Dithapelo tša Gago di Utolla’ng ka Wena?
Dithapelo tša Gago di Utolla’ng ka Wena?
“Batho ka moka ba tla xo Wene Mokwi wa dithapêlô.”—PS. 65:2.
1, 2. Ke ka baka la’ng bahlanka ba Jehofa ba swanetše go mo rapela ka kgodišego?
JEHOFA le ka mohla ga a hlokomologe dithapelo tša bahlanka ba gagwe bao ba botegago. Re ka kgodišega gore o a re kwa. Gaešita le ge Dihlatse tša Jehofa tše dimilione di be di ka rapela Modimo ka nako e tee, Jehofa o tla kgona go di theetša ka moka ga tšona.
2 A kgodišegile gore Modimo o kwele dithapelo tša gagwe, mopsalme Dafida o opetše ka gore: “Batho ka moka ba tla xo Wene Mokwi wa dithapêlô.” (Ps. 65:2) Dithapelo tša Dafida di ile tša arabja ka gobane e be e le morapedi yo a botegago wa Jehofa. Le rena re ka ipotšiša gore: ‘Na dithapelo tša-ka di bontšha gore ke bota Jehofa le gore borapedi bjo bo sekilego ke selo sa bohlokwa kudu go nna? Dithapelo tša-ka di utolla’ng ka nna?’
Rapela Jehofa ka Boikokobetšo
3, 4. (a) Re swanetše go rapela Modimo re e-na le boemo bofe bja monagano? (b) Re swanetše go dira’ng ge e ba re tlaišwa ke “dikxopolô” ka baka la sebe se segolo seo re se dirilego?
3 E le gore dithapelo tša rena di arabje, re swanetše go rapela Modimo ka boikokobetšo. (Ps. 138:6) Re swanetše go kgopela Jehofa gore a re hlahlobe go etša Dafida, yo a ilego a re: “Modimo, mphetlêkê, O tsebê pelo ya-ka; O ntekê O tsebê dikxopolô tša-ka. O mpônê xe nka ba wa tsela e mpe, O nkišê tseleng e sa felexo.” (Ps. 139:23, 24) Anke re se keng ra rapela feela, eupša gape re dumelele Modimo gore a re hlahlobe gomme re ikokobeletše keletšo ya Lentšu la gagwe. Jehofa a ka re iša “tseleng e sa felexo” gomme a re thuša go phegelela tsela ya bophelo yeo e lebišago bophelong bjo bo sa felego.
4 Go thwe’ng ge e ba re tlaišwa ke “dikxopolô” ka baka la sebe se segolo seo re se dirilego? (Bala Psalme 32:1-5.) Go leka go gatelela letswalo le molato go ka re nola moko go etša ge sehlare se felelwa ke monola ka baka la phišo ya selemo. Ka baka la sebe, Dafida o ile a lahlegelwa ke lethabo gomme go ka direga gore o ile a babja. Eupša o ile a imologa gakaakang ge a be a ipobola go Modimo! Akanya kamoo Dafida a ilego a thaba ka gona ge a lemoga gore Jehofa o mo ‘lebaletše dikarogo’ tša gagwe. Go ipobola dibe go Modimo go ka tliša kimollo gomme bagolo ba Bakriste ba tla thuša go dira gore modiri wa bobe a buše a phele gabotse moyeng.—Die. 28:13; Jak. 5:13-16.
Lopa Modimo Gomme o mo Leboge
5. Re swanetše go dira’ng ge re e-na le dipelaelo?
5 Ge e ba re e-na le dipelaelo tše dintši ka mabaka le ge e le afe, re swanetše go diriša keletšo ya Paulo e rego: “Le se ke la belaela ka selo, eupša dilong tšohle tsebišang Modimo dikgopelo tša lena ka thapelo le ka topo gotee le ka go leboga.” (Bafil. 4:6) Re swanetše go lopa Jehofa gore a re thuše le go re hlahla, kudu-kudu ge re lebeletšane le kotsi goba re tlaišwa.
6, 7. Re na le mabaka afe a go akaretša ditebogo dithapelong tša rena?
