Na o tla Latela Tlhahlo ya Jehofa e Lerato?
Na o tla Latela Tlhahlo ya Jehofa e Lerato?
“Ke hloile tsela e nngwe le e nngwe ya maaka.”—PS. 119:128.
1, 2. (a) Ge o nyaka tlhahlo ya go fihla mo o yago gona, o ka tšeela godimo temošo ya mohuta mang, gona ka baka la’ng? (b) Ke ditemošo tša mohuta mang tšeo Jehofa a di neago bao ba mo hlankelago, gona ka baka la’ng?
AKANYA ka se: O nyaka go ya lefelong tsoko. E le gore o hwetše tlhahlo, o ya go mogwera yo a botegago yo a tsebago tsela ya go ya moo. Ge a dutše a go hlahla, a ka bolela gore: “O hlokomele ge o batamela tseleng e latelago. Leswao leo la tsela le a fapoša. Batho ba bantši ba a le latela gomme ba feleletša ba timela.” Na o tla tšeela godimo go tshwenyega ga gagwe gomme wa latela temošo yeo? Ka ditsela tše dingwe, Jehofa o swana le mogwera yoo. O re nea ditaelo tša maleba tša kamoo re ka fihlelelago bophelo bjo sa felego, eupša gape o re lemoša ka ditutuetšo tše mpe tšeo di ka re lebišago tseleng e fošagetšego.—Doit. 5:32; Jes. 30:21.
2 Sehlogong se le se se latelago, re tla ahlaahla tše dingwe tša ditutuetšo tšeo Mogwera wa rena, e lego Jehofa Modimo, a re lemošago ka tšona. Anke re gopoleng gore Jehofa o re nea ditemošo tše bjalo ka ge a tshwenyegile ka rena e bile a re rata. O nyaka gore re fihle moo re yago gona. Go mo kweša bohloko kudu go bona batho ba ineela ditutuetšong tše mpe gomme ba timela. (Hesek. 33:11) Sehlogong se, re tla ahlaahla ditutuetšo tše tharo tšeo di fošagetšego. Ya pele ke tutuetšo yeo e tšwago go batho ba bangwe, ya bobedi etšwa go rena ka noši. Ya boraro etšwa selong seo e sego sa kgonthe; lega go le bjalo ke se kotsi kudu. Re swanetše go tseba gore ditutuetšo tšeo ke dife le kamoo Tatago rena wa Legodimong a re rutago go di ganetša. Mopsalme yo mongwe yo a buduletšwego o boditše Jehofa gore: “Ke hloile tsela e nngwe le e nngwe ya maaka.” (Ps. 119:128) Na o ikwa ka tsela e swanago? Anke re boneng kamoo re ka matlafatšago maikwelo a bjalo le go dira dilo ka go dumelelana le ona.
“O se ke wa Latela Lešaba”
3. (a) Ke ka baka la’ng go ka ba kotsi go latela basepedi ba bangwe ge e ba re sa kgodišege gore re tšee tsela efe? (b) Ke molao ofe wa motheo woo re o hwetšago go Ekisodo 23:2?
3 Ge o tšea leeto, o ka dira’ng ge e ba o ikwa o sa kgodišege gore o tšee tsela efe? O ka ikwa o lekega go latela basepedi ba bangwe—kudukudu ge e ba o bone batho ba bantši ba kgetha tsela yeo. Go dira bjalo go kotsi. Ge e le gabotse, go ka direga gore basepedi bao ga ba ye moo wena o yago gona, goba le bona ba ka ba ba timetše. Mohlaleng woo, nagana ka molao wa motheo woo o bego o thekga molao o mongwe woo o bego o neilwe Isiraele ya bogologolo. Bao ba bego ba hlankela e le baahlodi goba e le dihlatse ditabeng tša boahlodi ba ile ba lemošwa ka kotsi ya go “latela lešaba.” (Bala Ekisodo 23:2.) Ka ntle le pelaelo, go tloga go le bonolo kudu go batho ba sa phethagalago go ineela kgateletšong ya dithaka, gomme ba kgopamiša toka. Lega go le bjalo, na molao wa motheo wa go se latele lešaba o lekanyeditšwe feela ditabeng tša boahlodi? Ga go bjalo le gatee.
4, 5. Joshua le Kalebe ba ile ba gateletšwa bjang gore ba latele lešaba, eupša ke’ng seo se ba thušitšego go gana?
