Amogela Moya wa Modimo, e Sego wa Lefase

“Ga se ra amogela moya wa lefase, eupša re amogetše moya o tšwago go Modimo, gore re tsebe dilo tšeo re di neilwego ka botho ke Modimo.”—1 BAKOR. 2:12.

1, 2. (a) Ke ka kgopolo efe Bakriste ba therešo ba lego ntweng? (b) Re tla ahlaahla dipotšišo dife?

BAKRISTE ba therešo ba ntweng! Lenaba la rena ke le matla, le na le bomenetša e bile ga le hwe matwa. Le na le sebetša se se atlegago kudu seo se gobaditšego batho ba bantši. Eupša ga se ra swanela go ikwa re se na matla goba re fenyega gabonolo. (Jes. 41:10) Re na le selo seo se ka re šireletšago seo se sa fenyegego.

² Re ntweng ya moya e sego ya nama. Lenaba la rena ke Sathane Diabolo gomme sebetša se segolo seo a se dirišago ke “moya wa lefase.” (1 Bakor. 2:12) Selo se segolo seo se re šireletšago ditlhaselong tša gagwe ke moya wa Modimo. Re swanetše go kgopela moya wa Modimo gomme re bonagatše dika tša wona maphelong a rena gore re fenye ntwa ye le go dula re phafogile moyeng. (Bagal. 5:22, 23) Lega go le bjalo, moya wa lefase ke’ng, gona go tlile bjang gore o be le tutuetšo e kgolo ka tsela ye? Re ka bona bjang gore re tutuetšwa ke moya wa lefase? Gona re ka ithuta’ng go Jesu mabapi le go amogela moya wa Modimo le go gana moya wa lefase?

Ke ka Baka La’ng Moya wa Lefase o Phatlaletše ka Tsela ye?

3. Moya wa lefase ke’ng?

³ Moya wa lefase le o tšwa go Sathane, “mmuši wa lefase,” gomme o kgahlanong le moya wa Modimo. (Joh. 12:31; 14:30; 1 Joh. 5:19) Ke moya wo o tutuetšago lefase ka moka gomme o dira gore batho ba itshware ka tsela e itšego. Moya wo o tutuetša batho gore ba lwantšhane le thato ya Modimo le morero wa gagwe.

4, 5. Go tlile bjang gore moya o tšwago go Sathane o phatlalale ka tsela ye?

⁴ Go tlile bjang gore moya o tšwago go Sathane o phatlalale ka tsela ye? Sathane o thomile ka go fora Efa kua tšhemong ya Edene. O ile a dira gore mosadi yo a dumele gore go se bušwe ke Modimo go tla dira gore a phele gakaone. (Gen. 3:13) Ruri a e bile maaka a matala! (Joh. 8:44) Ke moka o ile a diriša mosadi yo gore a goketše Adama gore a se kwe Jehofa. Ka baka la seo Adama a ilego a se kgetha, batho ka moka ba ile ba rekišetšwa sebeng, ka go re’alo ba tlwaela go tutuetšwa ke moya wa go se kwe wa Sathane.—Bala Baefeso 2:1-3.

⁵ Sathane o ile a ba a tutuetša barongwa ba bantši gore ba mo thekge, gomme ba ile ba fetoga  batemona. (Kut. 12:3, 4) Go eka Modimo ka tsela yeo go ile gwa direga nakwana pele ga Meetsefula a mehleng ya Noa. Barongwa bao ba ile ba dumela gore ba be ba tla atlega ge ba ka hlokomologa dikabelo tša bona tša legodimong gomme ba phegelela dikganyogo tše di lešago dihlong tša lefase. (Juda 6) Sathane o ‘timetša lefase ka moka’ a thušwa ke batemona bao ba boetšego tikologong ya moya. (Kut. 12:9) Ka maswabi, batho ba bantši ga ba lemoge tutuetšo yeo ya batemona.—2 Bakor. 4:4.

Na o Tutuetšwa ke Moya wa Lefase?

