1, 2. (a) Modimo o letetše gore batho ba gagwe ba itshware bjang? (b) Sehlogo se se tlo araba dipotšišo dife?

JEHOFA o ile a budulela moapostola Petro gore a tswalanye bokgethwa bjo bo gateletšwego ka pukung ya Lefitiko le go nyakega ga gore re be ba bakgethwa boitshwarong bja rena bjalo ka Bakriste. (Bala 1 Petro 1:14-16.) Jehofa, yena “Mokgethwa,” o letetše gore batlotšwa le “dinku tše dingwe” ba dire sohle seo ba ka se kgonago gore e be ba bakgethwa boitshwarong bja bona ka moka—e sego dikarolong tše itšego feela tša maphelo a bona.—Joh. 10:16.

² Re tlo holwa kudu ke go ahlaahla dithuto tše dingwe gape tša bohlokwa ka pukung ya Lefitiko, e bile go diriša seo re tlago go ithuta sona go tla re thuša go itlhatsela re le ba bakgethwa boitshwarong bja rena ka moka. Re tlo ahlaahla dipotšišo tša go swana le tše di rego: Re swanetše go lebelela bjang go kwanantšha? Puku ya Lefitiko e re ruta’ng ka go godiša bogoši bja Jehofa? Re ka ithuta’ng tabeng ya go dirwa ga dihlabelo?

3, 4. (a) Ke ka baka la’ng Bakriste ba swanetše go phema go tshela melao le melao ya motheo ya Beibele? (b) Ke ka baka la’ng re sa swanela go itefeletša goba go boloka sekgopi?

³ Ge e ba re nyaka go kgahliša Jehofa, re swanetše go kgomarela melao le melao ya gagwe ya motheo ka go tia, re se ke ra thoma  go ba le mokgwa o mobe wa go e tshela. Gaešita le ge re se ka tlase ga Molao wa Moshe, dilo tšeo o bego o di nyaka go Baisiraele di re ruta seo Modimo a se amogelago le seo a sa se amogelego. Ka mohlala, Baisiraele ba be ba laetšwe gore: “O se ke wa itefeletša goba wa ba le sekgopi le bana ba setšhaba sa geno; o rate wa geno ka mokgwa wo o ithatago ka wona. Ke nna Jehofa.”—Lef. 19:18.

⁴ Jehofa o letetše gore re se ke ra itefeletša, e bile o nyaka gore re pheme go boloka sekgopi. (Baroma 12:19) Ge re ka hlokomologa melao le melao ya gagwe ya motheo, Diabolo o tla thaba, le gona re ka goboša leina la Jehofa. Gaešita le ge motho yo a itšego a ka ba a re kwešitše bohloko ka boomo, anke re se ke ra itira dibjana tša go bolokela sekgopi. Modimo o re neile tokelo ya go ba “dibjana tša letsopa” tšeo di swerego letlotlo la bodiredi. (2 Bakor. 4:1, 7) Ge re ka boloka dikgopi tše di swanago le esiti ka dibjaneng tše bjalo, di ka senyega!

5. Re ka ithuta’ng tabeng ya Arone le ya go bolawa ga barwa ba gagwe? (Bona seswantšho seo se lego mathomong a sehlogo.)

⁵ Phihlelo e gagolago pelo ya mabapi le lapa la Arone e begilwe go Lefitiko 10:1-11. Lapa leo le swanetše go ba le ile la kwa bohloko kudu ge mollo o tšwago legodimong o be o fiša barwa ba Arone e lego Nadaba le Abihu taberenakeleng. Ruri e swanetše go ba e bile teko e kgolo ya tumelo ge Arone le lapa la gagwe ba be ba botšwa gore ba se ke ba llela ditho tšeo tša lapa tše di hwilego! Na wena o itlhatsela o le yo mokgethwa ka go se gwerane le ditho tša lapa goba ba bangwe bao ba kgaotšwego?—Bala 1 Bakorinthe 5:11.

6, 7. (a) Ke dintlha dife tšeo re swanetšego go naganišiša ka tšona ge re lebeletšane le phetho ya ge e ba re tla ya lenyalong leo le tlago go swarelwa kerekeng? (Bona mongwalo wa ka tlase.) (b) Re ka hlalosetša bjang ba leloko boemo bja rena ge ba re laletša lenyalong leo le tlago go swarelwa kerekeng?

