MOGOLO yo mongwe wa nageng e itšego e lego François o re: “Go ile gwa tsoga dikgaruru ka morago ga diphenkgišano tšeo di bakilwego ke dikgetho, gomme se sa gapeletša Dihlatse tša Jehofa tše dikete go tšhaba magaeng a tšona. Go ile gwa thoma go ba le tlhokagalo ya dijo le dihlare, le gona tšeo di šetšego di be di bitša kudu. Dipanka di ile tša tswalela, gomme metšhene ya tšhelete ya hloka le sente ya lešidi goba ya se sa šoma.”

Bana babo rena go tšwa ofising ya lekala ba ile ba thuša kapejana ka go iša ditšhelete le ditlabakelo tša thušo ya tšhoganetšo go Dihlatse tšeo di tšhabilego magaeng a tšona tšeo di bego di bokane Diholong tša Mmušo nageng ka moka. Dihlopha tšeo di lwago di ile tša thiba ditsela, eupša ka ge di be di tseba gore Dihlatse ga di tšee lehlakore, gantši di be di dumelela dikoloi tša mokgatlo go feta.

François o re: “Ge re be re le tseleng ya go ya Holong e nngwe ya Mmušo, batho bao ba thunyago ba utame ba ile ba thunya koloi ya rena. Lega go le bjalo, dikolo tšeo di ile tša no feta magareng ga rena. Ge re be re bona lešole le re kitimela le swere sebetša ka letsogong, kapejana re ile ra boela ka sa morago ka koloi gomme ra boela lekaleng. Re ile ra leboga Jehofa gore re sa phela. Letšatšing le le latelago, bana babo rena ba 130 ba Holong yeo ya Mmušo ba ile ba kgona go fihla lefelong leo le bolokegilego. Ba bangwe ba ile ba tla ofising ya lekala, moo re ilego ra ba hlokomela moyeng le nameng go ba go fihla ge dikgaruru di fedile.”

François o re: “Ka morago ofisi ya lekala e ile ya amogela mangwalo a mantši a ditebogo ao a tšwago go bana babo rena nageng ka moka. Ge ba bona gore bana babo bona ba kaekae ba ile ba ba thuša, tumelo ya bona go Jehofa e ile ya matlafala.”

Ge bana babo rena le dikgaetšedi ba wetšwe ke dikotsi tša tlhago le tšeo di bakwago ke batho, ga re botše bao ba hlokago thušo gore ba ‘ruthele gomme ba khore.’ (Jak. 2:15, 16) Go e na le moo, re ba thuša ka dinyakwa tša bona tša nama. Ka mo go swanago, ka morago ga go amogela temošo ya gore go be go tlo wa tlala lekgolong la pele la nywaga, “barutiwa ba [ile ba] ikemišetša go romela tirelo ya thušo go bana babo bona bao ba dulago Judea, yo mongwe le yo mongwe wa bona go ya kamoo a bego a ka kgona ka gona.”—Dit. 11:28-30.

Ka ge re le bahlanka ba Jehofa, re ikemišeditše go thuša batho bao ba hlokago ka dilo tše di bonagalago. Lega go le bjalo, batho ba nyaka le dilo tša moya. (Mat. 5:3) E le go ba thuša go lemoga senyakwa seo le go se kgotsofatša, Jesu o ile a laela balatedi ba gagwe go dira barutiwa. (Mat. 28:19, 20) Yo mongwe le yo mongwe wa rena o neela ka nako ya gagwe e ntši, matla le ka dilo tša gagwe go thuša go phetha modiro woo. Re le mokgatlo, re diriša tšhelete e nngwe ya meneelo go thuša ka dinyakwa tša nama, eupša meneelo ye e dirišetšwa kudu go tšwetša pele dikgahlego tša Mmušo le go phatlalatša ditaba tše dibotse. Ka go dira bjalo re bontšha gore re rata Modimo le baagišani.—Mat. 22:37-39.

Bao ba thekgago modiro wa lefase ka bophara wa Dihlatse tša Jehofa ba ka kgodišega gore meneelo ya bona e dirišwa gabotse le ka tsela ya maleba. Na o ka kgona go thuša bana babo rena bao ba hlokago thušo? Na o kganyoga go thekga modiro wa go dira barutiwa? Ge e ba go le bjalo, “o se ke wa lesa go dira botse go bao bo ba swanetšego ge seatla sa gago se kgona go dira bjalo.”—Die. 3:27.