6. Tsela e tee feela yeo moya wa lefase o ka re tutuetšago ka yona ke efe?

⁶ Ba bantši ga ba lemoge tutuetšo ya Sathane, eupša Bakriste ba therešo ba tseba maanomabe a gagwe. (2 Bakor. 2:11) Ge e le gabotse, moya wa lefase o ka se re tutuetše ntle le ge e ba re o dumelela go dira bjalo. Anke re hlahlobeng dipotšišo tše nne tšeo di tla re thušago go lemoga ge e ba re tutuetšwa ke moya wa Modimo goba wa lefase.

7. Ke tsela efe e nngwe yeo Sathane a re aroganyago le Jehofa ka yona?

⁷ Boithabišo bjo ke bo kgethago bo bontšha gore ke motho wa mohuta mang? (Bala Jakobo 3:14-18.) Sathane o leka go re aroganya le Modimo ka go bjala moya wa go rata bošoro ka dipelong tša rena. Diabolo o a tseba gore Jehofa o hloile motho yo a ratago bošoro. (Ps. 11:5) Ka baka leo, Sathane o goketša dikganyogo tša rena tša nama ka go diriša dipuku, difilimi, mmino le dipapadi tša elektroniki—tšeo tše dingwe tša tšona di kgothaletšago babapadi gore ba itshware ka tsela e gobogilego kudu le e šoro. Sathane o tshwenyegile kudu ka gore karolo e itšego ya dipelo tša rena e rate bobe bjo a bo tšweletšago go sa šetšwe gore re sa dutše re rata tša go loka.—Ps. 97:10.

8, 9. Re swanetše go ipotšiša dipotšišo dife mabapi le boithabišo?

⁸ Ka lehlakoreng le lengwe, moya wa Modimo o tutuetša bao ba o amogelago gore ba hlweke, ba be le khutšo gomme ba tlale kgaugelo. Re swanetše go ipotšiša gore: ‘Na boithabišo bjo ke bo kgethago bo nkgothaletša go hlagolela dika tše dibotse?’ Bohlale bjo bo tšwago godimo “ga bo na boikaketši.” Bao ba tutuetšwago ke moya wa Modimo ga ba botše baagišani ba bona gore ba hlweke le gore ba be le khutšo mola bona ge ba le magaeng a bona ba bogela difilimi tše di tumišago bošoro le tše di gobogilego.

⁹ Jehofa o nyaka gore re ineele go yena ka pelo ka moka. Lega go le bjalo, Sathane le yena o nyaka gore re mo rapele gatee feela, go fo etša ge a ile a kgopela Jesu. (Luka 4:7, 8) Re ka ipotšiša gore: ‘Na boithabišo bjo ke bo kgethago bo dira gore ke kgone go ineela go Modimo ka pelo ka moka? Na bo dira gore ke hwetše go le thata goba go le bonolo go ganetša moya wa lefase? Na go tla nyakega gore ke dire diphetogo boithabišong bjo ke bo kgethago?’

10, 11. (a) Moya wa lefase o tutuetša pono efe mabapi le dilo tše di bonagalago? (b) Lentšu la Modimo le le buduletšwego ka moya le kgothaletša pono efe?

¹⁰ Ke lebelela bjang dilo tše di bonagalago? (Bala Luka 18:24-30.) Moya wa lefase o godiša “kganyogo ya mahlo” ka go kgothaletša megabaru le go rata dilo tše di bonagalago. (1 Joh. 2:16) O dirile gore ba bantši ba ikemišetše go huma. (1 Tim. 6:9, 10) Moya woo o ka dira gore re dumele gore go tlalelwa ke dilo tše di bonagalago go tla dira gore re dule re šireletšegile. (Die. 18:11) Lega go le bjalo, ge e ba re ka rata tšhelete go feta Modimo, Sathane o tla ba a fentše. Re swanetše go ipotšiša gore: ‘Na ke dula ke nyakana le manobonobo a dilo tše di bonagalago le maipshino?’