⁶ Mohlomongwe re ka se tsoge re lebeletšane le teko e kgolo yeo e swanago le yeo e kilego ya wela Arone le lapa la gagwe. Eupša go thwe’ng ge e ba re ka laletšwa lenyalong la wa leloko yo e sego Hlatse leo le tlago go swarelwa kerekeng? Ga go na lengwalo la Beibele leo le rego re se ke ra ya, eupša na go na le melao ya motheo ya Beibele yeo e ka re thušago go dira phetho e botse tabeng ye? *

⁷ Go ikemišetša ga rena go itlhatsela re le ba bakgethwa go Jehofa maemong ao re sa tšwago go bolela ka ona go ka makatša meloko ya rena yeo e sego Dihlatse. (1 Pet. 4:3, 4) Ke therešo gore re leka go se ba kgopiše, eupša gantši go kaone kudu gore re ba botše boemo bja rena phaa, re dira bjalo ka tsela e botho. Mohlomongwe re ka dira bjalo tiragalo yeo e sa le kgole. Re ka ba leboga gomme ra ba botša gore re thabela gore ba re laleditše lenyalong. Ke moka re ka ba botša gore ka baka la go se swane ga ditumelo tša rena, go ba ga rena moo go ka senya letšatši la bona le legolo gomme ra makatša bona le batho ba bangwe bao ba tlilego lenyalong. Ye ke tsela e nngwe yeo ka yona re ka phemago go kwanantšha ditumelo tša rena goba go tshela melao ya motheo ya Modimo.

8. Puku ya Lefitiko e godiša bogoši bja Jehofa bjang?

⁸ Puku ya Lefitiko e godiša bogoši bja Jehofa. Melao e fetago e 30 ya yeo e lego ka pukung ya Lefitiko, e boletšwe ke Jehofa ka go lebanya. Moshe o ile a dumelelana le seo gomme a dira tšohle tšeo Jehofa a bego a mo laetše gore a di dire. (Lef. 8:4, 5) Ka mo go swanago, le rena ka mehla re swanetše go dira dilo tšeo Mmuši wa rena e lego Jehofa a rego re di dire. Mokgatlo wa Modimo o re thuša go dira seo. Eupša tumelo ya rena e ka lekwa ge re le nnoši, go etša ge go bile bjalo ka Jesu ge a be a lekwa kua lešokeng. (Luka 4:1-13) Ge e ba re tshwenyegile ka bogoši bja Modimo e bile re mmota, ga go na motho yo a ka dirago gore re tshele melao ya gagwe ya motheo gomme ra wela molabeng wa go tšhaba batho.—Die. 29:25.

9. Ke ka baka la’ng batho ba Modimo ba hloilwe lefaseng ka moka?

 ⁹ Ka ge re le balatedi ba Kriste le Dihlatse tša Jehofa, re a tlaišwa lefaseng ka moka. Seo ga se re makatše, ka gobane Jesu o boditše barutiwa ba gagwe gore: “Batho ba tla le gafela tlaišegong gomme ba tla le bolaya, le tla ba ba hloilwego ke ditšhaba tšohle ka baka la leina la ka.” (Mat. 24:9) Eupša le ge re tlaišwa, re a kgotlelela modirong wa go bolela ka Mmušo le go tšwela pele re itlhatsela re le ba bakgethwa go Jehofa. Lega go le bjalo, ke ka baka la’ng re hloilwe gakaakaa gaešita le ge re botega, re le batho ba hlwekilego e bile re le badudi bao ba kwago? (Baroma 13:1-7) Ke ka gobane re kgethile Jehofa gore e be Mmuši wa rena! Re direla “yena a nnoši” tirelo e kgethwa, e bile re ka se tsoge re tshetše melao le melao ya gagwe ya motheo ya go loka.—Mat. 4:10.

