Banna, na le Ikokobeletša Bohlogo bja Kriste?

“Hlogo ya monna yo mongwe le yo mongwe ke Kriste.”—1 BAKOR. 11:3.

1. Ke’ng seo se bontšhago gore Jehofa ke Modimo wa thulaganyo?

KUTOLLO 4:11 e re: “Jehofa, wena Modimo wa rena o swanelwa ke go amogela letago, kgodišo le matla, gobane o bopile dilo ka moka, gomme di bile gona le go bopša ka baka la thato ya gago.” Ka ge a bopile dilo ka moka, Jehofa Modimo ke Mmuši yo a Phagamego wa legohle gomme o phagametše tlholo ya gagwe ka moka. Taba ya gore Jehofa ga “se Modimo wa tlhakatlhakano eupša ke wa khutšo” e ka bonwa tseleng yeo lapa la gagwe la barongwa le rulagantšwego ka yona.—1 Bakor. 14:33; Jes. 6:1-3; Baheb. 12:22, 23.

2, 3. (a) Tlholo ya Jehofa ya pele e bile mang? (b) Na Morwa wa leitšibulo o lekana le Tatagwe?

² Pele dilo tše dingwe ka moka di ka bopša, Modimo o be a dutše a le gona ka nywaga e sa balegego. Tlholo ya gagwe ya mathomo e be e le sebopiwa sa moya seo se tsebjago e le “Lentšu” ka ge e be e le Mmoleledi wa Jehofa. Lentšu ke yena yoo dilo tše dingwe ka moka di ilego tša bopša ka yena. Ka morago, o ile a tla lefaseng e le motho yo a phethagetšego gomme a tsebja e le Jesu Kriste.—Bala Johane 1:1-3, 14.

³ Na Mangwalo a re Modimo le Morwa wa gagwe wa leitšibulo ba a lekana? Moapostola Paulo o re botša seo a ilego a budulelwa go se ngwala, o re: “Ke nyaka ge le tseba gore hlogo ya monna yo mongwe le yo mongwe ke Kriste; hlogo ya mosadi yona ke monna; hlogo ya Kriste yona ke Modimo.” (1 Bakor. 11:3) Kriste o ka tlase ga bohlogo bja Tatagwe. Bohlogo le go ikokobetša di bohlokwa gore go be le khutšo le thulaganyo gare ga dibopiwa tše bohlale. Gaešita le yoo ‘dilo tše dingwe ka moka di hlodilwego ka yena’ o swanetše go ikokobeletša bohlogo bja Modimo.—Bakol. 1:16.

4, 5. Jesu o ile a ikwa bjang ka boemo bja gagwe go Jehofa?

⁴ Jesu o ile a ikwa bjang ka go ikokobeletša bohlogo bja Jehofa le go tla lefaseng? Mangwalo a re botša gore: “Kriste Jesu, yoo, gaešita le ge a be a le ka sebopego sa Modimo [ga se a ka] a nagana ka go thopa, e lego, gore o swanetše go lekana le Modimo. Aowa, eupša o ile a itlhohlora a ba ka sebopego sa mohlanka a swana le batho. Go feta moo, ge a ikhwetša a le ka sebopego sa motho, a ikokobetša gomme a ba yo a kwago go fihla lehung, ee, lehung koteng ya tlhokofatšo.”—Bafil. 2:5-8.

⁵ Ka dinako ka moka, Jesu ka boikokobetšo o be a dira thato ya Tatagwe. O itše: “Nka se dire selo le se tee ka la-ka; . . . kahlolo yeo ke e neago ke ya go loka, gobane ga ke nyake gore go dirwe thato ya-ka, eupša ke nyaka gore go dirwe thato ya yo a nthomilego.” (Joh. 5:30) O ile a ba a re: “Ka mehla ke dira dilo tše di kgahlišago [Tate].” (Joh. 8:29) Go ya mafelelong a bophelo bja gagwe bja lefaseng, Jesu o ile a botša Tatagwe thapelong gore: “Ke go tagafaditše lefaseng ka go phetha modiro wo o nneilego wona gore ke o dire.” (Joh. 17:4) Go molaleng gore Jesu o be a se na bothata bja go lemoga le go amogela bohlogo bja Modimo.

