Seboka Seo se ka se Kego sa Lebalwa

“GE SEBOKA se se šetše se fedile o tla re: ‘Ka kgonthe se e be e le seboka seo se ka se kego sa lebalwa sa pušo ya Modimo sa ngwaga le ngwaga!’” Ka mantšu ao, ngwanabo rena Stephen Lett wa Sehlopha se Bušago sa Dihlatse tša Jehofa o ile a dira gore lešaba le legolo la batheetši le fagahlele kudu seo se tlago go latela lenaneong. Le be le bokane sebokeng sa bo-126 sa ngwaga le ngwaga sa Watch Tower Bible and Tract Society of Pennsylvania, seo se bego se swerwe ka October 2, 2010, Holong ya Kopano ya Dihlatse tša Jehofa kua Jersey City, New Jersey, U.S.A. Dintlhakgolo tše dingwe tša tiragalo ye ya histori e be e le dife?

Polelo ya go bula ya ngwanabo rena Lett e be e le tlhaloso e mafolofolo mabapi le koloi ya legodimong ya Jehofa bjalo ka ge e hlaloswa ka pukung ya Beibele ya Hesekiele. Koloi ye e kgolo ya letago e swantšhetša mokgatlo wa Modimo woo Jehofa a o hlahlago ka mo go feletšego. Ngwanabo rena Lett o boletše gore karolo ya wona ya legodimong yeo e bopšago ke dibopiwa tša moya, e kitima ka lebelo la legadima—lebelo la dikgopolo tša Jehofa. Karolo ya lefaseng ya mokgatlo wa Jehofa Modimo le yona ka mo go swanago e a sepela. Ngwanabo rena Lett o boletše ka ditiragalo tše mmalwa tše di kgahlišago karolong e bonagalago ya mokgatlo wa Modimo nywageng e sa tšwago go feta.

Ka mohlala, makala a mangwe a ile a kopanywa a dirwa letee, e lego seo se tla dumelelago ba bantši bao ba bego ba hlankela magaeng a Bethele dinageng tšeo gore ba šetše kudu modiro wa go ruta. Ngwanabo rena Lett o ile a kgothaletša batheetši go tšwela pele ba rapelela Sehlopha se Bušago gore ka ge se emela sehlopha sa mohlanka se tšwele pele se sa fo botega feela, eupša gape se dule se le bohlale goba se na le temogo.—Mat. 24:45-47.

Dipego tše di Kgothatšago le Dipoledišano Tšeo di Kgomago Pelo

Tab Honsberger, yo a hlankelago Komiting ya Lekala kua Haiti, o neile pego e kgomago pelo ka ditlamorago tša tšhišinyego ya lefase yeo e bilego gona ka January 12, 2010, yeo e fetilego ka maphelo a batho bao ba akanyetšwago go 300 000 nageng yeo. O boletše gore baruti ba be ba botša batho gore Modimo o otlile bahlaselwa bao ka baka la go hloka ga bona tumelo mola a be a šireletša bao ba lokilego. Lega go le bjalo, diketekete tša disenyi tšeo di golegilwego di ile tša tšhaba ge maboto a kgolego a kgerešwa ke tšhišinyego. Eupša Mahaiti a mantši a dipelo tše di botegago a hwetša khomotšo ka go ithuta therešo mabapi le lebaka leo mehla ye re phelago go yona e tletšego mathata. Ngwanabo rena Honsberger o ile a tsopola ngwanabo rena yo a botegago wa Mohaiti yo a lahlegetšwego ke mosadi wa gagwe masetlapelong ge a re: “Ke sa lla go ba go fihla le lehono. Ga ke tsebe gore ke tlo mo llela go fihla neng, eupša ke thabela go kgongwa ke lerato la mokgatlo  wa Jehofa. Ke na le kholofelo e bile ke ikemišeditše go e abelana le ba bangwe.”

