Kitimang Lebelo ka Kgotlelelo

‘A re kitimeng ka kgotlelelo lebelo leo le beilwego pele ga rena.’—BAHEB. 12:1.

1, 2. Moapostola Paulo o ile a bapetša bophelo bja Bokriste le eng?

NGWAGA le ngwaga go ba le diphadišano tša mabelo a matelele tšeo di swarwago mafelong a mantši. Bakitimi bao ba ipotšago gore ba na le bokgoni ba tsenela mabelo ao ba na le pakane e tee feela—go fenya. Ba bantši bao ba tsenelago mabelo ao ba ba le pakane e nngwe e fapanego le yeo. Go batho bao, selo se segolo go bona ke ge ba ka fetša lebelo.

² Ka Beibeleng, bophelo bja Bokriste bo swantšhwa le lebelo. Moapostola Paulo o ile a botša Bakristegotee le yena ba kua Korinthe taba yeo lengwalong la gagwe la pele leo a ba ngwaletšego lona. O ngwadile gore: “Na ga le tsebe gore bakitimi lebelong ba kitima ka moka, eupša ke o tee feela yo a hwetšago moputso? Kitimang ka tsela yeo gore le o thope.”—1 Bakor. 9:24.

3. Ke ka baka la’ng Paulo a boletše gore ke mokitimi o tee feela yoo a fenyago?

³ Na Paulo o be a bolela gore ke Mokriste o tee feela gare ga bao ba bego ba le gona yo a bego a tla hwetša moputso wa bophelo gomme ba bangwe ka moka ba kitimela lefeela? Ga go bjalo le gatee! Bakitimi bao ba bego ba tsenela diphadišano ba be ba itlwaetša le go katana ka matla ka morero wa gore e be bafenyi. Paulo o be a nyaka gore Bakristegotee le yena ba katane ka tsela yeo ge ba phegelela go hwetša bophelo bjo bo sa felego. Ge e ba ba ka dira bjalo, ba be ba ka holofela go hwetša moputso wa bophelo. Therešo ke gore mo lebelong la Bokriste, bohle bao ba fetšago lebelo ba tla amogela moputso woo.

4. Ke’ng seo re swanetšego go se ela hloko ka lebelo leo le lego pele ga rena?

⁴ Mantšu ao a a kgothatša go rena bohle bao ba tsenetšego lebelo la bophelo lehono, eupša a bile a dira gore re nagane. Ka baka la’ng? Ka gobane moputso woo—go sa šetšwe gore ke wa bophelo bja legodimong goba bophelo Paradeiseng mo lefaseng—ga o bapišwe le selo. Go ba gona, lebelo le ke le letelele e bile le thata; go na le mapheko a mantši, ditšhitišo le dikotsi mo tseleng. (Mat. 7:13, 14) Ka manyami, ba bangwe ba ile ba fokotša lebelo la bona, ba lapa, goba gaešita le go wa tseleng. Ke melaba efe le dikotsi tšeo di lego gona lebelong la bophelo? O ka di phema bjang? O ka dira’ng gore o fihle mafelelong gomme o feleletše o fentše lebelo leo?

Go Nyakega Kgotlelelo Gore Motho a Fenye

5. Go etša ge go begilwe go Baheberu 12:1, Paulo o boletše’ng mabapi le lebelo?

⁵ Lengwalong la gagwe leo a le ngwaletšego Bakriste ba Baheberu kua Jerusalema le Judea, Paulo o ile a bolela gape ka dibopego tša dipapadi tša boramabelo. (Bala Baheberu 12:1.) Ga se a bolela feela ka mohola wa go tsenela lebelo leo eupša o boletše le ka dilo tšeo motho a swanetšego go di dira gore a le fenye. Pele ga ge re ka hlahloba keletšo e buduletšwego ya Paulo yeo a bego a e lebišitše go Bakriste ba Baheberu gomme ra bona seo re ka ithutago sona go yona, anke re ahlaahleng seo se dirilego gore Paulo a ngwale lengwalo leo gotee le seo a bego a leka go kgothaletša batheetši ba gagwe go se dira.

