutšo ga ba dire selo le ge e le sefe seo se ‘amollago le bagwera ba bohloko.’ (Die. 16:28) Bjalo ka “bao ba nago le khutšo,” re gata megato e šomago go ‘phegelela khutšo le batho bohle.’—Baheb. 12:14.

20. Ke bomang bao gona bjale e lego “barwa ba Modimo,” gomme ke bomang bao ba tlago go feleletša e le bana ba Modimo?

²⁰ Bao ba nago le khutšo ba a thaba ka gobane “ba tla bitšwa ‘barwa ba Modimo.’” Bakriste ba tloditšwego ba ba botegago ba thwetšwe ke Jehofa gomme ke “barwa ba Modimo.” Ba šetše ba e-na le tswalano ya kgaufsi kudu le Jehofa bjalo ka bana ba gagwe ka gobane ba na le tumelo go Kriste gomme ba rapela “Modimo wa lerato le khutšo” ka pelo ka moka. (2 Bakor. 13:11; Joh. 1:12) Go thwe’ng ka “dinku tše dingwe” tša Jesu tše nago le khutšo? Jesu e tla ba ‘Tatago tšona wa ka mo go sa Felego’ nakong ya Pušo ya Nywaga e Sekete, eupša mafelelong a yona o tla ikokobeletša Jehofa gomme di tla ba bana ba Modimo ka kgopolo e feletšego.—Joh. 10:16; Jes. 9:6; Baroma 8:21; 1 Bakor. 15:27, 28.

21. Re tla itshwara bjang ge e ba re “phela ka moya”?

²¹ Ge e ba re “phela ka moya,” go ba le khutšo e tla ba se sengwe sa dika tša rena tšeo di bonwago ke ba bangwe. Re ka se ke ra “tsošetšana phenkgišano” goba go “rumolana.” (Bagal. 5:22-26; Beibele ya Sepedi) Go e na le moo, re katanela go ba “le khutšo le batho bohle.”—Baroma 12:18.

Ba Thabile le ge ba Tlaišwa!

22-24. (a) Bao ba tlaišetšwago toko ba thaba ka mabaka afe? (b) Ke’ng seo se tlago go ahla-ahlwa dihlogong tše pedi tše ithutwago tše di latelago?

²² “Go thaba ba ba tlaišeditšwego toko, ka ge mmušo wa magodimo e le wa bona.” (Mat. 5:10)  Ge a hlalosa taba ye, Jesu o okeditše ka gore: “Go thaba lena ge batho ba le goboša le go le tlaiša gomme ba aketša ka go bolela mohuta o mongwe le o mongwe wa selo se sebe kgahlanong le lena ka baka la-ka. Thabang le hlalaleng, ka ge moputso wa lena e le o mogolo magodimong; gobane ba tlaišitše baporofeta ba pele ga lena ka tsela yeo.”—Mat. 5:11, 12.

²³ Go swana le baporofeta ba Modimo ba bogologolo, Bakriste ba letetše go gobošwa, go tlaišwa le go pharwa ka maaka—ka moka bakeng sa “toko.” Lega go le bjalo, ka go kgotlelela diteko tša mohuta woo ka potego, re ba le kgotsofalo ya gore re thabiša Jehofa le go mo godiša. (1 Pet. 2:19-21) Tlaišego ya rena e ka se fediše lethabo la rena la go hlankela Jehofa gona bjale goba nakong e tlago. E ka se fokotše gaešita le lethabo la go buša gotee le Kriste Mmušong wa legodimong goba lethabo la go hwetša bophelo bjo bo sa felego bjalo ka yo mongwe wa balata ba Mmušo woo. Ditšhegofatšo tše bjalo di nea bohlatse bja go amogelwa ke Modimo, botho bja gagwe le go nea ga gagwe ka seatla se se bulegilego.

²⁴ Go na le mo gontši moo go ka ithutwago Thutong ya Thabeng. Dithuto tše fapa-fapanego di ahla-ahlwa dihlogong tše pedi tše ithutwago tše di latelago. Anke re boneng kamoo re ka dirišago dipolelo tšeo tša Jesu Kriste.

O be o tla Araba Bjang?

• Ke ka baka la’ng “bao ba lemogago go nyaka ga bona dilo tša moya” ba thabile?

• “Bao ba nago le moya o boleta” ba thaba ka mabaka afe?

• Ke ka baka la’ng Bakriste ba thabile gaešita le ge ba tlaišwa?

• Ke’ng seo se go kgahlilego kudu dilong tšeo Jesu a itšego di tliša lethabo?

[Dipotšišo tša Thuto]

[Seswantšho go letlakala 7]

Dilo tše senyane tšeo di tlišago lethabo tšeo Jesu a boletšego ka tšona ke tšeo di holago lehono go fo swana le ge di be di hola ka nako yeo

[Seswantšho go letlakala 8]

Tsela e kaone ya go bontšha kgaugelo ke ka go botša ba bangwe ditherešo tša Beibele