Na o Lemoga Tlhahlo e Bonagalago ya Modimo?

BAISIRAELE le Baegipita ga se ba ka ba bona selo sa mohuta wo. Baisiraele ba Huduga Egipita, leru la thololo le eme ka pele ga bona bošego le mosegare. Bošego le be le fetoga thololo ya mollo. Ruri se se be se boifiša! Eupša le be le etšwa kae? Morero wa lona e be e le eng? Tiragalong ye yeo e diragetšego nywageng e ka bago e 3 500 e fetilego, ke’ng seo re ka ithutago sona tseleng yeo Baisiraele ba ilego ba lebelela “thololo ya mollo le leru”?—Ek. 14:24.

Lentšu la Modimo le utolla moo thololo ye e tšwago gona le morero wa yona, le re: “Jehofa o be a ba eta pele mosegare a le thololong ya leru gore a ba hlahle tseleng, gomme bošego a ba eta pele a le thololong ya mollo gore a ba hlabišetše seetša mosegare le bošego.” (Ek. 13:21, 22) Jehofa Modimo o be a diriša thololo ye ya mollo le leru go hlahla batho ba gagwe gore ba tšwe Egipita le go phatša lešokeng. Ba be ba swanetše go dula ba itokišeleditše go sepela gore ba e latele. Ge madira a Baegipita ao a bego a rakediša batho ba Modimo a be a le kgauswi le go ba hlasela, thololo ye e ile ya ema gare ga dihlopha tše tše pedi go šireletša Baisiraele. (Ek. 14:19, 20) Le ge thololo ye e sa ka ya ba hlahla go sepela tseleng yeo ba e tlwaetšego, Baisiraele ba be ba swanetše go fo e latela gore ba tsene Nageng ya Kholofetšo.

Go ba gona ga thololo ye go be go kgonthišetša batho ba Modimo gore Jehofa o na le bona. E be e emela Jehofa gomme ka dinako tše dingwe o be a bolela a le go yona. (Num. 14:14; Ps. 99:7) Go oketša moo, e be e bontšha gore Moshe ke yena yo a kgethilwego ke Jehofa gore a hlahle setšhaba. (Ek. 33:9) Ka mo go swanago, pego ya mafelelo yeo e bolelago ka go tšwelela ga thololo ye e be e kgonthišetša gore Joshua o kgethilwe ke Jehofa gore a hlatlame Moshe. (Doit. 31:14, 15) Ruri go atlega ga Baisiraele ge ba Huduga Egipita go be go ithekgile ka gore ba lemoge tlhahlo e bonagalago ya Modimo gomme ba e latele.

Ba Ile ba Hlokomologa Tlhahlo

Mohlomongwe Baisiraele ba ile ba šala ba ahlame ge ba bona thololo yeo ka lekga la mathomo. Lega go le bjalo, ka maswabi mohlolo woo ba bego ba dula ba o bona ga se wa ka wa kgahliša Baisiraele moo ba ilego ba palelwa ke go dula ba bota Jehofa. Ba ile ba hlohla tlhahlo ya Modimo ka makga a mmalwa. Ge madira a Baegipita a be a ba rakediša, ba ile ba bontšha gore ga ba bote matla a Jehofa a go ba phološa. Go e na le moo, ba ile ba latofatša Moshe mohlanka wa Modimo ka gore o ba lebišitše lehung. (Ek. 14:10-12) Ka morago ga gore ba phološwe Lewatleng le Lehwibidu, ba ile ba ngongoregela Moshe, Arone le Jehofa ka baka la ge ba be ba nagana gore ba hlaelwa ke dijo le meetse. (Ek. 15:22-24; 16:1-3; 17:1-3, 7) Dibeke tše sego kae ka morago ga seo, ba ile ba gapeletša Arone gore a dire namane ya gauta. Nagana feela! Karolong e nngwe ya mešaša ya bona, Baisiraele ba be ba bona thololo ya mollo le leru—bohlatse bjo bogolo bja go ba gona ga Yoo a ba ntšhitšego Egipita—mola ka lehlakoreng le lengwe, ba thoma go rapela modimo wa go se phele, ba re: “Wena Isiraele, yo ke Modimo wa gago yo a go etilego pele a go ntšha nageng ya Egipita.” Ruri tše ke “ditiro tše dikgolo tša go se . . . hlomphe”!—Ek. 32:4; Neh. 9:18.

