Potego ya Gago e Thabiša Pelo ya Jehofa
Potego ya Gago e Thabiša Pelo ya Jehofa
“Ngwan’a-ka! Hlalefa, O nthabišê pelo, ke tsebê se nkaxo fetola sôna xe ba nnyatša.”—DIE. 27:11.
1, 2. (a) Puku ya Jobo e hlalosa tlhohlo efe yeo e dirilwego ke Sathane? (b) Ke’ng seo se bontšhago gore Sathane o tšwetše pele go hlohla Jehofa ka morago ga mehla ya Jobo?
JEHOFA o ile a dumelela Sathane go leka potego ya mohlanka wa gagwe yo a botegago e lego Jobo. Ka baka leo, Jobo o ile a lahlegelwa ke diruiwa le bana ba gagwe gomme a babja. Eupša ge Sathane a be a leka potego ya Jobo, o be a se a nagana ka Jobo feela. Sathane o itše: “Letlalô le kxônwa ka letlalô. Motho tše a naxo natšô’ a ka di nthša tšohle xe a hlêkêlêla bophelô bya xaxwe.” Tlhohlo ye e ile ya tsoša kgang yeo e bego e sa akaretše Jobo feela le yeo ilego ya tšwela pele nako e telele ka morago ga lehu la Jobo.—Jobo 2:4.
2 Mo e ka bago nywaga e 600 ka morago ga diteko tša Jobo, Solomone o ile a budulelwa go ngwala gore: “Ngwan’a-ka! Hlalefa, O nthabišê pelo, ke tsebê se nkaxo fetola sôna xe ba nnyatša.” (Die. 27:11) Go molaleng gore ka nako yeo Sathane o be a sa dutše a hlohla Jehofa. Go feta moo, ponong yeo e neilwego moapostola Johane, Sathane o ile a bonwa a latofatša bahlanka ba Modimo ka morago ga gore a rakwe legodimong nako e itšego ka morago ga go thewa ga Mmušo wa Modimo ka 1914. Ee, gaešita le lehono moo re tseneletšego bofelong bja tshepedišo ye e kgopo ya dilo, Sathane o sa dutše a leka potego ya bahlanka ba Modimo!—Kut. 12:10.
3. Ke dithuto dife tša bohlokwa tšeo re ithutago tšona pukung ya Jobo?
3 Ka gona, ela hloko dithuto tše tharo tša bohlokwa tšeo re ithutago tšona pukung ya Jobo. Ya pele, diteko tša Jobo di utolla lenaba la kgonthe la batho le mothopo wa kganetšo go batho ba Modimo. Lenaba leo ke Sathane Diabolo. Ya bobedi, go sa šetšwe gore ke diteko dife tšeo di ka re welago, go ba le tswalano ya kgaufsi le Modimo go tla re thuša go dula re botega. Ya boraro, ge diteko di tšwelela gomme re lekwa ka tsela e itšego, Modimo o a re thekga bjalo ka ge a ile a thekga Jobo. Lehono Jehofa o re thekga ka Lentšu la gagwe, mokgatlo wa gagwe le moya wa gagwe o mokgethwa.
Dula o Gopola Gore Lenaba la Kgonthe ke Mang
4. Ke mang yo a ikarabelago ka maemo a gona bjale a lefase?
4 Batho ba bantši ga ba dumele gore Sathane o gona. Ka gona, gaešita le ge ba ka tšhošwa ke maemo a lefase, ga ba lemoge mothopo wa ona wa kgonthe—Sathane Diabolo. Batswadi ba rena ba pele e lego Adama le Efa ba ile ba kgetha go itokolla go Mmopi wa bona. Go tloga ka nako yeo, meloko e latetšego e dirile ka go hloka bohlale. Lega go le bjalo, ke Diabolo yo a ilego a fora Efa gore a rabele go Modimo. Ke yena a hlamilego tshepedišo ya dilo yeo e lego ka tlase ga taolo ya gagwe bathong ba sa phethagalago le ba hwago. Ka ge Sathane e le “modimo wa tshepedišo ye ya dilo,” lekoko la batho le bonagatša dika tšeo di swanago le tša gagwe e lego boikgogomošo, go rata manganga, lehufa, megabaru, boradia le borabele. (2 Bakor. 4:4; 1 Tim. 2:14; 3:6; bala Jakobo 3:14, 15.) Dika tše bjalo di bakile dintwa tša dipolotiki le tša bodumedi, lehloyo, kgobogo le mpherefere, e lego dilo tšeo di tlaleletšago tlaišegong ya batho.
