Baloki ba tla Tumiša Modimo ka mo go sa Felego
Baloki ba tla Tumiša Modimo ka mo go sa Felego
“Moloki ó tsebya xo ya xo ile . . . Xo loka xa xaxwe xo eme xò tiile mehla yohle.”—PS. 112:6, 9.
1. (a) Ke bokamoso bofe bjo bo thabišago bjoo bo letetšego bohle bao Modimo a ba lebelelago e le baloki? (b) Ke potšišo efe yeo e rotogago?
A BOKAMOSO bjo bo thabišago gakaakang bjo bo letetšego batho ka moka bao Modimo a ba lebelelago e le baloki! Ka mehla ba tla thabela go ithuta ka mo go oketšegilego ka Jehofa le dika tša gagwe tše dibotse. Dipelo tša bona di tlala ka lethabo ge ba dutše ba ithuta ka mo go oketšegilego go feta le ge e le neng pele ka mediro ya Modimo ya tlholo. Senyakwa se segolo seo re se hlokago e le gore re thabele bokamoso bjo bo tagilego ke ‘go loka,’ e lego seo se gatelelwago go Psalme 112. Eupša ke bjang Modimo yo mokgethwa le yo a lokilego, Jehofa, a lebelelago batho ba sebe e le baloki? Go sa šetšwe kamoo re ka lekago ka thata ka gona go dira se se lokilego, re dira diphošo gomme ka dinako tše dingwe re dira tše dikgolo.—Baroma 3:23; Jak. 3:2.
2. Ke mehlolo efe e mebedi yeo Jehofa a e dirilego ka go rata?
2 Ka lerato, Jehofa o neile tharollo yeo e phethagetšego. Bjang? Sa pele, ka go dira mohlolo wa go fetišetša bophelo bja Morwa wa gagwe yo a rategago wa legodimong ka popelong ya kgarebe e le gore a ka belegwa e le motho yo a phethagetšego. (Luka 1:30-35) Ka gona, ka morago ga gore Jesu a bolawe ke manaba a gagwe, Jehofa o ile a dira mohlolo o mongwe o mogolo. Modimo o ile a tsoša Jesu e le sebopiwa sa moya se se nago le letago.—1 Pet. 3:18.
3. Ke ka baka la’ng Modimo a be a thabišwa ke go putsa Morwa wa gagwe ka bophelo bja legodimong?
3 Jehofa o ile a putsa Jesu bjalo ka Morwa wa gagwe ka selo seo a sa kago a ba le sona bophelong bja gagwe pele e e-ba motho—bophelo bjo bo sa senyegego legodimong. (Baheb. 7:15-17, 28) Jehofa o be a thabela go dira se ka gobane Jesu o ile a dula a botega ka mo go phethagetšego le ge a be a lebeletšane le diteko tše šoro. Ka gona, Jesu o neile Tatagwe se sekaone-kaone, seo se feletšego, karabo maakeng a Sathane a gore batho ba hlankela Modimo ka mabaka a boithati e sego ka lerato la kgonthe.—Die. 27:11.
4. (a) Ge Jesu a boela legodimong, o ile a re direla’ng gomme Jehofa o ile a arabela bjang? (b) O ikwa bjang ka seo Jehofa le Jesu ba go diretšego sona?
4 Jesu o dirile mo gontši kua legodimong. O ‘bonagetše pele ga sefahlego sa Modimo bakeng sa rena’ ka mohola wa “madi a gagwe.” Tatago rena yo lerato wa legodimong ka botho o amogetše sehlabelo sa bohlokwa sa Jesu e le “sehlabelo sa poelanyo bakeng sa dibe tša rena.” Ka gona, ka ‘matswalo a hlwekilego,’ re ka neela “tirelo e kgethwa go Modimo yo a phelago.” Se se re nea lebaka la go dumelelana le mantšu a mathomo a Psalme 112 (NW) a rego, “Tumišang Jah!”—Baheb. 9:12-14, 24; 1 Joh. 2:2.
5. (a) Re swanetše go dira’ng gore re dule re e-na le boemo bjo bo nepagetšego pele ga Modimo? (b) Psalme 111 le 112 di rulagantšwe bjang?
