DIBOKA tša ngwaga le ngwaga tša Watch Tower Bible and Tract Society of Pennsylvania ke tšeo ka mehla di kgahlišago. Se se ile sa bonagala gabotse sebokeng sa ngwaga le ngwaga sa bo-127, seo se bego se swerwe ka Mokibelo wa October 1, 2011. Baeng bao ba bego ba laleditšwe go tšwa lefaseng ka bophara ba ile ba kgobokana ka Holong ya Kopano ya Dihlatse tša Jehofa kua Jersey City, New Jersey, U.S.A.

Gerrit Lösch wa Sehlopha se Bušago o ile a amogela lešaba leo le thabilego. O ile a botša lešaba le le tšwago dinageng tše 85 gore le thabela botee bja moswananoši bja ditšhabatšhaba. Botee bjo bo nea bohlatse bjo bobotse gomme bo tagafatša Jehofa. Ge e le gabotse, botee bjoo e be e le sehlogo se segolo sa seboka seo.

PEGO E KGAHLIŠAGO E TŠWAGO MEXICO

Karolo ya mathomo ya lenaneo e ile ya bontšha botee bja batho ba Jehofa. Baltasar Perla o ile a boledišana le ba bararo bao a tšwago le bona lapeng la Bethele ya Mexico mabapi le go kopanywa ga diofisi tše tshelelago tša makala tša Amerika Bogareng le lekala la Mexico. Ka baka la go kopanywa mo go bjalo, lapa la Bethele la Mexico ga bjale le na le ditšo tše fapafapanego gomme le na le batho ba ditšhabatšhaba. Go goroga ga badumedigotee le bona go tšwa dinageng tše fapafapanego go dirile gore bana babo rena ba kgothatšane. Go bile bjalo ka ge eka Modimo o dirile phetogo e kgolo ka gore a tloše mellwane ya dinaga tšeo.

Tlhohlo yeo e ilego ya tšweletšwa ke go kopanywa mo e be e le ya go thuša bagoeledi gore ba se ke ba ikwa ba aroganywa le mokgatlo wa Jehofa gaešita le ge diofisi tša makala di tswaletšwe dinageng tša gabo bona. Ka baka la se, phuthego e nngwe le e nngwe e na le e-mail yeo gaešita le bao ba lego mafelong a lego lekatana ba ka kgonago go ikgokaganya ka yona ka go lebanya le ofisi ya lekala.

TSEBIŠO YA MORAGO BJALE KA JAPANE

James Linton yo a tšwago lekaleng la Japane o ile a hlalosa kamoo bana babo rena ba ilego ba kgongwa ke tšhišinyego ya lefase le di-tsunami tšeo di ilego tša wela naga yeo ka March 2011. Dihlatse tše dintši di ile tša lahlegelwa ke baratiwa ba tšona le diphahlo. Dihlatse go tšwa mafelong ao a sego a kgongwa ke kotsi ye di ile tša dumelela bana babo rena go dula magaeng a bona a fetago a 3 100 le go šomiša dikoloi tša bona tše makgolo. Baithaopi bao ba šomago le Komiti ya tša Meago ya Tikologo ba ile ba šoma ka thata gore ba lokiše dintlo tša bana babo rena. Ba fetago 1 700 ba ile ba ithaopela go hlankela moo go nyakegago bathuši. Sehlopha sa baithaopi seo se tšwago United States se ile sa thuša ka go tsošološa Diholo tša Mmušo, gomme baithaopi ba 575 ba ile ba šoma modirong wo.

Bao ba bego ba kgomilwe ke tiragalo ye ba ile ba thušwa kudu moyeng le maikwelong. Bagolo ba fetago 400 ba ile ba hlankela moo go nyakegago maeto a bodiši. Sehlopha se Bušago ka ge se be se tshwenyegile ka bana babo rena bao ba wetšwego ke kotsi, se ile sa romela balebeledi ba babedi bao ba etelago makala go tšwa ntlongkgolo gore ba ba kgothatše. Ba ile ba homotšwa kudu ke ge Dihlatse lefaseng ka moka di bontšha go tshwenyega ka se.

