Go na le Ditaba tše Dibotse Tšeo di Nyakwago ke Bohle

“Ditaba tše . . . dibotse ke tsela e matla ya Modimo ya go phološa.”—BAROMA 1:16.

1, 2. Ke ka baka la’ng o boledišana le batho ba bangwe ka “ditaba tše . . . dibotse tša Mmušo,” gona ke karolo efe ya tšona yeo o e gatelelago?

‘KE THABELA go boledišana le batho ba bangwe ka ditaba tše dibotse letšatši le letšatši.’ Mohlomongwe o bile le kgopolo e bjalo goba o ile wa bolela bjalo. Ka ge o le Hlatse ya Jehofa e ineetšego, o a tseba gore go bohlokwa gakaakang go bolela “ditaba tše tše dibotse tša Mmušo.” O ka ba o kgona go bolela ka hlogo mantšu a boporofeta bja Jesu bja mabapi le modiro wo.—Mat. 24:14.

² Ge o boledišana le ba bangwe ka “ditaba tše . . . dibotse tša Mmušo,” o tšwetša pele modiro woo Jesu a o thomilego. (Bala Luka 4:43.) Ka ntle le pelaelo, e nngwe ya dintlha tšeo o di gatelelago ke ya gore Modimo kgauswinyane o tla tsena ditaba tša batho gare. A diriša “masetlapelo a magolo,” o tla fediša bodumedi bja maaka le bokgopo ka moka lefaseng. (Mat. 24:21) Mohlomongwe o fela o gatelela le gore Mmušo wa Modimo o tla tsošološa Paradeise mo lefaseng gore go tlale khutšo le lethabo. Ge e le gabotse, “ditaba tše . . . dibotse tša Mmušo” ke karolo ya ‘ditaba tše dibotse tšeo di boditšwego Aborahama e sa le pele, tša gore: “Ditšhaba tšohle di tla šegofatšwa ka wena.”’—Bagal. 3:8.

3. Ke ka baka la’ng re ka bolela gore moapostola Paulo o ile a gatelela ditaba tše dibotse ka pukung ya Baroma?

³ Lega go le bjalo, na go ka direga gore mohlomongwe ga re gatelele karolo e bohlokwa yeo batho ba e nyakago ya ditaba tše dibotse? Lengwalong leo moapostola Paulo a le ngwaletšego Baroma, o dirišitše lentšu “mmušo” gatee feela, eupša o dirišitše polelwana “ditaba tše dibotse” ka makga a 12. (Bala Baroma 14:17.) Ke karolo efe ya ditaba tše dibotse yeo Paulo a boletšego ka yona leboelela ka pukung yeo? Ke ka baka la’ng karolo yeo ya ditaba tše dibotse e le bohlokwa? Gona ke ka baka la’ng re swanetše go dula re e gopola ge re boledišana le ba bangwe ka “ditaba tše dibotse tša Modimo” tšhemong ya gabo rena?—Mar. 1:14; Baroma 15:16; 1 Bathes. 2:2.

Seo Bao ba Lego Roma ba Bego ba se Nyaka

4. Paulo o ile a bolela ka eng ge a be a golegilwe la mathomo kua Roma?

⁴ Re ithuta go gontši ka go ela hloko ditaba tšeo Paulo a ilego a bolela ka tšona ge a be a le golegilwe la mathomo kua Roma. Re bala gore ge Bajuda ba mmalwa ba mo etetše, o ile a nea ‘bohlatse bjo bo tletšego mabapi le (1) mmušo wa Modimo gomme a ba kgodiša mabapi le (2) Jesu.’ Mafelelo e bile afe? “Ba bangwe ba [ile ba] dumela dilo tšeo a di boletšego; ba bangwe ba se dumele.”  Ka morago ga moo, Paulo ‘o be a amogela ka botho bohle bao ba bego ba tsena ka moo a bego a le ka gona, a ba botša ka (1) mmušo wa Modimo le go ruta dilo tše di lego mabapi le (2) Morena Jesu Kriste.’ (Dit. 28:17, 23-31) Ka ntle le pelaelo, Paulo o ile a gatelela bohlokwa bja Mmušo wa Modimo. Eupša o ile a gatelela le eng? Selo sa bohlokwa seo e lego motheo wa Mmušo—karolo ya Jesu morerong wa Modimo.