5. Ke’ng seo re nyakago go se dira ka tsebo e bohlokwa yeo re nago le yona?
5 Ruri rena bjalo ka bahlanka ba Jehofa re na le tsebo e bohlokwa kudu! Ee, re a tseba gore ke mang yo a ikarabelago ka maemo a mpefalago a lefase. Ka gona, na ga re ikwe re gapeletšega go tšea karolo bodireding bja tšhemo e le gore re tsebiše batho gore mothopo o mogolo wa mathata ke mang? Le gona, na ga re thabele go ema ka lehlakoreng la Modimo wa therešo e lego Jehofa le go hlalosetša ba bangwe kamoo a tlago go fediša Sathane gotee le mathata a batho ka gona?
6, 7. (a) Ke mang yo a ikarabelago ka go tlaišwa ga barapedi ba therešo? (b) Re ka ekiša bjang mohlala wa Elihu wa bogologolo?
6 Sathane ga a ikarabele feela ka mathata a lefase eupša o ikarabela gape le ka kganetšo yeo batho ba Modimo ba lebanago le yona. O ikemišeditše go re leka. Jesu Kriste o boditše moapostola Petro gore: “Simone, Simone, bona! Sathane o le kganyogile gore a le fefere bjalo ka korong.” (Luka 22:31) Ka mo go swanago, yo mongwe le yo mongwe wa rena yo a latelago dikgato tša Jesu o tla lebeletšana le diteko ka tsela e itšego. Petro o swantšhitše Diabolo le ‘tau e rorago yeo e nyakago go metša yo mongwe.’ Le gona, Paulo o itše: “Bohle bao ba ratago go phela ka boineelo go Modimo tswalanong le Kriste Jesu le bona ba tla hlomarwa.”—1 Pet. 5:8; 2 Tim. 3:12.
7 Re ka bontšha bjang gore re dula re gopola gore lenaba la kgonthe ke mang ge modumedi-gotee le rena a welwa ke kotsi? Go e na le go ikarola go yena, re ekiša Elihu wa bogologolo yo a ilego a bolela le Jobo bjalo ka mogwera wa kgonthe. Re thuša ngwanabo rena go lwa le lenaba la rena e lego Sathane. (Die. 3:27; 1 Bathes. 5:25) Pakane ya rena ke go thuša morapedi-gotee le rena go dula a botega go sa šetšwe seo se ka diregago gomme a thabiše pelo ya Jehofa.
8. Ke ka baka la’ng Sathane a se ka a atlega maitekong a gagwe a go dira gore Jobo a kgaotše go godiša Jehofa?
8 Selo sa pele sa bohlokwa seo Sathane a ilego a se lobiša Jobo ke diruiwa tša gagwe. Diphoofolo tšeo e be e le tša bohlokwa, mohlomongwe o be a iphediša ka tšona. Eupša Jobo o be a di diriša gape borapeding bja gagwe. Ka morago ga gore Jobo a hlwekiše bana ba gagwe, o ile “a tsoxa è sa le bošexo, a dira dihlabêlô ka xo ya ka palô ya bôná bohle, xobane ó be a re: Mohlomong bana ba-ka ba sentše ba fapana le Modimo dipelong tša bôná.—Ké tšôna tše Jobo a bexo a fêla a di dira.” (Jobo 1:4, 5) Ka go rialo, Jobo o be a direla Jehofa dihlabelo ka diphoofolo ka mehla. Ge diteko di šetše di thomile, go be go se sa hlwa go kgonega gore a dire bjalo. Jobo o be a se na “khumô” yeo a bego a ka godiša Jehofa ka yona. (Die. 3:9) Eupša o be a ka kgona—ebile o ile a kgona—go godiša Jehofa ka molomo wa gagwe!