4 Ge e le gabotse, kgateletšo ya go “latela lešaba” e ka re kgoma ka nako le ge e ka ba efe. E ka tšwelela ka go ponya ga leihlo, gomme go ka ba thata kudu go e ganetša. Ka mohlala, nagana ka kgateletšo ya dithaka yeo Joshua le Kalebe ba kilego ba lebeletšana le yona. E be e le karolo ya sehlopha sa banna ba 12 bao ba bego ba ile go hlola Naga ya Kholofetšo. Ge ba boa, ba lesome ba banna bao ba ile ba nea pego e mpe le yeo e bego e nyamiša. Ba be ba bile ba bolela gore ba bangwe ba baagi ba moo e be e le ditšitširipa tšeo di bego di etšwa go Banefilimi, e lego ditlogolwana tša barongwa ba marabele le basadi ba batho. (Gen. 6:4) Ruri yeo e be e le polelo ya bošilo. Bana bao ba kgopo bao botatago bona e bego e le barongwa ba be ba fedišitšwe ka Meetsefula nywagakgolo e mentši pejana, a se tlogele setlogolwana le ge e le setee sa bona. Eupša gaešita le kgopolo yeo e se nago motheo e ka ba matla kudu go bao ba nago le tumelo e fokolago. Gateetee dipego tšeo tše mpe tšeo di tlišitšwego ke dihlodi tše lesome di ile tša tlatša batho ka poifo le kgakanego. Go se go ye kae, ba bantši ba be ba kgodišegile gore e be e tla ba phošo go tsena Lefaseng la Kholofetšo go etša ge Jehofa a be a laetše. Boemong bjoo bjo bo sa tsepamago, Joshua le Kalebe ba be ba tla dira’ng?—Num. 13:25-33.
5 Ga se ba ka ba latela lešaba. Gaešita le ge lešaba leo le be le hloile go kwa ka taba ye, banna bao ba babedi ba ile ba bolela therešo le go e kgomarela—le ge ba be ba tšhošetšwa ka go bolawa ka go kgatlwa ka maswika! Ba be ba tšere kae sebete se sekaakaa? Ga go pelaelo gore se be se etšwa tumelong yeo ba bego ba na le yona. Batho bao ba nago le tumelo ba bona gabotse phapano magareng ga dipolelo tša batho tšeo di se nago motheo le dikholofetšo tše kgethwa tša Jehofa Modimo. Ka morago banna bao ka bobedi ba ile ba bontšha kamoo ba bego ba ikwa ka gona ka pego ya Jehofa ya go phethagatša kholofetšo e nngwe le e nngwe ya gagwe. (Bala Joshua 14:6, 8; 23:2, 14.) Joshua le Kalebe ba be ba rata Modimo wa bona yo a botegago, gomme ba be ba sa ipone le ka mohla ba mo kweša bohloko ka baka la go latela lešaba leo le se nago tumelo. Ka gona, ba ile ba ema ba tiile, ba re beela mohlala o mobotse kudu lehono.—Num. 14:1-10.
6. Re ka gateletšega ka ditsela dife gore re latele lešaba?
6 Na o fela o ikwa o gateletšega go latela lešaba? Batho bao ba sa ratego Jehofa le bao ba nyatšago ditekanyetšo tša gagwe tša boitshwaro ruri e tloga e le ba bantši lehono. Ge go tliwa ditabeng tša boithabišo le boitapološo, gantši lešaba leo le godiša dikgopolo tšeo di se nago motheo. Ba ka gapeletša gore boitshwaro bjo bo gobogilego, bošoro le go dirišana le meoya tšeo di tletšego kudu mananeong a thelebišene, difiliming gotee le dipapading tša bidio ga di kotsi. (2 Tim. 3:1-5) Ge o kgetha boithabišo goba boitapološo bakeng sa gago goba lapa la gago, na o dumelela matswalo a ba bangwe ao a fokolago a tutuetša diphetho tša gago le go bopa letswalo la gago? Ge e le gabotse, na seo ga se go latela lešaba?
7, 8. (a) “Matla a [rena] a go hlatha” a tlwaetšwa bjang, gona ke ka baka la’ng tlwaetšo e bjalo e le bohlokwa kudu go feta go latela lelokelelo la melao e thata? (b) Ke ka baka la’ng o hwetša mohlala wa bafsa ba bantši ba Bakriste e le o kgothatšago?
