Kamoo Jesu a Godišago Toko ya Modimo

‘Modimo o beile Kriste e le sebego sa poelano ka tumelo mading a gagwe. Se e be e le gore a bontšhe toko ya gagwe.’—BAROMA 3:25.

1, 2. (a) Beibele e re ruta’ng mabapi le boemo bjoo batho ba lego go bjona? (b) Ke dipotšišo dife tšeo di tlago go ahla-ahlwa sehlogong se?

PEGO ya Beibele mabapi le borabele bja kua tšhemong ya Edene e tumile kudu. Ka moka ga rena re kgongwa ke ditla-morago tša sebe sa Adama go etša ge go hlaloswa ke mantšu a: “Ka motho o tee sebe se tsene lefaseng, gomme lehu la tsena ka sebe, ka baka leo lehu le aparetše batho bohle gobane bohle ba dirile sebe.” (Baroma 5:12) Go sa šetšwe kamoo re ka bago re leka ka thata ka gona go dira se se nepagetšego, re dira diphošo gomme re nyaka tebalelo ya Modimo. Moapostola Paulo le yena o ile a lla ka gore: “Botse bjo ke bo dumago ga ke bo dire, eupša bobe bjo ke sa bo dumego ke bjona ke bo dirilego tlwaelo. Ke motho yo a hlomolago pelo gakaakang!”—Baroma 7:19, 24.

² Boemo bja rena bja go se phethagale bo rotoša dipotšišo tše tše bohlokwa: Go tlile bjang gore Jesu wa Natsaretha a belegwe a se na sebe sa leabela, gona ke ka baka la’ng a ile a kolobetšwa? Tsela ya Jesu ya go phela e ile ya godiša toko ya Jehofa bjang? Ke ka baka la’ng Modimo a ile a dumelela manaba a Jesu go mo tlaiša le go mmolaya? Sa bohlokwa kudu, ke’ng seo se phethilwego ke lehu la Kriste?

Toko ya Modimo e a Hlohlwa

3. Sathane o forile Efa bjang?

³ Ka bošilo, batswadi ba rena ba pele e lego Adama le Efa ba ile ba hlanogela bogoši bja Modimo gomme ba nyaka go bušwa ke “noga ya kgale, ye e bitšwago Diabolo le Sathane.” (Kut. 12:9) Bona kamoo se se diregilego ka gona. Sathane o ile a belaela ge e ba tsela ya Jehofa Modimo ya go buša e lokile. O dirile se ka go botšiša Efa gore: “Afá Modimo ó boletše a re: Dihlare tšohle tša thšemo yé Le se kê la di ja?” Efa o ile a araba ka go bušeletša taelo e kwagalago ya Modimo ya gore se sengwe sa dihlare se be se se sa swanelwa go kgwathwa, go sego bjalo ba be ba tla hwa. Ke moka Sathane o ile a phara Modimo ka molato wa gore o bolela maaka. Diabolo o itše: “Le ka se kê la hwa lehu.” O ile a tšwela pele ka go fora Efa gore a dumele gore Modimo o be a ba fihlela selo se sengwe se sebotse le gore o be a tla swana le Modimo ge a ka ja seenywa seo, a ipuše.—Gen. 3:1-5.

4. Go tlile bjang gore batho ba be ka tlase ga pušo ya bonaba ya Sathane?

⁴ Ge e le gabotse, Sathane o be a bolela gore batho ba be ba tla thaba ge ba ipuša ntle le go bušwa ke Modimo. Go e na le gore Adama a godiše go loka ga pušo ya Modimo, o ile a theetša mosadi wa gagwe gomme le yena a ja seenywa se se ileditšwego. Ka gona, Adama o ile a lahlegelwa ke boemo bja go ba yo a phethagetšego pele ga Jehofa gomme a re imetša ka morwalo wa sebe le lehu. Ka yona nako yeo, moloko wa batho o ile wa ba ka tlase ga pušo ya bonaba ya Sathane, “modimo wa lefase lé.”—2 Bakor. 4:4, Beibele ya Sepedi; Baroma 7:14.