Go Ikokobeletša Tate go Tlišetša Morwa Ditšhegofatšo

6. Ke dika dife tše dibotse tšeo Jesu a ilego a di bontšha?

⁶ Ge a be a le lefaseng, Jesu o ile a bontšha dika tše dintši tše dibotse. Se sengwe sa tšona ke lerato le legolo leo a ilego a le bontšha Tatagwe. O itše: “Ke rata Tate.” (Joh. 14:31) O ile a ba a  bontšha gore o rata batho kudu. (Bala Mateo 22:35-40.) Jesu o be a le botho e bile a naganela, a se sehlogo goba a gatelela. O itše: “Tlang go nna, lena bohle bao le lapišitšwego le go imelwa, ke tla le lapološa. Rwalang joko ya-ka le ithute go nna, gobane ke wa moya o boleta e bile ke wa pelo e ikokobeditšego, gomme le tla hweletša meoya ya lena tapologo. Gobane joko ya-ka e botho, morwalo wa-ka o bohwefo.” (Mat. 11:28-30) Batho bao ba swanago le dinku ba nywaga e fapa-fapanego, kudu-kudu bao ba bego ba gateletšegile, ba ile ba homotšwa kudu ke semelo sa Jesu se se kgahlišago le molaetša wa gagwe o matlafatšago.

7, 8. Ka tlase ga Molao, mosadi yo a bego a swerwe ke bolwetši bja ngope o be a thibetšwe go dira’ng, eupša Jesu o ile a dirišana bjang le yena?

⁷ Ela hloko kamoo Jesu a ilego a dirišana le basadi ka gona. Historing ka moka, banna ba bantši ba be ba swara basadi gampe kudu. Se se be se dirwa le ke baetapele ba bodumedi ba Isiraele ya bogologolo. Eupša Jesu o be a swara basadi ka tlhompho. Se se bonagala tseleng yeo a ilego a dirišana le mosadi yoo a bego a swerwe ke bolwetši bja ngope ka nywaga e 12. O be a “tlaišitšwe kudu” ke dingaka gomme a feditše dilo tša gagwe ka moka a leka gore a fole. Go sa šetšwe tšeo ka moka, bolwetši bo be bo “befetše pele.” Ka tlase ga Molao, o be a lebelelwa a sa hlweka. Selo se sengwe le sengwe seo a bego a se kgoma se be se šilafala.—Lef. 15:19, 25.

⁸ Ge mosadi yo a e-kwa gore Jesu o fodiša balwetši, o ile a tla lešabeng leo le bego le mo kgobokanetše gomme a re: “Ge nka kgwatha feela dikobo tša gagwe tša ka ntle ke tla fola.” O ile a kgwatha Jesu gomme gatee-tee a fola. Jesu o be a tseba gore mosadi yo o be a se a swanela go kgwatha kobo ya gagwe. Lega go le bjalo, ga se a ka a mo omanya. Go e na le moo, o ile a mmontšha botho. O be a kwešiša kamoo mosadi yo a bego a ikwa ka gona nywaga ye ka moka ya bolwetši gomme a lemoga gore ruri o be a nyaka thušo. Ka lešoko, Jesu a re go yena: “Morwedi wa-ka, tumelo ya gago e go fodišitše. Sepela ka khutšo, gomme o fole.”—Mar. 5:25-34.