6. Bakriste ba be ba gateletšwe bjang ke baetapele ba bodumedi?

⁶ Bakriste ba lekgolong la pele la nywaga, kudukudu bao ba bego ba dula Jerusalema le Judea, ba be ba lebeletšane le diteko tše dintši le mathata. Ba be ba gateletšwe o šoro ke baetapele ba bodumedi bja Sejuda, e lego bao ba bego ba sa dutše ba na le matla a magolo godimo ga batho. Pejana, baetapele bao ba ile ba atlega go ahlola Jesu Kriste gore o lwa le mmušo gomme ba mmolaya bjalo ka sesenyi. Le gona ba be ba ikemišeditše go tšwetša pele kganetšo yeo. Ka pukung ya Ditiro, re bala dipego tše dintši tša ditšhošetšo tša bona le ditlhaselo tša bona go Bakriste, tšeo di thomilego gateetee ka morago ga ditiragalo tše di makatšago ka  Pentekoste ya 33 C.E. Ga go pelaelo gore seo se ile sa thatafišetša ba botegago bophelo.—Dit. 4:1-3; 5:17, 18; 6:8-12; 7:59; 8:1, 3.

7. Bakriste bao Paulo a ba ngwaletšego lengwalo ba be ba phela mehleng efe e hlobaetšago?

⁷ Bakriste bao ba be ba bile ba phela nakong ya pejana ga bofelo bja tshepedišo ya dilo ya Sejuda. Jesu o be a ba boditše ka phedišo yeo e bego e tla tlela setšhaba se se sa botegego sa Bajuda. O be a bile a boditše balatedi ba gagwe ka ditiragalo tšeo di bego di tla direga nakwana pele ga bofelo, a ba neile ditaelo tše di lebanyago tša seo ba bego ba swanetše go se dira gore ba phologe. (Bala Luka 21:20-22.) Ka gona, ba be ba tla dira’ng? Jesu o ba lemošitše gore: “Itlhokomeleng gore dipelo tša lena di se ke tša imelwa ke bojagobe, go nwa kudu le dipelaelo tša bophelo gomme ka tšhoganyetšo letšatši leo la le wela ka bjako.”—Luka 21:34.

8. Ke’ng seo se ka bago se dirile gore Bakriste ba bangwe ba fokotše lebelo goba ba felelwe ke matla?

⁸ Ge Paulo a be a ngwalela Baheberu lengwalo la gagwe, go be go šetše go fetile nywaga e ka bago e 30 ka morago ga ge Jesu a ba lemošitše ka seo. Bakriste bao ba ka ba ba ile ba kgongwa bjang ke go feta moo ga nako? Ba bangwe ba ile ba ineela dikgateletšong le ditšhitišong tša bophelo bja letšatši le letšatši gomme ba palelwa ke go dira tšwelopele ya moya yeo e ka bego e ba matlafaditše. (Baheb. 5:11-14) Go bonagala ba bangwe ba ile ba nagana gore bophelo bo be bo tla ba bonolo ge e ba ba be ba ka latela tsela ya bophelo ya Bajuda bao ba bego ba phela le bona. Go ba gona, Bajuda bao ba be ba se ba lahla Modimo ka mo go feletšego; ba be ba sa dutše ba latela Molao wa gagwe go fihla bokgoleng bjo itšego. Bakriste ba bangwe ba ile ba šušumetšwa goba ba tšhošetšwa ke batho ba bangwe ka phuthegong bao ba bego ba fišegela go latela Molao wa Moshe le setšo sa bona. Ke’ng seo Paulo a bego a ka se bolela seo se bego se tla thuša bana babo ba Bakriste gore ba dule ba phafogile moyeng gomme ba kgotlelele lebelong le?

9, 10. (a) Ke kgothatšo efe ya Paulo yeo re e balago go ya bofelong bja kgaolo ya lesome ya lengwalo la Baheberu? (b) Ke ka baka la’ng Paulo a ile a ngwala ka mediro e bontšhago potego ya dihlatse tša bogologolo?

