Go ka direga gore batho ba bjalo ba kganyoga go tlo nyalana gape le balekane ba bona bao ba tsošitšwego lefaseng le lefsa. Monna yo mongwe yo a hwetšwego ke mosadi o itše: “Nna le mosadi wa ka ga se ra kgetha go fediša lenyalo la rena. Kganyogo ya rena e be e le go hlankela Modimo ka mo go sa felego re le monna le mosadi. Le ge mosadi wa ka a hwile, ke sa dutše ke ikwa ka tsela yeo.” Na go na le lebaka le le kwagalago la go holofela gore batho bao ba tlago go tsošwa bahung ba tla nyala goba go nyalwa? Ga re tsebe.

Ka nywaga e mentši, dikgatišo tša rena di be di re mantšu a Jesu a mabapi le tsogo le go nyala goba go nyalwa mohlomongwe a bolela ka batho bao ba tlago go tsošetšwa mo lefaseng, le gore go bonala ba ka se tsene lenyalong. * (Mat. 22:29, 30; Mar. 12:24, 25; Luka 20:34-36) Gaešita le ge re sa re go bjalo, na go ka direga gore mantšu a Jesu a bolela ka bao ba bego ba tla tsošetšwa legodimong? Anke re ahlaahleng seo Jesu a se boletšego.

Jesu o be a bolela le bomang ge a be a bolela mantšu a? (Bala Luka 20:27-33.) O be a bolela le Basadutsei bao ba bego ba sa dumele tsogong, bao ba ilego ba mo leka ka go mmotšiša ka tsogo le lenyalo la go tšwetša pele lešika. * Jesu o ile a ba araba ka gore: “Bana ba tshepedišo ye ya dilo ba a nyala e bile ba a nyalwa, eupša bao ba tšewago ba swanelwa ke go hwetša tshepedišo yeo ya dilo gomme ba tsošwa bahung, ba ka se nyale le ge e le go nyalwa. Ge e le gabotse, ba ka se hlwe ba ehwa, gobane ba swana le barongwa gomme ke bana ba Modimo ka go ba bana ba tsogo.”—Luka 20:34-36.

Ke ka baka la’ng dikgatišo tša rena di ile tša re mohlomongwe Jesu o be a bolela ka batho bao ba tlago go tsošetšwa mo lefaseng? Phetho yeo e be e theilwe mabakeng a mabedi. Sa pele, go thwe mohlomongwe Basadutsei ba be ba naganne ka batho bao ba tlago go tsošetšwa mo lefaseng le gore Jesu a ka ba a ile a ba araba ka go dumelelana le sona seo ba bego ba se naganne. Sa bobedi, Jesu o ile a phetha karabo ya gagwe ka go bolela ka Aborahama, Isaka le Jakobo—e lego bapatriareka ba botegago bao ba tlago go tsošetšwa go tlo phela mo lefaseng.—Luka 20:37, 38.

Lega go le bjalo, go ka direga gore Jesu a ka ba a be a naganne ka batho bao ba bego ba tla tsošetšwa legodimong. Ke ka baka la’ng re ka fihlelela phetho yeo? Anke re ahlaahleng dipolelwana tše pedi tša motheo.

“Bao ba tšewago ba swanelwa ke go . . . tsošwa bahung.” Batlotšwa ba botegago ba “swanelwa ke mmušo wa Modimo.” (2 Bathes. 1:5, 11) Go boletšwe gore ba lokile bakeng sa bophelo motheong wa topollo; ka go re’alo ga ba hwe e le badiradibe bao ba bonwego molato. (Baroma 5:1, 18; 8:1) Batho ba bjalo ba bitšwa ‘ba thabilego le ba bakgethwa’ gomme ba tšewa ba swanelwa ke go tsošetšwa legodimong. (Kut. 20:5, 6) Ka mo go fapanego, bao ba tlago go tsošetšwa mo lefaseng ba tla akaretša batho bao “ba sa lokago.” (Dit. 24:15) Na re ka bolela ka bona gore ba ‘tšewa ba swanelwa’ ke tsogo?

 “Ba ka se hlwe ba ehwa.” Dibeibele tše dingwe di fetolela polelwana ye ka gore “ba ka se sa bušwa ke lehu” le gore “lehu ga le sa na matla go bona.” Batlotšwa bao ba fetšago bophelo bja bona bja mo lefaseng ba botega ba tsošetšwa legodimong gomme ba newa go se hwe, e lego bophelo bjo bo sa felego le bjo bo sa senyegego. (1 Bakor. 15:53, 54) Lehu ga le sa na matla go bao ba tsošeditšwego legodimong. *

Re ka phetha ka go re’ng mabapi le seo re sa tšwago go se ahlaahla? Go ka direga gore mantšu a Jesu a mabapi le go tsena lenyalong le tsogo a bolela ka bao ba tsošetšwago legodimong. Ge e ba go le bjalo, gona mantšu a gagwe a tla re botša dilo tše mmalwa ka bao ba tsošetšwago go phela legodimong: (1) Gore ba ka se sa nyala goba go nyalwa, (2) ba ka se hlwe ba ehwa le gore (3) ba swana le barongwa ka ditsela tše itšego—e lego dibopiwa tša moya tše di dulago legodimong. Lega go le bjalo, phetho ye e rotoša dipotšišo tše mmalwa.