6 Lega go le bjalo, ge e ba re rapela feela ge go e na le selo seo re se nyakago, seo se tla utolla’ng ka maikemišetšo a rena? Paulo o itše re swanetše go tsebiša Modimo dikgopelo tša rena ‘gotee le go mo leboga.’ Ruri re na le mabaka a go bolela mantšu ao a swanago le a Dafida a rego: “Morêna, boxolo ké bya xaxo, le matla, le letaxô, le dithêtô, le borêna; xobane tšohle kwa lexodimong le mo lefaseng ké tša xaxo; O mmuši, O hlôxô ye e iphaxamišitšexo xodimo xa tšohle . . . Modimo, byale rena re a Xo leboxa, re rêta Leina la xaxo le le taxilexo.”—1 Kor. 29:11-13.
7 Jesu o ile a leboga Modimo bakeng sa dijo gotee le senkgwa le beine tšeo ba di jelego nakong ya Dijo tša Morena tša Mantšiboa. (Mat. 15:36; Mar. 14:22, 23) Ka ntle le go bontšha tebogo e swanago, re swanetše go ‘leboga Morena’ ka baka la “mehlôlô a xo e dira xo bana ba batho” le “dikahlolô tša [gagwe] tša tokô” gotee le lentšu la gagwe goba molaetša woo ga bjale o hwetšagalago ka Beibeleng.—Ps. 107:15; 119:62, 105.
Rapelela ba Bangwe
8, 9. Ke ka baka la’ng re swanetše go rapelela Bakriste-gotee le rena?
8 Ga go na pelaelo gore re a ithapelela, eupša dithapelo tša rena di swanetše go akaretša le ba bangwe—gaešita le Bakriste bao re sa tsebego maina a bona. Le ge moapostola Paulo a ka ba a be a sa tsebe maina a badumedi ka moka ba Kolose, o ngwadile gore: “Re leboga Modimo Tatago Morena wa rena Jesu Kriste ka mehla ge re le rapelela, ka ge re kwele ka tumelo ya lena mabapi le Kriste Jesu le lerato leo le nago le lona go bakgethwa bohle.” (Bakol. 1:3, 4) Le gona, Paulo o ile a rapelela Bakriste ba Thesalonika. (2 Bathes. 1:11, 12) Dithapelo tša mohuta woo di utolla mo gontši ka rena le kamoo re ikwago ka gona ka bana babo rena le dikgaetšedi.
9 Go rapelela ga rena Bakriste ba tloditšwego gotee le bagwera ba bona ba “dinku tše dingwe,” go nea bohlatse bja gore re tshwenyega ka mokgatlo wa Modimo. (Joh. 10:16) Paulo o ile a kgopela badumedi-gotee le yena gore ba mo rapelele e le gore ‘a newe go kgona go bolela gore a tsebatše sephiri se sekgethwa sa ditaba tše dibotse.’ (Baef. 6:17-20) Na re rapelela Bakriste ba bangwe ka tsela yeo?
10. Go rapelela ba bangwe go ka ba le mafelelo afe go rena?
10 Go rapelela ba bangwe go ka fetoša tsela yeo re ba lebelelago ka yona. Ge e ba re rapelela motho yo a itšego gaešita le ge re sa mo rate, na re ka tšwela pele re mo hloile? (1 Joh. 4:20, 21) Dithapelo tša mohuta wo di a aga e bile di dira gore go be le botee magareng ga rena le bana babo rena. Ka godimo ga moo, dithapelo tše bjalo di bontšha gore re na le lerato leo le swanago le la Kriste. (Joh. 13:34, 35) Seka seo sa lerato ke karolo ya seenywa sa moya wa Modimo. Na re rapelela moya o mokgethwa, re kgopela Jehofa gore a re thuše go bonagatša seenywa sa ona e lego lerato, lethabo, khutšo, bopelotelele, botho, bolo, tumelo, boleta le boitshwaro? (Luka 11:13; Bagal. 5:22, 23) Ge e ba go le bjalo, mantšu le ditiro tša rena di tla bontšha gore re sepela le go phela ka moya o mokgethwa.—Bala Bagalatia 5:16, 25.