5. (a) Jehofa o ile a kgomarela bjang seo a se boletšego? (b) Ke’ng seo Modimo a se holofeditšego ditlogolo tša Adama le Efa?

⁵ Ka baka la ge Jehofa ka mehla a bolela therešo, o ile a ahlolela Adama le Efa lehu. (Gen. 3:16-19) Eupša seo se be se sa bolele gore morero wa Modimo o foloditše. Ga go bjalo le gatee! Ge Jehofa a be a ahlola Adama le Efa, o ile a bolela gore ditlogolo tša bona di tla ba le bokamoso  bjo bo phadimago. O dirile se ka go tsebatša morero wa gagwe wa go tšweletša “peu” yeo Sathane a bego a tla e loma serethe. Lega go le bjalo, Peu yeo e be e tla fola serethe seo se lomilwego gomme ya “phšatla [Sathane] hlôxô.” (Gen. 3:15) Ge e bolela ka Jesu Kriste, Beibele e gatelela se ka gore: “Morwa wa Modimo o bonagaditšwe bakeng sa morero wo, e lego, go fediša mediro ya Diabolo.” (1 Joh. 3:8) Eupša ke bjang boitshwaro bja Jesu le lehu la gagwe di godišitšego toko ya Modimo?

Seo se Bolelwago ke Kolobetšo ya Jesu

6. Re tseba bjang gore Jesu ga se a ka a abela sebe sa Adama?

⁶ Ge Jesu a godile, o be a swanetše go lekana tlwaa le Adama yo a bego a phethagetše. (Baroma 5:14; 1 Bakor. 15:45) Se se bolela gore Jesu o be a swanetše go belegwa a phethagetše. Se se be se tla kgonega bjang? Morongwa Gabariele o ile a hlalosa gabotse taba ye go mmago Jesu e lego Maria, a re: “Moya o mokgethwa o tla theogela go wena, gomme matla a Yo Godimo-dimo a tla go aparetša. Ka baka leo, le yo a tlago go belegwa o tla bitšwa yo mokgethwa, Morwa wa Modimo.” (Luka 1:35) Ge Jesu e be e sa le yo monyenyane, go bonagala Maria a ile a mmotša ditaba tše dingwe mabapi le go belegwa ga gagwe. Ka gona, lebakeng le lengwe ge Maria le tatago Jesu yo e sego wa madi, Josefa, ba be ba hwetša Jesu a le tempeleng ya Modimo, mošemane yo o ile a ba botšiša gore: “Na le be le sa tsebe gore ke swanetše go ba ntlong ya Tate?” (Luka 2:49) Go molaleng gore Jesu o tsebile e sa le yo monyenyane gore ke yena Morwa wa Modimo. Ka gona, go godiša toko ya Modimo go be go le bohlokwa kudu go yena.

7. Ke selo sefe se bohlokwa seo Jesu a bego a e-na le sona?

⁷ Jesu o bontšhitše gore ruri o kgahlegela dilo tša moya ka gore ka mehla o be a e-ba gona dibokeng tša borapedi. Ka ge a be a phethagetše, o swanetše go ba a ithutile le go kwešiša dilo ka moka tšeo a di kwelego le go di bala Mangwalong a Seheberu. (Luka 4:16) Le gona, o be a e-na le selo se sengwe se bohlokwa kudu—mmele o phethagetšego wa motho woo o bego o ka neelwa e le sehlabelo bakeng sa batho. Ge a be a kolobetšwa, Jesu o be a rapela e bile mohlomongwe o be a nagana ka mantšu a boporofeta ao a begilwego go Psalme 40:6-8.—Luka 3:21; bala Baheberu 10:5-10. *

8. Ke ka baka la’ng Johane Mokolobetši a ile a leka go ganetša Jesu go kolobetšwa?

⁸ Mathomong Johane Mokolobetši o ile a leka go ganetša Jesu go kolobetšwa. Ka baka la’ng? Ka gobane Johane o be a kolobetša Bajuda go  bontšha gore ba a itshola ka baka la dibe tšeo ba di dirilego kgahlanong le Molao. Ka ge e be e le wa leloko la kgaufsi, Johane o swanetše go ba a be a tseba gore Jesu o lokile gomme go be go sa nyakege gore a itshole. Jesu o ile a kgonthišetša Johane gore ruri o be A swanetše go kolobetšwa. Jesu o hlalositše gore: “Ka tsela yeo go re swanetše gore re phethe toko ka moka.”—Mat. 3:15.

