Na Ruri o Leboga Ditšhegofatšo tše o Nago le Tšona?

KA MORAGO ga gore barwa ba Isiraele ba lokollwe ka mohlolo bokgobeng bja Egipita, ba be ba thabile ka ge ga bjale ba be ba ka rapela Jehofa ka bolokologi. (Ek. 14:29–15:1, 20, 21) Lega go le bjalo, go se go ye kae pono ya bona e ile ya fetoga. Ba ile ba thoma go belaela ka maemo a bona. Ka baka la’ng? Ka baka la gore ba ile ba se sa šetša seo Jehofa a ba diretšego sona gomme ba thoma go belaela ka mathata a bona a go dula lešokeng. Ba ile ba re go Moshe: “Le re’ng le re rotošitše la re ntšha nageng ya Egipita go tlo hwela mo lešokeng? Gobane mo ga go na dijo le meetse e bile meoya ya rena e hlaswa senkgwa se seo se nyatšegago [e lego manna].”—Num. 21:5.

Nywagakgolo ka morago ga moo, Kgoši Dafida wa Isiraele ya bogologolo o opetše ka gore: “Ge e le nna ke botile botho bja gago; Anke pelo ya ka e thabele phološo ya gago. Ke tla opelela Jehofa, gobane o mputsitše.” (Ps. 13:5, 6) Dafida ga se a lebala mediro e botho yeo Jehofa a mo diretšego yona. Go e na le moo, ka mehla o be a ipha nako ya go nagana ka yona. (Ps. 103:2) Le rena Jehofa o re diretše dilo tše dintši tše dibotse gomme e tla ba ga bošilo go tšeela fase dilo tšeo a re diretšego tšona. Ka gona, anke re hlahlobeng tše dingwe tša ditšhegofatšo tšeo Modimo a re neago tšona lehono.

“Tswalano ya Kgauswi le Jehofa”

Mopsalme o opetše ka gore: “Tswalano ya kgauswi le Jehofa ke ya bao ba mmoifago.” (Ps. 25:14) Ruri go ba le tswalano ya kgauswi le Jehofa ke tokelo go batho bao ba sa phethagalago! Lega go le bjalo, go thwe’ng ge re ka swarega kudu ka mediro ya rena ya letšatši le letšatši mo re feleletšago re se na nako e lekanego ya go rapela? Nagana feela ka seo se tlago go direga ka tswalano ya rena e botse le Jehofa. Ka ge Jehofa e le Mogwera wa rena, o letetše gore  re mmote, re mo tšhollele sa mafahleng ka thapelo gomme re mmotše seo se re tšhošago, seo re se nyakago gotee le mathata a rena. (Die. 3:5, 6; Bafil. 4:6, 7) Ka gona na se ga se bontšhe gore re swanetše go kaonefatša dithapelo tša rena?

Ge mofsa wa Hlatse yo a bitšwago Paul a be a nagana ka dithapelo tša gagwe, o ile a lemoga gore di swanetše go kaonefatšwa. * O itše: “Ke be ke šetše ke tlwaetše go boaboeletša ge ke rapela Jehofa.” Ge Paul a be a dira nyakišišo tabeng ye ka go Watch Tower Publications Index, o ile a lemoga gore go na le mehuta ya dithapelo tše e ka bago tše 180 tšeo di ngwadilwego ka Beibeleng. Dithapelong tše, bahlanka ba Jehofa ba nakong e fetilego ba ile ba mo ntšhetša sa mafahleng. Paul o itše: “Ka go naganišiša ka mehlala yeo ya ka Mangwalong, ke ithutile go bolela ka go lebanya seo ke se nyakago dithapelong tša ka. Se se nthušitše go tšhollela Jehofa se se lego ka pelong ya ka. Ga bjale ke thabišwa ke go mmatamela ka thapelo.”

“Dijo . . . ka Nako e Swanetšego”

Tšhegofatšo e nngwe yeo Jehofa a re neilego yona ke ditherešo tše dintši tšeo re ithutilego tšona ka Mangwalong. Ge re dutše re thabela motlalo wa dijo tša moya, re na le mabaka a go “goeletša ka lethabo ka baka la boemo bjo bobotse bja pelo.” (Jes. 65:13, 14) Lega go le bjalo, re swanetše go ntšha mahlo dinameng gore re se ke ra dumelela ditutuetšo tše di sa agego di dira gore re thome go se sa ba mafolofolo therešong. Ka mohlala, go theetša phatlalatšo ya maaka ya bahlanogi go ka šitišana le menagano ya rena gomme gwa dira gore re se bone bohlokwa bja ‘dijo tša moya tšeo Jehofa a re neago tšona ka nako e swanetšego’ ka “mohlanka yo a botegago le wa temogo.”—Mat. 24:45-47.

André, yo a hlanketšego Jehofa ka nywaga e mentši o bile le phihlelo e bohloko ya go arošwa ke dikgopolo tša bahlanogi. O be a nagana gore go fo gaša mahlo Wepesaeteng ya bahlanogi go be go ka se be kotsi. O gopola gore: “Mathomong ke be ke kgahlwa ke seo go thwego ke therešo ya bahlanogi. Ge ke be ke dutše ke bala seo ba se bolelago, ke ile ka thoma go nagana gore ke na le mabaka a go tlogela mokgatlo wa Jehofa. Eupša ka morago, ge ke be ke dira nyakišišo ka seo bahlanogi ba se bolelago kgahlanong le Dihlatse tša Jehofa, ke ile ka lemoga gore ruri barutiši ba ba maaka ke baradia. Ba be ba kgopamiša ditaba gomme ba itshwarelela ka tšona e le bohlatse bjo matla. Ka gona, ke ile ka thoma go bala dikgatišo tša rena gape le go ba gona dibokeng. Kapejana ke ile ka lemoga gore ke be ke lahlegetšwe o šoro.” Go a thabiša gore André o boetše ka phuthegong.

