Tlwaeletšang ba Bangwe Gore ba Katanele go Swanelega

“Yo mongwe le yo mongwe yo a rutilwego gabotse o tla swana le morutiši wa gagwe.”—LUKA 6:40.

1. Jesu o ile a thea bjang motheo o tiilego wa phuthego nakong ya bodiredi bja gagwe mo lefaseng?

GE MOAPOSTOLA Johane a be a phetha pego ya gagwe ya Ebangedi o ngwadile gore: “Ge e le gabotse go na le dilo tše dingwe tše dintši tšeo Jesu a di dirilego, tšeo ge e ba di be di ka ngwalwa ka botlalo, ke naganago gore lefase ka bolona le be le ka se kgone go rwala mangwalo a go phuthwa ao a ngwadilwego.” (Joh. 21:25) Gare ga dilo tše dingwe tšeo Jesu a di fihleletšego nakong ya bodiredi bja gagwe bjo a bo dirilego ka mafolofolo eupša e le ka nako e kopana, e be e le go nyaka banna, go ba tlwaetša le go ba rulaganya ka tsela yeo ba bego ba tla etelela pele ka morago ga gore a tloge mo lefaseng. Ge Jesu a be a boela legodimong ka 33 C.E., o ile a tloga a theile motheo o tiilego wa phuthego yeo e bego e tla gola ka lebelo gore e be le ba diketekete ka gare ga yona.—Dit. 2:41, 42; 4:4; 6:7.

2, 3. (a) Ke ka baka la’ng go tloga go nyakega gore banna bao ba kolobeditšwego ba katanele go swanelega? (b) Ke’ng seo se tlago go ahlaahlwa sehlogong se?

² Ka baka la bagoeledi ba Mmušo ba mafolofolo ba ka godimo ga dimilione tše šupago ka diphuthegong tša ka godimo ga 100 000 go dikologa lefase lehono, go dula go nyakega banna bao ba ka etelelago pele dilong tša moya. Ka mohlala, go tloga go nyakega bagolo ba Bakriste. Bao ba katanelago go fihlelela tokelo ye ya tirelo ba a retwa, ka gobane ba “kganyoga modiro o mobotse.”—1 Tim. 3:1.

 ³ Lega go le bjalo, ga go fo itiragalela gore banna ba fihlelele ditokelo ka phuthegong. Taba ya gore monna o na le thuto ya lefase goba gore o na le phihlelo ya bophelo ga e mo hlamele gore a swanelegele modiro wa mohuta wo. Gore monna a hlankele gabotse boemong bjo, o swanetše go fihlelela ditshwanelego tša moya. Go nyakega gore a be le dika tša moya go feta go ba le bokgoni goba dilo tšeo a di fihleletšego bophelong. Banna ba ka thušwa bjang gore ba swanelegele boikarabelo ka phuthegong? Jesu o itše: “Yo mongwe le yo mongwe yo a rutilwego gabotse o tla swana le morutiši wa gagwe.” (Luka 6:40) Mo sehlogong se, re tla ahlaahla tše dingwe tša ditsela tšeo Morutiši yo Mogolo, e lego Jesu Kriste, a di dirišitšego go thuša barutiwa ba gagwe gore ba swanelegele go rwala boikarabelo bjo bogolo, e bile re tla bona gore ke dithuto dife tšeo re ka ithutago tšona go tšwa go seo a se dirilego.

“Ke le Biditše Bagwera”

4. Jesu o bontšhitše bjang gore ke mogwera wa kgonthe go barutiwa ba gagwe?

⁴ Jesu o be a swara barutiwa ba gagwe go swana le bagwera, a sa ba tšeele fase. O be a fetša nako le bona, a ba botša diphiri le go ‘ba tsebiša dilo ka moka tšeo a di kwelego go Tatagwe.’ (Bala Johane 15:15.) Nagana kamoo ba bego ba thabile ka gona ge Jesu a be a araba potšišo ya bona ya gore: “Pontšho ya go ba gona ga gago le ya bofelo bja tshepedišo ya dilo e tla ba eng?” (Mat. 24:3, 4) Le gona, ge a be a na le balatedi ba gagwe feela, o ile a ba botša seo a bego a se nagana le kamoo a bego a ikwa ka gona. Ka mohlala, bošegong bjoo a ekilwego ka bjona, Jesu o ile a tšea Petro, Jakobo le Johane a ya le bona serapeng sa Getsemane, e lego moo a ilego a rapela ka pelo ya gagwe ka moka yeo e bego e tshwenyegile. Baapostola bao ba bararo ba ka ba ba se ba kwa seo Jesu a bego a se bolela thapelong yeo, eupša ba swanetše go ba ba bone kamoo tiragalo yeo e bego e le e bohlokwa ka gona. (Mar. 14:33-38) Le gona, nagana kamoo go fetoga ponagalo ga Jesu go swanetšego go ba go ile gwa ba kgoma ka gona pejana. (Mar. 9:2-8; 2 Pet. 1:16-18) Tswalano ya kgauswi yeo Jesu a bilego le yona le barutiwa ba gagwe e ile ya ba thuša kudu ge ka morago ba be ba phetha dikabelo tše boima.