7 Jehofa o re neile mpho ya bohlokwa yeo e re thušago go dira diphetho—“matla a [rena] a go hlatha.” Lega go le bjalo, matla ao a nyaka go tlwaetšwa “ka go a diriša.” (Baheb. 5:14) Go latela lešaba go ka se tlwaetše matla a rena a go hlatha; e bile a ka se tlwaetšwe ke lelokelelo la melao e thata ditabeng tšeo di nyakago gore motho a itirela diphetho a diriša letswalo la gagwe. Ka mohlala, ke ka baka leo batho ba Jehofa ba sa newago lelokelelo la difilimi, dipuku goba mekero ya Inthanete yeo ba swanetšego go e phema. Ka ge lefase le le fetoga ka bjako, lelokelelo le bjalo le ka šiiwa ke nako ka pela ka morago ga gore le dirwe. (1 Bakor. 7:31) Se sebe le go feta, le tla re amoga boikarabelo bjo bohlokwa kudu bja go lekola melao ya motheo ya Beibele ka kelohloko le ka thapelo e le gore re dire diphetho motheong wa melao e bjalo ya motheo.—Baef. 5:10.
8 Ke therešo gore ka dinako tše dingwe diphetho tša rena tšeo di theilwego Beibeleng di ka dira gore batho ba bangwe ba se re rate. Bafsa ba Bakriste bao ba lego sekolong ba ka lebeletšana le kgateletšo e matla yeo e tšwago go lešaba ya gore ba bone le go dira seo se bonwago le go dirwa ke batho ka moka. (1 Pet. 4:4) Ka go re’alo, ke mo gobotse go bona Bakriste ba bafsa le ba bagolo ba ekiša tumelo ya Joshua le Kalebe, ba gana go latela lešaba.
Le se ke la Latela “Dipelo tša Lena le Mahlo a Lena”
9. (a) Ge re le leetong, ke ka baka la’ng go ka ba kotsi go fo latela maikwelo a rena? (b) Ke ka baka la’ng molao woo o hwetšwago go Numeri 15:37-39 e be e le wa maleba go batho ba Modimo ba bogologolo?
9 Tutuetšo ya bobedi e kotsi yeo re tlago go e ahlaahla e tšwa go rena ka noši. Re ka e swantšha ka tsela ye: Ge e ba o tšea leeto la go ya lefelong le itšego, na o ka ipona o beela mmapa wa gago ka thoko gomme o latela maikwelo a gago—mohlomongwe o latela tsela e nngwe le e nngwe yeo e ka go bontšhago dilo tše di kgahlišago? Go molaleng gore go latela maikwelo a bjalo go tla go dira gore o se fihlelele pakane ya gago. Mo tabeng ye, ela hloko o mongwe wa melao yeo Jehofa a e neilego Baisiraele ba bogologolo. Ba bantši lehono ga ba kwešiše mabaka ao go bego go na le molao wa go itirela mašaphu morumong wa diaparo le go tsenya lenti le letalalerata godimo ga morumo. (Bala Numeri 15:37-39.) Lega go le bjalo, na wena o kwešiša lebaka? Go latela molao o bjalo go ile gwa thuša batho ba Modimo go dula ba fapane e bile ba le kgole le ditšhaba tša baheitene tšeo di bego di ba dikologile. Seo se be se le bohlokwa ge e ba ba be ba nyaka go dula ba amogelwa ke Jehofa. (Lef. 18:24, 25) Lega go le bjalo, molao woo e bile o utolla kotsi yeo rena ka noši re ka ipeago go yona ya go re fapoša tseleng yeo e re lebišago bophelong bjo bo sa felego. Bjang?
10. Jehofa o bontšhitše bjang gore o tseba gabotse kamoo motho a lego ka gona?
10 Ela hloko lebaka leo Jehofa a le boditšego batho ba gagwe la gore a bee molao wo; o itše: “Le se ke la latela dipelo tša lena le mahlo a lena, tšeo ka go di latela le dirago tša go se botege.” Jehofa o tseba gabotse kamoo motho a lego ka gona. O tseba gabotse kamoo pelo ya rena, goba motho wa ka gare, a ka goketšwago ke seo a se bonago. Ke ka baka leo Beibele e re lemošago gore: “Pelo e boradia kudu go feta selo le ge e le sefe e bile ke e kgopo. Ke mang yo a ka e tsebago?” (Jer. 17:9) Ka gona, na o bona lebaka leo le dirilego gore Jehofa a lemoše Baisiraele? O be a tseba gabotse gore ba be ba tla rata go lebelela ditšhaba tša baheitene tšeo di ba dikologilego gomme ba goketšwa ke seo ba se bonego. Ba be ba ka lekega gore ba swane le batho bao ba go se dumele gomme ba nagane, ba ikwe gotee le go dira dilo go swana le bona.—Die. 13:20.