¹¹ Go fapana le moo, Lentšu la Modimo le le buduletšwego ka moya le re kgothaletša gore re be le pono e lekalekanego ka tšhelete le gore re šome ka thata bakeng sa go itlhokomela le go hlokomela malapa a rena ka dilo tša nama. (1 Tim. 5:8) Moya wa Modimo o thuša bao ba o hwetšago gore ba ekiše semelo sa Jehofa sa go ba le seatla se se bulegilego. Batho ba bjalo ba tsebja ka go nea, e sego ka go fo amogela. Ba lebelela batho ba le bohlokwa go feta dilo gomme ba thabela go abelana le ba bangwe seo ba nago le sona ge e ba go kgonega. (Die. 3:27, 28) E bile ga ba dumelele gore tirelo ya bona go  Modimo e etwe pele ke go phegelela tšhelete.

12, 13. Ka go se swane le moya wa lefase, moya wa Modimo o ka re kgoma bjang gore re dire dilo tšeo di re holago?

¹² Semelo sa ka se bontšha gore ke tutuetšwa ke moya ofe? (Bala Bakolose 3:8-10, 13.) Moya wa lefase o kgothaletša mediro ya nama. (Bagal. 5:19-21) Teko e kgolo ya gore re tutuetšwa ke moya ofe ga e tle ge dilo di re sepelela gabotse, eupša e tla ge dilo di sa re sepelele gabotse, go etša nakong ya ge ngwanabo rena goba kgaetšedi wa Mokriste a re hlokomologa, a re kgopiša goba a re direla sebe. Go oketša moo, go ka bonagala gabotse gore re tutuetšwa ke moya ofe ge re le magaeng a rena. Go ka nyakega gore re itlhahlobe. Ipotšiše gore: ‘Dikgweding tše tshela tše di fetilego, na semelo sa ka se ile sa bontšha gore ke Mokriste goba na ke boetše mekgweng e mebe yeo ke bego ke bolela le go itshwara ka yona?’

¹³ Moya wa Modimo o ka re thuša go ‘hlobola semelo sa kgale le ditlwaelo tša sona’ gomme ra apara “semelo se sefsa.” Seo se tla re thuša gore re tlale lerato le botho. Re tla tlwaela go lebalelana ka bolokologi, gaešita le ge go ka bonagala go na le lebaka le le kwagalago la go belaela. Re ka se sa hlwa re eba le “sekgopi, bogale, pefelo, mašata le polelo e gobošago” ge re swarwa ka go hloka toka. Go e na le moo, re tla katanela go ‘šokelana ka bonolo.’—Baef. 4:31, 32.

14. Batho ba bantši lefaseng ba lebelela Lentšu la Modimo bjang?

¹⁴ Na ke hlompha le go rata ditekanyetšo tša Beibele tša boitshwaro? (Bala Diema 3:5, 6.) Moya wa lefase o tsoša borabele kgahlanong le Lentšu la Modimo. Bao ba tutuetšwago ke moya wo ba hlokomologa seo ba se bitšago dikarolo tše di sa kwagalego tša Beibele, ba bona go le kaone go latela metlwae le difilosofi tša batho. (2 Tim. 4:3, 4) Ba bangwe ga ba nyake go kwa selo ka Lentšu la Modimo. Batho ba bjalo ba belaela go ba bohlokwa ga Beibele le go nepagala ga yona, ba ipona ba le bohlale. Ba tšeela fase ditekanyetšo tša yona tše kgethwa tša mabapi le bohlotlolo, bosodoma le tlhalo. Ba ruta gore “botse ke bobe gomme ba re bobe ke botse.” (Jes. 5:20) Na re kgomilwe ke moya o bjalo? Na re ithekga ka bohlale bja batho, go akaretša le dikgopolo tša rena, ge re lebeletšana le mathata? Goba na re katanela go latela keletšo ya Beibele?

