Motho yo Bohlokwa Kudu Bophelong bja Gago ke Mang?

“Ke wena o nnoši o lego Yo Godimodimo godimo ga lefase ka moka.”—PS. 83:18.

1, 2. Mabapi le go phološwa ga rena, ke ka baka la’ng go se gwa lekana go fo tseba leina la Jehofa?

MOHLOMONGWE ge o be o bona leina la Jehofa ka lekga la pele, ke ge o be o le bontšhwa go Psalme 83:18. O ka ba o ile wa makatšwa ke go bala mantšu a rego: “Gore batho ba tsebe gore wena yoo leina la gago e lego Jehofa, ke wena o nnoši o lego Yo Godimodimo godimo ga lefase ka moka.” Ga go na pelaelo gore ga e sa le go tloga ka nako yeo, o ile wa diriša lengwalo le go thuša batho ba bangwe gore ba tsebe Modimo wa rena yo lerato, e lego Jehofa.—Baroma 10:12, 13.

² Gaešita le ge go le bohlokwa gore batho ba tsebe leina la Jehofa, go fo ba le tsebo yeo ga se gwa lekana. Bona kamoo mopsalme a gatelelago gape therešo e nngwe yeo go lego bohlokwa gore re e tsebe e le gore re phološwe, ge a re: “Ke wena o nnoši o lego Yo Godimodimo godimo ga lefase ka moka.” Ee, Jehofa ke Motho yo bohlokwa kudu legohleng ka moka. Ka ge e le Mmopi wa dilo ka moka, o na le tshwanelo ya go letela gore dibopiwa tša gagwe tšohle di ikokobeletše yena. (Kut. 4:11) Ka gona, ke mo go swanetšego go ipotšiša gore: ‘Motho yo bohlokwa kudu bophelong bja ka ke mang?’ Ruri go bohlokwa gore re hlahlobe ka kelohloko karabo ya potšišo yeo!

Kgang Yeo e Tsošitšwego Tšhemong ya Edene

3, 4. Sathane o kgonne bjang go fora Efa, gona mafelelo e bile afe?

³ Bohlokwa bja potšišo ye bo ka bonwa gabotse ditiragalong tšeo di diregilego morago kua tšhemong ya Edene. Moo ke mo morongwa wa lerabele yoo ka morago a ilego a tsebja e le Sathane Diabolo a fapošitšego mosadi wa pele e lego Efa, gore a etiše dikganyogo tša gagwe pele ga taelo ya Jehofa ya gore a se ke a ja seenywa sa sehlare se itšego. (Gen. 2:17; 2 Bakor. 11:3) Efa o ile a ineela kgoketšong yeo gomme ka go re’alo a bontšha go se hlomphe bogoši bja Jehofa. Efa ga se a ka a lebelela Jehofa e le Motho yo bohlokwa kudu bophelong bja gagwe. Eupša Sathane o kgonne bjang go fora Efa?

⁴ Sathane o ile a diriša mekgwa e mmalwa e sa lemogegego ge a be a boledišana le Efa. (Bala Genesi 3:1-5.) Sa pele, Sathane ga se a diriša leina la Jehofa. O ile a fo re “Modimo.” Ka mo go fapanego, mongwadi wa puku ya Genesi o dirišitše leina la Jehofa temaneng ya mathomo ya kgaolo yeo. Sa bobedi, go e na le go bolela ka ‘taelo’ ya Modimo, Sathane o ile a fo botšiša ka seo Modimo a se ‘boletšego.’ (Gen. 2:16) A diriša mokgwa wo o sa lemogegego, Sathane a ka ba a ile a leka go nyenyefatša bohlokwa bja taelo yeo. Sa boraro, gaešita le ge a be a bolela le Efa, o ile a diriša lešupi la bontši la “le.” Ka go dira bjalo, a ka ba a ile a leka go diriša go ipona ga Efa a le bohlokwa, a katanela go mo dira gore a nagane gore o bohlokwa, bjalo ka ge eka o a ipolela le go bolelela monna wa gagwe. Mafelelo e bile afe? Go bonagala ka boikgogomošo Efa a ile a phetha ka go bolelela yena le monna wa gagwe ka go botša noga gore: “Dienywa tša dihlare tša mo serapeng re ka di ja.”

5. (a) Sathane o ile a dira gore Efa a nagane kudu ka eng? (b) Efa o bontšhitše eng ka go ja seenywa se se bego se ileditšwe?