11. Ke ka ditsela dife re ka goketšwago ke dikwi tša rena tša nama?
11 Mehleng ye ya rena, go bonolo gore dipelo tša rena tša boradia di goketšwe ke dikwi tša rena tša nama. Re phela lefaseng leo le rulaganyeditšwego go kgahla tshekamelo ya nama. Ka gona, re ka diriša bjang molao wa motheo woo o hwetšwago go Numeri 15:39? Ela hloko boemo bjo: Ge e ba batho bao ba go dikologilego sekolong, mošomong, goba motseng wa geno ba apara ka tsela e tsošago dikganyogo, na seo se ka go kgoma? Na o ka lekega gore o ‘latele pelo ya gago le mahlo a gago’ gomme wa goketšwa ke seo o se bonago? Ke moka na o ka lekega gore o theoše ditekanyetšo tša gago ka go apara go swana le batho bao?—Baroma 12:1, 2.
12, 13. (a) Re swanetše go dira’ng ge mahlo a rena a tlwaela go lebelela moo a sa swanelago? (b) Re ka tutuetšwa ke’ng gore re gane go ba mothopo wa teko go ba bangwe?
12 Re swanetše go gata mogato wa ka pelapela wa go hlagolela boitshwaro. Ge e ba mahlo a rena a tlwaetše go lebelela moo a sego a swanela, gona a re gopoleng phetho yeo Jobo yo a botegago a ilego a e dira, yo a ilego a dira kwano le mahlo a gagwe—phetho e tiilego ya go se kganyoge mosadi yo e sego wa gagwe. (Jobo 31:1) Ka mo go swanago, Kgoši Dafida o ile a dira phetho ye: “Selo le ge e le sefe seo se se nago mohola nka se se bee pele ga mahlo a ka.” (Ps. 101:3) Selo le ge e le sefe seo se ka senyago letswalo la rena le le hlwekilego le tswalano ya rena le Jehofa, go rena se swana le “[selo] seo se se nago mohola.” Seo se ka akaretša teko le ge e le efe yeo e goketšago mahlo a rena gomme e bea dipelo tša rena kotsing ya go gokeletšwa go dira sebe.
13 Ka lehlakoreng le lengwe, ga re nyake gore ka tsela e itšego re be “[selo] seo se se nago mohola” go batho ba bangwe ka go ba leka gore ba nagane go dira bobe. Ke ka baka leo re tšeelago godimo keletšo e buduletšwego ya Beibele ya gore re apare moaparo o rulagantšwego gabotse le wa go se solege. (1 Tim. 2:9) Go se solege ga se selo seo re ka fo go se hlalosa ka tsela yeo e kgahlago rena. Re swanetše go naganela matswalo le maikwelo a batho bao ba re dikologilego, re bee khutšo ya bona ya monagano le dinyakwa tša bona pele ga tša rena. (Baroma 15:1, 2) Phuthego ya Bokriste e šegofaditšwe ka bafsa ba dikete tše dintši bao ba beago mohlala o kgahlišago tabeng ye. Re tloga re ikgantšha ka bona ge ba dutše ba gana go ‘latela dipelo tša bona le mahlo a bona,’ ba kgetha go kgahliša Jehofa dilong ka moka tšeo ba di dirago—gaešita le ka tsela yeo ba aparago ka yona!
O se ke wa Latela ‘Dilo tša Lefeela’
14. Samuele o ile a lemoša ka go phegelela ‘dilo dife tša lefeela’?
14 Nagana o tšea leeto leo le go fetišago leganateng. Ge o dutše o sepela, kua pele o bona selo seo o ka rego ke meetse. Eupša ga se ona. Ga go na selo! Go phegelela go nyaka go hwetša selo seo e sego sa kgonthe go ka dira gore o lobe bophelo bja gago! Jehofa o tseba gabotse kotsi yeo. Ela hloko mohlala wo. Baisiraele ba be ba nyaka go swana le ditšhaba tšeo di ba dikologilego, tšeo di bego di bušwa ke dikgoši tša batho. Ge e le gabotse, kganyogo yeo e be e le sebe se segolo, ka ge e be e swana le gore ga ba sa nyaka Jehofa e eba Kgoši ya bona. Le ge Jehofa a ile a ba dumelela gore ba be le kgoši ya motho, o ile a diriša moporofeta Samuele go ba lemoša ka kotsi ya go phegelela ‘dilo tša lefeela.’—Bala 1 Samuele 12:21.