5. Ke senyakwa sefe sa kgonthe seo Paulo a ilego a se gatelela ka pukung ya Baroma?

⁵ Batho bohle ba swanetše go tseba ka Jesu gomme ba mo dumele. Ka pukung ya Baroma, Paulo o ile a bolela ka yona taba ye. Pejana o ngwadile ka ‘Modimo yoo a mo direlago tirelo e kgethwa ka moya wa gagwe mabapi le ditaba tše dibotse ka Morwa wa gagwe.’ O ile a tlaleletša ka gore: “Ga ke hlabišwe dihlong ke ditaba tše dibotse; ge e le gabotse, . . . ke tsela e matla ya Modimo ya go phološa yo mongwe le yo mongwe yo a nago le tumelo.” Ka morago o ile a bolela ka nako ya “ge Modimo ka Kriste Jesu a ahlola diphiri tša batho, go ya ka ditaba tše dibotse tšeo ke di bolelago.” Ke moka o ile a hlalosa gore: “Go tloga Jerusalema le tikologong ya go fihla Ilirikamo ke boletše ditaba tše dibotse ka Kriste ka botlalo.” * (Baroma 1:9, 16; 2:16; 15:19) O nagana gore ke ka baka la’ng Paulo a ile a ruta Baroma ka mo go tletšego ka Jesu Kriste?

6, 7. Re ka bolela’ng ka go hlongwa ga phuthego ya Roma le ka batho bao ba bego ba bopa phuthego yeo?

⁶ Ga re tsebe gore phuthego ya Roma e thomile bjang. Na e ka ba e le gore Bajuda goba basokologi bao ba bego ba le gona ka Pentekoste ya 33 C.E. ba ile ba boela Roma e le Bakriste? (Dit. 2:10) Goba na bagwebi ba Bakriste le basepedi ba ile ba phatlalatša therešo kua Roma? Go sa šetšwe gore boemo e be e le bofe, ge Paulo a be a ngwala puku ye mo e ka bago ka 56 C.E., phuthego e be e šetše e hlomilwe. (Baroma 1:8) Phuthego yeo e be e bopša ke batho ba mohuta mang?

⁷ Ba bangwe e be le ba setlogo sa Sejuda. Paulo o ile a re ge a dumediša Andronika le Juniase a re ke “metswalo ya ka,” mohlomongwe a bolela gore e be e le metswalo ya gagwe yeo e bego e le Bajuda go swana le yena. Akhwila, yo a bego a dira ditente kua Roma, le mosadi wa gagwe Perisika, le bona e be e le Bajuda. (Baroma 4:1; 9:3, 4; 16:3, 7; Dit. 18:2) Eupša go bonagala bana babo rena ba bantši le dikgaetšedi bao Paulo a ilego a ba dumediša e be e le Bantle. Ba bangwe e ka ba e be e le “ba ntlo ya Kesara,” mohlomongwe a bolela gore ke makgoba a Kesara goba bahlankedi ba banyenyane ba mmušo.—Bafil. 4:22; Baroma 1:6; 11:13.

8. Bao ba bego ba le Roma ba be ba lebeletšane le bothata bofe?

⁸ Mokriste yo mongwe le yo mongwe kua Roma o be a lebeletšane le bothata bjoo yo mongwe le yo mongwe wa rena a lebeletšanago le bjona. Paulo o ile a bo hlalosa ka tsela ye: “Bohle ba dirile sebe gomme ba hlaelelwa ke letago la Modimo.” (Baroma 3:23) Go molaleng gore bohle bao Paulo a ba ngwaletšego ba be ba swanetše go lemoga gore e be e le badiradibe gomme ba dumele go yoo Modimo a bego a mo diriša go lokiša bothata bjoo.

Go Lemoga Bothata bja Sebe

9. Paulo o ile a gatelela gore ditaba tše dibotse di ka ba le mafelelo afe?

⁹ Mathomong a lengwalo leo le yago go Baroma, Paulo o boletše ka mafelelo a mabotse ao a tlišwago ke ditaba tše dibotse tšeo a bego a bolela ka tšona leboelela, ge a re: “Ga ke hlabišwe dihlong ke ditaba tše dibotse; ge e le gabotse, ditaba tše tše dibotse ke tsela e matla ya Modimo ya go phološa yo mongwe le yo mongwe yo a nago le tumelo, go Mojuda pele, ke moka gwa latela Mogerika.” Ee, go phologa go be go kgonega. Lega go le bjalo, go be go nyakega tumelo ka go  dumelelana le therešo ya bohlokwa yeo e tsopotšwego go Habakuku 2:4, e rego: “Moloki—o tla phela ka tumelo.” (Baroma 1:16, 17; Bagal. 3:11; Baheb. 10:38) Eupša ditaba tšeo tše dibotse, tšeo di ka lebišago phološong, di tswalana bjang le taba ya gore “bohle ba dirile sebe”?