5. Bagolo ba Bakriste ba ka abelana nako ya bona le ba bangwe ka ditsela dife?

⁵ Ka go swana le Jesu, bagolo ba Bakriste lehono ba gwerana le ba bangwe le go ba thuša. Ba hlagolela tswalano e borutho le ya kgauswi le badumedigotee le bona ka go fetša nako ba bontšha gore ba a ba kgahlegela. Le ge bagolo ba lemoga bohlokwa bja go boloka diphiri, ga ba phele bophelo bja go uta ditaba. Bagolo ba bota bana babo bona gomme ba abelana le bona ditherešo tša Mangwalo tšeo bona ka noši ba ithutilego tšona. Bagolo le ka mohla ga ba sware ka lenyatšo mohlanka wa bodiredi yoo mohlomongwe a ka bonagalago e sa le yo monyenyane go bona. Go e na le moo, ba mo lebelela e le monna wa moya yoo a ka tlago a dira tšwelopele, e le yoo a dirago tirelo e bohlokwa kudu ka phuthegong.

“Ke le Beetše Mohlala”

6, 7. Hlalosa mohlala woo Jesu a o beetšego barutiwa ba gagwe le kamoo o ilego wa ba kgoma ka gona.

⁶ Le ge barutiwa ba Jesu ba be ba tšeela godimo dilo tša moya, ka dinako tše dingwe tsela ya bona ya go nagana e be e tutuetšwa ke setlogo sa bona le setšo sa bona. (Mat. 19:9, 10; Luka 9:46-48; Joh. 4:27) Lega go le bjalo, Jesu ga se a ka a rerela barutiwa ba gagwe goba go ba tšhošetša. Le gona ga se a ka a ba imetša ka merwalo goba a ba kgothaletša go dira selo se sengwe mola yena a dira se se fapanego le seo. Go e na le moo, Jesu o ile a ba ruta ka go ba beela mohlala.—Bala Johane 13:15.

⁷ Jesu o tlogeletše barutiwa ba gagwe mohlala ofe? (1 Pet. 2:21) O ile a boloka bophelo bja gagwe bo le bonolo e le gore a ka hlankela ba bangwe ka bolokologi. (Luka 9:58) Jesu o be a na le boipoetšo gomme ka mehla o be a thea seo a se rutago Mangwalong. (Joh. 5:19; 17:14, 17) O be a batamelega e bile a le botho. O be a tutuetšwa ke lerato dilong tšohle tšeo a bego a di dira. (Mat. 19:13-15; Joh. 15:12) Mohlala wa Jesu o ile wa kgoma baapostola ba gagwe gabotse. Ka mohlala, Jakobo ga se a ka a boifa ge a be a lebane le lehu eupša o ile a hlankela Modimo ka potego go fihlela a bolawa. (Dit. 12:1, 2) Johane ka potego o ile a latela dikgatong tša Jesu ka nywaga ya ka godimo ga e 60.—Kut. 1:1, 2, 9.

8. Ke mohlala ofe woo bagolo ba o beelago banna bao e sa lego ba bafsa gotee le ba bangwe?

⁸ Bagolo bao ba ikgafago, ba ikokobeditšego le  bao ba nago le lerato ba bea mohuta wa mohlala woo o nyakwago ke banna bao e sa lego ba bafsa. (1 Pet. 5:2, 3) Go oketša moo, bagolo bao e lego mehlala tumelong, go ruteng, bophelong bja Bokriste le bodireding ba kgotsofatšwa ke go tseba gore ba bangwe ba ka kgona go ekiša tumelo ya bona.—Baheb. 13:7.