Hlagolela Tswalano ya Kgaufsi le Jehofa
9. Selo sa bohlokwa kudu seo re nago le sona ke’ng?
9 Go sa šetšwe gore re humile goba re a diila, re sa le ba bafsa goba re tšofetše, re phetše gabotse goba re a fokola, re ka hlagolela tswalano ya kgaufsi le Jehofa. Go sa šetšwe diteko tšeo re lebeletšanago le tšona, go ba le tswalano ya kgaufsi le Modimo go re thuša gore re dule re botega gomme re thabiše pelo ya Jehofa. Gaešita le batho bao bego ba e-na le tsebo e nyenyane ya therešo ba ile ba ba le sebete gomme ba dula ba botega.
10, 11. (a) Kgaetšedi yo mongwe wabo rena o ile arabela bjang ge a be a lekwa? (b) Ke karabo efe e matla yeo kgaetšedi yo a e neilego Sathane?
10 Ela hloko mohlala wa Kgaetšedi Valentina Garnovskaya, e lego yo mongwe wa Dihlatse tša kua Russia tšeo go swana le Jobo yo a botegago di ilego tša dula di botega go sa šetšwe diteko tše šoro. Ka 1945, ge a be a e-na le nywaga e 20, ngwanabo rena yo mongwe o ile a mo nea bohlatse. O ile a boa gape ka makga a mabedi gore a tlo bolela le yena ka Beibele, eupša ka morago ga moo Valentina ga se a ka a mmona gape. Lega go le bjalo, Valentina o ile a thoma go bolela le baagišani ba gagwe ka Beibele. Ka baka leo, o ile a golegwa gomme a ahlolelwa nywaga e seswai kampeng. Ka 1953 o ile a lokollwa gomme a thomološa modiro wa boboledi gatee-tee. O ile a swarwa gape gomme a išwa kgolegong—nakong ye a ahlolelwa nywaga e lesome. Ka morago ga go fetša nywaga e mmalwa kampeng e nngwe, o ile a hudušetšwa go e nngwe. Kampeng yeo go be go e na le dikgaetšedi tšeo di bego di e-na le kopi ya Beibele. Ka letšatši le lengwe, kgaetšedi yo mongwe o ile a bontšha Valentina Beibele. E be e le nako e thabišago gakaakang! Nagana feela, Beibele e nnoši yeo Valentina a ilego a e bona ke yeo e bego e swerwe ke ngwanabo rena yo a ilego a mo nea bohlatse ka 1945!
11 Ka 1967, Valentina o ile a lokollwa gomme mafelelong o ile a kgona go bontšha boineelo bja gagwe go Jehofa ka kolobetšo. O ile a diriša tokologo ya gagwe ka phišego e le gore a tšee karolo bodireding go fihla ka 1969. Lega go le bjalo, ngwageng woo o ile a golegwa gape gomme mo nakong ye a ahlolelwa nywaga e meraro kgolegong. Go sa šetšwe seo, Valentina o ile a tšwela pele ka boboledi. Pele a e-hwa ka 2001, o be a thušitše batho ba 44 go ithuta therešo. O be a feditše nywaga e 21 a le dikgolegong le dikampeng. O be a ikemišeditše go gafa dilo ka moka, go akaretša le tokologo ya gagwe, e le gore a dule a botega. Bofelong bja bophelo bja gagwe, Valentina o itše: “Ga se ka ka ka ba le ntlo. Thoto tša-ka ka moka di be di le ka sutukheiseng e tee feela, eupša ke be ke thabile gomme ke kgotsofaletše go hlankela Jehofa.” Ruri Valentina o neile karabo e matla go Sathane yo a boletšego gore batho ba ka se dule ba botegela Modimo ge ba lebeletšane le diteko! (Jobo 1:9-11) Re ka kgodišega gore Valentina o thabišitše pelo ya Jehofa le gore Jehofa o fagahletše nako yeo ka yona a tlago go tsoša Valentina gotee le ba bangwe ka moka bao ba hwilego ba botega.—Jobo 14:15.
