1. Ke dithuto dife tšeo batho ba Modimo ba di ahlaahlago gantši, gona go di bušeletša go re hola bjang?

MOHLOMONGWE o kile wa re o lokišetša Thuto ya Morokami wa re: ‘Okare re kile ra ithuta ka taba ye!’ Ge e ba e le kgale o kopanela le phuthego ya Bokriste, mohlomongwe o lemogile gore ditaba tše dingwe di ahlaahlwa gantši. Go ithuta ka Mmušo wa Modimo, topollo, modiro wa go dira barutiwa le ka dika tše bjalo ka lerato le tumelo ke karolo ya dijo tša rena tša moya. Ka go bušeletša dithuto tše, re thušwa gore re dule re phetše gabotse tumelong le go “[ba] badiri ba lentšu, e sego bakwi feela ba iphorago.”—Jak. 1:22.

2. (a) Gantši go bolelwa ka’ng ge go thwe dikgopotšo tša Modimo? (b) Dikgopotšo tša Modimo di fapana bjang le tša batho?

² Lentšu la Seheberu leo le fetoletšwego e le “kgopotšo” gantši le bolela ditaelo le melao yeo Modimo a e fago batho ba gagwe. Go fapana le melao ya batho, yeo e dulago e nyaka go lokišwa goba go kaonefatšwa, ka mehla melao ya Jehofa e a botega gomme go bjalo le ka ditaelo tša gagwe. Le ge e mengwe ya yona e šoma ka nako e itšego goba maemong a itšego, ga se gore e ba e fošagetše. Mopsalme o itše: “Go loka ga dikgopotšo tša gago ke ga go iša mehleng ya neng le neng.”—Ps. 119:144.

3, 4. (a) Dikgopotšo tša Jehofa di ka akaretša’ng? (b) Baisiraele ba be ba tla holega bjang ge ba be ba ka kwa dikgopotšo tša Jehofa?

³ O ka ba o lemogile gore ka dinako tše dingwe dikgopotšo tša Jehofa di akaretša melaetša ya temošo. Ka mehla setšhaba sa Isiraele se be se hwetša ditemošo go baporofeta ba Modimo. Ka mohlala, pejana ga ge Baisiraele ba ka tsena Nageng ya Kholofetšo, Moshe o ile a ba lemoša gore: “Le itlhokomeleng ka ge dipelo tša lena di ka goketšega ke moka la aroga la rapela medimo e mengwe le go e khunamela, ke moka bogale bja Jehofa bja le tukela.” (Doit. 11:16, 17) Beibele e utolla gore Modimo  o ile a nea batho ba gagwe dikgopotšo tše dintši tše bohlokwa.

⁴ Maemong a mantši, Jehofa o ile a kgothaletša Baisiraele gore ba mmoife, ba theetše lentšu la gagwe e bile ba kgethagatše leina la gagwe. (Doit. 4:29-31; 5:28, 29) Ge ba be ba ka kwa dikgopotšo tše, ba be ba tla hwetša ditšhegofatšo tše dintši.—Lef. 26:3-6; Doit. 28:1-4.

5. Ke ka baka la’ng Jehofa a ile a lwela Kgoši Hesekia?

⁵ Historing ka moka ya Baisiraele, Modimo o ile a phethagatša seo a se holofeditšego. Ka mohlala, ge Kgoši Sanheribe wa Asiria a be a hlasela Juda gomme a le kgauswi le go tšeela Kgoši Hesekia bogoši, Jehofa o ile a tsena ditaba gare ka go romela morongwa. Ka bošego bjo tee feela, morongwa wa Modimo o ile a bolaya “monna yo mongwe le yo mongwe wa mogale le yo matla” madireng a Asiria, moo Sanheribe a ilego a gapeletšega go boela gae a jelwe ke dihlong. (2 Dikor. 32:21; 2 Dikg. 19:35) Ke ka baka la’ng Modimo a ile a lwela Kgoši Hesekia? Ke ka gobane Hesekia “o ile a kgomarela Jehofa. Ga se a ka a tlogela go mo latela, eupša o ile a lota ditaelo tša Jehofa.”—2 Dikg. 18:1, 5, 6.

6. Kgoši Josia o ile a bota Jehofa bjang?

⁶ Mohlala o mongwe wa motho yo a ilego a kwa ditaelo tša Jehofa ke wa Kgoši Josia. O thomile a sa na le nywaga e seswai go “dira tše di lokilego mahlong a Jehofa . . . Ga se a ka a arogela ka go le letona goba go le letshadi.” (2 Dikor. 34:1, 2) Josia o ile a bontšha gore o botile Jehofa ka go fediša medingwana le go tsošološa borapedi bja therešo. Ka go dira bjalo, Josia ga se a tlišetša yena feela ditšhegofatšo eupša o ile a di tlišetša le setšhaba ka moka.—Bala 2 Dikoronika 34:31-33.