⁹ Go a kgahliša go bona kamoo Paulo, a buduletšwe ke Modimo, a ilego a nyaka go matlafatša Bakriste ba Baheberu. Go kgaolo ya lesome ya lengwalo la gagwe, Paulo o boletše gore Molao e be e le feela “moriti wa dilo tše dibotse tše di tlago go tla” gomme a bontšha gabotse mohola wa sehlabelo sa Kriste sa topollo. Go ya mafelelong a kgaolo yeo, Paulo o kgothaleditše bao ba bego ba tlo bala lengwalo la gagwe gore: “Go nyakega gore le kgotlelele, e le gore ka morago ga ge le dirile thato ya Modimo, le amogele seo a se holofeditšego. Gobane go šetše ‘lebakanyana’ gomme ‘yo a tlago o tla fihla, a ka se diege.’”—Baheb. 10:1, 36, 37.

¹⁰ Go Baheberu kgaolo 11, Paulo o hlalosa ka bokgoni seo tumelo ya kgonthe go Modimo e lego sona. Le gona o hlalosa seo a diriša mehlala ya bogologolo ya banna le basadi ba tumelo. Ke ka baka la’ng a ile a bolela ka tumelo pele ga ge a ka boela a bolela ka kgotlelelo? Ke ka gobane o be a nyaka gore Bakriste bao ba lemoge gore ge e ba ba be ba tla bontšha tumelo ya kgonthe go Jehofa, go be go nyakega gore ba be le kgotlelelo le sebete. Mohlala o mobotse woo o beilwego ke bahlanka bao ba bogologolo ba botegago ba Jehofa o be o tla matlafatša Baheberu gore ba lebeletšane le diteko le mathata ao a bego a tla ba wela. Ka gona, ka morago ga gore Paulo a bolele ka mediro ya tumelo ya babotegi bao ba mehleng ya kgale, o be a ka bolela gore: “Ka ge re na le leru le legolo gakaakaa la dihlatse leo le re dikologilego, le rena a re apoleng boima bjo bongwe le bjo bongwe le sebe seo se re tatetšago gabonolo, re kitimeng ka kgotlelelo lebelo leo le beilwego pele ga rena.”—Baheb. 12:1.

‘Leru la Dihlatse’

11. Go nagana ka ‘leru le legolo la dihlatse’ go ka re kgoma bjang?

¹¹ Ka tsela ya seswantšhetšo, ‘leru le legolo la dihlatse’ le be le sa no bogela goba go ema ka thoko, le le moo go fo bogela lebelo goba go bona ge mokitimi goba sehlopha seo le se ratago se fenya lebelo. Go e na le moo, e be e le batšeakarolo, ba le bjalo ka bakitimi lebelong. Le gona ba be ba kitimile lebelong leo ka katlego gomme ba le feditše. Le ge ga bjale ba hwile, go be go ka naganwa ka bona e le bakitimi bao ba  nago le phihlelo bao ba bego ba ka kgothaletša bakitimi ba bafsa lebelong leo. Nagana kamoo motho yo a bego a kitima lebelong le bjalo a bego a tla ikwa ka gona ge e ba a tseba gore kgauswi le yena, goba gare ga babogedi, go be go na le ba bangwe bao e bego e le bakitimi ba nago le phihlelo. Na o be a ka se dire sohle seo a ka se kgonago gore a fetše lebelo? Dihlatse tšeo tša bogologolo di be di ka hlatsela gore go sa šetšwe kamoo lebelo leo la seswantšhetšo le bego le lapiša ka gona, motho o be a ka kgona go le fenya. Ka gona, ka go dula ba gopola mohlala wa ‘leru le legolo la dihlatse,’ Bakriste ba Baheberu ba be ba ka ba le sebete gomme ba ‘kitima lebelo ka kgotlelelo’—go etša ge le rena re ka dira bjalo lehono.

12. Mehlala yeo Paulo a boletšego ka yona e sepedišana bjang le maemo a rena?

¹² Bontši bja babotegi bao Paulo a boletšego ka bona ba fetile maemong a swanago le a rena. Ka mohlala, Noa o phetše pejana ga go fedišwa ga lefase la pele ga Meetsefula. Re phela kgauswi le bofelo bja tshepedišo ya gona bjale ya dilo. Aborahama le Sara ba ile ba laelwa go tlogela naga ya gabo bona gomme ba ye ba phelele borapedi bja therešo ke moka ba letele go phethagatšwa ga kholofetšo ya Jehofa. Re kgothaletšwa go ikgafa gomme Jehofa a re amogele re be re hwetše ditšhegofatšo tšeo a re swaretšego tšona. Moshe o ile a sepela lešokeng le le boifišago a lebile Nageng ya Kholofetšo. Le rena re leetong tshepedišong ye ya dilo yeo e lebilego mafelelong, re sepela re lebile lefaseng le lefsa leo re le holofeditšwego. Ruri re swanetše go ela hloko dilo tše banna ba ba fetilego go tšona, katlego ya bona le go palelwa ga bona, gotee le dilo tšeo ba bego ba le matla go tšona le tšeo ba bego ba fokola go tšona.—Baroma 15:4; 1 Bakor. 10:11.

