Polelo e Kgethegilego ya Phatlalatša

Ke Mang yo a Swanelegago go Buša Batho?

Ke mmuši ofe yo a ka

• rarollago mathata a tša ditšhelete, a kgonthišetša batho gore go tla ba le motlalo wa dijo le dintlo tše di swanelegago bakeng sa bohle?

• thibelago dikotsi tša tlhago gomme a phološa batho kotsing yeo e bakwago ke di-tsunami, madimo goba ditšhišinyego tša lefase?

• fedišago malwetši ka moka, gaešita le go nea batšofadi matla a bofsa?

• fedišago dintwa ka moka gomme a dira gore balata ba gagwe ba phele ka khutšo le tšhireletšego?

• tsošološago tswalano ya diphedi le tikologo ya tšona gore e be e phethagetšego gomme a fetoša lefase paradeise?

Go na le Mmuši o tee feela yo a ka tlišago ditšhegofatšo tše ka moka. Mmuši yoo ke mang? Potšišo yeo e tla arabja polelong ya phatlalatša yeo e nago le sehlogo se se rego, “Ke Mang yo a Swanelegago go Buša Batho?” Polelo ye yeo e theilwego Beibeleng e tla newa lefaseng ka bophara dinageng tše fetago 230. Mafelong a mantši, e tla newa Holong ya Mmušo ya Dihlatse tša Jehofa ya lefelong leo ka Sontaga April 6, 2008. Dihlatse tša Jehofa tša lefelong la geno di tla thabela go go botša nako le aterese. O laletšwa ka borutho gore o be gona.