10. Go ile gwa direga’ng nakong e nngwe ge ngwanabo rena yo mongwe a be a tshetše melao ya motheo?

¹⁰ Le gona ga re “karolo ya lefase.” Ka go re’alo, ga re tšee karolo dintweng tša lefase le dipolotiking. (Bala Johane 15:18-21; Jesaya 2:4.) Ba bangwe bao ba ineetšego go Modimo ba kile ba tšea karolo ditabeng tša lefase le. Ba bantši ba bona ba itshotše gomme Tatago rena wa legodimong yo a nago le kgaugelo a ba amogela gape. (Ps. 51:17) Ke ba sego kae bao ba sego ba itshola. Ka mohlala, nakong ya Ntwa ya Bobedi ya Lefase, bahlankedi ba mmušo ba ile ba tšea bana babo rena ba 160 bao ba bego ba golegilwe ntle le molao ba nywaga ya ka tlase ga e 45 go tšwa dikgolegong ka moka tša kua Hungary gomme ba ba kgobokanya toropong e tee. Ge ba le moo, ba ile ba ba gapeletša go tsenela bošole. Bana babo rena ba bao ba botegago ba ile ba gana ba tiile, eupša ba senyane gare ga bona ba dumela. Ka morago ga nywaga e mebedi, yo mongwe wa bao ba ilego ba tsenela bošole o ile a ikhwetša e le karolo ya mašole ao a bego a neilwe mošomo wa go bolaya Dihlatse tšeo tše di botegago. Ngwanabo o be a le gare ga Dihlatse tšeo! Lega go le bjalo, Dihlatse tšeo ga se tša ka tša bolawa.

11, 12. Tsela yeo Jehofa a bego a laetše gore dihlabelo di neelwe ka yona Isiraeleng ya bogologolo e ruta Bakriste eng lehono?

¹¹ Go ya ka Molao wa Moshe, Baisiraele ba be ba laetšwe go neela dihlabelo tše itšego. (Lef. 9:1-4, 15-21) Dihlabelo tšeo di be di sa swanela go ba le bosodi ka gobane di be di swantšhetša sehlabelo sa Jesu se se phethagetšego. Go oketša moo, Baisiraele ba be ba swanetše go latela ditaelo tše itšego ge ba neela sebego se sengwe le se sengwe goba sehlabelo. Ka mohlala, nagana ka seo mma yo a bego a sa tšwa go ba le ngwana a bego a swanetše go se dira. Lefitiko 12:6 e re: “Ge go fela matšatši a gore mosadi yoo e be yo a sekišitšwego ka baka la morwa wa gagwe goba morwedi wa gagwe, a tliše kgapana ya ngwaga o tee ya sebego sa go fišwa le leebana goba leebakgorwana la sebego sa sebe. A di tliše go moperisita mojakong wa tente ya kopano.” Modimo o be a boletše ka go lebanya dilo tšeo a di nyakago, eupša Molao wo a bego a o neile Baisiraele o bontšha gabotse tekatekano ya gagwe e lerato. Ge mma yoo a be a ka se kgone go tliša nku, o be a dumeletšwe go tliša maebakgorwana a mabedi goba maebana a mabedi. (Lef. 12:8) Gaešita le ge morapedi yo a be a diila, o be a ratwa e bile a lebelelwa e le wa bohlokwa go fo swana le yo a tlišago sebego sa go tsebalega. Re ka ithuta’ng go se?

¹² Moapostola Paulo o ile a kgothaletša badumedigotee le yena gore ba direle Modimo “sehlabelo sa tumišo.” (Baheb. 13:15) Melomo ya rena e swanetše go bolela phatlalatša ka leina la Jehofa le lekgethwa. Bana babo rena le dikgaetšedi ba difoa ba diriša polelo ya diatla go tumiša Modimo. Bakriste bao ba sa kgonego go tšwa ka gae ba mo tumiša ka go ngwala mangwalo, ka go nea bohlatse ka mogala le ka go boledišana le bahlokomedi ba bona le baeng. Dihlabelo tša rena tša  tumišo, e lego go tumiša Jehofa ka go botša ba bangwe ka leina la gagwe le ka go tsebatša ditaba tše dibotse, di swanetše go ya ka maemo a rena a tša maphelo le bokgoni. Re swanetše go nea Jehofa sohle seo re ka se kgonago.—Baroma 12:1; 2 Tim. 2:15.