15. Go e na le gore re ithekge ka bohlale bja rena, re swanetše go dira’ng?

¹⁵ Moya wa Modimo o dira gore re hlomphe Beibele. Go swana le mopsalme, re lebelela lentšu la Modimo e le lebone dinaong tša rena le seetša tseleng ya rena. (Ps. 119:105) Go e na le gore re ithekge ka bohlale bja rena, re ithekga ka Lentšu la Modimo re kgodišegile gore le tla re thuša go bona phapano magareng ga se se nepagetšego le se se fošagetšego. Ga re ithute feela go hlompha Beibele eupša re ithuta le go rata molao wa Modimo.—Ps. 119:97.

 Ithute Mohlaleng wa Jesu

16. Go ba le “monagano wa Kriste” go akaretša’ng?

¹⁶ Gore re hwetše moya wa Modimo, re swanetše go katanela go ba le “monagano wa Kriste.” (1 Bakor. 2:16) Gore re be le “boemo bja monagano bjo bo swanago le bjo Kriste Jesu a bego a na le bjona” go nyakega gore re tsebe tsela yeo a bego a nagana le go dira dilo ka yona gomme re mo ekiše. (Baroma 15:5; 1 Pet. 2:21) Ela hloko ditsela tše dingwe tšeo re ka dirago se ka tšona.

17, 18. (a) Re ithuta’ng go Jesu mabapi le thapelo? (b) Ke ka baka la’ng re swanetše go ‘tšwela pele re kgopela’?

¹⁷ Rapelela moya wa Modimo. Jesu o ile a rapelela moya wa Modimo gore o mo thuše pele a lebeletšana le diteko. (Luka 22:40, 41) Le rena re swanetše go kgopela Modimo gore a re nee moya wa gagwe o mokgethwa. Bohle bao ba o kgopelago ka tumelo, Jehofa o ba nea wona ntle le tefo le ka seatla se se bulegilego. (Luka 11:13) Jesu o itše: “Tšwelang pele le kgopela, le tla newa; tšwelang pele le tsoma, le tla hwetša; tšwelang pele le kokota, le tla bulelwa. Gobane yo mongwe le yo mongwe yo a kgopelago o a amogela, gomme yo mongwe le yo mongwe yo a tsomago o a hwetša, le yo mongwe le yo mongwe yo a kokotago o tla bulelwa.”—Mat. 7:7, 8.

¹⁸ Ge o kgopela moya wa Jehofa le thušo ya gagwe, o se ke wa kgopela gatee ya ba moka. Go ka nyakega gore o rapele ka makga a mantši le ka nako e teletšana. Ka dinako tše dingwe, Jehofa o fo ba a nyaka gore bao ba mo kgopelago ba bontšhe gore ba tshwenyegile gakaakang ka selo seo ba se kgopelago le go bontšha gore tumelo ya bona e tiile go fihla kae pele a ka araba dithapelo tša bona. *

19. Ke’ng seo ka mehla Jesu a bego a se dira, gona ke ka baka la’ng re swanetše go mo ekiša?

¹⁹ Theetša Jehofa ka pelo ka moka. Jesu ka mehla o be a dira dilo tšeo di kgahlago Tatagwe. Ke ka lekga le tee feela moo tsela yeo Jesu a bego a nyaka go dira dilo e bego e fapana le seo Tatagwe a bego a se nyaka. Lega go le bjalo, o ile a bolela le Tatagwe a kgodišegile, a re: “Go se phethege thato ya ka eupša go phethege ya gago.” (Luka 22:42) Ipotšiše gore: ‘Na ke theetša Modimo gaešita le ge go bonagala go le thata?’ Go kwa Modimo go bohlokwa ge e ba re nyaka go phela. Re swanetše go mo kwa ka pelo ka moka ka ge e le Mmopi wa rena, Mothopo le Mothekgi wa maphelo a rena. (Ps. 95:6, 7) Ga go na tselapedi. Ntle le go kwa, re ka se amogelwe ke Modimo.