15. Ke ka ditsela dife Baisiraele ba ilego ba phegelela dilo tša lefeela?
15 Na batho bao ba be ba nagana gore ka tsela e itšego kgoši ya motho e be e ka ba ya kgonthe kudu, yeo e ka botwago kudu go feta Jehofa? Ge e ba go le bjalo, ba be ba tloga ba phegelela selo sa lefeela! Le gona ba be ba le kotsing ya go phegelela dilo tše dingwe tše dintši tše di tšwago go Sathane tša go lahletša. Dikgoši tša batho di be di ka ba wetša gabonolo borapeding bja diswantšho. Barapedi ba medimo ya diswantšho ba dira phošo ya go nagana gore dilo tše di bonwago—medingwana yeo e dirilwego ka kota goba leswika—ke tša kgonthe ka tsela e itšego, ke tšeo di ka botwago go feta Modimo yo a sa bonagalego Jehofa, yena yo a dirilego dilo ka moka. Eupša bjalo ka ge moapostola Paulo a boletše, medingwana “ga se selo.” (1 Bakor. 8:4) Ga e kgone go bona, go kwa, go bolela goba go dira selo le ge e le sefe. O ka kgona go e bona le go e kgoma, eupša ge e ba o be o ka rapela o mongwe wa yona, gona o tla be o phegelela selo sa lefeela e le ruri—selo seo e sego sa kgonthe seo se ka tlišago kotsi feela.—Ps. 115:4-8.
16. (a) Sathane o goketša bjang batho ba bantši gore ba phegelele dilo tša lefeela? (b) Ke ka baka la’ng re ka re dilo tše di bonagalago ke dilo tša lefeela, kudukudu ge di bapišwa le Jehofa Modimo?
16 Sathane o sa dutše a na le bokgoni bja go kgodiša batho gore ba phegelele dilo tša lefeela. Ka mohlala, o gokeditše batho ba bantši gore ba lebelele dilo tše di bonagalago e le tšhireletšo. Tšhelete, dithoto gotee le mešomo e lefago tšhelete e ntši di ka bonagala di bulela batho dibaka tše dibotse bophelong. Lega go le bjalo, ke’ng seo dilo tše di bonagalago di se neago ge motho a lwala, ge boemo bja tša boiphedišo bo senyega goba ge go tšwelela kotsi ya tlhago? Di nea motho eng ge a ikwa a ngenegile moko, a nyaka go ba le morero bophelong, a nyaka tsela le dikarabo tša dipotšišo tše bohlokwa bophelong? Di ka imolla motho bjang ge a lebane le lehu? Re tla nyama ge e ba re ka lebelela gore dilo tše di bonagalago di ka kgotsofatša dinyakwa tša moya. Dilo tše di bonagalago ga di phološe; ke dilo tša lefeela. Mafelelong, di ka se nee motho tšhireletšego ya kgonthe, ka ge di se na mohola wa sa ruri bophelong bja gona bjale bjo bo kopana bja batho goba ka ge go ka direga gore ba babje le go hwa. (Die. 23:4, 5) Ka gona, ruri Modimo wa rena Jehofa ke wa kgonthe! Ke feela ka go ba le tswalano e tiilego le yena moo re ka hwetšago tšhireletšego ya kgonthe. Ruri yeo ke tšhegofatšo e kgolo! A re se keng ra mo lahla e le feela gore re phegelele dilo tša lefeela.
17. O ikemišeditše go dira’ng ka ditutuetšo tše mpe tšeo re di ahlaahlilego?
17 Na ga se ra šegofatšwa e le ka gobane Jehofa e le Mogwera wa rena le Mohlahli wa rena leetong la bophelo? Ge e ba re ka tšwela pele re ekwa ditemošo tša gagwe ka ditutuetšo tše tharo tše kotsi—lešaba, dipelo tša rena le dilo tša lefeela—go na le kgonagalo e ntši ya gore re fihle moo re yago gona, e lego bophelong bjo bo sa felego. Sehlogong se se latelago, a re ahlaahleng ditemošo tše dingwe tše tharo tšeo Jehofa a di dirišago go re thuša go hloya le go efoga ditsela tša bofora tšeo di fapošago batho ba bantši.—Ps. 119:128.
O Nagana’ng?
O ka diriša bjang melao ya motheo yeo e hwetšwago Mangwalong a a latelago bophelong bja gago?
[Dipotšišo tša Thuto]
[Seswantšho go letlakala 11]
Na o fela o lekega go latela lešaba?
[Seswantšho go letlakala 13]
Ke ka baka la’ng go le kotsi go latela maikwelo a gago?
[Seswantšho go letlakala 14]
Na o phegelela dilo le ge e le dife tša lefeela?