13. Ke ka baka la’ng re swanetše go tliša dipego tša rena tša tirelo ya tšhemo?

¹³ Dihlabelo tša rena tša tumišo ke dibego tšeo rena ka noši re ithaopelago go di nea Modimo ka gobane re mo rata. (Mat. 22:37, 38) Eupša re kgopelwa gore re tliše dipego tša rena tša tirelo ya tšhemo. Bjale ke boemo bofe bja kgopolo bjo re swanetšego go ba le bjona ka se? Pego yeo re e tlišago kgwedi e nngwe le e nngwe e sepedišana le boineelo bja rena go Modimo. (2 Pet. 1:7) Ke therešo gore ga go le o tee wa rena yo a swanetšego go ikwa a gapeletšega go fetša diiri tše dintši tirelong ya tšhemo e le feela gore mafelelong a kgwedi a tliše pego yeo e bontšhago gore o kgathile tema e kgolo bodireding. Ke ka baka leo mogoeledi wa Mmušo yo a lego legaeng la balwetši le batšofadi goba yo a sa kgonego go tšwa ka gae a ka begago dikarolwana tša metsotso e 15 go e na le go bega diiri. Jehofa o lebelela metsotso yeo e le sehlabelo se sekaonekaone seo mogoeledi a kgonnego go se dira e bile e le tsela ya go mmontšha gore o a Mo rata le go leboga tokelo e kgolo ya go Mo hlankela e le yo mongwe wa Dihlatse tša Gagwe. Go fo swana le Baisiraele bao maemo a bona a bego a sa ba dumelele go neela tše dingwe tša dihlabelo tša go tsebalega, bahlanka ba rategago ba Jehofa bao maemo a bona a ba šitišago go dira mo go oketšegilego ba sa dutše ba ka tliša dipego tša bona. Le gona pego ya yo mongwe le yo mongwe wa rena e bopa pego ya lefase ka bophara, yeo e thušago mokgatlo go rulaganya e sa le pele modiro wa go bolela ka Mmušo. Ka gona, na mokgatlo o a tshwenya ge o re kgopela gore re tliše dipego tša rena tša tirelo ya tšhemo?

14. Hlalosa gore ke ka baka la eng re swanetše go hlahloba mekgwa ya rena ya go ithuta.

¹⁴ Ka morago ga gore re ahlaahle dithuto tše sego kae tše bohlokwa tša ka pukung ya Lefitiko, o ka re: ‘Ga bjale ke a bona gore ke ka baka la eng puku ye e le karolo ya Lentšu la Modimo le le buduletšwego.’ (2 Tim. 3:16) Gona bjale o ka ba o ikemišeditše le go feta gore o itlhatsele o le yo mokgethwa, e sego feela ka gobane Jehofa a letetše seo go wena, eupša e le ka gobane a swanelwa ke gore o mo direle sohle go mo kgahliša. Mohlomongwe seo o ithutilego sona ka pukung ya Lefitiko dihlogong tše tše pedi se go thušitše gore o nyake go badišiša Mangwalo ka kelohloko. (Bala Diema 2:1-5.) Hlahloba mokgwa wa gago wa go ithuta ka thapelo. Ga go pelaelo gore o nyaka gore Jehofa a amogele dihlabelo tša gago tša tumišo. Na o hweditše gore o dumelela thelebišene, dipapadi tša bidio, dipapadi goba ditloša bodutu di go šitiša go ithuta le go gola moyeng? Ge e ba go le bjalo, o ka holwa kudu ke go naganišiša ka a mangwe a mantšu a moapostola Paulo ao a begilwego ka pukung ya Baheberu.

15, 16. Ke ka baka la’ng Paulo a ile a bolela ka go se pepetletše le Bakriste ba Baheberu lengwalong leo a ba ngwaletšego lona?

¹⁵ Paulo o ile a bolela ka go se pepetletše le Bakristegotee le yena ba Baheberu lengwalong leo a ba ngwaletšego lona. (Bala Baheberu 5:7, 11-14.) Moapostola yo ga se a ka a sega  le bona! O ile a ba botša gore ba “retetše” tabeng ya go kwa. Ke ka baka la’ng Paulo a ile a ba kgalemela o šoro gakaakaa, a se ba pepetletše? O be a bonagatša lerato la Jehofa le go tshwenyega ka Bakriste bao ba bego ba leka go phela ka maswi, goba dithuto tša motheo tša Beibele. Go bohlokwa gore re tsebe dithuto tšeo, eupša go nyakega “dijo tše di tiilego” gore Mokriste a gole moyeng.

¹⁶ Go e na le gore Baheberu ba gole moyeng gomme ba rute ba bangwe, bona ka noši ba be ba sa hloka go rutwa. Ka baka la’ng? Ka gobane ba be ba sa nyake go ja “dijo tše di tiilego.” Ka gona ipotšiše gore: ‘Ke lebelela bjang dijo tše di tiilego tša moya? Na ke a di ja? Goba na ke tšwafa go rapela le go ithuta Beibele ka mo go tseneletšego? Ge e ba go le bjalo, na bothata bjo bongwe ke mokgwa wo ke ithutago ka wona?’ Ga se ra swanela go fo botša batho ditaba tše dibotse, eupša re swanetše go ba ruta le go dira barutiwa.—Mat. 28:19, 20.