9. Jesu o ile a arabela bjang ge barutiwa ba gagwe ba be ba leka go thibela bana go tla go yena?

⁹ Gaešita le bana ba be ba lokologa ge ba be ba e-na le Jesu. Tiragalong e nngwe ge batho ba be ba tliša bana go Jesu, barutiwa ba gagwe ba ile ba ba thibela, go bonagala ba be ba nagana gore a ka se nyake go tshwenywa ke bana. Eupša yeo e be e se tsela yeo Jesu a bego a ikwa ka yona. Pego ya Mangwalo e re botša gore: “Jesu ge a bona se a galefa gomme a re go [barutiwa]: ‘Lesang bana ba banyenyane ba tle go nna; le se leke go ba thibela, gobane mmušo wa Modimo ke wa ba bjalo ka bona.’” Ke moka “a gokarela bana a thoma go ba šegofatša, a ba bea diatla.” Jesu ga se a fo kgotlelela go fetša nako a e-na le bana, o be a ba amogela ka borutho.—Mar. 10:13-16.

10. Go tlile bjang gore Jesu a be le dika tšeo a ilego a di bontšha?

¹⁰ Go tlile bjang gore Jesu a be le dika tšeo a ilego a di bontšha ge a be a phela mo lefaseng? Pele ga bophelo bja gagwe bja lefaseng, o ile a ithuta go Tatagwe wa legodimong ka nako e telele. (Bala Diema 8:22, 23.) Ge a be a le legodimong, o ile a bona tsela ya lerato yeo Jehofa a bego a diriša bohlogo ka yona godimo ga tlholo ya Gagwe ka moka gomme a mo ekiša. Na Jesu o be a ka kgona go dira dilo tše ka moka ge nkabe a se a ikokobeletša bohlogo bja Tatagwe? O be a thabela go ikokobeletša Tatagwe gomme Jehofa o be a thabela go ba le Morwa yo bjalo. Ge a be a le lefaseng, Jesu o ile a bontšha ka mo go phethagetšego dika tše dibotse tša Tatagwe wa legodimong. A tokelo e kgolo gakaakang go ikokobeletša Kriste, Mmuši wa Mmušo wa legodimong yo a kgethilwego ke Modimo!

Ekiša Dika tša Kriste

11. (a) Ke mang yo re swanetšego go katanela go mo ekiša? (b) Ke ka baka la’ng banna ka mo go kgethegilego ka phuthegong ba swanetše go katanela go ekiša Jesu?

¹¹ Ka moka ga rena ka phuthegong ya Bokriste, kudu-kudu banna, re swanetše go tšwela pele re katanela go ekiša dika tša Kriste. Go etša  ge go bontšhitšwe, Beibele e re: “Hlogo ya monna yo mongwe le yo mongwe ke Kriste.” Bjalo ka ge Kriste a ekišitše Hlogo ya gagwe, Modimo wa therešo, banna ba Bakriste ba swanetše go katanela go ekiša hlogo ya bona—Kriste. Ge a se na go ba Mokriste, moapostola Paulo o ile a dira bjalo. O ile a kgothaletša Bakriste-gotee le yena gore: “E-bang baekiši ba-ka, go etša ge nna ke le moekiši wa Kriste.” (1 Bakor. 11:1) Moapostola Petro o itše: “Le bileditšwe tseleng ye, gobane gaešita le Kriste o ile a tlaišega bakeng sa lena, a le tlogelela mohlala gore le latele dikgato tša gagwe kgaufsi.” (1 Pet. 2:21) Kgothatšo ya go ekiša Kriste e bohlokwa kudu go banna ka lebaka le lengwe gape. Ke bona bao e bago bagolo le bahlanka ba bodiredi. Ka ge Jesu a ile a thabela go ekiša Jehofa, banna ba Bakriste ba swanetše go thabela go ekiša Kriste le dika tša gagwe.

12, 13. Bagolo ba swanetše go swara bjang dinku tšeo di lego tlhokomelong ya bona?