Go rabela ga Baisiraele go be go bontšha gore ruri ga ba hlomphe tlhahlo ya Jehofa. Bothata e be e se pono ya bona ya nama, eupša e be e le pono ya moya. Ba be ba bona thololo, eupša ba be ba se sa lemoga bohlokwa bja  yona. Le ge ditiro tša bona di ile tša “kweša yena Mokgethwa wa Isiraele bohloko,” Jehofa ka kgaugelo o ile a tšwela pele a ba nea tlhahlo a diriša thololo go ba go fihla ge Baisiraele ba fihla Nageng ya Kholofetšo.—Ps. 78:40-42, 52-54; Neh. 9:19.

Šetša Tlhahlo ya Modimo Lehono

Le lehono, Jehofa ga se a tlogela batho ba gagwe ba se na tlhahlo e bonagalago. Go fo swana le ge a sa ka a letela gore Baisiraele ba ikhweletše tsela, le rena lehono ga re botšwe gore re ikhweletše tsela ya go ya lefaseng le lefsa la kholofetšo. Jesu Kriste ke yena a kgethilwego gore e be Moetapele wa phuthego. (Mat. 23:10; Baef. 5:23) O neile sehlopha sa mohlanka yo a botegago matla a itšego a go laola, e lego sehlopha seo se bopšago ke Bakriste ba botegago bao ba tloditšwego ka moya. Ke moka, sehlopha seo sa mohlanka se kgetha balebeledi ka phuthegong ya Bokriste.—Mat. 24:45-47; Tito 1:5-9.

Re ka tseba bjang sehlopha seo sa mohlanka goba sa molaki? Ela hloko kamoo Jesu ka boyena a se hlalosago ka gona, o re: “Ke mang yo ruri e lego molaki yo a botegago, yo a nago le temogo, yo Mong wa gagwe a tlago go mmea gore a hlokomele sehlopha sa gagwe sa bahlanka gore a tšwele pele a ba nea tekanyo ya dijo tša bona ka nako e swanetšego? Go thaba mohlanka yoo, ge e ba ge Mong wa gagwe a fihla a mo hwetša a dira bjalo!”—Luka 12:42, 43.

Ka gona, sehlopha sa molaki se a ‘botega,’ se ka se tsoge se lahlile goba go hlanogela Jehofa, Jesu, ditherešo tša Beibele goba batho ba Modimo. Ka ge se na le “temogo,” sehlopha sa molaki se bontšha gore se na le kahlolo e botse ge se hlahla modiro ka moka o bohlokwa wa go bolela “ditaba tše . . . dibotse tša Mmušo” le go dira “batho ba ditšhaba ka moka barutiwa.” (Mat. 24:14; 28:19, 20) Sehlopha sa molaki se bontšha gore se a kwa ka go aba dijo tša moya tše dibose le tšeo di nago le phepo “ka nako e swanetšego.” Jehofa o bontšha gore o thekga sehlopha se ka go šegofatša batho ba gagwe ka koketšego, ka go ba hlahla gore ba dire diphetho tše dibotse, ka go ba thuša go kwešiša gabotse ditherešo tša Beibele, ka go ba šireletša gore ba se fedišwe ke manaba a bona le ka go ba nea khutšo ya monagano le ya dipelo.—Jes. 54:17; Bafil. 4:7.

Arabela Tlhahlong ya Modimo

Re ka bontšha bjang gore re tšeela godimo tlhahlo ya Modimo? Moapostola Paulo o itše: “Kwang bao ba etelelago pele gare ga lena gomme le ikokobetše.” (Baheb. 13:17) Ga se ka mehla go ka bago bonolo go dira bjalo. Ka mohlala: Ipee boemong bja Baisiraele mehleng ya Moshe. Akanya ka morago ga go sepela leeto le letelele, thololo e a ema. E tla ema nako e kae? Na e tla ema letšatši le tee, beke e tee goba dikgwedi tše mmalwa? O ipotšiša gore: ‘Na ke swanetše go pakolla merwalo ya ka ka moka?’ Mathomong, o ka pakolla dilo tša bohlokwa. Lega go le bjalo, ka morago ga matšatši a mmalwa, o ferekane ge o tsomana le selo se sengwe merwalong ya gago, o thoma go e pakolla ka moka. Eupša, ge o le kgauswi le go fetša go pakolla, o bona thololo e thoma go sepela—gomme o swanetše go thoma go paka merwalo gape! Seo se ka se be bonolo e bile se ka se kwagale. Lega go le bjalo, Baisiraele ba ile ba swanelwa ke go “hlomolla mešaša gateetee ka morago ga moo.”—Num. 9:17-22.

