Dipotšišo tše Tšwago go Babadi

Ke ka tsela efe lehu la batho bao ba botegelago Modimo e lego ‘le bohlokwa mahlong a Jehofa’?

▪ Mopsalme yo a buduletšwego o opetše ka gore: “Lehu la batho ba Jehofa bao ba mmotegelago le bohlokwa mahlong a gagwe.” (Ps. 116:15) Bophelo bja morapedi yo mongwe le yo mongwe wa kgonthe wa Jehofa bo bohlokwa kudu go yena. Lega go le bjalo, mantšu a tsopotšwego ka mo godimo a Psalme 116 ga a bolele feela ka lehu la motho o tee.

Ge go neelwa polelo ya poloko bakeng sa Mokriste, ga se gwa swanelwa go šomiša Psalme 116:15 go šupa go mohu, gaešita le ge a hwile e le mohlanka yo a botegago wa Jehofa. Ka baka la’ng? Ka gobane mantšu a mopsalme a na le tlhaloso e nabilego. A ra gore Modimo a ka se dumelele gore sehlopha ka moka sa bao ba mmotegelago se hwe ka gobane o se lebelela e le se bohlokwa.—Bona Psalme 72:14; 116:8.

Psalme 116:15 e re kgonthišetša gore Jehofa a ka se dumelele bahlanka ba gagwe bao ba mmotegelago gore ba fedišwe ka moka lefaseng e le sehlopha. Ge e le gabotse, histori ya rena ya mehleng yeno e bontšha gore re šetše re lebeletšane le diteko tše dikgolo le ditlaišego, ka go re’alo e nea bohlatse bjo bo tletšego bja gore Modimo le ka mohla a ka se dumelele gore re fedišwe.

Ka baka la matla a gagwe a sa lekanyetšwago le morero wa gagwe o kgonthišeditšwego, Jehofa a ka se dumelele gore re fedišwe re le sehlopha. Ge e ba Modimo a be a ka dumelela seo, go be go tla bonagala e ka manaba a gagwe a na le matla go mo feta—e lego seo se sa kgonegego! Morero wa Jehofa wa gore lefase ka moka le dulwe ke batho bao ba mmotegelago o be o ka se phethagale—gomme se le ganyenyane ga se kgonagale. (Jes. 45:18; 55:10, 11) Gaešita le tirelo e kgethwa go Jehofa e be e tla kgaotšwa mo lefaseng ge e ba go be go se batho ba šetšego gore ba mo hlankele ba le malapeng a lefaseng a tempele ya gagwe e kgolo ya moya! Motheo wa “lefase le lefsa” o be o ka se be gona—e lego batho ba lokilego bao ba phelago lefaseng ka tlase ga “legodimo le lefsa.” (Kut. 21:1) Le gona Pušo ya Kriste ya Nywaga e Sekete e be e ka se be ya kgonthe ge e ba e se na balata mo lefaseng.—Kut. 20:4, 5.

Maemo a Modimo le botumo bja gagwe di be di tla belaelwa ge e ba a be a ka dumelela manaba a gagwe go fediša sehlopha ka moka sa batho ba gagwe mo lefaseng. Ge e ba a be a ka dumelela seo, gona e be e tla ba kgobošo go maemo a Jehofa ka ge e le Mmuši wa Legohle. Go feta moo, ka ge a itlhompha e bile a hlompha leina la gagwe le lekgethwa, Jehofa a ka se dumelele gore sehlopha ka moka sa batho bao ba mmotegelago se bolawe. Le gona ela hloko se: Ka ge go Modimo “go se [na] go hloka toka,” le ka mohla a ka se palelwe ke go phološa sehlopha sa batho bao ba bego ba dutše ba mo hlankela ka potego. (Doit. 32:4; Gen. 18:25) Go tlaleletša go se, go dumelela phedišo ya sehlopha sa bahlanka ba gagwe go be go tla thulana le Lentšu la Modimo ge le re: “Jehofa a ka se lahle batho ba gagwe ka baka la leina la gagwe le legolo.” (1 Sam. 12:22) Ka kgonthe, “Jehofa a ka se lahle batho ba gagwe, le gona a ka se tlogele bohwa bja gagwe.”—Ps. 94:14.

Ruri go kgothatša kudu go tseba gore batho ba Jehofa ba ka se fedišwe le ka mohla mo lefaseng! Ka gona, anke ka mehla re dire sohle seo re ka se kgonago go ipontšha re botegela Modimo, re botile kholofetšo ya gagwe e rego: “Sebetša le ge e le sefe seo se rulelwago go lwa le wena se ka se atlege gomme leleme le ge e le lefe leo le go hlaselago kahlolong o tla le ahlola. Bjo ke bohwa bja bahlanka ba Jehofa gomme toko ya bona e tšwa go nna.”—Jes. 54:17.

[Ntlhakgolo go letlakala 22]

Modimo le ka mohla a ka se dumelele gore batho ba gagwe ba fedišwe