9. Kolobetšo ya Jesu e be e swantšhetša’ng?

⁹ Ka ge Jesu e be e le motho yo a phethagetšego, o be a ka phetha ka gore yena, go swana le Adama, a ka kgona go tswala moloko o phethagetšego. Lega go le bjalo, Jesu ga se a kganyoga seo ka ge e be e se thato ya Jehofa gore se direge. Modimo o be a romile Jesu go tla lefaseng gore a phethe karolo ya Peu e holofeditšwego, goba Mesia. Se se be se akaretša gore Jesu a dire sehlabelo ka bophelo bja gagwe bjo bo phethagetšego. (Bala Jesaya 53:5, 6, 12.) Ke therešo gore kolobetšo ya Jesu e be e sa swane le ya rena. E be e sa akaretše go ineela go Jehofa, ka ge Jesu a be a šetše a le karolo ya setšhaba sa Modimo se se ineetšego sa Isiraele. Go e na le moo, kolobetšo ya Jesu e be e swantšhetša go itliša go tlo dira thato ya Modimo go etša ge go bontšhitšwe Mangwalong ao a bolelago ka Mesia.

10. Go dira ga Mesia thato ya Modimo go be go akaretša’ng, gona Jesu o ile a ikwa bjang ka se?

¹⁰ Thato ya Jehofa ka Jesu e be e akaretša go bolela ditaba tše dibotse tša Mmušo wa Modimo, go dira barutiwa le go ba lokišeletša modiro wa nakong e tlago wa go dira barutiwa. Go itliša ga Jesu go be go bile go akaretša go ikemišetša go kgotlelela tlaišo le lehu le sehlogo e le ge a thekga pušo ya Jehofa Modimo ya go loka. Ka ge Jesu a be a rata Tatagwe wa legodimong kudu, o be a kgahlišwa ke go dira thato ya Modimo gomme a kgotsofatšwa kudu ke go dira sehlabelo ka mmele wa gagwe. (Joh. 14:31) E bile o be a kgahlišwa ke go tseba gore mmele wa gagwe o phethagetšego o ka neelwa Modimo e le sehlabelo sa go re rekolla bokgobeng bja sebe le lehu. Na Modimo o ile a dumelela Jesu gore a ikgafe e le gore a phethagatše maikarabelo a a magolo? Ruri o ile a mo dumelela!

11. Jehofa o ile a bontšha bjang gore o amogela Jesu e le Mesia yo a holofeditšwego, goba Kriste?

¹¹ Bangwadi ka moka ba Diebangedi tše nne ba hlatsela gore Jehofa Modimo o amogetše Jesu ge a be a e-tšwa meetseng a Noka ya Jorodane. Johane Mokolobetši o hlatsela se ka gore: “Ke bone moya o theoga legodimong go etša leeba, gomme wa dula godimo ga [Jesu] . . . Ke bone seo, gomme ka hlatsela gore yo ke yena Morwa wa Modimo.” (Joh. 1:32-34) Go oketša moo, ka yona nako yeo Jehofa o tsebaditše gore: “Yo ke Morwa wa-ka, morategi, yo ke mo amogetšego.”—Mat. 3:17; Mar. 1:11; Luka 3:22.

O Ile a Botega go Fihla Lehung

12. Ke’ng seo Jesu a ilego a se dira nywageng e meraro le seripa ka morago ga go kolobetšwa?

¹² Nywageng e meraro le seripa yeo e ilego ya latela, Jesu o ile a swarega kudu ka go ruta batho ka Tatagwe le ka go loka ga pušo ya Modimo. Go sepela ka maoto go dikologa Naga ya Kholofetšo ka moka go ile gwa mo lapiša, eupša ga go le setee seo se ilego sa mo thibela go nea bohlatse bja therešo ka botlalo. (Joh. 4:6, 34; 18:37) Jesu o rutile ba bangwe ka Mmušo wa Modimo. O ile a bontšha seo Mmušo o tlago go se direla batho ka gore a fodiše balwetši, a fepe mašaba ao a swerwego ke tlala gaešita le go tsoša bahu.—Mat. 11:4, 5.