⁵ Le gona Sathane o ile a kgopamiša ditherešo. O be a e ra gore Modimo ga a na toka ka go nyaka gore Adama le Efa ‘ba se ke ba ja tše di tšwago sehlareng se sengwe le se sengwe sa mo serapeng.’ Se se latelago, Sathane o ile a dira gore Efa a nagane ka yena feela le kamoo a ka kaonefatšago maemo a gagwe bophelong, a “[swane] le Modimo.” Mafelelong, o ile a dira gore Efa a nagane kudu ka sehlare seo le dienywa tša sona go e na le go nagana ka tswalano ya gagwe le Yoo a bego a mo neile dilo ka moka. (Bala Genesi 3:6.) Ka manyami, ka  go ja seenywa seo, Efa o bontšhitše gore Jehofa e be e se Motho yo bohlokwa kudu bophelong bja gagwe.

Kgang Yeo e Tsošitšwego Mehleng ya Jobo

6. Sathane o ile a belaela bjang potego ya Jobo, le gona Jobo o ile a newa sebaka sefe?

⁶ Nywagakgolo ka morago, monna yo a botegago Jobo o kile a ba le sebaka sa go bontšha gore Motho yo bohlokwa kudu bophelong bja gagwe e be e le mang. Ge Jehofa a be a botšiša Sathane ka go botega ga Jobo, Sathane o ile a araba ka bogale a re: “Na o re ge Jobo a boifa Modimo o mmoifela lefeela?” (Bala Jobo 1:7-10.) Sathane ga se a ka a gana gore Jobo o be a ekwa Modimo. Go e na le moo, o ile a belaela maikemišetšo a Jobo. Ka boradia o ile a latofatša Jobo ka gore o hlankela Jehofa ka baka la boithati e sego ka baka la lerato. Ke Jobo feela yo a bego a ka bontšha gore tatofatšo yeo ke maaka e bile o ile a newa sebaka sa go dira bjalo.

7, 8. Jobo o ile a swanelwa ke go lebeletšana le diteko dife, gomme o bontšhitše’ng ka go kgotlelela ga gagwe ka potego?

⁷ Jehofa o ile a dumelela Sathane go tlišetša Jobo dikotsi ka go latelana. (Jobo 1:12-19) Jobo o ile a arabela bjang dikotsing tšeo? Re botšwa gore ga se a ka a “dira sebe goba a bolela gore Modimo o dirile selo le ge e le sefe se se fošagetšego.” (Jobo 1:22) Eupša Sathane ga se a ka a homotšwa ke seo. O ile a tšwela pele ka go ngongorega ka gore: “Letlalo ka letlalo, se sengwe le se sengwe seo motho a nago le sona o tla se gafa ka baka la moya wa gagwe.” * (Job 2:4) Sathane o ile a bolela gore ge e ba Jobo ka boyena a ka tlaišega, gona o be a tla phetha ka gore Jehofa e be e se Motho yo bohlokwa kudu bophelong bja gagwe.

⁸ Bolwetši bjo bo šišimišago bo ile bja fetoša sebopego sa Jobo ke moka mosadi wa gagwe a mo gapeletša gore a roge Modimo gomme a hwe. Ka morago, bahomotši ba gagwe ba maaka ba bararo ba ile ba mo latofatša ka go se itshware gabotse. (Jobo 2:11-13; 8:2-6; 22:2, 3) Lega go le bjalo, ditlaišegong tše ka moka, Jobo o ile a gana go lahla potego ya gagwe. (Bala Jobo 2:9, 10.) O bontšhitše ka go kgotlelela ga gagwe ka potego gore Jehofa e be e le Motho yo bohlokwa kudu bophelong bja gagwe. Le gona, Jobo o bontšhitše gore go a kgonega gore motho yo a sa phethagalago a bontšhe gaešita le ka tsela e lekanyeditšwego gore ditatofatšo tša Diabolo ke tša maaka.—Bapiša le Diema 27:11.

Karabo e Phethagetšego ya Jesu

9. (a) Sathane o ile a leka Jesu bjang ka go diriša go swarwa ga gagwe ke tlala? (b) Jesu o ile a arabela bjang tekong ye?