11. Ke ka baka la’ng o ka re ke mo go swanetšego go kgopela ba bangwe gore ba re rapelele?
11 Ge e ba re e-kwa gore bana ba rena ba lekega gore ba hlalefetše ka go kopiša ge ba ngwala ditlhahlobo sekolong, re swanetše go ba rapelela le go ba thuša ka Mangwalo e le gore ba ka botega gomme ba se ke ba dira selo le ge e le sefe seo se fošagetšego. Paulo o boditše Bakriste ba Korinthe gore: “Re rapela Modimo gore le se ke la dira selo sa phošo.” (2 Bakor. 13:7) Dithapelo tše bjalo tšeo di bontšhago boikokobetšo di thabiša Jehofa gomme di re bolelela gabotse. (Bala Diema 15:8.) Re ka kgopela ba bangwe gore ba re rapelele, go etša ge Paulo a dirile. O ngwadile gore: “Tšwelang pele le re rapelela, gobane re holofela gore re na le letswalo le botegago, ka ge re rata go itshwara ka go botega dilong tšohle.”—Baheb. 13:18.
Dithapelo tša Rena di Bolela mo Gontši
12. Ke dilo dife tšeo di swanetšego go ba karolo ya bohlokwa ya dithapelo tša rena?
12 Na dithapelo tša rena di utolla gore re Dihlatse tšeo di thabilego le tšeo di fišegago tša Jehofa? Na ditopo tša rena di bontšha gore re tshwenyegile kudu ka go itumelelanya le thato ya Modimo, go bolelwa ga molaetša wa Mmušo, go godišwa ga bogoši bja Jehofa le go kgethagatšwa ga leina la gagwe? Dilo tše e swanetše go ba karolo ya bohlokwa ya dithapelo tša rena, go etša ge Jesu a bontšhitše thapelong ya gagwe ya mohlala, yeo e thomago ka mantšu a rego: “Tatago rena wa magodimong, leina la gago a le kgethagatšwe. Mmušo wa gago a o tle. Thato ya gago a e direge le mo lefaseng bjalo ka ge e direga legodimong.”—Mat. 6:9, 10.
13, 14. Dithapelo tša rena di utolla’ng ka rena?
13 Ge re bolela le Modimo ka thapelo re utolla maikemišetšo a rena, dilo tšeo re di kgahlegelago gotee le dikganyogo tša rena. Jehofa o tseba seo re lego sona ka gare. Diema 17:3 e re: “Meubeng xo lekwa thsipi-thsêhla; mollong xo lekwa thsipi-khwibidu; Mo-leka-pelo ké Morêna.” Modimo o bona seo se lego ka dipelong tša rena. (1 Sam. 16:7) O tseba kamoo re ikwago ka gona ka diboka, bodiredi gotee le bana babo rena le dikgaetšedi ba moya. Jehofa o tseba kamoo re ikwago ka gona ka ‘bana babo’ Kriste. (Mat. 25:40) O tseba ge e ba re tloga re kganyoga seo re se rapelelago goba ge e ba re fo ba re boa-boetša mantšu. Jesu o itše: “Ge o rapela, o se ke wa boa-boetša dilo tše di swanago, go etša ge batho ba ditšhaba ba dira, gobane [ka phošo] ba akanya gore ba tla kwewa ka go diriša ga bona mantšu a mantši.”—Mat. 6:7.
14 Le gona, seo re se bolelago ge re rapela se utolla gore re ithekgile ka Modimo gakaakang. Dafida o itše: “’Thšabêlô sa-ka ké Wene [Jehofa]; O sebô sa-ka se se tiilexo xe ke thšaba manaba. A nke ke y’o dula mo Ngwakong wa xaxo ka mehla le mehla; ke khutê ke phêmêlwê ke ’phêxô tša xaxo.” (Ps. 61:3, 4) Ge Modimo ka tsela ya seswantšhetšo a ‘phurolla tente ya gagwe godimo ga rena,’ re thabela polokego le tlhokomelo ya gagwe yeo e re šireletšago. (Kut. 7:15) Ke mo go homotšago gakaakang go batamela kgaufsi le Jehofa ka thapelo re kgodišegile gore ‘o na le rena’ ge re lebeletšane le teko le ge e le efe ya tumelo!—Bala Psalme 118:5-9.