10, 11. Ke ka baka la’ng kgopolo yeo e hlaloswago go Baroma 3:23 e sa makatše batho ba bangwe eupša e makatša ba bangwe?

¹⁰ Pele ga ge motho a ka ba le tumelo e phološago bophelo, o swanetše go dumela gore ke modiradibe. Taba ya gore motho ke modiradibe e ka se makatše bao ba gotšego ba dumela go Modimo e bile ba tlwaelane le Beibele. (Bala Mmoledi 7:20.) Go sa šetšwe gore ba a dumela goba ba a belaela, ba kwešiša ganyenyane seo Paulo a bego a se bolela ge a be a re: “Bohle ba dirile sebe.” (Baroma 3:23) Lega go le bjalo, ge re phetha bodiredi bja rena, re ka kopana le batho ba bantši bao ba sa kwešišego polelo yeo.

¹¹ Dinageng tše dingwe, go tlwaelegile gore motho a godišwe a botšwa gore ga a na sebe, gore ga a na sebe sa leabela. Lega go le bjalo, o a lemoga gore o dira diphošo, o na le dika tšeo di sa kgahlišego, le gona a ka be a dirile dilo tše mpe. E bile o lemoga gore ba bangwe ba boemong bjo bo swanago le bja gagwe. Lega go le bjalo, ka baka la tsela yeo a godišitšwego ka yona, ga a kwešiše lebaka leo ka lona yena le ba bangwe ba lego ka tsela yeo. Ge e le gabotse, malemeng a mangwe, ge o re motho ke modiradibe, ba bangwe ba ka nagana gore o ra gore ke sesenyi goba motho yo a tshetšego melao e itšego. Go molaleng gore motho yo a goletšego tikologong e bjalo a ka ba a sa ipone e le modiradibe go ya ka kgopolo yeo Paulo a e hlalositšego.

12. Ke ka baka la’ng batho ba bantši ba sa dumele gore batho ka moka ke badiradibe?

¹² Gaešita le dinageng tšeo go tletšego Bojakane, ba bantši ga ba dumele kgopolo ya gore ke badiradibe. Ka baka la’ng? Gaešita le ge ba fela ba e ya kerekeng, ba bona pego ya Beibele ya Adama le Efa e le feela nonwane. Ba bangwe ba golela tikologong ya batho bao ba sa dumelego go Modimo. Ba belaela gore Modimo o gona gomme ka baka leo ga ba kwešiše gore go na le Ramatlaohle yo a beelago batho ditekanyetšo le gore ge ba sa kgone go phela ka tšona ba dira sebe. Ka kgopolo e itšego, ba swana le batho ba lekgolong la pele la nywaga bao Paulo a ilego a ba hlalosa ba “se na kholofelo” e bile ba “se na Modimo lefaseng.”—Baef. 2:12.

13, 14. (a) Ke lebaka lefe le lengwe leo le dirago gore bao ba sa dumelego go Modimo le tabeng ya gore ba na le sebe ba hlokago boitshwarelelo? (b) Go se dumele mo go lebišitše ba bantši kae?

¹³ Lengwalong leo le yago go Baroma, Paulo o neile mabaka a mabedi ao a bontšhago gore tikologo e bjalo yeo motho a godišeditšwego go yona e ka se be sehlare sa ntšhirela—mehleng yeo le ya lehono. Lebaka la pele ke la gore tlholo ka boyona e hlatsela gore Mmopi o gona. (Bala Baroma 1:19, 20.) Se se dumelelana le seo Paulo a se lemogilego ge a be a ngwalela Baheberu a le Roma a re: “Ntlo e nngwe le e nngwe e agwa ke motho, eupša yo a agilego dilo ka moka ke Modimo.” (Baheb. 3:4) Tsela e bjalo ya go nea mabaka e bontšha gore go na le Mmopi yo a bopilego legohle goba a dirilego gore le be gona.