5 Gore re dule re lokile pele ga Modimo, re swanetše go ba le tumelo mading a Jesu a tšholotšwego. Re swanetše go leboga Jehofa ka mehla kudu-kudu bakeng sa lerato leo a re ratago ka lona. (Joh. 3:16) Gape re swanetše go tšwela pele re ithuta Lentšu la Modimo gomme re dire seo re ka se kgonago gore re phele ka go dumelelana le molaetša wa lona. Psalme 112 e na le dikeletšo tše dibotse bakeng sa bao ba nyakago go ba le letswalo le le hlwekilego pele ga Modimo. Psalme ye e dumelelana le Psalme 111. Ka leleme la mathomo la Seheberu, bobedi bja tšona di thoma ka mantšu ao a nago le leswao la makalo a rego “Tumišang Jah!” goba “Haleluya!” gomme di latelwa ke methaladi e 22 woo o mongwe le o mongwe o thomago ka ditlhaka tše 22 tša mongwalo wa Seheberu. *
Motheo wa Lethabo
6. “Monna” yo a boifago Modimo yo a hlalositšwego go Psalme 112 o šegofaditšwe bjang?
6 “Monna wa lehlóxônôlô ké e a boifaxo Morêna, a kxahlwa xaxolo ke ’tayô tša xaxwe. Bana ba xaxwe e tlo ba ba matla lefaseng; leloko la baloki le tlo šexofatšwa.” (Ps. 112:1, 2) Ela hloko gore sa pele mopsalme o bolela ka “monna” o tee gomme a buša a bolela ka “baloki” ba bantši karolong ya mafelelo ya temana ya bobedi. Se se ka ba se e-ra gore Psalme 112 e ka šupa go sehlopha seo se bopšago ke batho ba bantši. Ka mo go kgahlišago, moapostola Paulo o ile a budulelwa gore a diriše Psalme 112:9 go Bakriste ba lekgolong la pele la nywaga. (Bala 2 Bakorinthe 9:8, 9.) Ruri psalme ye e bontšha gabotse kudu kamoo balatedi ba Kriste ba lefaseng ba ka thabago ka gona lehono!
7. Ke ka baka la’ng bahlanka ba Modimo ba swanetše go mmoifa ka mo go swanetšego gomme wena o swanetše go ikwa bjang ka ditaelo tša Modimo?
7 Bjalo ka ge go bontšhitšwe go Psalme 112:1, Bakriste ba ba therešo ba ba le lethabo le legolo ge ba sepela ka go ‘boifa Jehofa.’ Poifo ye ya go boifa go se mo kgahliše e ba thuša go gana moya wa lefase la Sathane. Ba “kxahlwa xaxolo” ke go ithuta Lentšu la Modimo le go kwa ditaelo tša gagwe. Seo se akaretša taelo ya gore re bolele ditaba tše dibotse tša Mmušo lefaseng ka bophara. Ba katanela go dira batho ba ditšhaba ka moka barutiwa ge ba dutše ba lemoša bakgopo ka letšatši la kahlolo la Modimo leo le tlago.—Hesek. 3:17, 18; Mat. 28:19, 20.
8. (a) Batho ba Modimo bao ba ineetšego lehono ba neilwe moputso bjang ka baka la phišego ya bona? (b) Ke ditšhegofatšo dife tšeo di letetšego bao ba nago le kholofelo ya go phela lefaseng?
8 Ka baka la go kwa ditaelo tše bjalo, palo ya bahlanka ba Modimo lefaseng lehono ke e ka bago dimilione tše šupago. Ke mang yo a ka ganago gore batho ba gagwe ke “ba matla lefaseng”? (Joh. 10:16; Kut. 7:9, 14) Le gona, ba tla “šexofatšwa” gakaakang ge Modimo a phethagatša morero wa gagwe! E le sehlopha, bao ba nago le kholofelo ya go phela lefaseng ba tla phološwa “masetlapelong a magolo” e le gore ba thome “lefase le lefsa” moo ‘toko e tla agago gona.’ Ge nako e dutše e e-ya, baphologi ba Haramagedone ba “tlo šexofatšwa” kudu. Ba tla be ba itokišeleditše go amogela ba dimilione bao ba tla bego ba tsošitšwe. A tebelelo e kgahlišago gakaakang! Mafelelong, ba go “kxahlwa xaxolo” ke tayo ya Modimo ba tla phethagala gomme ka mehla ba thabela “tokologo ya letago ya bana ba Modimo.”—2 Pet. 3:13; Baroma 8:21. 8:21.