Mark Sanderson, yoo ga bjale e lego setho sa lapa la Bethele ya Brooklyn, o neile pego ka naga ya Philippines. E be e le setho sa Komiti ya Lekala moo gomme o be a thabetše go bolela ka ditlhora tše 32 tša go latelelana tša palo ya bagoeledi ba Mmušo le kamoo palo ya dithuto tša Beibele e fetago kgole bagoeledi ba nageng yeo. O boletše ka ngwanabo rena yo a bitšwago Miguel yoo setlogolo sa gagwe se ilego sa bolawa. Miguel o ile a šoma ka thata go dira gore mmolai a sekišwe le go golegwa. Ka morago ge a be a nea bohlatse kgolegong, Miguel o ile a kopana le mmolai yoo. Le ge a be a tšhogile, Miguel o ile a bolela le yena ka bonolo le botho. Mafelelong o ile a ithuta le monna yoo, gomme o ile a arabela gabotse ke moka a thoma go rata Jehofa. Ga bjale o kolobeditšwe. Miguel ke mogwera wa gagwe wa kgauswi gomme o lwela gore ngwanabo yo yo mofsa a lokollwe kgolegong ka pela. *

Lenaneong go ile gwa latela poledišano ka ngwanabo rena Mark Noumair, yo e lego mohlahli wa Lefapha la Dikolo tša Pušo ya Modimo. O ile a boledišana le banyalani ba bararo—Alex le Sarah Reinmueller, David le Krista Schafer gotee le Robert le Ketra Ciranko. Alex Reinmueller, e lego mothuši go Komiti ya Kgatišo, o boletše mabapi le kamoo a ilego a dira therešo gore e be ya gagwe ge a be a bula madibogo kua Canada a na le nywaga e 15 feela, gantši a šoma a nnoši. Ge a botšišwa gore ke mang yo a bilego le tutuetšo e kgolo go yena Bethele, ngwanabo rena Reinmueller o ile a bolela ka banna ba bararo bao ba botegago, a bolela kamoo yo mongwe le yo mongwe wa bona a mo thušitšego go gola moyeng. Mosadi wa gagwe Sarah, o boletše ka segwera sa gagwe le kgaetšedi yo a ilego a kgotlelela ka nywagasome dikgolegong tša China ka baka la tumelo ya gagwe. Sarah o boletše gore o ile a ithuta go ithekga ka Jehofa ka gore a ithapelele.

David Schafer, e lego mothuši go Komiti ya go Ruta, o ile a reta mmagwe ka baka la tumelo ya gagwe e matla ke moka a bolela ka bana babo rena bao ba bego ba šoma go rema mehlare gomme ba mo thekga gore e be mmulamadibogo wa go thuša ge e be e sa le yo mofsa. Mosadi wa gagwe Krista, o boletše ka borutho ka go tutuetšwa ga gagwe ke ditho tše di godilego tša lapa la Bethele tšeo di ilego tša ipontšha e le tše di “botegago go se senyenyane” bjalo ka ge Jesu a boletše.—Luka 16:10.

Robert Ciranko, e lego mothuši go Komiti ya Bongwadi, o ile a bolela ka borakgolo ba gagwe ba babedi le bomakgolo ba gagwe ba babedi, bao e bego e le bafaladi ba Hungary e bile e le Bakriste ba tloditšwego. Ge a sa le yo monyenyane, o be a kgahlwa ke ge a e ya dikopanong tše dikgolo nywageng ya bo-1950 gomme a bona gore  mokgatlo wa Jehofa o be o feta kgole phuthego ya gabo. Mosadi wa gagwe Ketra, o boletše mabapi le kamoo a ithutilego go botega ge a be a hlankela e le mmulamadibogo phuthegong yeo e bego e hlasetšwe ke bohlanogi le mathata a mangwe. O ile a kgotlelela gomme mafelelong o ile a kgethelwa go hlankela e le mmulamadibogo yo a kgethegilego phuthegong yeo a ilego a kgahlwa ke botee bja yona.

Manfred Tonak o ile a latela ka pego ya mabapi le Ethiopia. Naga ye e be e dutše e le gona mehleng ya Beibele, gomme ga bjale e šegofaditšwe ka bagoeledi ba ditaba tše dibotse ba ka godimo ga 9 000. Bontši bja bona ba dula toropong ya Addis Ababa goba kgauswi le yona. Ka gona mafelo a lego lekatana a nyaka bagoeledi ba bantši ba Mmušo. Go fihlelela se, Dihlatse tša Maethiopia tšeo di dulago dinageng tše dingwe di ile tša laletšwa gore di etele moo ka morero wa go dira boboledi dikarolong tšeo di lego lekatana tša naga yeo. Ba bantši ba ile ba tla, ba kgothatša Dihlatse tša lefelong leo gomme ba hwetša batheetši bao ba arabelago gabotse.