12. Lerato le kgatha tema efe tswalanong ya rena le Jehofa?
12 Segwera sa rena le Jehofa se theilwe leratong leo re mo ratago ka lona. Re tšeela godimo dika tša Modimo gomme re dira sohle seo re ka se kgonago go phela ka go dumelelana le merero ya gagwe. Go fapana le seo Diabolo a se bolelago, re rata Jehofa e sego ka gobane go e na le seo a re holofeditšego sona e bile re mo rata go sa šetšwe seo se ka diregago. Lerato le leo le tšwago pelong le a re matlafatša gore re kgone go dula re botega ge re lebeletšane le teko. Ge e le Jehofa yena, o tla ‘leta tsela ya baratwa ba gagwe.’—Die. 2:8; Ps. 97:10.
13. Jehofa o lebelela bjang seo re mo direlago sona?
13 Lerato le re tutueletša go godiša leina la Jehofa go sa šetšwe gore re ikwa eka ga re sa kgona go dira mo gontši. O bona maikemišetšo a rena a mabotse gomme ga a re ahlole ge e ba re sa kgone go dira sohle seo re ka ratago go se dira. Sa bohlokwa ga se feela selo seo re se dirago, eupša le lebaka leo ka lona re se dirago le bohlokwa. Gaešita le ge Jobo a be a kwele bohloko gomme a kgotleletše diteko tše dintši, o ile a botša balatofatši ba gagwe ka go rata ga gagwe ditsela tša Jehofa. (Bala Jobo 10:12; 28:28.) Kgaolong ya mafelelo ya puku ya Jobo, Modimo o ile a galefela Elifase, Bilidada le Tsofara ka ge ba sa ka ba bolela therešo. Ka nako e swanago, Jehofa o ile a bontšha gore o amogela Jobo ka go mmitša ka makga a mararo gore ke “mohlanka wa-ka” le ka go mo laela gore a rapelele badiradibe bao. (Jobo 42:7-9) Eka le rena re ka dira dilo ka tsela yeo e tla dirago gore Jehofa a re amogele.
Jehofa o Thekga Bahlanka ba Gagwe ba Botegago
14. Jehofa o ile a thuša Jobo go fetoša tsela ya gagwe ya go nagana bjang?
14 Jobo o ile a dula a botega gaešita le ge a be a se a phethagala. Ka dinako tše dingwe ge a be a le ka tlase ga kgateletšo e šoro, o be a e-ba le pono e fošagetšego. Ka mohlala, o ile a re go Jehofa: “Ke a Xo bitša, ’me xa O arabe . . . O lwa le nna ka matla a ’atla tša xaxo.” Go oketša moo, Jobo o ile a lebiša tlhokomelo ka mo go sa swanelago go itokafatšeng gagwe ge a be a re: ‘Ga ke yo mobe’ le gore ‘diatla tša-ka ga di na borumolane le thapelo ya-ka ga e na bosodi.’ (Jobo 10:7; 16:17; 30:20, 21) Lega go le bjalo, Jehofa o ile a thuša Jobo ka botho ka go mmotšiša lelokelelo la dipotšišo tšeo di ilego tša tloša tlhokomelo go yena. Le gona, di ile tša mo thuša go bona gabotse bophagamo bja Modimo le bonyenyane bja motho. Jobo o ile a amogela keletšo gomme a fetoša pono ya gagwe.—Bala Jobo 40:8; 42:2, 6.
15, 16. Lehono Jehofa o nea bahlanka ba gagwe thušo ka ditsela dife?
15 Lehono, Jehofa gape o nea bahlanka ba gagwe tlhahlo e lerato le e tiilego. Ka godimo ga moo, re thabela mehola e tlišwago ke seo. Ka mohlala, Jesu Kriste o neile sehlabelo sa topollo gomme a thea motheo bakeng sa tebalelo ya dibe. Motheong wa sehlabelo seo, re ka ba le tswalano ya kgaufsi le Modimo go sa šetšwe go se phethagale ga rena. (Jak. 4:8; 1 Joh. 2:1) Le gona, ge re lebeletšane le diteko, re rapelela thekgo le matla a moya o mokgethwa wa Modimo. Go oketša moo, re na le Beibele e feletšego gomme ge e ba re e bala le go naganišiša ka dikagare tša yona, re itokišetša diteko tša tumelo. Go ithuta go re thuša go kwešiša kgang ya bogoši bja legohle le ya potego ya motho ka noši.