¹⁴ Ka gona, Paulo o be a na le mabaka a kwagalago a go ngwalela Baroma gore motho le ge e le ofe—go akaretša le Baisiraele ba bogologolo—yo a ilego a rapela medimo ya diswantšho ya go se phele, o be a ‘hloka boitshwarelelo.’ Go ka bolelwa bjalo le ka bao ba ineetšego dikopanong tša botona le botshadi tšeo e sego tša tlhago tšeo di thulanago le tsela yeo banna le basadi ba bego ba swanetše go diriša mebele ya bona ka gona.  (Baroma 1:22-27) Ge a be a šupa mokgweng wo wa go nea mabaka, Paulo o ile a phetha ka mo go swanetšego ge a be a re: “Bajuda gotee le Bagerika ba tlase ga sebe ka moka.”—Baroma 3:9.

‘Hlatse’

15. Ke bomang bao ba nago le letswalo, gona le ba kgoma bjang?

¹⁵ Puku ya Baroma e bolela lebaka le lengwe leo batho ba swanetšego go lemoga gore ke badiradibe le gore ba nyaka go lokollwa bothateng bjoo. Ge e le mabapi le melao yeo Modimo a e neilego Baisiraele ba bogologolo, Paulo o ngwadile gore: “Ka moka bao ba dirilego sebe tlase ga molao ba tla ahlolwa ka molao.” (Baroma 2:12) Ge a tšwela pele ka go nea mabaka, o bolela gore batho ba ditšhaba goba ditlogo tšeo di sa tlwaelanago le molao woo wa Modimo gantši “ba dira ka tlhago dilo tša molao.” Ke ka baka la’ng batho ba bjalo ba hloile go robala le wa leloko, go bolaya le go utswa? Paulo o hlalosa lebaka, o re: Ba na le letswalo.—Bala Baroma 2:14, 15.

16. Ke ka baka la’ng go ba le letswalo go sa bolele gore re tla phema sebe?

¹⁶ Go sa šetšwe seo, ga go pelaelo gore o lemogile gore go ba le letswalo, e lego leo le šomago bjalo ka hlatse ya ka gare, ga go bolele gore motho o tla latela tlhahlo ya lona. Mohlala wa Baisiraele ba bogologolo o bontšha se. Le ge Baisiraele ba be ba na le letswalo leo ba le neilwego ke Modimo le melao e lebanyago e tšwago go Modimo yeo e lego kgahlanong le go utswa le bohlotlolo, gantši ba be ba sa kwe matswalo a bona le Melao ya Jehofa. (Baroma 2:21-23) Ba be ba ikarabela ka mo go feletšego e bile ba na le sebe, ba be ba fapoga ditekanyetšong le melaong ya Modimo. Se se ile sa tloga se kgoma tswalano ya bona le Mmopi wa bona.—Lef. 19:11; 20:10; Baroma 3:20.

17. Re hwetša kgothatšo efe pukung ya Baroma?

¹⁷ Seo re se ahlaahlilego pukung ya Baroma se ka bonala se dira gore re bone boemo bja batho pele ga Ramatlaohle bo sa kgahliše, go akaretša le bja rena. Lega go le bjalo, Paulo ga se a tlogela ditaba di le bjalo. Ge a be a tsopola mantšu a Dafida a lego go Psalme 32:1, 2, moapostola o ngwadile gore: “Go thaba bao ditiro tša bona tša go hloka molao di swaretšwego le bao dibe tša bona di khupeditšwego; go thaba motho yo sebe sa gagwe le gatee Jehofa a ka se se balego.” (Baroma 4:7, 8) Ee, Modimo o rulagantše gore go be le tsela ya molao ya go lebalelwa dibe.

Ditaba tše Dibotse ka Jesu ke Karolo e Bohlokwa ya Molaetša wa Rena

18, 19. (a) Paulo o gateletše karolo efe ya ditaba tše dibotse ge a be a ngwalela Baroma? (b) Re swanetše go lemoga’ng gore re hwetše ditšhegofatšo tša Mmušo?