⁹ Gateetee ka morago ga gore Jesu a kolobetšwe, Sathane o ile a leka go mo goketša gore a phegelele dikganyogo tša boithati go e na le go dira gore a lebelele Jehofa e le Motho yo bohlokwa  kudu bophelong bja gagwe. Diabolo o ile a leka Jesu ka diteko tše tharo. Ya mathomo, o ile a leka go diriša go swarwa ga Jesu ke tlala, a mo leka gore a fetoše maswika gore e be dinkgwa. (Mat. 4:2, 3) Jesu o be a sa tšwa go ikona dijo ka matšatši a 40 gomme a swerwe ke tlala kudu. Ka gona, Diabolo o ile a mo kgothaletša go diriša gampe matla a gagwe a go dira mehlolo gore a hwetše dijo. Jesu o ile a arabela bjang? Ka go se swane le Efa, Jesu o ile a tsepamišetša monagano wa gagwe Lentšung la Jehofa gomme gateetee a gana teko yeo.—Bala Mateo 4:4.

10. Ke ka baka la’ng Sathane a ile a leka Jesu ka go mmotša gore a itahlele fase tlhoreng ya morako wa tempele?

¹⁰ Sathane o ile a ba a leka go tutuetša Jesu gore a arabele ka boithati. O ile a leka Jesu ka go mmotša gore a itahlele fase tlhoreng ya morako wa tempele. (Mat. 4:5, 6) Ke eng seo Sathane a bego a holofela go se fihlelela? Sathane o be a e ra gore ge e ba Jesu a ka se gobatšwe ke go itahlela fase, gona seo se be se tla hlatsela gore e be e le “morwa wa Modimo.” Go molaleng gore Diabolo o be a nyaka gore Jesu a tshwenyege kudu ka botumo bja gagwe, gaešita le go fihla bokgoleng bja gore a dire pontšho ya bomponeng. Sathane o be a tseba gore motho a ka amogela teko e kotsi ka baka la boikgantšho le go nyaka go phema go se sa hlompšha ke batho ba bangwe. Sathane o ile a diriša mangwalo gampe, eupša Jesu a bontšha gore O be a na le kwešišo e feletšego ya Lentšu la Jehofa. (Bala Mateo 4:7.) Ka go gana teko yeo, Jesu o ile a hlatsela gape gore Jehofa e be e le Motho yo bohlokwa kudu bophelong bja gagwe.

11. Ke ka baka la’ng Jesu a ile a gana ge Diabolo a be a holofetša go mo nea mebušo ka moka ya lefase?

¹¹ Tekong ya gagwe ya mafelelo, Sathane o ile a holofetša Jesu moputso o mogolo ka gore o tla mo nea mebušo ka moka ya lefase. (Mat. 4:8, 9) Gateetee Jesu o ile a gana seo a bego a se holofetšwa. O ile a lemoga gore go amogela seo a se holofetšwa go be go tla bolela gore o be a gana bogoši bja Jehofa—yona tshwanelo ya Modimo ya go ba Yo Godimodimo. (Bala Mateo 4:10.) Boemong bjo bongwe le bjo bongwe, Jesu o ile a araba Sathane ka go tsopola mangwalo ao a bego a na le leina la Jehofa.

12. Ke phetho efe e thata yeo Jesu a ilego a lebeletšana le yona ge a le kgauswi le go fihla mafelelong a bophelo bja gagwe bja lefaseng, gona re ithuta’ng tseleng yeo a ilego a arabela ka yona phethong yeo?

¹² Ge Jesu a be a le kgauswi le go fihla mafelelong a bophelo bja gagwe bja lefaseng, o ile a lebeletšana  le go dira phetho e thata kudu. Bodireding bja gagwe ka moka, o ile a bontšha gore o ikemišeditše go neela bophelo bja gagwe e le sehlabelo. (Mat. 20:17-19, 28; Luka 12:50; Joh. 16:28) Lega go le bjalo, Jesu o be a lemoga gore o tla latofatšwa ka maaka le go golegwa ka tlase ga tshepedišo ya tša molao ya Sejuda le go bolawa bjalo ka morogaki. Tsela yeo a bego a tla hwa ka yona e ile ya mo tshwenya kudu. O ile a rapela ka gore: “Tate, ge e ba go kgonega, a senwelo se se mphete.” Eupša a tšwela pele ka gore: “Fela e sego ka mo go ratago nna, eupša ka mo go ratago wena.” (Mat. 26:39) Ee, ruri go botega ga Jesu go fihla lehung go bontšhitše ntle le pelaelo gore Motho yo bohlokwa kudu bophelong bja gagwe e be e le mang!