 DIPHENYO DIKGORONG TŠA TSHEKO

Bana babo rena ba be ba theeditše ka kelohloko ge Stephen Hardy yo a tšwago lekaleng la Brithania a swere poledišano ka diphenyo tša morago bjale dikgorong tša tsheko. Ka mohlala, mmušo wa Fora o be o nyaka ka kgapeletšo diranta tše dimilione tše 626 tša lekgetho go lekgotla leo re le šomišago kua Fora. Bothata bjo bo ile bja rarollwa ge Kgoro ya Yuropa ya Ditshwanelo tša Batho (European Court of Human Rights [ECHR]) e be e ema le rena ka go bolela gore mmušo wa Fora o be o tshetše seo se bolelwago ke Article 9 ya Tumelelano ya Yuropa, yeo e šireletšago tokologo ya bodumedi. Phetho yeo e tšerwego ke kgoro e bontšha gore ge e le gabotse mmušo o be o sa nyake tšhelete, ka ge e ile ya re: “Go gana go dumelela ka molao lekgotla le itšego la bodumedi, go leka go le fediša le go bolela ka lona ka lenyatšo, ke go ganetšana le ditshwanelo tša molao tšeo di lego go Article 9 ya Tumelelano ya Yuropa.”

ECHR e ile ya ema le rena gape tshekong yeo re bego re na le yona le Armenia. Ga e sa le go tloga ka 1965, ECHR e be e bolela gore Tumelelano ya Yuropa e be e sa šireletše batho bao ba bego ba gapeletšwa go tsenela tirelo ya bohlabani. Komitikgolo ya Kgoro ya tsheko, e lego yeo e phagametšego Dikgoro ka moka tša Yuropa, e ntšhitše taelo ya gore “go gana ga motho go tsenela tirelo ya tša bohlabani, ge e ba seo se bakilwe ke go thulana o šoro le ditumelo tša gagwe,” go swanetše go thekgwa ke Tumelelano ya Yuropa. Phetho ye e tlama naga ya Armenia le dinaga tše bjalo ka Azerbaijan le Turkey gore di amogele tshwanelo e swanago.

TŠA MEAGO

Go ile gwa latela Guy Pierce wa Sehlopha se Bušago gomme a bolela ka seo bao ba bego ba le gona ba ipotšišago ka sona, e lego meago yeo go rulagantšwego gore e agwe New York State. O ile a rola bidio yeo e bontšhago seo se diregago kua Wallkill, Patterson le mafelong a mafsa ao a rekilwego kua Warwick le Tuxedo, New York. Moago o mofsa wo o tla fetšwago ka 2014 kua Wallkill o tla ba le diphapoši tše fetago 300.

Go rulagantšwe gore go agwe moago wa diheketara tše 100 kua toropong ya Warwick. Ngwanabo rena Pierce o itše: “Le ge re sa kgonthišega ka thato ya Jehofa ka Warwick, re aga lefelong le ka morero wa gore re hudušetše ntlokgolo ya Dihlatse tša Jehofa moo.” Le gona go rulagantšwe gore go dirišwe setsha sa diheketara tše 20 seo se lego dikhilomithara tše lesome ka leboa la Warwick e le gore go agwe moago woo go tlago go bewa metšhene le ditlabakelo tša go aga. Ngwanabo rena Pierce o ile a re: “Go tloga ka nako yeo re dumelelwago go thoma go aga, re holofela go fetša modiro wo ka moka ka nywaga e mene. Ke moka re tla rekiša meago ya rena ya Brooklyn.”

Ngwanabo rena Pierce o ile a rotoša potšišo ya gore: “Na Sehlopha se Bušago se fetošitše kgopolo ya sona ka go batamela ga masetlapelo a magolo?” O ile a e araba ka gore: “Le gatee. Ge e ba masetlapelo a magolo a ka šitiša dithulaganyo tša rena, seo se tla thabiša, se tla thabiša e le ruri!”

PHAKGAMELANG TAU E RORAGO

Ka morago go ile gwa latela setho se sengwe sa Sehlopha se Bušago e lego Stephen Lett, gomme o ile a ahlaahla 1 Petro 5:8 e rego: “Dulang le hlaphogetšwe, le phakgame. Lenaba la lena Diabolo o sepelasepela go swana le tau e rorago, a nyaka yo a kago go mo metša.” Ngwanabo rena Lett o ile a bontšha gore tše dingwe tša dika tša tau di dira gore seswantšho sa Petro se swanele gabotse tsela yeo Diabolo a hlaloswago ka yona.