Tirišo e Bohlale ya Mahumo
9, 10. Bakriste ba therešo ba dirišitše bjang mahumo a bona a moya gomme go loka ga bona go tla ema bjang go tiile mehla yohle?
9 “Ka ngwakong wa xaxwe xo tlo ba le lešexo le menônô, xo loka xa xaxwe xo ka se kê xwa šišinyêxa. Mo xo baloki ó etša seedi xó sile, è le yo botho, yo lešôkô le xo loka.” (Ps. 112:3, 4) Mehleng ya Beibele, ba bangwe ba bahlanka ba Modimo ba be ba tumile ka baka la dilo tša bona tše di bonagalago. Ka kgopolo e nngwe, bao Modimo a ba amogelago ba a huma e le ka kgonthe, gaešita le ge go huma moo e se ka dilo tše di bonagalago. Ntlha ke gore, ba bantši bao ba kgethago go ikokobetša pele ga Modimo e ka ba e le badiidi gomme ba tšeelwa fase, go etša ge go be go le bjalo mehleng ya Jesu. (Luka 4:18; 7:22; Joh. 7:49) Eupša go sa šetšwe gore motho o na dilo tše di bonagalago tše dintši goba tše dinyenyane, go a kgonega gore a hume moyeng.—Mat. 6:20;1 Tim. 6:18, 19; bala Jakobo 2:5.
10 Bakriste ba tloditšwego, gotee le bagwera ba bona, ga ba bontšhe go ba dingame ka mahumo a bona a moya. Go e na le moo, ke ‘dietša’ lefaseng la lefsifsi la Sathane gomme “mo xo baloki [ba] etša seedi.” Ba dira bjalo ka go thuša ba bangwe gore ba holege dithutong tše bohlokwa tša moya le tsebong ya Modimo. Baganetši ba lekile go thibela modiro wa go bolela ka Mmušo eupša ba paletšwe. Go e na le moo, dienywa tša modiro wo wa go loka di tla ‘ema di tiile mehla yohle.’ Ka go kgotlelela tseleng ya go loka, bahlanka ba Modimo ba ka kgodišega gore ba tla phela ka mo go sa felego, ba ‘eme ba tiile mehla yohle.’
11, 12. Ke ditsela dife tše dingwe tšeo ka tšona batho ba Modimo ba dirišago dilo tše di bonagalago tšeo ba nago le tšona?
11 Batho ba Modimo, bobedi ba sehlopha sa mohlanka sa batlotšwa le “lešaba le legolo” ba itlhatsetše e le bao ba neelago ka seatla se se bulegilego ka dilo tše di bonagalago. Psalme 112:9 e balega ka gore: “Xa a time, ó nea modiidi.” Lehono Bakriste ba therešo gantši ba dira meneelo ka dilo tše di bonagalago go Bakriste-gotee le bona gaešita le go baagišani bao ba se nago sa bona. Le gona ba diriša dilo tše di bonagalago bakeng sa go thekga masolo ao a neago thušo dinakong tša mathata. Bjalo ka ge Jesu a ile a bontšha gore go be go tla ba bjalo, seo le sona ke mothopo wa lethabo.—Bala Ditiro 20:35; 2 Bakorinthe 9:7.
12 Go oketša moo, nagana ka tšhelete yeo e dirišwago bakeng sa go gatiša makasine wo ka maleme a 172 ao bontši bja ona a bolelwago ke batho bao ba se nago sa bona. Le gona, ela hloko gore go dirilwe ditokišetšo tša gore makasine wo o hwetšagale ka dipolelo tše di fapa-fapanego tša diatla tšeo di dirišwago ke difoa gotee le mongwalo wa Braille wo o dirišwago ke difofu.