Kamoo re ka Arabelago ka Gona

13. Go ba go fihla ga bjale, re ithutile’ng mohlaleng wa Efa, wa Jobo le wa Jesu Kriste?

¹³ Re ithutile’ng go fihla ga bjale? Tabeng ya Efa, re ithuta gore bao ba ineelago dikganyogong tša boithati goba go ikwa ba le bohlokwa ba bontšha gore Jehofa ga se Motho yo bohlokwa kudu maphelong a bona. Go fapana le se, go tšwa pegong ya go botega ga Jobo, re ithuta gore gaešita le batho bao ba sa phethagalago ba ka bontšha gore ba etiša Jehofa pele ka go kgotlelela mathata ka potego—gaešita le ge ba tloga ba sa kwešiše sebaki sa mathata ao. (Jak. 5:11) Sa mafelelo, mohlala wa Jesu o re ruta gore re ikemišetše go hlabišwa dihlong le go se tshwenyege kudu ka botumo bja rena. (Baheb. 12:2) Eupša re ka diriša bjang dithuto tše?

14, 15. Tsela yeo Jesu a ilego a arabela ka yona tekong e fapana bjang le ya Efa, gona re ka ekiša Jesu bjang? (Hlalosa seswantšho seo se lego go letlakala 18.)

¹⁴ Le ka mohla o se ke wa dumelela diteko di dira gore o lebale Jehofa. Efa o ile a tsepamišetša monagano wa gagwe tekong yeo a bego a lebane le yona. O ile a bona seenywa seo “se loketše go ka jewa le gore ke selo se se kganyogwago ke mahlo, ee, gore sehlare seo se be se kgahliša ge se lebelelwa.” (Gen. 3:6) Se se fapane kudu le tsela yeo Jesu a ilego a arabela ka yona ditekong tše tharo tšeo a ilego a lebeletšana le tšona! Ga se a ka a dumelela teko e nngwe le e nngwe e mo dira gore a lebale ditlamorago tša ditiro tša gagwe. O ile a ithekga ka Lentšu la Modimo e bile a diriša leina la Jehofa.

¹⁵ Ge re lebeletšane le diteko tša gore re dire dilo tšeo di sa kgahlišego Jehofa, re tsepamišetša menagano ya rena kae? Ge re tsepamišetša menagano ya rena kudu tekong, ke moo kganyogo e fošagetšego e tlago go ba e matla. (Jak. 1:14, 15) Re swanetše go gata mogato kapejana gore re tumole ka medu kganyogo yeo, gaešita le ge mogato woo o ka bonagala e le o mogolo go swana le go tloša setho se itšego sa mmele wa rena. (Mat. 5:29, 30) Go swana le Jesu, re swanetše go nagana ka ditlamorago tša ditiro tša rena, kamoo di tlago go kgoma tswalano ya rena le Jehofa. Re swanetše go gopola seo se bolelwago ke Lentšu la gagwe, e lego Beibele. Ke feela ka tsela ye moo re ka bontšhago gore Jehofa ke Motho yo bohlokwa kudu maphelong a rena.

16-18. (a) Ke’ng seo se ka re nolago moko? (b) Ke’ng seo se tlago go re thuša go lebeletšana ka katlego le maemo ao a gateletšago?

¹⁶ Le ka mohla o se ke wa dumelela mathata a gago a go dira gore o galefele Jehofa. (Die. 19:3) Ge re dutše re batamela kgauswiuswi le bofelo bja lefase le le kgopo, batho ba Jehofa ba bantši ba kgongwa ke dikotsi le masetlapelo. Mo nakong ye ga se ra letela go šireletšwa ka mohlolo. Lega go le bjalo, go swana le Jobo, re ka nolega moko ge re hwelwa ke baratiwa ba rena goba re welwa ke mathata.

¹⁷ Jobo ga se a ka a kwešiša lebaka leo ka lona Jehofa a bego a dumelela gore dilo tše itšego di direge gomme le rena ka dinako tše dingwe re ka no se kwešiše lebaka leo ka lona dilo tše mpe di diregago. Mohlomongwe re ile ra kwa ka bana babo rena ba botegago bao ba bolailwego ke tšhišinyego ya lefase, go swana le ba kua Haiti goba bao ba bolailwego ke dikotsi tše dingwe tša tlhago. Goba re ka ba re tseba Mokriste yo a itšego yo a botegago yoo a bilego mohlaselwa wa bošoro goba yo a hwilego kotsing e šoro. Goba re ka ba ra ikhwetša re hlasetšwe ke maemo a itšego a gateletšago goba go bona go hloka toka. Tlalelo ya rena e ka dira gore re goeletše ka gore: ‘Ke ka baka la’ng Jehofa? Ke ka baka la’ng se se diragalela nna? Ke sentše’ng?’ (Habak. 1:2, 3) Ke eng seo se tlago go  re thuša go lebeletšana le maemo ka katlego dinakong tše swanago le tše?