¹² Bagolo ka phuthegong ya Bokriste ba swanetše go ithuta go ba bjalo ka Kriste. Petro o neile banna ba bagolo, goba bagolo, kgothatšo ye: “Dišang mohlape wa Modimo wo o lego tlhokomelong ya lena, e sego ka go gapeletšwa, eupša e be ka go rata; le gona e se be ka go rata leruo la go se botege, eupša e be ka go fišega; gape e se be ka go buša bao e lego bohwa bja Modimo, eupša e be ka go ba mehlala go mohlape.” (1 Pet. 5:1-3) Bagolo ba Bakriste ga se ba swanela go buša ka molamo wa tšhipi, go gatelela, go bea melao ka go se naganele ba bangwe goba go ba bogale. Ge ba ekiša mohlala wa Kriste, ba katanela go ba le lerato, go naganela, go ikokobetša le go ba botho ge ba dirišana le mohlape woo o lego ka tlase ga tlhokomelo ya bona.

 ¹³ Bao ba etelelago pele ka phuthegong ke banna ba sa phethagalago gomme ba swanetše gore ka mehla ba lemoge seo. (Baroma 3:23) Ka gona, ba swanetše go fagahlela go ithuta ka Jesu le go ekiša lerato la gagwe. Ba swanetše go naganišiša ka tsela yeo ka yona Modimo le Kriste ba dirišanago le batho gomme ba katanele go ba ekiša. Petro o re kgothatša ka gore: “Ka moka ga lena itlemeng ka go kokobela ga monagano yo mongwe go yo mongwe, gobane Modimo o ganetša baikgogomoši, eupša o nea baikokobetši botho bjo bo sa swanelago.”—1 Pet. 5:5.

14. Bagolo ba swanetše go godiša ba bangwe go fihla bokgoleng bofe?

¹⁴ Ditirišanong tša bona le mohlape wa Modimo, banna ba ba kgethilwego ka phuthegong ba swanetše go bontšha dika tše dibotse. Baroma 12:10 e re: “Leratong la borwarre e-bang le maikwelo a borutho a bonolo go yo mongwe le yo mongwe. Go bontšhaneng kgodišo, etelelang pele.” Bagolo le bahlanka ba bodiredi ba godiša ba bangwe. Go etša Bakriste ka kakaretšo, banna ba ga se ba swanela go ‘dira selo ka tshele goba ka go ikgopola, eupša ka monagano o ikokobeditšego ba swanetše go tšea gore ba bangwe ba ba feta ka bogolo.’ (Bafil. 2:3) Ruri bao ba etelelago pele ba swanetše go lebelela ba bangwe e le bao ba fetago ka bogolo. Ka go dira bjalo, banna ba kgethilwego ba tla ba ba latela keletšo ya Paulo e rego: “Lega go le bjalo, rena ba tiilego re swanetše go rwala mafokodi a bao ba sa tiago, gomme re se ke ra ikgahliša ka noši. Anke yo mongwe le yo mongwe wa rena a kgahliše moagišani wa gagwe ka se e lego se sebotse bakeng sa go mo aga. Gobane gaešita le Kriste ga se a ka a ikgahliša.”—Baroma 15:1-3.

‘Go Godiša Basadi’

15. Banna ba swanetše go dirišana bjang le basadi ba bona?

¹⁵ Bjale ela hloko keletšo ya Petro e yago go banna ba nyetšego. O ngwadile gore: “Lena banna, tšwelang pele le dula le [basadi ba lena] ka mokgwa wo o swanago go ya ka tsebo, le ba nea kgodišo go etša sebjana se fokolago, se setshadi.” (1 Pet. 3:7) Go godiša motho yo mongwe go bolela go mo tšeela godimo. Ka gona, o tla theetša dipono le dinyakwa tša motho yoo gomme o ka nyaka go dumelelana le yena ka ntle le ge e ba go e-na le lebaka le le kwagalago la go se dire bjalo. Ye ke tsela yeo monna a swanetšego go dirišana le mosadi wa gagwe ka yona.