“Mokgatlo Wohle wa Bana Babo Rena”

Borwarre bja rena bjo bo nago le botee ke tšhegofatšo e tšwago go Jehofa. (Ps. 133:1) Moapostola Petro o bile le lebaka le le kwagalago la go ngwala gore: “Ratang mokgatlo wohle wa bana babo rena.” (1 Pet. 2:17) Ge re le karolo ya borwarre bja Bokriste, re thabela thekgo e lerato ya botate, bomma, barwarre le  dikgaetšedi tša moya bao ba lego tumelong e tee le rena.—Mar. 10:29, 30.

Lega go le bjalo, maemo a go fapafapana a ka dira gore re se ke ra kwana le bana babo rena le dikgaetšedi. Ka mohlala, go bonolo go thoma go selekišwa ke go se phethagale ga motho yo a itšego gomme ra thoma go dulela go mo swaya diphošo. Ge se se ka direga, na re ka se holwe ke go nagana gore Jehofa o rata bahlanka ba gagwe go sa šetšwe go se phethagale ga bona? Go feta moo, “ge e ba re re: ‘Ga re na sebe,’ gona re a iphora gomme therešo ga e gona go rena.” (1 Joh. 1:8) Na ga se ra swanela go katanela go ‘tšwela pele re kgotlelelana gomme re lebalelana ka bolokologi’?—Bakol. 3:13.

Mofsa yo a bitšwago Ann, o ile a ithuta go tšwa lebading gore go bohlokwa go gwerana le Bakristegotee. Ge a be a itshwere bjalo ka morwa wa lehlaswa wa seswantšhong sa Jesu, o ile a katogela kgole le phuthego ya Bokriste. Ka morago o ile a hlaphogelwa gomme a boela therešong. (Luka 15:11-24) Ann o ithutile’ng phihlelong ye? O a hlalosa: “Ka ge ga bjale ke boetše ka mokgatlong wa Jehofa, ke rata bana bešo le dikgaetšedi ka moka go sa šetšwe go se phethagale ga bona. Mathomong ke be ke akgofela go ba swaya diphošo. Eupša ga bjale ke ikemišeditše go se dumelele selo se nkamoga ditšhegofatšo tše ke di thabelago tša go ba gare ga badumedigotee le nna. Ga go na selo lefaseng seo se ka bapetšwago le paradeise ya rena ya moya.”

Dula o Leboga Ditšhegofatšo tša Gago

Kholofelo yeo re nago le yona ya gore Mmušo wa Modimo ke pheko ya mathata ka moka a batho ke lehumo leo le ka se bapišwego le selo. La mathomo ge re be re ekwa ka kholofelo ye, dipelo tša rena di ile tša kibakiba ka lethabo! Re ile ra ikwa bjalo ka mmapatši wa seswantšhong sa Jesu yo a ilego “a rekiša ka bjako dilo ka moka tšeo a bego a na le tšona” gore a reke “perela e tee ya theko e kgolo.” (Mat. 13:45, 46) Jesu ga se a ka a bolela gore mmapatši yo o ile a tenwa ke perela ye. Ka mo go swanago, le rena re swanetše go dula re tšeela godimo kholofelo ya rena e kgahlišago.—1 Bathes. 5:8; Baheb. 6:19.

Ela hloko mohlala wa Jean, yo a hlanketšego Jehofa ka nywaga ya ka godimo ga e 60. O re: “Go bolela le batho ka Mmušo wa Modimo go nthušitše gore ke dule ke naganne ka wona. Ke thaba kudu ge ke bona ba thoma go kwešiša gore Mmušo ke eng. Go bona therešo ya Mmušo e fetoša bophelo bja morutwana wa Beibele go dira gore ke nagane gore: ‘Ruri ke na le ditherešo tše di kgahlišago tšeo ke swanetšego go di botša ba bangwe!’”

Re na le mabaka a kwagalago a go leboga ditšhegofatšo tše dintši tša moya tšeo re nago le tšona. Le ge re ka tlalelwa ka baka la diteko tše bjalo ka kganetšo, bolwetši, botšofadi, kgatelelo ya monagano, go hwelwa le mathata a boiphedišo, re a tseba gore ke tša nakwana. Ditšhegofatšo tša rena tša moya di tla oketšwa ka ditšhegofatšo tša nama ka tlase ga Mmušo wa Modimo. Tlaišego le ge e le efe yeo re e kgotleletšego ga bjale e tla fedišwa tshepedišong e mpsha ya dilo.—Kut. 21:4.

Gona bjale, anke re lebogeng ditšhegofatšo tša rena tša moya gomme re bontšhe tebogo e swanago le ya mopsalme yo a opetšego ka gore: “Wena Jehofa Modimo wa ka, O dirile dilo tše dintši, o re diretše dilo tše dintši tše di makatšago, gomme tšeo o re naganetšego tšona ke tše dintši; Ga go yo a ka bapišwago le wena. Ge nka re ke botša ba bangwe ka tšona le go bolela ka tšona, e ba tše dintši kudu moo ke palelwago ke go di anega.”—Ps. 40:5.

[Mongwalo wa tlase]

[Seswantšho go letlakala 18]

Re šegofaditšwe ka thekgo ya moya yeo re e hwetšago ge re le mathateng