Ka ge ditau di na le matla gomme di na le lebelo go feta batho, ga se ra swanela go leka go lwa goba go tšhabela Sathane ka matla a rena. Re nyaka thušo ya Jehofa. (Jes. 40:31) Ka ge tau e tsoma ka go khukhunetša, gona re swanetše go efoga leswiswi la moya leo Sathane a tsomago go lona. Go etša ge tau e kgona go bolaya phoofolo e se nago matla go swana le phuti goba ngwana wa pitsi yo a robetšego, Sathane le yena ga a na lešoko gomme o nyaka go re bolaya. Ka morago ga ge tau e khoše, gantši diphoofolo tšeo e di hlasetšego ga di na bobono, ka gona “boemo bja . . . mafelelo” bja  batho bao ba hlasetšwego ke Sathane moyeng “e ba bjo bobe kudu go feta bja pele.” (2 Pet. 2:20) Ka gona re swanetše go emeletšana le Sathane gomme re swarelele ka go tia melaong ya motheo ya Beibele yeo re ithutilego yona.—1 Pet. 5:9.

THABELA KAROLO YA GAGO KA NTLONG YA JEHOFA

Seboledi se se latelago sa Sehlopha se Bušago e lego Samuel Herd se itše: “Ka moka ga rena re na le karolo e itšego ka ntlong ya Jehofa.” Bakriste ka moka ba na le karolo e itšego ka “ntlong” ya Modimo, e lego tempele ya gagwe ya moya, yona thulaganyo ya go mo rapela motheong wa sehlabelo sa topollo sa Jesu. Ke karolo yeo motho a swanetšego go e tšeela godimo ka ge e le tokelo e kgolo. Go swana le Dafida, le rena re rata go ‘dula ka ntlong ya Jehofa matšatši ohle a bophelo bja rena.’—Ps. 27:4.

Ngwanabo rena Herd o ile a ahlaahla Psalme 92:12-14 gomme a botšiša gore: “Jehofa o dira bjang gore re gole?” O ile a araba ka gore: “Paradeiseng ya moya, Modimo o dira gore re dule re le borutho, o a re šireletša gomme o re fa meetse a lapološago a therešo. A re lebogeng Jehofa ka baka la se.” Ke moka ngwanabo rena Herd o ile a kgothaletša batheetši gore: “A re kgotsofaleleng go dula ka ntlong ya Jehofa—e sego feela ka nakwana, eupša ka mo go sa felego.”

BAKRISTE BA HLOMPHA LENTŠU LA MODIMO

Polelong e latetšego, David Splane yoo le yena e lego wa Sehlopha se Bušago, o ile a hlalosa gore Bakriste ba therešo go tloga kgale ba be ba dutše ba hlompha Lentšu la Modimo. Lekgolong la pele la nywaga, ba ile ba ithekga ka lona gore ba rarolle taba ya lebollo. (Dit. 15:16, 17) Eupša lekgolong la bobedi la nywaga, ba bangwe bao ba ipitšago gore ke Bakriste gomme ba rutilwe filosofi ya Bagerika ba ile ba thoma go etiša pele dithuto tša bona go e na le go etiša Mangwalo pele. Ka morago, ba bangwe ba ile ba dira gore dithuto tša Beibele di tšeelwe legato ke dikgopolo tša bao ba bitšwago Botate ba Kereke le babušiši ba Roma, gomme seo se ile sa baka dithuto tše dintši tša maaka.

Ngwanabo rena Splane o ile a hlalosa gore Jesu o dirišitše seswantšho go bontšha gore go tla dula go na le Bakriste ba kgonthe ba tloditšwego mo lefaseng gore ba emele therešo. (Mat. 13:24-30) Re ka se bolele ka kgodišego gore e be e le bomang. Lega go le bjalo, go theoša le nywagakgolo, batho ba bantši ba ile ba pepentšha ditumelo le mekgwa yeo e sego ya Mangwalo. Ba  bangwe ba bona e be e le Mopišopomogolo Agobard yo a phetšego lekgolong la senyane la nywaga, Peter wa Bruys, Henry wa Lausanne, le Valdès (goba, Waldo) wa lekgolong la bo-12 la nywaga, John Wycliffe wa lekgolong la bo-14 la nywaga, William Tyndale wa lekgolong la bo-16 la nywaga, Henry Grew le George Storrs ba lekgolong la bo-19 la nywaga. Lehono Dihlatse tša Jehofa di tšwela pele di kgomarela ditekanyetšo tša Mangwalo gomme di lebelela Beibele e le motheo wa therešo. Ke ka baka leo Sehlopha se Bušago se kgethilego lengwalo la Johane 17:17 le le rego: “Lentšu la gago ke therešo,” gore e be temana ya rena ya ngwaga ya 2012.

