“Na o ka Kgona go re Tšea Senepe?”

Ka morago ga letšatši la bobedi la kopano ya selete, Josué yo a hlankelago Bethele ya Mexico, o be a sepelasepela gore a boge toropo ya Querétaro. Javier le Maru, e lego banyalani bao ba bego ba etile go tšwa Colombia, ba ile ba kgopela Josué go ba tšea senepe. Ka ge Josué le bagwera ba gagwe ba Dihlatse ba be ba apere gabotse gomme ba hlomile dipetšhe tša kopano, banyalani bao ba ile ba ba botšiša ge e ba ba etšwa sebokeng sa dialoga goba tiragalong e nngwe e bohlokwa. Josué o ile a hlalosa gore ba be ba tlile kopanong ya Dihlatse tša Jehofa gomme ka morago a laletša banyalani ba go tla go theetša lenaneo la Sontaga.

Banyalani bao ba ile ba ikwa ba lewa ke dihlong tša go ba gona ka ge ba be ba se na diaparo tšeo di ka swanelago tiragalo e bjalo e bohlokwa. Lega go le bjalo, Josué o ile a ba botša leina la gagwe le nomoro ya mogala ya ofising ya lekala yeo a bego a hlankela go yona.

Josué o ile a makala ge dikgwedi tše nne ka morago Javier a ikopanya le yena. Banyalani bao ba be ba bile gona kopanong yeo gomme ga bjale ba be ba nyaka gore Dihlatse tša Jehofa di ba etele Mexico City, e lego moo ba bego ba dula gona ka nako yeo. Go se go ye kae Thuto ya Beibele e ile ya thongwa le Javier le Maru gomme ka nako e sa fetšego pelo ba thoma go ba gona dibokeng. E ile ya ba bagoeledi dikgwedi tše lesome ka morago. Le ge banyalani ba ba ile ba swanelwa ke go hudugela toropong ya Toronto kua Canada, ba ile ba dira tšwelopele moyeng gomme ba kolobetšwa.

Ka morago Josué o ile a hwetša lengwalo go tšwa go Javier le hlalosa seo se ilego sa mo šušumeletša go amogela therešo. Lengwalo leo le itše: “Pele ga ge nna le mosadi wa ka re ka ba gona kopanong, re ile ra boledišana ka go nyakega ga gore re hwetše tlhahlo ya dilo tša moya. Re itše ge re bona ka tsela yeo le aperego gabotse ka yona, ra nagana gore le tšwa sebokeng se bohlokwa kudu. Kopanong yeo re ile ra makatšwa ke ka tsela e lerato yeo re bontšhitšwego madulo ka yona, thušo ya go phetla Beibele ge lenaneo le tšwela pele, gaešita le boitshwaro bja bohle bao ba lego gona. Le ge re be re apere bjalo ka baeti go be go bonagala se e se bothata.”

Mantšu a Kgoši Solomone yo bohlale ka kgonthe e bile a therešo go Josué! Solomone o ngwadile gore: “Bjala peu ya gago mesong gomme o se ke wa khutšiša seatla sa gago go fihlela e eba mantšiboa; ka gobane ga o tsebe mo e tlago go mela gona, e ka ba mo goba mola, le gona ga o tsebe ge e ba bobedi bja tšona di tla mela ka go swana.” (Mmo. 11:6) Na o ka gaša peu ka go šomiša dibaka tša go laletša ba bangwe kopanong e tlago goba polelong ya phatlalatša? Bjalo ka Javier le Maru, Jehofa a ka go šomiša go gogela ba swerwego ke tlala le lenyora la go hwetša tlhahlo ya dilo tša moya.—Jes. 55:1

[Seswantšho go letlakala 32]

Go tloga ka go le letshadi go ya go le letona: Alejandro Voeguelin, Maru Pineda, Alejandro Pineda, Javier Pineda le Josué Ramírez lekaleng la Mexico