‘Jesu o Ile a ba Nea Ditaelo Gomme a ba Roma’

9. Re tseba bjang gore Jesu o ile a tlwaeletša barutiwa ba gagwe go phetha modiro wa boebangedi?

⁹ Ka morago ga go tšea karolo ka mafolofolo bodireding bja gagwe ka nywaga e ka bago e mebedi, Jesu o ile a katološa modiro wa gagwe wa boboledi ka gore a rome baapostola ba gagwe ba 12 go yo bolela. Eupša o ile a thoma ka go ba nea ditaelo. (Mat. 10:5-14) Ge a be a le kgauswi le go fepa lešaba la ba dikete ka mohlolo, Jesu o ile a botša barutiwa ba gagwe kamoo a nyakago ba beakanya batho ka gona le go aba dijo. (Luka 9:12-17) Ka gona, go molaleng gore Jesu o ile a tlwaetša barutiwa ba gagwe ka go ba nea ditaelo tše di kwagalago le tše di lebanyago. Tsela ye ya go ba tlwaetša, go akaretša le tutuetšo e matla ya moya o mokgethwa, ka morago e ile ya hlamela baapostola ba gagwe go rulaganya modiro o mogolo wa boboledi woo o thomilego ka 33 C.E. go ya pele.

10, 11. Tlwaetšo e sa kgaotšego e ka newa bjang bao ba sa tšwago go thoma go kopanela?

¹⁰ Lehono, tlhahlo ya moya e thoma ge monna a amogela go swarelwa thuto ya Beibele. Go ka nyakega gore re mo rute go bala gabotse. Re swanetše go tšwela pele re mo thuša ge re dutše re swara thuto ya Beibele le yena. Ge a thoma go ba gona dibokeng tša Bokriste ka mehla, tlwaetšo ya gagwe ya moya e tla tšweletša dienywa ge a tšea karolo Sekolong sa Bodiredi sa Pušo ya Modimo, a e ba mogoeledi yo a sa kolobetšwago, bjalo bjalo. Ka morago ga kolobetšo, tlwaetšo yeo a e hwetšago e ka akaretša dilo tše bjalo ka go thuša ka go hlokomela Holo ya Mmušo. Ge nako e tšwela pele, ngwanešo a ka thušwa gore a bone seo a swanetšego go se dira gore a swanelegele go ba mohlanka wa bodiredi.

¹¹ Ge mogolo a nea ngwanabo rena yo a kolobeditšwego kabelo, o swanetše go mo hlalosetša gabotse thulaganyo ya maleba ya mokgatlo gomme a mo nee le tlhahlo e nyakegago. Ngwanabo rena yo a tlwaetšwago o swanetše go kwešiša seo se letetšwego go yena. Ge e ba a goga ka kgara go phethagatša seo a kgopetšwego go se dira, mogolo yo a nago le lerato ga a akgofele go phetha ka gore ga a swanelege. Go e na le moo, mogolo ka botho o tla hlalosa ka go lebanya dilo tšeo a swanetšego go di lokiša gomme a hlahlobe lefsa dipakane tšeo di beilwego gotee le thulaganyo yeo e swanetšego go latelwa. Ge banna ba arabela gabotse maitekong a bjalo gomme ba feleletša ba thabela go hlankela ba bangwe, bagolo ba a thaba ge ba bona seo.—Dit. 20:35.

“Yo a Theetšago Keletšo o Bohlale”

12. Ke’ng seo se dirilego gore keletšo ya Jesu e atlege?

¹² Jesu o ile a tlwaetša barutiwa ba gagwe ka go nea yo mongwe le yo mongwe wa bona tayo go ya ka dinyakwa tša gagwe. Ka mohlala, o ile a kgalemela Jakobo le Johane ge ba be ba nyaka go bitša mollo go tšwa legodimong gore o tšhume Basamaria ba bangwe bao ba bego ba ganne go mo amogela. (Luka 9:52-55) Ge mmago Jakobo le Johane a be a etla go Jesu legatong la bona gomme a kgopela gore ba newe maemo a godimo Mmušong, Jesu o ile a bolela le bana bao ba motho ka go lebanya a re: “Madulo a ka letsogong la ka la le letona le ka go la le letshadi ga se nna yo nka a neago, eupša ke a bao ba a lokišeditšwego ke Tate.” (Mat. 20:20-23) Jesu ka dinako tšohle o be a nea keletšo e kwagalago, e holago le yeo e bego e theilwe ka go tia melaong ya motheo ya Modimo. O rutile barutiwa ba gagwe go diriša melao e bjalo ya motheo. (Mat. 17:24-27) Le gona Jesu o be a lemoga mafokodi a balatedi ba gagwe e bile ga se a ka a letela gore e be ba phethagetšego. Keletšo ya gagwe e be e šušumetšwa ke lerato la kgonthe.—Joh. 13:1.

13, 14. (a) Ke bomang bao ba nyakago keletšo? (b) Nea mehlala ya keletšo yeo mogolo a ka e neago motho ka go lebanya ge e ba a sa gole moyeng.