7. Baisiraele ba be ba eba le ditlamorago dife ge ba be ba phaela ka thoko dikgopotšo tša Jehofa?

⁷ Ka manyami, ga se ka mehla batho ba Jehofa ba ilego ba bota dikgopotšo tša gagwe ka mo go feletšego. Go theoša le nywagakgolo, ka dinako tše dingwe ba be ba sa kwe ditaelo tša Modimo. Go ya ka mantšu a moapostola Paulo, ge tumelo ya bona e be e fokola, gantši ba be ba “išwa kua le kua ke phefo e nngwe le e nngwe ya thuto.” (Baef. 4:13, 14) Le gona go etša ge go porofetilwe, ba be ba eba le ditlamorago tše mpe ge ba sa bote dikgopotšo tša Modimo.—Lef. 26:23-25; Jer. 5:23-25.

8. Re ka ithuta’ng mohlaleng wa Baisiraele?

⁸ Mohlala wa Baisiraele o ka re hola  bjang? Go swana le Baisiraele, bahlanka ba Modimo le bona lehono ba a eletšwa le go laiwa. (2 Pet. 1:12) Lentšu la Modimo le le buduletšwego le bjalo ka kgopotšo go rena nako le nako ge re le bala. Ka ge re na le tokologo ya go ikgethela, re ka kgetha go kwa ditaelo tša Jehofa goba ra kgetha go phegelela dilo tšeo rena re bonago di lokile. (Die. 14:12) Anke re ahlaahleng mabaka a mangwe ao a dirago gore re bote dikgopotšo tša Jehofa le kamoo re holwago ke go di kwa.

9. Jehofa o ile a kgonthišetša Baisiraele bjang gore o na le bona ge ba be ba le lešokeng?

⁹ Ge Baisiraele ba be ba tlo tšea leeto la nywaga e 40 ‘lešokeng leo le boifišago,’ Jehofa ga se a ba botša e sa le pele ditaba ka botlalo tša kamoo a bego a tla ba hlahla ka gona, go ba šireletša le go ba hlokomela. Lega go le bjalo, o ile a ba bontšha leboelela gore ba ka mmota le go bota ditaelo tša gagwe. Ka go diriša leru mosegare le mollo bošego, Jehofa o be a gopotša Baisiraele gore o na le bona ge a dutše a ba eteletše pele lešokeng leo le boifišago. (Doit. 1:19; Ek. 40:36-38) O ile a ba nea le dinyakwa tša bona tša motheo. ‘Diaparo tša bona di be di sa onale gomme dinao tša bona di sa ruruge.’ Ka kgonthe ba be ‘ba sa hloke selo.’—Neh. 9:19-21.

10. Jehofa lehono o hlahla bjang batho ba gagwe?

¹⁰ Lehono bahlanka ba Modimo ba kgauswi le go tsena lefaseng le lefsa la go loka. Na re a dumela gore Jehofa o tla re nea dilo tšeo re di hlokago gore re phologe “masetlapelo a magolo” ao a tlago? (Mat. 24:21, 22; Ps. 119:40, 41) Ke therešo gore Jehofa ga a re hlahle ka leru goba mollo ge re lebile lefaseng le lefsa. Eupša o diriša mokgatlo wa gagwe go re thuša go dula re phakgame. Ka mohlala, re botšwa leboelela gore re iphepe moyeng ka go bala Beibele, go ba le mantšiboa a Borapedi bja Lapa gaešita le go ya dibokeng le bodireding ka mehla. Na re dirile diphetogo maphelong a rena gore re latele ditaelo tše? Go dira bjalo go tla re thuša gore re age tumelo yeo e tlago go re fihliša lefaseng le lefsa.

11. Modimo o bontšha bjang gore o na le taba le rena?

¹¹ Ditaelo tšeo re di hweditšego ga di re thuše feela go dula re phakgame moyeng, eupša di re thuša le maphelong a rena a letšatši le letšatši. Ka mohlala, di re thuša go ba le pono e lekalekanego ka dilo tše di bonagalago le go dula re na le leihlo le bonolo gore re se ke ra belaela kudu. Re holwa gape ke tlhahlo ya mabapi le moaparo le go itokiša, go kgetha boithabišo bjo bo agago le go dira phetho ya gore re tla phegelela thuto go fihla kae. Le gona nagana ka dikgopotšo tšeo re di neilwego tša gore re boloke magae a rena, dikoloi tša rena, Diholo tša Mmušo di bolokegile gotee le go itokišeletša maemo a tšhoganetšo. Keletšo e bjalo e bontšha gore Modimo o na le taba le rena.