Kgaugelo le go Loka
13. Ke bomang bao ba beago mehlala e mebotse ya go nea ka kgaugelo gomme re ka ekiša mohlala wa bona bjang?
13 “Monna yo boló ké yeo a diraxo ka botho.” (Ps. 112:5) Ga go pelaelo gore o lemogile gore batho bao thušago ba bangwe ga se ka mehla e lego bao ba nago le kgaugelo. Ba bangwe ba neela ka go bontšha gore ba na le mo gontši go feta ba bangwe goba ba gana go nea. Ga se mo go thabišago go thušwa ke motho yoo a dirago gore o ikwe o le tlasana goba yoo a dirago gore o ikwe o lapiša goba o le morwalo. Ka mo go fapanego, ke mo go lapološago go amogela thušo go motho yoo a nago le kgaugelo. Jehofa ke mohlala o mogolo wa Monei wa kgaugelo, yo a thabilego. (1 Tim. 1:11; Jak. 1:5, 17) Jesu Kriste o ile a bontšha ka mo go phethagetšego mohlala wa Tatagwe wa kgaugelo. (Mar. 1:40-42) Ka gona, gore re lebelelwe ke Modimo re le ba lokilego, re nea re thabile le ka kgaugelo, kudu-kudu tirelong ya tšhemo ge re thuša baagišani ba rena moyeng.
14. Ke ditsela dife tše dingwe tšeo ka tšona re ka ‘sekago ditaba tša rena ka molao’?
14 “[O] sêka ’taba tš’axwe ka molaô.” (Ps. 112:5) Bjalo ka ge go boletšwe e sa le pele, sehlopha sa molaki yo a botegago se hlokomela dilo tša Mong wa sona ka go dumelelana le toka ya Jehofa. (Bala Luka 12:42-44.) Se se bonagala tlhahlong ya Mangwalo yeo e newago bagolo bao ka dinako tše dingwe ba swaraganago le melato ya go dirwa ga sebe se segolo ka phuthegong. Tsela e lokilego ya go swaragana le mathata ke yeo e bonagalago gape le tlhahlong yeo e theilwego Beibeleng yeo sehlopha sa mohlanka se e neago bakeng sa go bontšha gore ke bjang diphuthego, magae a baromiwa le magae a Bethele a swanetšego go šoma ka gona. Ga se feela go bagolo mo go nyakegago toka eupša e nyakega gape le go Bakriste ba bangwe ditirišanong tša bona le ba bangwe gaešita le go bao e sego badumedi go akaretša le ditabeng tša kgwebo.—Bala Mika 6:8, 11.
Ditšhegofatšo Bakeng sa Baloki
15, 16. (a) Ditaba tše mpe tša lefase di kgoma baloki bjang? (b) Bahlanka ba Modimo ba ikemišeditše go tšwela pele ba dira’ng?
15 “A ka se kê a šutha neng le neng; moloki ó tsebya xo ya xo ile. Xa a boife ’thsêlê tša ba babe; pelo ya xaxwe e tiile à botile Morêna. Pelo ya xaxwe e thekxilwe; xa a boife selô; ó tlo bôna se se tl’o xo dirwa manaba a xaxwe.” (Ps. 112:6-8) Le ka mohla historing, ga se gwa ka gwa ba le ditaba tše mpe gakaakaa, tšeo di akaretšago dilo tše swanago le dintwa, botšhošetši, malwetši a mafsa le a kgale ao a dulago a boa, bosenyi, bodiidi le tšhilafalo yeo e bakago tshenyo. Bao Modimo a ba lebelelago e le ba lokilego ba ka se pheme mafelelo a ditaba tše tše mpe, eupša ga ba boife bokamoso. Go e na le moo, dipelo tša bona di “tiile” gomme di “thekxilwe” ge ba dutše ba lebeletše bokamoso ka kholofelo, ba tseba gore lefase le lefsa la Modimo la go loka le kgaufsi. Ge masetlapelo a direga, ba kgona go lebeletšana le boemo ka gobane ba ithekga ka Jehofa. Le ka mohla a ka se dumelele baloki ba “šutha”—o ba nea thušo le matla a go kgona go kgotlelela.—Bafil. 4:13.
