Na o Thabišwa ke “Tokelo ya go Nea ka Botho”?

BAKRISTE ba pele ba kua Filipi ba be ba tsebja ka go thekga ga bona ka pelo ka moka borapedi bja therešo. Moapostola Paulo o ba ngwaletše lengwalong la gagwe leo le buduletšwego gore: “Ka mehla ke leboga Modimo wa ka ge ke le gopola ditopong tšohle tšeo ke di direlago lena ka moka. Ke dira topo e nngwe le e nngwe ka lethabo, ka baka la karolo ye le e tšerego ditabeng tše dibotse go tloga letšatšing la pele la ge le di amogela go fihla mo nakong ye.” (Bafil. 1:3-5) Paulo o be a gopola gabotse ge Lidia le ba lapa la gagwe ba be ba kolobetšwa gomme Lidia a ba opeletša gore yena le baboledigotee le yena ba tle ba dule ka ntlong ya gagwe.—Dit. 16:14, 15.

Nakwana ka morago ga moo, phuthego yeo e bego e sa tšwa go hlongwa kua Filipi e ile ya romela Paulo dinyakwa tša gagwe ka makga a mabedi, nakong ya ge a be a dutše dibeke tše mmalwa le badumedigotee le yena kua Thesalonika, moo e ka bago bokgole bja dikhilomithara tše 160. (Bafil. 4:15, 16) Nywaga e mmalwa ka morago ga moo, ge Bafilipi le ba bangwe ba bana babo  bona ba Matsedonia ba be ba lebeletšane le tlaišo le ‘bodiidi bjo bogolo,’ ba ile ba kwa ka seo Bakriste bao ba bego ba tlaišwa kua Jerusalema ba bego ba se nyaka gomme ba be ba nyaka go ba thuša. Paulo o ile a hlatsela gore ba tloga ba dirile “go feta kamoo ba kgonago ka gona.” Lega go le bjalo o ngwadile gore: “Ba ile ba dula ba re kgopela ka go lopa mo gogolo bakeng sa tokelo ya go nea ka botho.”—2 Bakor. 8:1-4; Baroma 15:26.

Mo e ka bago nywaga e lesome ka morago ga ge Bafilipi ba amogetše Bokriste la mathomo, ba be ba sa dutše ba bonagatša moya o swanago wa go nea kudu. Ge ba kwele gore Paulo o be a golegilwe kua Roma, ba ile ba roma Epaforodito gore a tšee leeto la dikhilomithara tše 1 287 a sepela nageng le go sesa lewatleng gomme a iše dilo go moapostola. Go molaleng gore Bafilipi ba be ba nyaka go hlokomela Paulo e le gore a ka kgona go tšwela pele a matlafatša le go ruta bana babo, gaešita le ge a be a golegilwe.—Bafil. 1:12-14; 2:25-30; 4:18.

Lehono, Bakriste ba therešo ba go tšea e le tokelo go thekga modiro wa go bolela ka Mmušo le wa go dira barutiwa. (Mat. 28:19, 20) Ba etiša dikgahlego tša Mmušo pele ka go gafa nako ya bona, maiteko a bona le ka go neela ka ditšhelete. Lepokisi leo le sepedišanago le sehlogo se le bontšha ditsela tše dingwe tšeo o ka tšeago karolo go thekgeng modiro wo re o neilwego ke Modimo.

[Lepokisi go matlakala 22, 23]

DITSELA TŠEO KA TŠONA BA BANGWE BA KGETHAGO GO NEA

MENEELO BAKENG SA MODIRO WA LEFASE KA BOPHARA

Ba bantši ba beela ka thoko tekanyo ya tšhelete yeo ba e tsenyago ka mapokising a ngwadilwego gore “Modiro wa Lefase ka Bophara.”

Kgweding e nngwe le e nngwe, diphuthego di romela ditšhelete tše ofising ya Dihlatse tša Jehofa yeo e lego nageng ya gabo tšona. Meneelo ya boithatelo ya ditšhelete le yona e ka romelwa ka go lebanya go Watch Tower Bible and Tract Society of South Africa, Attention: Accounting Office, Private Bag X2067, Krugersdorp, 1740, South Africa, goba ofising ya lekala ya Dihlatse tša Jehofa yeo e lego nageng ya geno. (Meneelo ya boithatelo yeo go bolelwago ka yona dikarolong tše lego ka mo tlase le yona e ka romelwa ofising ya lekala ya Dihlatse tša Jehofa yeo e lego nageng ya geno.) Ditšheke tšeo di romelwago atereseng yeo e lego ka mo godimo di swanetše go dirwa gore di lefelelwe go “Watch Tower Society.” Go ka neelwa gape le ka mabenyabje goba dilo tše dingwe tša bohlokwa. Lengwalo le lekopana leo le bolelago gore dilo tše bjalo ke dimpho tšeo di neelwago ka go lebanya le swanetše go sepela le meneelo ye.

GO NEA MO GO RULAGANYEDITŠWEGO

Go tlaleletša go dimpho tša ditšhelete tše di newago ka go lebanya, go na le mekgwa e mengwe ya go nea bakeng sa go hola tirelo ya Mmušo ya lefase ka bophara. Yona e akaretša:

Phemelo (Inšuranse): Watch Tower Bible and Tract Society of South Africa e ka ngwadišwa e le mojabohwa wa thulaganyo ya tša phemelo ya bophelo goba thulaganyo ya go rola modiro/phenšene.

Diakhaonto tša Panka: Diakhaonto tša panka, mangwalo a panka a bontšhago gore o neela mokgatlo bokae, goba diakhaonto tša ge motho a rola modiro di ka neelwa gore di hlokomelwe goba di lefelelwe go Watch Tower Bible and Tract Society of South Africa ge motho a ehwa, ka go dumelelana le seo se nyakwago ke melao ya panka.

Di-Stock le Di-Bond: Di-stock le di-bond di ka neelwa go Watch Tower Bible and Tract Society of South Africa e le mpho e neelwago ka go lebanya, goba Watch Tower Bible and Tract Society of South Africa e ka ngwadišwa e le Mojabohwa wa Dithoto ka morago ga lehu la mong wa tšona.

Mafelo ao e Lego Dithoto: Mafelo ao e lego dithoto tšeo di ka rekišwago a ka neelwa e le mpho e neelwago ka go lebanya goba ge e ba e le lefelo la bodulo, ka go boloka thoto e le go monei, yo a ka tšwelago pele a dula go yona ge a sa dutše a phela. Ikgokaganye le ofisi ya lekala ya nageng ya geno pele o fetiša lefelo le ge e le lefe leo e lego thoto.

Dikeno le di-Trusts: Dithoto goba tšhelete di ka tlogelelwa Watch Tower Bible and Tract Society of South Africa e le bohwa ka go dira keno ya semolao, goba Watch Tower Bible and Tract Society of South Africa e ka ngwadišwa e le mojabohwa wa tumelelano yeo ya go aba bohwa. Tumelelano yeo e newago mokgatlo wa bodumedi e ka ba le mehola e itšego tabeng ya lekgetho.

Bakeng sa tsebišo e oketšegilego, o ka ikgokaganya le Accounting Office, e ka ba ka go ngwala goba ka mogala atereseng yeo e lokeleditšwego ka mo tlase goba o ka ikgokaganya le ofisi ya lekala ya Dihlatse tša Jehofa yeo e lego nageng ya geno.

Accounting Office

Watch Tower Bible and Tract Society of South Africa

Private Bag X2067

Krugersdorp

1740

South Africa

Mogala: 011 761 1323