¹⁸ Mohlomongwe o ka re: “Ruri tše ke ditaba tše dibotse!” Ruri ke tšona, e lego seo se re bušetšago karolong ya ditaba tše dibotse yeo Paulo a e gateletšego pukung ya Baroma. Go etša ge go bontšhitšwe, Paulo o ngwadile gore: “Ga ke hlabišwe dihlong ke ditaba tše dibotse; ge e le gabotse, . . . ke tsela e matla ya Modimo ya go phološa.”—Baroma 1:15, 16.

¹⁹ Ditaba tšeo tše dibotse di bolela kudu ka karolo yeo Jesu a e kgathago go phethagatšweng ga morero wa Modimo. Paulo o be a ka fagahlela “letšatšing la ge Modimo ka Kriste Jesu a ahlola diphiri tša batho, go ya ka ditaba tše dibotse.” (Baroma 2:16) Ge a be a bolela se, o be a sa tšeele fase ‘mmušo wa Kriste le wa Modimo’ goba seo Modimo a tlago go se fihlelela ka Mmušo woo. (Baef. 5:5) Eupša o bontšhitše gore e le gore re phele re be re hwetše ditšhegofatšo tšeo di tlišwago ke Mmušo wa Modimo, re swanetše go lemoga (1) boemo bja rena re le badiradibe pele ga Modimo le (2) lebaka leo re swanetšego go ba le tumelo go Jesu Kriste gore re lebalelwe dibe. Ge motho a thoma go kwešiša le go dumela dikarolo tšeo tša morero wa Modimo le go bona bokamoso bjoo se se mmulelago bjona, o na le mabaka a  kwagalago a go bolela gore: “Ee, ruri tše ke ditaba tše dibotse!”

20, 21. Ge re le bodireding, ke ka baka la’ng re swanetše go dula re gopola ditaba tše dibotse tšeo di gatelelwago pukung ya Baroma, gona seo se ba le mafelelo afe?

²⁰ Re swanetše go dula re gopola karolo ye ya ditaba tše dibotse ge re phetha bodiredi bja rena bja Bokriste. Ge a be a bolela ka Jesu, Paulo o ile a tsopola mantšu a Jesaya, a rego: “Ga go le o tee yo a theago tumelo ya gagwe go yena yo a tlago go nyamišwa.” (Baroma 10:11; Jes. 28:16) Molaetša wa bohlokwa mabapi le Jesu ga se wa swanela go makatša bao ba tlwaelanego le seo Beibele e se bolelago ka sebe. Lega go le bjalo, ge e le mabapi le ba bangwe, molaetša wo e tla ba selo se sefsa go bona, selo seo ba sa se tsebego goba seo ba sa dumelego go sona ditšong tša gabo bona. Ge ba bjalo ba thoma go dumela go Modimo gomme ba bota Mangwalo, re tla swanela ke go ba hlalosetša karolo yeo Jesu a e phethago. Sehlogo se se latelago se tla ahlaahla Baroma kgaolo 5 yeo e bolelago ka karolo ye ya ditaba tše dibotse. Ga go pelaelo gore sehlogo se se tla go hola bodireding bja gago.

²¹ Ruri ke mo go holago gore batho ba dipelo tše di lokilego ba kwešiše ditaba tše dibotse tšeo go bolelwago ka tšona gantši pukung ya Baroma, ditaba tše dibotse tšeo ‘ge e le gabotse e lego tsela e matla ya Modimo ya go phološa yo mongwe le yo mongwe yo a nago le tumelo.’ (Baroma 1:16) Ntle le gore re tla šegofatšwa, re tla tla re bona ge ba bangwe ba dumelelana le mantšu a Paulo a lego go Baroma 10:15, a rego: “Ke tše dibotse gakaakang dinao tša bao ba bolelago ditaba tše dibotse tša dilo tše dibotse!”—Jes. 52:7.

[Mongwalo wa tlase]

Na o a Gopola?

• Puku ya Baroma e gatelela karolo efe ya ditaba tše dibotse?

• Re swanetše go thuša ba bangwe go kwešiša selo sefe sa bohlokwa?

• Ke bjang “ditaba tše dibotse ka Kriste” di tlago go re phološa le go phološa ba bangwe?

[Dipotšišo tša Thuto]

[Ntlhakgolo go letlakala 8]

Ditaba tše dibotse tšeo di gatelelwago go Baroma di akaretša karolo e bohlokwa yeo Jesu a e kgathago morerong wa Modimo

[Seswantšho go letlakala 9]

Ka moka ga rena re belegwe re na le bolwetši bjo bo bolayago—sebe!