DIPHETOGO TŠE DI KGAHLIŠAGO MABAPI LE TLWAETŠO LE TIRELO

Tsebišo yeo e ilego ya newa ke Anthony Morris wa Sehlopha se Bušago e ile ya hlalosa diphetho tšeo di dirilwego ka baromiwa le babulamadibogo ba kgethegilego. Go tloga ka September 2012, diklase tša Sekolo sa Beibele sa Banyalani ba Bakriste di tla swarwa dinageng tše itšego. Morero wa Sekolo sa Gilead o fetošitšwe. Go tloga ka October ya ngwagola, ka moka bao ba ilego ba tlwaetšwa Gilead ke bao ba bego ba le tirelong e itšego e kgethegilego ya nako e tletšego—e le baromiwa bao ba sa kago ba tla Gilead, babulamadibogo ba kgethegilego, balebeledi ba tikologo goba ditho tša Bethele. Dialoga di tla šomišetšwa go kgothatša le go tiiša batho ba Modimo, e ka ba e le diofising tša makala, modirong wa bosepedi, goba mafelong ao a nago le batho ba bantši moo ba ka kgothatšago diphuthego modirong wa boboledi.

Babulamadibogo ba oketšegilego ba kgethegilego ba tla thoma tšhemo mafelong ao a lego lekatana. Go tloga ka January 1, 2012, dialoga tše dingwe tša Sekolo sa Beibele sa Bana Babo Rena ba Sego Lenyalong gaešita le tša Sekolo sa Beibele sa Banyalani ba Bakriste di be di tla abelwa go šoma e le babulamadibogo ba kgethegilego ba nakwana gomme di thome le go katološa modiro mafelong ao a lego lekatana. Di be di tla abelwa dikabelo tše tharo ka go latelana ka nywaga e meraro e le babulamadibogo ba kgethegilego. Dialoga tšeo di bontšhago di šoma gabotse tirelong ye di ka newa dikabelo tša sa ruri.

Seboka sa ngwaga le ngwaga sa 2011 e bile se tletšego ka lethabo. Re ithekgile ka Jehofa gore a šegofatše dithulaganyo tše difsa tša go tiiša modiro wa rena wa boboledi le go tšwela pele a matlafatša borwarre bja rena—gore letago le tumišo ka moka di išwe go yena.

[Lepokisi/Diswantšho go matlakala 18, 19]

GO TSEBANA GAKAONE

Lenaneo le ile la akaretša dipoledišano le basadi ba bahlano go ba senyane ba bahlologadi ba ditho tša Sehlopha se Bušago. Kgaetšedi Marina Sydlik, Edith Suiter, Melita Jaracz, Melba Barry le Sydney Barber ba ile ba anega kamoo ba hweditšego therešo le ka tsela yeo ba ilego ba tsenela tirelo ya nako e tletšego. Yo mongwe le yo mongwe o ile a anega diphihlelo tša gagwe tše thabišago, seo a se gopolago ka monna wa gagwe le ditšhegofatšo tšeo a di thabetšego le yena. Mafelelong a dipoledišano tše, bohle bao ba bego ba le gona ba ile ba opela ka tsela e kgomago pelo kopelo 86, yeo e rego: “Basadi ba ba Botegago, Dikgaetšedi tša Bakriste.”

[Diswantšho]

(Ka godimo) Daniel le Marina Sydlik; Grant le Edith Suiter; Theodore le Melita Jaracz

(Ka tlase) Lloyd le Melba Barry; Carey le Sydney Barber

[Mebapa go letlakala 16]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

Makala a tshelelago a ile a kopanywa ka tlase ga lekala la Mexico

MEXICO

GUATEMALA

HONDURAS

EL SALVADOR

NICARAGUA

COSTA RICA

PANAMA

[Seswantšho go letlakala 17]

Tsela yeo ntlokgolo ya Dihlatse tša Jehofa e tlago go ba ka yona kua Warwick, New York