12. (a) Ke’ng seo Jesu a ilego a se botša barutiwa ba gagwe leboelela? (b) Ke tiro efe ya boikokobetšo yeo e ilego ya kgoma Petro kudu, le gona e swanetše go re kgoma bjang?

¹² Lekgolong la pele la nywaga, batho ba Modimo ba be ba gopotšwa ka mehla. Jesu o boletše gantši le barutiwa ba gagwe ka bohlokwa bja go hlagolela boikokobetšo. Eupša ga se a fo ba botša seo se bolelwago ke go ba le boikokobetšo—o ba bontšhitše kamoo ba ka bago le bjona. Letšatšing la gagwe la mafelelo lefaseng, Jesu o ile a kgobokanya baapostola gore ba bine Paseka. Ge baapostola ba dutše ba eja, Jesu o ile a emelela ke moka a ba hlapiša dinao, e lego tiro yeo gantši e bego e dirwa ke mohlanka mehleng yeo. (Joh. 13:1-17) Le ka mohla baapostola ga se ba ka ba lebala tiro ye ya boikokobetšo. Nywaga e ka bago e 30 ka morago, moapostola Petro yo a bego a le gona pasekeng yeo, o ile a eletša badumedigotee  le yena ka seka sa boikokobetšo. (1 Pet. 5:5) Mohlala wa Jesu o swanetše go re šušumeletša go dirišana ka boikokobetšo.—Bafil. 2:5-8.

13. Jesu o ile a gopotša barutiwa ba gagwe bohlokwa bja go hlagolela seka sefe se bohlokwa?

¹³ Taba e nngwe yeo Jesu a bego a bolela ka yona gantši le barutiwa ba gagwe ke bohlokwa bja tumelo e tiilego. Ka morago ga ge ba paletšwe ke go fodiša mošemane yo a bego a tsenwe ke motemona, barutiwa ba ile ba botšiša Jesu gore: “Ke ka baka la’ng re se ra kgona go leleka motemona yola?” Jesu o ile a araba ka gore: “Ke ka baka la tumelo ya lena e nyenyane. Gobane ruri ke re go lena, ge e ba le na le tumelo e lekanago le thoro ya sehlare sa mosetata, . . . go ka se be le seo se le palelago.” (Mat. 17:14-20) Bodireding bja gagwe ka moka, Jesu o ile a ruta barutiwa ba gagwe gore tumelo ke seka se bohlokwa. (Bala Mateo 21:18-22.) Na re diriša dibaka ka moka tšeo di lego gona go matlafatša tumelo ya rena ka tlhahlo e agago yeo re e hwetšago dikopanong tše dikgolo le tše dinyenyane gaešita le dibokeng tša Bokriste? Tše ga e fo ba dinako tše di kgahlišago tša go bokana gotee; ke dinako tša go bontšha gore re bota Jehofa.

14. Ke ka baka la’ng go le bohlokwa gore lehono re hlagolele lerato la go swana le la Kriste?

¹⁴ Mangwalo a Bakriste a Segerika a tletše ka dikgopotšo tša gore re ratane. Jesu o itše taelo ya bobedi e kgolokgolo ke ya gore “o rate moagišani wa gago ka mokgwa wo o ithatago ka wona.” (Mat. 22:39) Ka mo go swanago, Jakobo ngwanabo Jesu ka motswadi o tee o ile a re lerato ke “molao wa bogoši.” (Jak. 2:8) Moapostola Johane o ngwadile gore: “Baratiwa, ga ke le ngwalele taelo e mpsha, eupša ke le ngwalela taelo ya kgale yeo le e kwelego go tloga mathomong.” (1 Joh. 2:7, 8) Johane o be a bolela ka’ng ge a be a re “taelo ya kgale”? O be a bolela ka taelo ya go ba le lerato. E be e le taelo ya “kgale” ka kgopolo ya gore Jesu o be a e neile nywagasomeng e fetilego, e lego “go tloga mathomong.” Eupša gape e be e le e “mpsha” ka kgopolo ya gore e be e nyaka gore motho a be le lerato la boikgafo, e lego leo barutiwa ba bego ba tla le hloka ge ba lebeletšana le maemo a mafsa. Ka ge re le barutiwa ba Kriste, na ga re leboge ditemošo tšeo di re thušago gore re be šedi gore re se be le moya wa boithati wo o tletšego lefaseng le, woo o ka fokodišago lerato la boagišani?

15. Morero o mogolo wa Jesu ge a be a le lefaseng e be e le ofe?

¹⁵ Jesu o be a kgahlegela batho ba bangwe. Re bona seo ge a be a fodiša balwetši le digole le ge a be a tsoša bahu. Lega go le bjalo, morero wa Jesu o mogolo e be e se go  fodiša batho nameng. Go bolela ditaba tše dibotse le go ruta ga gagwe go ile gwa kgoma maphelo a batho ka tsela e kgolo kudu. Bjang? Ka mohlala, re a tseba gore bao Jesu a ilego a ba fodiša le go ba tsoša lekgolong la pele la nywaga mafelelong ba ile ba tšofala gomme ba hwa, eupša bao ba ilego ba arabela gabotse molaetšeng wa gagwe wa ditaba tše dibotse ba na le kholofelo ya bophelo bjo bo sa felego.—Joh. 11:25, 26.