¹³ Monna yo mongwe le yo mongwe yo a katanelago go swanelegela boikarabelo ka phuthegong ya Bokriste o tla newa tayo goba keletšo ya Mangwalo neng neng bophelong. Diema 12:15 e re: “Yo a theetšago keletšo o bohlale.” Ngwanabo rena yo mongwe yo e sa lego mofsa o re: “Ke hweditše gore tlhohlo ya ka e kgolo e be e le go lebeletšana  le go se phethagale ga ka. Keletšo ya mogolo yo mongwe e ile ya nthuša gore ke be le pono e nepagetšego ka taba ye.”

¹⁴ Ge e ba bagolo ba lemoga gore boitshwaro bjo itšego bjo bo belaetšago bo šitiša monna gore a dire tšwelopele moyeng, ba gata mogato wa pele gore ba mmušetše tseleng ka moya wa boleta. (Bagal. 6:1) Ka dinako tše dingwe, go nyakega gore motho a eletšwe ka baka la mokgwa o itšego wa semelo sa gagwe. Ka mohlala, ge e ba ngwanabo rena a na le mokgwa wa go se nyake go ikgafa, mogolo a ka hwetša e le mo go holago go mmontšha gore Jesu e be e le mogoeledi yo a fišegago wa Mmušo yoo a laetšego balatedi ba gagwe gore ba dire barutiwa. (Mat. 28:19, 20; Luka 8:1) Ge e ba ngwanabo rena yo mongwe a bonagala a rata maemo, mogolo a ka mmontšha kamoo Jesu a thušitšego barutiwa ba Gagwe go bona dikotsi tša go nyaka bophagamo. (Luka 22:24-27) Go thwe’ng ge e ba ngwanabo rena a na le mokgwa wa go se nyake go lebalela ba bangwe? Seswantšho sa mohlanka yo a gannego go lebalela mohlankagotee le yena molato o monyenyane mola yena ka noši a be a lebaletšwe o mogolo se ka dira gore a kwešiše ntlha yeo gabotse. (Mat. 18:21-35) Ge e ba go nyakega gore motho a newe keletšo, ke mo gobotse gore bagolo ba e nee kapelapela kamoo go kgonegago.—Bala Diema 27:9.

“O Itlwaetše”

15. Lapa la monna le ka mo thuša bjang gore a hlankele ba bangwe?

¹⁵ Bagolo ba etelela pele go tlwaetša banna gore ba swanelege, eupša ba bangwe le bona ba ka ba thekga. Ka mohlala, lapa la monna le ka mo thuša gore a swanelegele boikarabelo, ge e le gabotse le swanetše go dira bjalo. Le gona ge e ba e šetše e le mogolo, o tla holwa ke thekgo ya mosadi wa gagwe yo a mmontšhago lerato gotee le bana ba gagwe bao ba sa bonagatšego boithati. Go ikemišetša ga bona go mo abelana le phuthego ke gabohlokwa ge e ba a tla atlega go rwaleng boikarabelo bja gagwe. Moya wa bona wa boikgafo o a mo thabiša e bile o tšeelwa godimo ke ba bangwe.—Die. 15:20; 31:10, 23.

16. (a) Boikarabelo bjo bogolo bja gore motho a swanelege bo magetleng a mang? (b) Monna a ka katanela bjang go swanelegela ditokelo ka phuthegong?

¹⁶ Le ge ba bangwe ba ka mo thuša le go mo thekga, boikarabelo bjo bogolo bja gore monna a swanelegele ditokelo ka phuthegong bo magetleng a gagwe. (Bala Bagalatia 6:5.) Go ba gona, ga se gore ngwanabo rena e swanetše go ba mohlanka wa bodiredi goba mogolo e le gore a thuše ba bangwe le gore a tšee karolo ka botlalo bodireding. Lega go le bjalo, go katanela go ba le ditokelo ka phuthegong go bolela gore motho a leke ka matla go fihlelela ditshwanelego tšeo di boletšwego ke Mangwalo. (1 Tim. 3:1-13; Tito 1:5-9; 1 Pet. 5:1-3) Ka gona ge e ba monna a kganyoga go hlankela e le mohlanka wa bodiredi goba mogolo eupša a se a tšwa a kgethwa, o swanetše go šetša kudu dibopego tšeo go nyakegago gore a dire tšwelopele moyeng go tšona. Se se bolela gore a bale Beibele ka mehla, a ithute ka mafolofolo a le noši, a naganišiše, a rapele go tšwa pelong gomme a tšee karolo ka phišego  bodireding bja Bokriste. Ka go dira dilo tšeo, a ka diriša keletšo ya Paulo go Timotheo e rego: “O itlwaetše gomme pakane ya gago e be go bontšha boineelo go Modimo.”—1 Tim. 4:7.