20. Jesu o be a katanela go dira’ng bophelong bja gagwe, gona re ka mo ekiša bjang?

²⁰ Tseba Beibele gabotse. Jesu o be a tsopola Mangwalo ge a be a ganetša ditlhaselo tše di lebanyago tša Sathane tša go senya tumelo ya gagwe. (Luka 4:1-13) Ge Jesu a be a lebeletšana le baganetši ba gagwe ba bodumedi, o be a ithekga ka Lentšu la Modimo. (Mat. 15:3-6) Bophelong bja gagwe ka moka, Jesu o be a katanela go phetha seo a se tsebago ka molao wa Modimo. (Mat. 5:17) Le rena re swanetše go fepa menagano ya rena ka Lentšu la Modimo leo le matlafatšago tumelo. (Bafil. 4:8, 9) Ba bangwe ba rena ba ka thatafalelwa ke go hwetša nako ya go ba le thuto ya motho ka noši le ya lapa. Lega go le bjalo, go e na le gore re hwetše nako, go ka nyakega gore re iphe nako ya go dira bjalo.—Baef. 5:15-17.

21. Re ka diriša thulaganyo efe gore re tsebe Lentšu la Modimo gakaone le go le diriša?

²¹ “Mohlanka yo a botegago le wa temogo” o re thušitše go ba le nako ya thuto ya motho ka  noši le ya lapa ka go rulaganya gore go be le mantšiboa a Borapedi bja Lapa beke le beke. (Mat. 24:45) Na o diriša thulaganyo ye ka bohlale? Gore o kgone go ba le monagano wa Kriste, o re’ng o sa akaretše mananeo a go hlahloba ka tatelano seo Jesu Kriste a se rutilego ditabeng tšeo o di ratago? O ka diriša Watch Tower Publications Index gore o hwetše tsebišo tabeng yeo o nyakago go e hlahloba. Ka mohlala, go tloga ka 2008 go fihla ka 2010, kgatišo ya batho bohle ya makasine wo e be e na lelokelelo la dihlogo tše 12 tšeo di bego di re: “Seo re Ithutago Sona go Jesu.” O ka nyaka go diriša dihlogo tše ge o ithuta. Go thoma ka 2006, Phafoga! e be e na le dihlogo tše di rego: “O be o tla Araba Bjang?” Dipotšišo tše di be di hlametšwe go go thuša go godiša le go nweletša tsebo ya gago ka Lentšu la Modimo. O re’ng o sa akaretše dihlogo tše bjalo nako le nako lenaneong la Borapedi bja Lapa?

Re ka Fenya Lefase

22, 23. Re swanetše go dira’ng gore re fenye lefase?

²² Re swanetše go gana moya wa lefase gore re hlahlwe ke moya wa Modimo. Ga go bonolo go ganetša moya woo. Se se ka ba thata kudu. (Juda 3) Eupša re ka fenya! Jesu o boditše barutiwa ba gagwe gore: “Mo lefaseng le a tlaišega, eupša betang dipelo! Ke fentše lefase.”—Joh. 16:33.

²³ Le rena re ka fenya lefase ge e ba re ganetša moya wa lona gomme re dira sohle seo re ka se kgonago gore re hwetše moya wa Modimo. Ruri “ge e ba Modimo a ema le rena, ke mang yo a tlago go lwa le rena?” (Baroma 8:31) Ka go hwetša moya wa Modimo le go latela tlhahlo ya gagwe e hwetšwago ka Beibeleng, re tla ba le kgotsofalo, khutšo, lethabo le kgodišego ya gore re tla hwetša bophelo bjo bo sa felego lefaseng le lefsa leo le lego kgauswi.

[Mongwalo wa tlase]

Na o a Gopola?

• Ke ka baka la’ng moya wa lefase o phatlaletše ka tsela ye?

• Ke dipotšišo dife tše nne tšeo re swanetšego go ipotšiša tšona?

• Ke dilo dife tše tharo tšeo re ka ithutago tšona go Jesu mabapi le go hwetša moya wa Modimo?

[Dipotšišo tša Thuto]

[Seswantšho go letlakala 8]

Go tlile bjang gore barongwa ba bangwe e be batemona?

[Seswantšho go letlakala 10]

Sathane o diriša moya wa lefase go laola batho, eupša re ka kgona go ganetša tutuetšo ya wona