16. Lehono modiro wa go bolela ka Mmušo le wa go dira barutiwa o phethwa ka tekanyo e kaaka’ng?

¹⁶ Lehono modiro wa go bolela ditaba tše dibotse woo Jesu a o thomilego lekgolong la pele la nywaga o phethwa ka tsela e kgolo le go feta. Ee, Jesu o laetše barutiwa ba gagwe gore: “Ka gona, eyang le dire batho ba ditšhaba ka moka barutiwa.” (Mat. 28:19) Ruri barutiwa ba gagwe ba ile ba dira seo, gomme re ka re, le rena re dirile seo! Dihlatse tša Jehofa tše mafolofolo tše fetago dimilione tše šupago di bolela ka Mmušo wa Modimo ka phišego dinageng tše fetago tše 230, le gona ka mehla di ithuta Beibele le batho ba dimilione. Modiro wo wa boboledi ke bohlatse bja gore re phela mehleng ya bofelo.

17. Paulo le Petro ba ile ba nea keletšo efe?

¹⁷ Ruri dikgopotšo di ile tša thuša Bakriste ba pele gore ba dule ba tiile tumelong. E fo nagana kamoo Timotheo a swanetšego go ba a ile a kgothatšega ka gona ge moapostola Paulo, yoo ka nako yeo a bego a golegilwe Roma, a be a mmotša gore: “Dula o swere mohlala wa mantšu a phedišago ao o a kwelego go nna.” (2 Tim. 1:13) Ka morago ga gore moapostola Petro a kgothaletše Bakristegotee le yena gore ba hlagolele dika tše bjalo ka kgotlelelo, lerato la borwarre le boitshwaro, o ile a re: “Ke tla ikemišetša ka mehla go le gopotša dilo tše, gaešita le ge le di tseba le bile le tieletše therešong.”—2 Pet. 1:5-8, 12.

18. Bakriste ba lekgolong la pele la nywaga ba be ba lebelela dikgopotšo bjang?

¹⁸ Ee, mangwalo ao Paulo le Petro ba a ngwadilego a be a na le “mantšu a boletšwego pele ke baporofeta.” (2 Pet. 3:2) Na bana babo rena ba lekgolong la pele la nywaga ba ile ba tenwa ke tlhahlo e bjalo? Le gatee, ka gobane tlhahlo e bjalo e be e bontšha gore Modimo o a ba rata, e lego seo se ba thušitšego go “gola bothong bjo bogolo bja Modimo le tsebong ya go tseba Morena le Mophološi wa [bona] Jesu Kriste.”—2 Pet. 3:18.

19, 20. Ke ka baka la’ng re swanetše go bota dikgopotšo tša Jehofa, gona go dira seo go re hola bjang?

¹⁹ Lehono re na le mabaka a mantši a go bota dikgopotšo tša Jehofa tšeo di lego ka Lentšung la gagwe leo le botegago, Beibele. (Bala Joshua 23:14.) Ka gare ga yona, re bona kamoo ka nywaga e dikete Modimo a ilego a dirišana le batho ba sa phethagalago ka gona. Dipego tšeo tša histori di ngwaletšwe go re hola. (Baroma 15:4; 1 Bakor. 10:11) Re bone go phethagala ga boporofeta bja Beibele. Boporofeta bo ka swantšhwa le dikgopotšo tšeo di boletšwego e sa le pele. Ka mohlala, batho ba dimilione ba kgeregela borapeding bjo bo hlwekilego bja Jehofa, go etša ge go porofetilwe gore go tla ba bjalo “mehleng ya bofelo.” (Jes. 2:2, 3) Maemo a mpefalago a lefase le ona a phethagatša boporofeta bja Beibele. Le gona ka ge go boletšwe, modiro o mogolo wa go bolela ditaba tše dibotse lefaseng ka bophara o phethagatša ka go lebanya mantšu a Jesu.—Mat. 24:14.

²⁰ Mmopi wa rena o re bontšhitše ka ditsela ka moka gore re ka mmota. Na re holwa ke seo? Re swanetše go bota dikgopotšo tša gagwe. Rosellen o ile a dira sona seo. O re: “Ge ke be ke thoma go bota Jehofa ka mo go feletšego, ke ile ka thoma go bona gabotse gore o a nthekga le go mmatlafatša.” Eka le rena re ka holwa ke go kwa dikgopotšo tša Jehofa.