17, 18. Ke’ng seo se ka dirwago ke ngwanabo rena yo a kolobeditšwego ge e ba pelaelo, go ikwa a sa ikholofele le go hloka mafolofolo a go hlankela di mo šitiša gore a hlankele?

¹⁷ Eupša go thwe’ng ge e ba monna ga a katanele go swanelega e le ka baka la dipelaelo goba a ikwa a sa ikholofele? O tla dira gabotse ge a ka naganišiša ka dilo tše dintši tšeo Jehofa Modimo le Jesu Kriste ba re direlago tšona. Ruri, Jehofa ke yena “a re rwalelago morwalo letšatši le letšatši.” (Ps. 68:19) Ka gona Tatago rena wa legodimong a ka thuša ngwanabo rena gore a rwale boikarabelo ka phuthegong. Le gona, ngwanabo rena yo a sa hlankelego e le mohlanka wa bodiredi goba mogolo o tla hwetša e le mo go holago go ela hloko therešo ya gore go nyakega gore banna ba bantši ba amogele ditokelo tša tirelo ka mokgatlong wa Modimo. Go naganišiša ka dintlha tše go ka tutueletša ngwanabo rena go dira boiteko bja gore a fenye maikwelo a fošagetšego. A ka rapelela moya o mokgethwa, a gopola gore o enywa dika tšeo di akaretšago khutšo le boitshwaro—tšona dika tšeo di nyakegago gore motho a tloše pelaelo goba go ikwa a sa ikholofele. (Luka 11:13; Bagal. 5:22, 23) Le gona motho a ka kgodišega ka botlalo gore Jehofa o šegofatša bohle bao ba katanelago go swanelega ba na le maikemišetšo a mabotse.

¹⁸ Na e ka ba e le gore monna yo a kolobeditšwego o hlaelelwa ke mafolofolo a gore a katanele go swanelega? Ke’ng seo se ka thušago ngwanabo rena yo a se nago kganyogo ya go hlankela? Moapostola Paulo o ngwadile gore: “Modimo ke yena yo a le fago mafolofolo, a le neago kganyogo le matla a gore le dire dilo tšohle tšeo a di ratago.” (Bafil. 2:13) Modimo ke yena a re fago kganyogo ya go hlankela, gomme moya wa Jehofa o ka matlafatša motho gore a dire tirelo e kgethwa. (Bafil. 4:13) Go oketša moo, Mokriste a ka rapelela gore Modimo a mo thuše go dira se se swanetšego.—Ps. 25:4, 5.

19. Ke’ng seo go emišwa ga “badiši ba šupago . . . , ee, bakgomana ba seswai” go re kgonthišetšago sona?

¹⁹ Jehofa o šegofatša maiteko a banna ba bagolo a gore ba tlwaetše ba bangwe. Le gona tšhegofatšo e hwetšwa ke bao ba arabelago gomme ba katanela go fihlelela ditokelo ka phuthegong. Mangwalo a re kgonthišetša gore gare ga batho ba Modimo go tla emišwa “badiši ba šupago . . . , ee, bakgomana ba seswai,” e lego palo e nyakegago ya banna ba swanelegago, gore ba etelele pele ka mokgatlong wa Jehofa. (Mika 5:5) Ruri e tloga e le tšhegofatšo gore banna ba bantši ka tsela ye ba Bakriste ba a tlwaetšwa e bile ba katanela go swanelegela ditokelo tša tirelo e le gore Jehofa a tumišwe!

O be o tla Araba Bjang?

• Jesu o ile a thuša bjang barutiwa ba gagwe gore ba swanelegele boikarabelo bjo bo oketšegilego?

• Bagolo ba ka ekiša bjang Jesu ge ba dutše ba thuša banna ka phuthegong gore ba etelele pele?

• Ke karolo efe yeo lapa la monna le e kgathago go mo thuša gore a swanelege?

• Ke eng seo monna ka boyena a ka se dirago gore a katanele go swanelegela ditokelo?

[Dipotšišo tša Thuto]

[Diswantšho go letlakala 31]

Ke tlwaetšo efe yeo o ka e neago morutwana wa gago wa Beibele ge a dutše a katanela go dira tšwelopele?

[Seswantšho go letlakala 32]

Banna ba ka bontšha bjang gore ba katanela go swanelega?