16 Ka godimo ga moo, re holega kudu ka go ba karolo ya borwarre bja lefase ka bophara bjoo Jehofa a bo fepago ka dijo tša moya a diriša “mohlanka yo a botegago le wa temogo.” (Mat. 24:45-47) Go e nngwe le e nngwe ya diphuthego tša Dihlatse tša Jehofa tše ka bago 100 000, go swarwa diboka tšeo di re rutago le go re matlafaletša go lebeletšana le diteko tšeo di ka tšwelelago tša tumelo. Se se bontšhwa ke phihlelo ya Sheila, e lego mofsa yo a lego mahlalagading wa Hlatse yo a dulago Jeremane.
17. Phihlelo ya ngwanenyana yo mongwe e bontšha bjang bohlale bja go ba gona ka mehla dibokeng tša Bokriste?
17 Ka letšatši le lengwe ge Sheila a be a le sekolong, go ile gwa se tle morutiši ka klaseng ya bona ka nakwana. Barutwana-gotee le yena ba ile ba dira phetho ya go diriša letlapa leo le dirišetšwago go ikgokaganya le meoya leo le bitšwago Ouija. Gatee-tee, Sheila o ile a tšwa ka klaseng gomme seo a ilego a se kwa ka morago se ile sa dira gore a thabišwe ke gore o ile a dira bjalo. Ge ba be ba diriša Ouija, barutwana ba bangwe ba ile ba kwa go ba gona ga batemona ka klaseng gomme ba tšhaba ba tšhogile. Lega go le bjalo, ke’ng seo se ilego sa thuša Sheila go dira phetho ya go tšwa ka klaseng ka bjako? Sheila o hlalosa gore: “Pele ga tiragalo ye, re be re ile ra ahla-ahla dikotsi tša Ouija dibokeng Holong ya Mmušo. Ka gona, ke be ke tseba seo ke swanetšego go se dira. Ke be ke nyaka go thabiša Jehofa bjalo ka ge Beibele e bolela go Diema 27:11.” Ruri e bile mo gobotse gore Sheila a be gona dibokeng gomme a theetše lenaneo ka kelohloko!
18. O ikemišeditše go dira’ng?
18 Anke yo mongwe le yo mongwe wa rena a ikemišetše go kgomarela tlhahlo yeo re e newago ke mokgatlo wa Modimo. Ka go ba gona ka mehla dibokeng, go bala Beibele, go ithuta dikgatišo tšeo di theilwego Beibeleng, thapelo le go gwerana le Bakriste ba godilego tsebong, re hwetša tlhahlo le thekgo tšeo re di nyakago. Jehofa o nyaka gore re fenye gomme o kgodišegile gore re tla tšwela pele re botega. Ruri re na le tokelo e kgolo kudu ya go godiša leina la Jehofa, go dula re botega le go thabiša pelo ya Jehofa!
Na o a Gopola?
• Sathane o ikarabela ka maemo le diteko dife?
• Selo sa bohlokwa kudu seo re nago le sona ke sefe?
• Motheo wa segwera sa rena le Jehofa ke ofe?
• Ke ditsela dife tše dingwe tšeo Jehofa a re thekgago ka tšona lehono?
[Dipotšišo tša Thuto]
[Seswantšho go letlakala 8]
Na o ikwa o gapeletšega go botša ba bangwe tsebo e bohlokwa yeo o nago le yona?
[Seswantšho go letlakala 9]
Re ka thuša barapedi-gotee le rena gore ba dule ba botega
[Seswantšho go letlakala 10]
Valentina o be a ikemišeditše go gafa dilo tšohle e le gore a dule a botega