Ntlhakgolo ya lenaneo e be e le tšhiedišano ya mabapi le Dihlatse tša Jehofa kua Russia le mathata a bona a semolao. Aulis Bergdahl wa Komiti ya Lekala kua Russia o ile a bolela ka histori ya tlaišo ya Dihlatse kua Russia, kudukudu kua Moscow. Philip Brumley wa Lefapha la tša Molao lekaleng la United States o boletše ka ditiragalo tše di kgahlišago tša dikgweding tše di sa tšwago go feta ge Kgoro ya Yuropa ya Ditshwanelo tša Batho (ECHR) e be e theeditše melato e senyane yeo Dihlatse di bego di latofatšwa ka yona. Kgoro e ile ya dumelelana ka lentšu letee gore ga go le e tee ya ditatofatšo tše senyane yeo e bego e kwagala, gomme mabakeng a mantši kgoro e ile ya dira maiteko a kgethegilego go hlalosa ka botlalo lebaka leo dingangišano tše di bego di fošagetše. Le ge go sa emetšwe go bona gore ditaba tše di tla felela kae, Ngwanabo rena Brumley o ile a bolela ka kgodišego mabapi le mafelelo ao kahlolo ya Kgoro e ka bago le ona melatong ya nageng yeo.

Se se latetšego ditaba tše tše dibose, Ngwanabo rena Lett o tsebišitše gore ECHR e ile ya bona go dumeletšwe gore go be le tsheko mabapi le motšhelo yeo e tšerego nako e telele yeo e akaretšago mmušo wa Fora le Dihlatse tša Jehofa. Kgoro ye e hlomphegago kudu e dumela go swara ditsheko tše sego kae tšeo di tlišwago go yona. Go ba go fihla mo nakong ye ECHR e šetše e theeditše ditsheko ka moka tše 39 tšeo di akaretšago Dihlatse tša Jehofa, gomme re fentše tše 37 tša tšona. Ngwanabo rena Lett o kgothaleditše batho ka moka ba Modimo gore ba bolele ka taba ye le Jehofa Modimo ka thapelo.

Pego ya mafelelo e ile ya newa ke Richard Morlan, e lego mohlahli wa Sekolo sa Bagolo ba Phuthego. O boletše ka lethabo ka sekolo se le tebogo ya bagolo bao ba šetšego ba etšwa go sona.

 Dipolelo tše Dingwe ka Ditho tša Sehlopha se Bušago

Guy Pierce wa Sehlopha se Bušago o neile polelo e kgothatšago yeo e bego e lebišitše sehlogong sa ngwaga seo se rego: “Bota leina la Jehofa.” (Tsef. 3:12) O boletše gore le ge ye e le nako e kgahlišago ka ditsela tše dintši go batho ba Jehofa, e bile ke nako yeo re sa swanelago go tšea dilo gabohwefo. Letšatši la Jehofa le kgaufsi, lega go le bjalo batho ba sa dutše ba bota bodumedi bja maaka, mekgatlo ya dipolitiki, mahumo a dilo tše di bonagalago le tše di swanago le tšona, e bile ba tšhabela therešo. Gore re hwetše botšhabelo bja kgonthe, re swanetše go bitša leina la Jehofa, e lego seo se akaretšago go tseba, go hlompha ka mo go tseneletšego le go bota Motho yo a emelwago ke leina leo, go mo rata ka selo se sengwe le se sengwe seo re nago le sona.