16. Ke temošo efe yeo Lentšu la Modimo le e neago banna mabapi le go godiša basadi ba bona?

¹⁶ Ge a be a botša banna gore ba godiše basadi ba bona, Petro o ile a oketša ka temošo e rego: “E le gore dithapelo tša lena di se ke tša šitišwa.” (1 Pet. 3:7) Se se bontšha gabotse gore Jehofa o tšeela godimo tsela yeo monna a swarago mosadi wa gagwe ka yona. Dithapelo tša monna di ka thibelwa ge a palelwa ke go godiša mosadi wa gagwe. Go oketša moo, na basadi gantši ga ba arabele gabotse ge ba swarwa ka tlhompho ke banna ba bona?

17. Monna o swanetše go rata mosadi wa gagwe go fihla bokgoleng bofe?

¹⁷ Tabeng ya gore motho a rate mosadi wa gagwe, Lentšu la Modimo le eletša ka gore: “Banna ba swanetše go rata basadi ba bona bjalo ka mebele ya bona. . . . Gobane ga go na motho yo a kilego a hloya nama ya gagwe; eupša o a e fepa le go e babalela, go etša ge Kriste le yena a dira phuthego bjalo, . . . Yo mongwe le yo mongwe wa lena ka noši a rate mosadi wa gagwe bjalo ka ge a ithata.” (Baef. 5:28, 29, 33) Banna ba swanetše go rata basadi ba bona go fihla bokgoleng bofe? Paulo o ngwadile gore: “Banna, tšwelang pele le rata basadi ba lena go etša ge  Kriste le yena a ratile phuthego gomme a ikgafela yona.” (Baef. 5:25) Ee, monna o swanetše go ikemišetša le go gafa bophelo bja gagwe bakeng sa mosadi wa gagwe, go etša ge Kriste a dirile bjalo go ba bangwe. Ge monna wa Mokriste a swara mosadi wa gagwe ka botho, ka go mo naganela, a mo theetša ka kelohloko, a se na boithati, go ba bonolo go mosadi wa gagwe gore a ikokobeletše bohlogo bja gagwe.

18. Banna ba ka thušwa ke’ng go hlokomela boikarabelo bja bona lenyalong?

¹⁸ Na go nea mosadi kgodišo ka tsela ye ke selo seo go lego thata kudu gore banna ba se dire? Aowa, Jehofa a ka se ke a ba kgopela gore ba dire selo seo ba ka se kgonego go se dira. Go sa šetšwe seo, barapedi ba Jehofa ba ka kgona go hwetša thušo e phagametšego dilo ka moka legohleng—moya o mokgethwa wa Modimo. Jesu o itše: “Ka gona, ge e ba lena gaešita le ge le le ba kgopo le tseba go nea bana ba lena dimpho tše dibotse, gona Tate yo a lego legodimong o tla nea gakaakang moya o mokgethwa go bao ba mo kgopelago!” (Luka 11:13) Dithapelong tša bona, banna ba ka kgopela gore ka moya o mokgethwa, Jehofa a ba thuše ditirišanong tša bona le ba bangwe, go akaretša le basadi ba bona.—Bala Ditiro 5:32.

19. Go tla ahla-ahlwa’ng sehlogong sa rena se se latelago?

¹⁹ Ke therešo gore banna ba na le boikarabelo bjo boima bja go ithuta kamoo ba ka ikokobeletšago bohlogo bja Kriste le go bo ekiša. Eupša go thwe’ng ka basadi, kudu-kudu bao ba nyetšwego? Sehlogo se se latelago se tla ahla-ahla kamoo ba swanetšego go lebelela karolo ya bona thulaganyong ya Jehofa.

Na o a Gopola?

• Ke dika dife tša Jesu tšeo re swanetšego go di ekiša?

• Bagolo ba swanetše go swara dinku bjang?

• Monna o swanetše go swara mosadi wa gagwe bjang?

[Dipotšišo tša Thuto]

[Diswantšho go letlakala 10]

Ekiša Kriste ka go godiša ba bangwe