Ba Kgonne Bjang go Atlega?

13. Noa o ile a lebeletšana le ditlhohlo dife, gomme o thušitšwe ke’ng go di fenya?

¹³ Ke’ng seo se dirilego gore bahlanka ba ba Jehofa ba kgotlelele gomme ba atlege lebelong le? Ela hloko seo Paulo a se ngwadilego ka Noa. (Bala Baheberu 11:7.) ‘Meetsefula ao a bego a tla tlela lefase gomme a fediša nama ka moka’ e be e le selo seo Noa a bego ‘a sešo a se bona.’ (Gen. 6:17) E be e le selo seo se bego se se sa ka sa direga pele, seo se bego se se sa ka sa ba gona le ka mohla. Lega go le bjalo, Noa ga se a ka a ipotša gore se ka se kgonege goba gore se ka se direge. Ka baka la’ng? Ka gobane o be a na le tumelo ya gore selo le ge e le sefe seo Jehofa a se boletšego, Jehofa o be a tla se dira. Noa ga se a ka a nagana gore tšeo a bego a kgopetšwe go di dira di be di le thata kudu. Go e na le moo, o ile “a dira tšona tšeo.” (Gen. 6:22) Ge re nagana dilo ka moka tšeo Noa a bego a swanetše go di dira—go aga areka, go kgoboketša diphoofolo, go tlatša areka ka dijo tša bona le tša diphoofolo, go bolela molaetša wa go lemoša batho le go dira gore lapa la gagwe le dule le tiile moyeng—e be e se selo se senyenyane gore a ‘dire tšona tšeo.’ Lega go le bjalo, tumelo ya Noa le kgotlelelo ya gagwe di ile tša feleletša ka gore yena le lapa la gagwe ba hwetše bophelo le ditšhegofatšo.

14. Ke diteko dife tšeo Aborahama le Sara ba ilego ba di kgotlelela, gomme di re ruta thuto efe?

¹⁴ Aborahama le Sara ke bona ba latelago lelokelelong la Paulo la “leru le legolo . . . la dihlatse leo le re dikologilego.” Ba ile ba tlogedišwa bophelo bja bona bjo bo tlwaelegilego bja Uri, gomme go be go bonagala e ka ga ba tsebe bokamoso bja bona. Ba ile ba ipontšha e le mehlala ya tumelo e sa šišinyegego le ya go kwa dinakong tše thata. Ka baka la boikgafo bjoo Aborahama a bego a ikemišeditše go bo dira borapeding bja therešo, o ile a bitšwa ka mo go swanetšego gore ke “tatago bohle bao ba nago le tumelo.” (Baroma 4:11) Paulo o ile a bolela feela ka ditiragalo tše bohlokwa tša bophelo bja bona, ka ge bao ba bego ba bala lengwalo la gagwe ba be ba tseba ka botlalo tša bophelo bja Aborahama. Go sa šetšwe seo, thuto yeo Paulo a ilego a e fetiša e be e le e matla; o itše: “Ka moka ba ile ba hwa ba na le tumelo, gaešita le ge dikholofetšo di se tša phethagala mehleng ya bona, eupša ba di bone di le kgole ba di amogela gomme ba bolela phatlalatša gore e be e le bašele le badiiledi nageng.” (Baheb. 11:13) Go molaleng gore tumelo ya bona go Modimo le tswalano ya bona le yena di  ile tša ba thuša go kitima lebelong leo ka kgotlelelo.