David Splane wa Sehlopha se Bušago o neile polelo e šišinyago kgopolo yeo e nago le sehlogo seo se rego: “Na o Tsene Boikhutšong bja Modimo?” O boletše gore Boikhutšo bja Modimo ga bo bolele go tapa, ka ge Jehofa le Morwa wa gagwe ba “tšwetše pele ba šoma” letšatšing leo ka moka la seswantšhetšo la boikhutšo e le gore ba phethe ka katlego merero ya Modimo bakeng sa dilo tšeo a di bopetšego lefase. (Joh. 5:17) Ka gona, re ka tsena bjang boikhutšong bja Modimo? Go lahla sebe le go tlogela mediro ya go itokafatša ke feela karolo ya karabo ya potšišo yeo. Re swanetše go bontšha tumelo go Modimo gomme re dule re gopola morero wa gagwe, re dira sohle seo re ka se kgonago go dumelelana le morero woo. Ka dinako tše dingwe yeo e ka ba tlhohlo e kgolo, eupša re swanetše go amogela keletšo gomme re dirišane le tlhahlo e tšwago mokgatlong wa Jehofa. Ngwanabo rena Splane o kgothaleditše batheetši bohle go dira sohle seo ba ka se kgonago gore ba tsene boikhutšong bja Modimo.

Polelo ya mafelelo yeo e neilwego ke Anthony Morris wa Sehlopha se Bušago, e be e na le sehlogo seo se rego: “Re sa Letetše Eng?” A bontšha maikwelo a go akgofa ga nako le borutho bja botswadi, Ngwanabo rena Morris o ile a gopotša batheetši ka ditiragalo tša boporofeta tšeo di sa lego ka pele ga rena, ditiragalo tšeo batho ka moka bao ba botegago ba di letetšego ka phišego. Di akaretša kgoeletšo ya gore: “Go na le khutšo le polokego” le go fedišwa ga bodumedi bja maaka. (1 Bathes. 5:2, 3; Kut. 17:15-17) Ngwanabo rena Morris o lemošitše gore re pheme go bolela gore: “Ye e swanetše go ba e le Haramagedone,” e le ge re bona goba go kwa ditabeng ditiragalo tšeo di sa phethagatšego diporofeto tšeo. O ile a kgothaletša moya wa go leta ka lethabo le kgotlelelo woo o hlaloswago go Mika 7:7. Le gona ka nako e swanago o kgothaleditše bohle go batamelana kudu le Sehlopha se Bušago, go swana le mašole ao a lego moo ntwa e lego thata gona. O itše: “Le beteng pelo, lena bohle bao le letetšego Jehofa.”—Ps. 31:24.

Mafelelong, go be go na le ditsebišo tšeo di kgahlišago tšeo di ka se kego tša lebalwa. Geoffrey Jackson wa Sehlopha se Bušago o ile a tsebiša ka morero wa go gatiša kgatišo e nolofaditšwego e ithutwago ya Morokami le go bona ge eba e tla tšwetšwa pele ntle le go kgaotšwa bakeng sa bao ba nago le bokgoni bjo bonyenyane bja go bala Seisemane. Ke moka Stephen Lett a tsebiša gore Sehlopha se Bušago se tla rulaganya maeto a bodiši bakeng sa balebeledi ba dilete le basadi ba bona kua United States. O ile a tsebiša gape gore Sekolo sa Tlwaetšo ya Bodiredi se tla thoma go tsebja e le Sekolo sa Beibele sa Bana Babo Rena ba Sego Lenyalong. O ile a ba a tsebiša ka sekolo se sefsa seo se bitšwago Sekolo sa Beibele sa Banyalani ba Bakriste. Sekolo se se tla nea banyalani tlwaetšo e oketšegilego gore ba dirišwe kudu mokgatlong wa Jehofa. Ngwanabo rena Lett o tsebišitše gape gore Sekolo sa Balebeledi ba Basepedi le Basadi ba Bona gotee le Sekolo sa Ditho tša Dikomiti tša Makala le Basadi ba Tšona se tla thoma go swarwa gabedi ngwageng kua Patterson, gomme go lokišeleditšwe gore bao ba šetšego ba bile go sona ba tle ba se boeletše.

Phetho e kgothatšago ya lenaneo e bile ge ngwanabo rena wa nywaga e 97, John E. Barr, e lego setho sa nako e telele sa Sehlopha se Bušago, a rapela thapelo ya boikokobetšo le e tšwago pelong. * Yo mongwe le yo mongwe o ile a tloga moo a ikwa gore le e bile letšatši leo le ka se kego la lebalwa.

[Mengwalo ya tlase]

[Ntlhakgolo go letlakala 19]

Dipoledišano di ile tša thabelwa ke batho ka moka bao ba bego ba le gona

[Ntlhakgolo go letlakala 20]

Jehofa o šegofaditše modiro wa boboledi kua Ethiopia