15, 16. Thapelo e ka re thuša go lemoga’ng ka kganyogo ya rena ya go katanela go swanelegela ditokelo tša tirelo?
15 Ge re rapela Jehofa ka potego mabapi le maikemišetšo a rena seo se tla re thuša go lemoga ge e ba maikemišetšo ao e le a kgonthe. Ka mohlala, na ruri phišego ya rena ya go hlankela maemong a bolebeledi gare ga batho ba Modimo e tutuetšwa ke go nyaka go thuša ka boikokobetšo le go dira sohle seo re ka se kgonago go tšwetša pele dikgahlego tša Mmušo? Goba na go ka direga gore re nyaka go ba “maemong a pele” goba re nyaka go ‘buša ba bangwe ka thata’? Ga se gwa swanela go ba bjalo gare ga batho ba Modimo. (Bala 3 Johane 9, 10; Luka 22:24-27.) Ge e ba re e-na le dikganyogo tšeo di fošagetšego, go rapela Jehofa Modimo ka tsela yeo e se nago boikaketši go ka utolla dikganyogo tšeo gomme gwa re thuša go fetoga pele di tsema medu.
16 Basadi ba Bakriste ba ka ba le kganyogo e tseneletšego ya gore banna ba bona ba hlankele bjalo ka bahlanka ba bodiredi gomme mafelelong e be balebeledi goba bagolo. Dikgaetšedi tše di ka ba tša dira dilo ka go dumelelana le maikwelo ao di a tšweletšago dithapelong tša tšona tša ka thopeng ka go katanela go itshwara ka tsela yeo e beago mohlala. Seo se bohlokwa, ka gobane dipolelo le boitshwaro bja lapa la monna di kgoma tsela yeo a lebelelwago ka yona ka phuthegong.
Go Rapela Legatong la ba Bangwe
17. Ke ka baka la’ng go le bohlokwa gore re be noši ge re rapela ka thopeng?
17 Ka dinako tše dingwe Jesu o be a tloga lešabeng e le gore a rapele Tatagwe ka thopeng. (Mat. 14:13; Luka 5:16; 6:12) Le rena re swanetše go rapela ka thopeng. Ge re rapela re iketlile re le maemong ao go se nago lešata, re ka kgona go dira diphetho tšeo di tlago go thabiša Jehofa le tšeo di tlago go re boloka re tiile moyeng. Lega go le bjalo, Jesu gape o be a rapela phatlalatša gomme ke mo gobotse gore re ahla-ahle kamoo re ka dirago bjalo ka mokgwa o swanetšego.
18. Ke dintlha dife tšeo bana babo rena ba swanetšego go di gopola ge ba rapela legatong la phuthego?
18 Ge re le dibokeng, banna ba botegago ba rapela legatong la phuthego. (1 Tim. 2:8) Bofelong bja thapelo yeo badumedi-gotee le rena ba swanetše go kgona gore “amene,” yeo e bolelago gore “a go be bjalo.” Lega go le bjalo, e le gore ba kgone gore amene, ba swanetše go dumelelana le seo se boletšwego. Jesu ga se a ka a bolela selo seo se tšhošago goba seo se sa bontšhego go naganela ba bangwe thapelong ya gagwe ya mohlala. (Luka 11:2-4) Go oketša moo, ga se a ka a bolela ditaba ka botlalo mabapi le dinyakwa goba mathata a motho yo mongwe le yo mongwe yo a bego a mo theeditše. Ke mo go swanetšego gore re bolele ka mathata a motho ka noši thapelong ya ka thopeng, e sego ya phatlalatša. Le gona, ge re rapela legatong la sehlopha, re swanetše go phema go bolela diphiri.