Sa pele, ke ka baka la’ng Jesu a be a ka bolela ka batho bao ba bego ba tla tsošetšwa legodimong ge a be a araba Basadutsei bao go bonagalago ba be ba naganne ka batho bao ba tlago go tsošetšwa mo lefaseng? Ga se ka mehla moo Jesu a bego a araba baganetši ba gagwe go ya ka seo ba bego ba se nagana. Ka mohlala, o ile a botša Bajuda bao ba bego ba nyaka gore a ba direle pontšho gore: “Phušolang tempele ye gomme ke tla e tsoša ka matšatši a mararo.” Go ka direga gore Jesu o be a tseba gore ba be ba naganne ka moago wa tempele, “eupša ge a be a bolela ka tempele o be a šupa go mmele wa gagwe.” (Joh. 2:18-21) Mohlomongwe Jesu o ile a se bone bohlokwa bja go araba Basadutsei bao ba bego ba fo mo leka, bao ba bego ba sa dumele gore go na le tsogo goba barongwa. (Die. 23:9; Mat. 7:6; Dit. 23:8) Go e na le moo, mohlomongwe a ka ba a be a nyaka go utollela barutiwa ba gagwe ditherešo tše itšego mabapi le go tsošetšwa legodimong, bao ka letšatši le lengwe ba bego ba tla tsošetšwa legodimong.

Sa bobedi, ke ka baka la’ng Jesu a ile a phetha taba ye ka go bolela ka Aborahama, Isaka le Jakobo, e lego batho bao ba tlago go tsošetšwa mo lefaseng? (Bala Mateo 22:31, 32.) Ela hloko gore pele Jesu a bolela ka bapatriareka bao o thomile ka mantšu a rego, “ge e le mabapi le tsogo ya bahu.” Polelwana yeo e ka bontšha gore Jesu bjale o be a tlo bolela ka bao ba bego ba tlo tsošetšwa mo lefaseng. Ke moka, Jesu o ile a tsopola mangwalo a Moshe ao Basadutsei ba bego ba re ba a a dumela, a diriša mantšu ao Jehofa a a boditšego Moshe sehlareng se se tukago go ba nea bohlatse bjo bo oketšegilego bja gore tsogo—yeo go yona batho ba tlago go tsošetšwa mo lefaseng—ke morero wa Modimo wo o tlago go phethagala.—Ek. 3:1-6.

Sa boraro, ge e ba mantšu a Jesu a mabapi le tsogo le go tsena lenyalong a šupa go bao ba tlago go tsošetšwa legodimong, na se se ra gore bao ba tlago go tsošetšwa mo lefaseng ba tla kgona go nyala le go nyalwa? Lentšu la Modimo ga le arabe potšišo yeo. Ge e ba Jesu a be a bolela ka bao ba bego ba tla tsošetšwa legodimong, gona mantšu a gagwe ga a re botše selo ka taba ya ge e ba bao ba tlago go tsošetšwa mo lefaseng ba tla nyala goba go nyalwa lefaseng le lefsa.

Ga bjale re a tseba gore Lentšu la Modimo le bolela ka go lebanya gore lehu le fediša tlemo ya lenyalo. Ka baka leo, mohlolo goba mohlologadi ga se a swanela go ikwa a le molato ge a dira phetho ya go nyala goba go nyalwa gape. Yeo ke phetho ya motho ka noši, le gona batho ba bjalo ga se ba swanelwa go swaiwa diphošo ge ba nyaka molekane wa lenyalo.—Baroma 7:2, 3; 1 Bakor. 7:39.

Ke mo go kwagalago gore re ka ba re na le dipotšišo tše dintši ka bophelo lefaseng le lefsa. Go e na le gore re hlwe re phopholetša dikarabo tša dipotšišo tšeo, re swanetše go fo leta re tle re bone. Eupša re ka kgodišega ka se: Batho bao ba kwago ba tlo thaba, ka gobane Jehofa o tlo kgotsofatša dikganyogo tša bona ka moka ka tsela yeo re ka se kgonego go e nagana.—Ps. 145:16.