17, 18. (a) Ke ka baka la’ng re swanetše go dula re eja dijo tše di tiilego tša moya? (b) Re ka lebelela bjang go nwa bjala pele re eya dibokeng tša Bokriste?

¹⁷ Ba bantši ba rena re ka hwetša go se bonolo go ithuta Beibele. Ke therešo gore Jehofa ga a leke go tutueletša batho ba gagwe go ithuta ka go ba dira gore ba ikwe ba le molato ge ba sa dire bjalo. Lega go le bjalo, go sa šetšwe gore ke kgale re le bahlanka ba Modimo ba ineetšego goba go se bjalo, re swanetše go tšwela pele re eja dijo tše di tiilego tša moya. Go bohlokwa gore re dire bjalo ge e ba re nyaka go dula re le ba bakgethwa.

¹⁸ Ge e ba re nyaka go ba ba bakgethwa, re swanetše go ithuta Mangwalo ka kelohloko gomme re dire seo Modimo a se nyakago go rena. Gopola barwa ba Arone e lego Nadaba le Abihu, bao Modimo a ilego a ba bolaya ka gobane ba tlišitše “mollo wo o sego wa dumelelwa,” bao mohlomongwe ba dirilego seo ba tagilwe. (Lef. 10:1, 2) Ekwa seo Modimo a ilego a se botša Arone ka morago ga moo. (Bala Lefitiko 10:8-11.) Na ditemana tše di re botša gore ga se ra swanela go nwa bjala pele re eya dibokeng tša Bokriste? Nagana ka dintlha tše di latelago: Ga re ka tlase ga Molao wa Moshe. (Baroma 10:4) Dinageng tše dingwe, badumedigotee le rena ba nwa bjala ka go lekanetša nakong ya dijo pele ba eya dibokeng. Nakong ya Paseka go be go dirišwa dinwelo tše nne tša beine. Ge Jesu a be a thea Segopotšo, o ile a nea barutiwa ba gagwe beine yeo e swantšhetšago madi a gagwe. (Mat. 26:27) Beibele e ganetša go nwa kudu le botagwa. (1 Bakor. 6:10; 1 Tim. 3:8) Le gona matswalo a Bakriste ba bantši ga a ba dumelele go nwa bjala pele ba tšea karolo sebopegong le ge e le sefe sa tirelo e kgethwa. Lega go le bjalo, dinaga ga di swane, le gona selo sa bohlokwa ke gore Bakriste ba “[dire] phapano magareng ga selo se sekgethwa le se se gobogilego” e le gore ba itshware ka tsela e kgethwa yeo e thabišago Modimo.

19. (a) Ke’ng seo re swanetšego go dula re se gopola ka borapedi bja rena bja lapa le thuto ya motho ka noši? (b) Ke’ng seo o ikemišeditšego go se dira tabeng ya go itlhatsela o le yo mokgethwa?

¹⁹ O ka hwetša mahumo a mantši a moya ge o ka a epa ka Lentšung la Modimo. Ikhole ka didirišwa tša go dira nyakišišo tšeo o nago le tšona go kaonefatša borapedi bja lena bja lapa le thuto ya gago ya motho ka noši. Oketša tsebo ya gago ka Jehofa le ka merero ya gagwe. Batamela kgauswiuswi le yena. (Jak. 4:8) Rapela Modimo go swana le mopsalme yo a opetšego ka gore: “Mpule mahlo e le gore ke bone dilo tše di makatšago tše di tšwago molaong wa gago.” (Ps. 119:18) Le ka mohla o se ke wa tshela melao le melao ya motheo ya Beibele. Ikemišetše go phela ka go dumelelana le melao e phagamego ya Jehofa, yena “Mokgethwa,” gomme o tšee karolo ka mafolofolo “[modirong] o mokgethwa wa ditaba tše dibotse tša Modimo.” (1 Pet. 1:15; Baroma 15:16) Itlhatsele o le yo mokgethwa mehleng ye e thata ya bofelo. Eka ka moka ga rena re ka ba ba bakgethwa boitshwarong bja rena gomme ka go re’alo re godiše bogoši bja Jehofa Modimo wa rena yo mokgethwa.