19. Re swanetše go itshwara bjang nakong ya thapelo ya phatlalatša?
19 Ge go e na le motho yo a rapelago legatong la rena, re swanetše go bontšha gore re ‘boifa Modimo’ ka go bontšha tlhompho. (1 Pet. 2:17) Go na le mediro e mengwe yeo e ka bago e swanetšego lefelong le lengwe le ka nako e itšego yeo e ka se kego ya swanelega dibokeng tša Bokriste. (Mmo. 3:1) Ka mohlala, a re re motho yo mongwe o nyaka gore bohle bao ba lego sehlopheng ba swarane ka matsogo nakong ya thapelo. Seo se ka kgopiša goba sa šitiša ba bangwe, go akaretša le baeng bao e sego badumedi-gotee le rena. Banyalani ba bangwe ba ka swarana ka matsogo ka tsela yeo e sa kgopišego ba bangwe, eupša ge e ba ba gokarelana nakong ya thapelo ya phatlalatša, bao ba bonago boitshwaro bjo bjalo ba ka kgopišega. Ba ka nagana goba ba tlelwa ke kgopolo ya gore banyalani bao ba šeditše tsela yeo ba ratanago ka yona go e na le go hlompha Jehofa. Ka gona, anke re “[direng] dilo tšohle bakeng sa letago la Modimo” ka ge re mo hlompha ka mo go tseneletšego gomme re pheme boitshwaro bjo bo ka šitišago, bja tšhoša goba bja kgopiša ba bangwe.—1 Bakor. 10:31, 32; 2 Bakor. 6:3.
Re Swanetše go Rapelela’ng?
20. O ka hlalosa Baroma 8:26, 27 bjang?
20 Ka dinako tše dingwe go ka direga gore re se ke ra tseba seo re ka se bolelago dithapelong tša rena tša ka thopeng. Paulo o ngwadile gore: “Bothata bja seo re swanetšego go se rapelela go etša ge re swanetše ga re bo tsebe, eupša moya [o mokgethwa] ka bowona o re phophothela ditsetselong tše re di hlokelago mantšu. Lega go le bjalo, [Modimo] yo a fetlekago dipelo o tseba seo se bolelwago ke moya.” (Baroma 8:26, 27) Jehofa o dirile gore dithapelo tše dintši di ngwalwe ka Beibeleng. O amogela ditopo tše bjalo tšeo di buduletšwego e le dikgopelo tšeo re ka ratago go di dira gomme o a di phethagatša. Modimo o a re tseba e bile o tseba seo se bolelwago ke dilo tšeo a dirilego gore moya wa gagwe o di bolele ka bangwadi ba Beibele. Jehofa o araba dithapelo tša rena ge moya o re “phophothela” goba o re bolelela. Eupša ge re dutše re tlwaelana gakaone le Lentšu la Modimo, seo re swanetšego go se rapelela se ka itlela gabonolo.
21. Ke’ng seo re tlago go se ahla-ahla sehlogong se se latelago?
21 Bjalo ka ge re bone, dithapelo tša rena di utolla mo gontši ka rena. Ka mohlala, di ka utolla kamoo re batametšego kgaufsi le Jehofa ka gona le kamoo re tsebago Lentšu la gagwe gakaone ka gona. (Jak. 4:8) Sehlogong se se latelago, re tla ahla-ahla dithapelo tše itšego le mantšu a itšego a thapelo ao a ngwadilwego ka Beibeleng. Tlhahlobo e bjalo ya Mangwalo e ka ba le mafelelo afe dithapelong tša rena go Modimo?
O be o tla Araba Bjang?
• Re swanetše go rapela Jehofa re e-na le boemo bofe bja monagano?
• Ke ka baka la’ng re swanetše go rapelela badumedi-gotee le rena?
• Dithapelo tša rena di ka utolla’ng ka rena le maikemišetšo a rena?
• Re swanetše go itshwara bjang nakong ya thapelo ya phatlalatša?
[Dipotšišo tša Thuto]
[Seswantšho go letlakala 4]
Na o tumiša Jehofa le go mo leboga ka mehla?
[Seswantšho go letlakala 6]
Tsela yeo re itshwarago ka yona nakong ya dithapelo tša phatlalatša e swanetše go godiša Jehofa ka mehla