¹⁸ Re swanetše go ba šedi gore re se ke ra nagana gore ditiragalo tše bjalo ke pontšho ya go se amogelwe ke Jehofa. Jesu o ile a gatelela therešo ye ge a be a bolela ka dikotsi tše pedi tšeo di diregilego mehleng ya gagwe. (Bala Luka 13:1-5.) Dikotsi tše dintši di bakwa ke “nako le ditiragalo tšeo di sa letelwago.” (Mmo. 9:11) Eupša go sa šetšwe gore sebaki sa mathata a rena ke sefe, re ka kgotlelela ge e ba re tsepamišetša menagano ya rena go “Modimo wa khomotšo yohle.” O tla re nea matla a nyakegago e le gore re tšwele pele re botega.—2 Bakor. 1:3-6.

19, 20. Jesu o ile a thušwa ke eng go kgotlelela maemo a lešago dihlong, gona rena re ka thušwa ke eng go dira se se swanago?

¹⁹ Le ka mohla o se ke wa dumelela boikgantšho goba go boifa go hlabišwa dihlong e eba dilo tšeo o tshwenyegago kudu ka tšona. Boikokobetšo bja Jesu bo ile bja dira gore a kgone go ‘itlhohlora gomme a be ka sebopego sa mohlanka.’ (Bafil. 2:5-8) O ile a kgona go kgotlelela maemo a mantši a lešago dihlong ka baka la ge a be a ithekga ka Jehofa. (1 Pet. 2:23, 24) Ka go dira bjalo, Jesu o be a etiša thato ya Jehofa pele gomme se se ile sa feleletša ka gore a phagamišetšwe boemong bja godimo. (Bafil. 2:9) Jesu o ile a kgothaletša barutiwa ba gagwe gore ba phele ka tsela e swanago.—Mat. 23:11, 12; Luka 9:26.

²⁰ Ka dinako tše dingwe, diteko tše itšego tša tumelo ya rena e ka ba tše di lešago dihlong. Lega go le bjalo, re swanetše go ba le kgodišego e swanago le ya moapostola Paulo, yo a itšego: “Ke ka lona lebaka le ke bilego ke tlaišwago ke dilo tše, eupša ga ke na dihlong. Gobane ke tseba yo ke mo dumetšego, e bile ke kgodišega gore o kgona go hlokomela seo ke mo gafetšego sona go fihla letšatšing leo.”—2 Tim. 1:12.

21. Go sa šetšwe mokgwa wa lefase wa boithati, o ikemišeditše go dira’ng?

²¹ Beibele e boletše e sa le pele gore mehleng ya rena batho e tla ba “baithati.” (2 Tim. 3:2) Ka gona, ga go makatše gore re dikologilwe ke batho bao ba bontšhago moya wa nna pele. Anke le ka mohla re se ke ra šilafatšwa ke mokgwa o bjalo wa boithati! Go e na le moo, go sa šetšwe gore re lebeletšane le diteko, re welwa ke dikotsi goba re kopana le batho bao ba lekago go re hlabiša dihlong, anke yo mongwe le yo mongwe wa rena a ikemišetše go hlatsela gore Jehofa ke Motho yo bohlokwa kudu bophelong bja gagwe!

[Mongwalo wa tlase]

Re ka Ithuta’ng . . .

• tseleng yeo ka yona Sathane a forilego Efa?

• tseleng yeo ka yona Jobo a arabetšego mathateng a gagwe?

• go seo Jesu a bego a tsepamišeditše monagano wa gagwe go sona?

[Dipotšišo tša Thuto]

[Seswantšho go letlakala 17]

Efa o ile a palelwa ke go etiša pele tswalano ya gagwe le Jehofa

[Seswantšho go letlakala 18]

Jesu o ile a gana diteko tša Sathane gomme a tsepamišetša monagano go direng thato ya Jehofa

[Diswantšho go letlakala 20]

Go nea bohlatse ditenteng ka morago ga tšhišinyego ya lefase kua Haiti

Dinakong tša mathata, re ka tsepamišetša menagano ya rena go “Modimo wa khomotšo yohle”