13. Ke’ng seo Jesu a ilego a se ruta mabapi le thapelo?

¹³ Go e na le gore a ithete ka dithuto le mediro ya gagwe ya go fodiša, Jesu o beile mohlala o mobotse wa gore ka boikokobetšo a iše tumišo ka moka go Jehofa. (Joh. 5:19; 11:41-44) Le gona Jesu o be a tseba dilo tše bohlokwa kudu tšeo re swanetšego go di rapelela. Dithapelo tša rena di swanetše go akaretša kgopelo ya gore leina la Modimo, Jehofa, “le kgethagatšwe” le gore pušo ya Modimo ya go loka e tšeele legato pušo e kgopo ya  Sathane gore “thato ya [Gagwe] e direge le mo lefaseng bjalo ka ge e direga legodimong.” (Mat. 6:9, 10) Jesu o ile a ba a re kgothaletša go dira dilo ka go dumelelana le dithapelo tšeo ka go “tsoma mmušo pele le toko ya [Modimo].”—Mat. 6:33.

14. Gaešita le ge Jesu a be a phethagetše, ke ka baka la’ng go be go nyakega gore a dire maiteko gore a phethe karolo ya gagwe morerong wa Modimo?

¹⁴ Ge nako ya gore Jesu a hwe lehu la sehlabelo e be e dutše e batamela, o ile a thoma go kwešiša ka botlalo boikarabelo bjo bogolo bjoo a bo rwelego. Morero wa Tatagwe le botumo bjo bobotse di be di ithekgile ka gore Jesu a kgotlelele go sekišwa ka go hloka toka le lehu le sehlogo. Matšatši a mahlano pele ga ge Jesu a ka hwa, o rapetše ka gore: “Bjale moya wa-ka o tshwenyegile, gomme ke tla re’ng? Tate, mphološe nakong ye. Lega go le bjalo, ke ka baka leo ke tlilego nakong ye.” Ka morago ga go ntšha maikwelo a a tlhago, Jesu ka go hloka boithati o ile a lebiša tlhokomelo tabeng e bohlokwa kudu gomme a rapela ka gore: “Tate tagafatša leina la gago.” Jehofa o ile a araba le semeetseng a re: “Ke le tagafaditše gomme ke tla buša ke le tagafatša.” (Joh. 12:27, 28) Ee, Jesu o be a ikemišeditše gore potego ya gagwe e lekwe o šoro go feta kamoo motho le ge e le ofe a ilego a lekwa. Eupša ga go pelaelo gore go kwa mantšu a Tatagwe wa legodimong go neile Jesu kholofelo e matla ya gore o tla atlega ge a dutše a tagafatša le go godiša pušo ya Jehofa. Ruri o ile a atlega!

Seo Lehu la Jesu le se Fihleletšego

15. Pele Jesu a ka hwa, ke ka baka la’ng a ile a re: “Go phethegile”?

¹⁵ Ge Jesu a be a fegilwe koteng ya tlhokofatšo a le kgaufsi le go hwa, o itše: “Go phethegile!” (Joh. 19:30) Ruri Jesu o ile a kgona go phethagatša dilo tše dikgolo ka thušo ya Modimo nakong ya nywaga e meraro le seripa go tloga kolobetšong go fihla lehung! Ge Jesu a be a e-hwa, go ile gwa ba le tšhišinyego e kgolo ya lefase gomme tona ya madira ya Roma yeo e bego e ikarabela ka tiragalo ye e ile ya gapeletšega go bolela gore: “Ka kgonthe motho yo e be e le Morwa wa Modimo.” (Mat. 27:54) Go bonagala tona ye e be e sa tšwa go bona Jesu a kwerwa ka baka la go ipitša Morwa wa Modimo. Go sa šetšwe dilo ka moka tšeo Jesu a ilego a tlaišwa ka tšona, o ile a dula a botega gomme a hlatsela gore Sathane o na le maaka a matala-tala. Sathane o ile a hlohla bohle bao ba thekgago pušo ya Modimo ka gore: “Motho tše a naxo natšô’ a ka di nthša tšohle xe a hlêkêlêla bophelô bya xaxwe.” (Jobo 2:4) Ka go botega ga gagwe, Jesu o ile a bontšha gore Adama le Efa le bona ba be ba ka botega ka tlase ga teko ya bona e nyenyane. Sa bohlokwa kudu, bophelo bja Jesu le lehu la gagwe di ile tša thekga le go godiša go loka ga pušo ya Jehofa. (Bala Diema 27:11.) Na go na selo se sengwe seo lehu la Jesu le ilego la se fihlelela? Ee, se gona!