16 Baloki ba Modimo le bona ba lebeletšana le lehloyo le maaka ao a phatlalatšwago ke baganetši, eupša se se paletšwe ke go tswalela Bakriste ba therešo melomo gomme se tla tšwela pele se palelwa. Go e na le moo, bahlanka ba Modimo ba tšwela pele ba eme ba tiile gomme ba sa šišinyege modirong woo Jehofa a ba neilego wona—go bolela ditaba tše dibotse tša Mmušo le go dira bohle bao ba arabelago gore e be barutiwa. Ga go pelaelo gore baloki ba tla lebeletšana le kganetšo e kgolo ge bofelo bo dutše bo batamela. Lehloyo le bjalo le tla fihla tlhoreng ya lona tlhaselong ya lefaseng ka bophara ya Sathane Diabolo karolong ya gagwe e le Gogo wa Magogo. Ke moka, mafelelong re tla ‘lebelela manaba a rena’ ge a dutše a fenywa ka mo go feletšego. E tla ba mo go kgahlišago gakaakang go bona kgethagatšo e feletšego ya leina la Jehofa!—Hesek. 38:18, 22, 23.
“Phaxama ka xo Rêtwa”
17. Ke bjang baloki ba tlago go “phaxama ka xo rêtwa”?
17 E tla ba mo go thabišago gakaakang go tumiša Jehofa re le batee, go se na kganetšo go tšwa go Diabolo le lefase la gagwe! Lethabo le bjalo e tla ba bohwa bja ka mo go sa felego bja bohle bao ba tšwelago pele ba e-na le boemo bjo bo lokilego le Modimo. Ba ka se ke ba fenywa wa go nyamiša ka gobane Jehofa o holofeditše gore “’naka” la baloki ba gagwe le tla “phaxama ka xo rêtwa.” (Ps. 112:9) Baloki ba Jehofa ba tla hlalala ka phenyo ge ba bona go fenywa ka moka ga manaba a bogoši bja Jehofa.
18. Mantšu a phethago a Psalme 112 a tla phethagatšwa bjang?
18 “Yo mobe ó di bôna a dumala; ó tšikitlanya mênô a fêlêla; xò senyêxa se a bexo a se hutša.” (Ps. 112:10) Kgaufsinyane bohle bao ba tšwelago pele ba ganetša batho ba Modimo ba tla ‘fetšwa’ ke lehufa le lehloyo la bona. Kganyogo ya bona ya go bona modiro wa rena o fela e tla fela le bona nakong ya “masetlapelo a magolo.”—Mat. 24:21.
19. Re ka kgodišega ka’ng?
19 Na o tla ba gare ga baphologi ba thabilego ba phenyo yeo e kgolo? Goba ge e ba go ka direga gore ka baka la bolwetši goba botšofadi o hwe pele lefase la Sathane le fedišwa, na o tla ba gare ga “ba lokilego” bao ba tlago go tsošwa? (Dit. 24:15) Karabo e ka ba ee ge e ba o tšwela pele o bontšha tumelo sehlabelong sa Jesu sa topollo gomme o ekiša Jehofa, go etša ge go dira bao ba swantšhetšwago ke “monna” wa moloki yoo a hlaloswago go Psalme 112. (Bala Baefeso. 5:1, 2.) Jehofa o tla dira gore ba bjalo ba ‘tsebje’ ka mehla le gore ditiro tša bona tša go loka ga di tšeelwe fase. Ba tla tsebja le go ratwa ke Jehofa ka mehla le mehla.—Ps. 112:3, 6, 9.
[Mongwalo wa tlase]
^ ser. 5 Taba ya gore dipsalme tše tše pedi di a dumelelana e bonagala ka mokgwa woo di ngwadilwego ka wona gaešita le ka dikagare tša tšona. Dika tša Modimo tšeo go boletšwego ka tšona go Psalme 111 di ekišwa ke “monna” yo a boifago Modimo wa Psalme 112, bjalo ka ge seo se ka bonwa ka go bapiša Psalme 111:3, 4 le Psalme 112:3, 4.
Dipotšišo Bakeng sa go Naganišiša
• Ke mabaka afe a mangwe ao ka wona re ka hlalalago ka gore “Haleluya”?
• Ke tšwelopele efe ya mehleng yeno yeo e dirago gore Bakriste ba therešo thabe kudu?
• Jehofa o rata monei wa mohuta mang?
[Dipotšišo tša Thuto]
[Seswantšho go letlakala 25]
Gore re dule re lokile pele ga Modimo, re swanetše go ba le tumelo mading a tšholotšwego a Jesu
[Diswantšho go letlakala 26]
Meneelo yeo e newago ka go rata e ka thuša ka modiro wa tlhakodišo le go phatlalatšwa ga dikgatišo tše di theilwego Beibeleng