15. Ke’ng seo se tutueditšego Moshe gore a phele ka tsela yeo a ilego a phela ka yona?

¹⁵ Moshe ke o mongwe wa bahlanka ba Jehofa bao e lego mehlala e mebotse gare ga ‘leru la dihlatse.’ Moshe o ile a tlogela bophelo bja manobonobo le bja maemo, “a kgetha go swarwa gampe le setšhaba sa Modimo.” Ke’ng seo se ilego sa mo tutuetša go dira bjalo? Paulo o araba ka gore: “O be a tsepeletše go amogeleng moputso. . . . O ile a tšwela pele a tiile go etša ge eka o bona Yo a sa bonagalego.” (Bala Baheberu 11:24-27.) Moshe ga se a ka a šitišwa ke “go thabela boipshino bja nakwana bja sebe.” Modimo e be e le wa kgonthe go Moshe, le gona dikholofetšo tša gagwe e be e le tša kgonthe go yena moo a ilego a bonagatša sebete se se makatšago gotee le kgotlelelo. O ile a katana ka matla ge a be a etelela Baisiraele pele go tšwa Egipita go leba Nageng ya Kholofetšo.

16. Ke ka baka la’ng Moshe a ile a se fele matla ge a be a thibelwa go tsena Nageng ya Kholofetšo?

¹⁶ Ka go swana le Aborahama, Moshe ga se a ka a bona go phethagatšwa ga kholofetšo ya Modimo nakong ya ge a be a sa phela. Nakong ya ge Baisiraele ba be ba le kgauswi le go tsena Nageng ya Kholofetšo, Moshe o ile a botšwa gore: “O tla bona naga yeo o le kgole, eupša o ka se tsene nageng yeo ke e neago bana ba Isiraele.” Se e bile ka gobane pejana yena le Arone, ge ba be ba galefišitšwe ke borabele bja setšhaba, ba ‘paletšwe ke go phetha boikarabelo bja bona go Modimo ge ba be ba le gare ga bana ba Isiraele kua meetseng a Meriba.’ (Doit. 32:51, 52) Na Moshe o ile a fela matla goba a befelwa? Aowa. O ile a šegofatša setšhaba seo gomme a phetha ka go bolela mantšu a rego: “Wena Isiraele, o yo a thabilego! Ke mang a etšago wena, wena setšhaba seo se phološwago ke Jehofa, Yena kotse yeo e go thušago, e lego yena tšhoša ya gago e kgolo?”—Doit. 33:29.

 Seo re Ithutago Sona

17, 18. (a) Ge e le mabapi le lebelo la rena la bophelo, ke’ng seo re ka ithutago sona go ‘leru la dihlatse’? (b) Ke’ng seo se tlago go ahlaahlwa sehlogong se se latelago?

¹⁷ Ka go hlahloba ga rena maphelo a ba bangwe ba bao e lego karolo ya “leru . . . la dihlatse leo le re dikologilego,” go molaleng gore ge e ba re tla kitima lebelo le go fihla mafelelong, re swanetše go ba le tumelo e feletšego go Modimo le go dikholofetšo tša gagwe. (Baheb. 11:6) Tumelo yeo e swanetše go kgoma tsela yeo re phelago maphelo a rena ka yona gona bjale. Ka go fapana le bao ba se nago tumelo, bahlanka ba Jehofa ba ka kgona go bona ka kua ga dilo tšeo di lego molaleng. Re kgona go bona “Yo a sa bonagalego” ke moka ra kitima lebelo ka kgotlelelo.—2 Bakor. 5:7.

¹⁸ Lebelo le la Bokriste ga le bonolo. Lega go le bjalo, go a kgonega gore re fetše lebelo le ka katlego. Sehlogong se se latelago re tla ahlaahla thušo e nngwe yeo e lego gona go re thuša gore re atlege.

Na o ka Hlalosa?

• Ke ka baka la’ng Paulo a ile a fetša nako e teletšana a bolela ka dihlatse tše botegago tša bogologolo?

• Go naganišiša ka “leru . . . la dihlatse leo le re dikologilego” go ka re kgothatša bjang gore re kitime ka kgotlelelo?

• O ithutile’ng ka go ahlaahla bophelo bja dihlatse tše botegago tše bjalo ka Noa, Aborahama, Sara le Moshe?

[Dipotšišo tša Thuto]

[Seswantšho go letlakala 19]

Aborahama le Sara ba be ba ikemišeditše go tlogela manobonobo a Uri