16, 17. (a) Ke ka baka la’ng go kgonegile gore dihlatse tša Jehofa tša pele ga mehla ya Bokriste di lebelelwe ke Modimo e le tše di lokilego? (b) Jehofa o ile a putsa bjang potego ya Morwa wa gagwe, gomme ke’ng seo Morena Jesu Kriste a tšwelago pele a se dira?

¹⁶ Go na le bahlanka ba Jehofa ba bantši bao ba phetšego pele Jesu a ka tla lefaseng. Modimo o ile a ba lebelela ba lokile gomme a ba nea kholofelo ya tsogo. (Jes. 25:8; Dan. 12:13) Eupša ke lebaka lefe le legolo leo le dirago gore Modimo yo mokgethwa, Jehofa, a šegofatše batho ba badiradibe ka tsela e kgolo gakaakaa? Beibele ge e hlalosa, e re: “Modimo o [beile Jesu Kriste] e le sebego sa poelano ka tumelo mading a gagwe. Se e be e le gore a bontšhe toko ya gagwe gobane o be a lebalela dibe tšeo di dirilwego nakong e fetilego ge Modimo a be a bontšha bopelotelele; e le gore a bontšhe toko ya gagwe lebakeng le la  gona bjale, gore e be yo a lokilego gaešita le ge a bolela motho yo a dumelago go Jesu a lokile.”—Baroma 3:25, 26. *

¹⁷ Jehofa o ile a putsa Jesu ka go mo tsoša gomme a mmea boemong bjo bo phagametšego bjoo a bego a le go bjona pele a e-tla lefaseng. Jesu ga bjale o phela bophelo bja go se hwe e le sebopiwa sa moya se se tagafaditšwego. (Baheb. 1:3) Bjalo ka Moperisita yo a Phagamego le Kgoši, Morena Jesu Kriste o tšwela pele go thuša balatedi ba gagwe go godiša toko ya Modimo. Ruri re leboga gore Tatago rena wa legodimong, Jehofa, ke Moputsi wa bohle bao ba dirago se gomme ba mo hlankela ka potego e le ge ba ekiša Morwa wa gagwe!—Bala Psalme 34:3; Baheberu 11:6.

18. Go tla ahla-ahlwa’ng sehlogong se se latelago?

¹⁸ Batho bao ba botegago go tloga ka Abele ba bile le tswalano ya kgaufsi le Jehofa ka gobane ba bontšhitše tumelo e bile ba bile le kholofelo Peung e holofeditšwego. Jehofa o be a tseba gore Morwa wa gagwe o tla dula a botega le gore lehu la gagwe le tla bipa ka mo go feletšego “sebe sa lefase.” (Joh. 1:29) Lehu la Jesu le hola le batho ba mehleng yeno. (Baroma 3:26) Ka gona, topollo ya Kriste e ka go tlišetša ditšhegofatšo dife? Taba yeo e tla ahla-ahlwa sehlogong se se latelago.

[Mengwalo ya tlase]

O be o tla Araba Bjang?

• Toko ya Modimo e ile ya hlohlwa bjang?

• Kolobetšo ya Jesu e be e swantšhetša’ng?

• Ke’ng seo se fihleletšwego ke lehu la Jesu?

[Dipotšišo tša Thuto]

[Seswantšho go letlakala 9]

Na o a tseba gore kolobetšo ya Jesu e be e swantšhetša’ng?