Ka gona, re arabela bjang ge re hwetša tlhahlo e tšwago go Modimo? Na re katanela go e latela “gateetee ka morago ga moo”? Goba na re tšwela pele re dira dilo kamoo re tlwaetšego ka gona? Na re tlwaelane le tlhahlo ya moragorago, e bjalo ka go swara dithuto tša magae tša Beibele, go nea bohlatse go batho ba leleme le šele, go tšea karolo ka mehla borapeding bja lapa, go dirišana le Dikomiti tša go Hloma Kwano le Sepetlele le go itshwara gabotse ge re le dikopanong? E bile re bontšha gore re tšeela godimo tlhahlo ya Modimo ka go amogela keletšo. Ge re swanetše go dira diphetho tše dikgolo, ga re bote bohlale bja rena eupša re lebelela go Jehofa le go mokgatlo wa gagwe gore re hwetše tlhahlo. Go etša ge ngwana a nyaka tšhireletšo ya batswadi ba gagwe ge go tsoga ledimo,  le rena re nyaka tšhireletšo ya mokgatlo wa Jehofa ge re welwa ke mathata a lefase le ao a swanago le ledimo.

Ke therešo gore bao ba etelelago pele karolong ya lefaseng ya mokgatlo wa Modimo ga se ba phethagala—go etša ge Moshe a be a sa phethagala. Lega go le bjalo, go ba gona ga thololo e be e le bohlatse bja gore o kgethilwe ke Modimo le gore O a mo amogela. Le gona, ela hloko gore Moisiraele yo mongwe le yo mongwe o be a sa ikgethele gore o tla thoma neng go sepela. Go e na le moo, batho ba be ba dira “go ya ka taelo ya Jehofa yeo a ba neilego yona ka Moshe.” (Num. 9:23) Ka gona go bonagala Moshe, yo a bego a dirišwa ke Modimo go nea tlhahlo, a be a dira seka sa go bontšha gore ke nako ya go sepela.

Lehono, sehlopha sa molaki sa Jehofa se dula se dira seka se se bonagalago ge e le nako ya go sepela. Molaki o dira seo bjang? Ka dihlogo tša Morokami le tša Tirelo ya Rena ya Mmušo, ka dikgatišo tše difsa le ka dipolelo tšeo re di kwago dikopanong tše dinyenyane le tše dikgolo. Tlhahlo e bile e fetišetšwa diphuthegong ka balebeledi ba basepedi, ka mangwalo goba ka mananeo a tlwaetšo ao bana babo rena bao ba nago le maikarabelo ka phuthegong ba bago le ona.

Na o tloga o lemoga tlhahlo e bonagalago ya Modimo? Jehofa o diriša mokgatlo wa gagwe go re hlahla, rena batho ba gagwe, gore re phatše “lešokeng” mehleng ye ya bofelo ya lefase le kgopo la Sathane. Ka baka leo, re na le botee, lerato le tšhireletšego.

Ge Baisiraele ba be ba tsena Nageng ya Kholofetšo, Joshua o itše: “Le tseba gabotse ka dipelo tša lena ka moka le ka meoya ya lena ka moka gore ga go le lentšu letee mantšung ka moka a mabotse ao Jehofa Modimo wa lena a le boditšego ona leo le sa kago la phethega. Ka moka a ile a phethega go lena.” (Josh. 23:14) Ka mo go swanago, ruri batho ba Modimo lehono ba tla fihla lefaseng le lefsa le le holofeditšwego. Lega go le bjalo, go tsena go lona go ithekgile ka gore re rate go latela tlhahlo ya Modimo ka boikokobetšo. Ka gona, eka bohle re ka lemoga tlhahlo e bonagalago ya Jehofa!

[Diswantšho go letlakala 5]

Re hlahlwa ke mokgatlo wa Jehofa lehono

Ditokollo tša kopano

Dikolo tša pušo ya Modimo

Go tlwaeletšwa bodiredi dibokeng