Beibele e Fetoša Maphelo

Ke’ng seo se ka tutueletšago setho sa sehlopha sa bafsa ba disenyi sa Mexico seo se bitšwago Junior Satans gore se fetoge gomme e be modudi yo a botegago le yo a šomago ka thata? Ke ka baka la’ng mosadi wa Mojapane yo a atlegilego go tša kgwebo a ka kgaotša go phegelela mahumo bjalo ka selo se segolo bophelong bja gagwe, gona o ikwa bjang ka diphetogo tšeo a di dirilego? Ke’ng seo se ka tutueletšago morekiši wa dibetša wa kua Russia go tlogela kgwebo ya gagwe yeo e sego molaong eupša e le yeo e mo tlišetšago tšhelete e ntši? Ela hloko seo batho ba ba se bolelago.

PEGO YA BOPHELO BJA GAGWE

LEINA: ADRIAN PEREZ

NYWAGA: 30

NAGA: MEXICO

BOPHELO BJA PELE E E-BA MOKRISTE: SETHO SA SEHLOPHA SA DISENYI

BOPHELO BJA-KA BJA NAKONG E FETILEGO: Ge ke be ke e-na le nywaga e ka bago 13, lapa lešo le ile la hudugela Ecatepec de Morelos kua Mexico State. Ka nako yeo, lefelo leo le be le tletše bafsa ba disenyi, bao ba senyago dithoto ka boomo le bao ba lemaletšego dihlare-tagi. Go se go ye kae, ke ile ka thoma go nwa kudu, ke senya dithoto ka boomo e bile ke itshwara ka tsela e gobogilego.

Ka morago, re ile ra boela morago kua San Vicente e lego motse woo ke belegetšwego go ona. Lega go le bjalo, go lemalela dihlare-tagi e be e le bothata bjo bogolo moo. E be e le mo go tlwaelegilego go bona bafsa ba rapaletše ditarateng ba hwile. Ke ile ka ba setho sa sehlopha sa bafsa ba disenyi seo se bitšwago Junior Satans. Re be re utswa e bile re diriša dihlare-tagi, kudu-kudu re be re kgoga thinner goba sekgomaretši. Gantši ke be ke sa gopole gore ke fihlile bjang gae gomme ka dinako tše dingwe ke be ke rapalala setarateng ke idibetše. Ba bangwe ba bagwera ba-ka ba ile ba golegwa ka baka la bohodu le go bolaya.

Go sa šetšwe dilo ka moka tše mpe tšeo ke bego ke di dira, ke be ke dumela go Modimo. E le gore ke se ke ka ikwa ke le molato, ke be ke tšea karolo ditirelong tša bodumedi tše bjalo ka stations of the cross nakong ya Beke e Kgethwa. Lega go le bjalo, ka morago ga moo ka moka ga rena go akaretša le  monna yo a bego a bapala karolo ya Kriste, re be re keteka go tšea ga rena karolo tiragalong yeo ka go tagwa.

KAMOO BEIBELE E FETOTŠEGO BOPHELO BJA-KA: Mafelelong a nywaga ya-ka ya mahlalagadi, ke ile ka thoma go ithuta Beibele le Dihlatse tša Jehofa. Ke be ke lemoga gore bophelo bja-ka bo be bo se na morero le gore ge e ba nka tšwela pele ka tsela yeo ke bego ke phela ka yona, dilo di be di ka se ntshepelele gabotse. Seo se ilego sa nkgahla ke mantšu ao a ngwadilwego go Bagalatia 6:8 ao a rego: “Yo a bjalelago nama ya gagwe o tla buna tshenyego nameng, eupša yo a bjalelago moya o tla buna bophelo bjo bo sa felego moyeng.” Lengwalo le le ile la dira gore ke lemoge gore ge e ba ke nyaka gore dilo di ntshepelele gabotse, ke tla swanelwa ke go bjala ke naganne ka bokamoso.

Ge ke be ke ithuta Beibele, ke ile ka thoma go kwešiša gore Jehofa ke Modimo yo a phelago yo a nkgahlegelago le gore o ikemišeditše go ntebalela dibe tšeo ke di dirilego nakong e fetilego. Ke ile ka ithuta go seo se ntiragaletšego gore o theetša dithapelo le go di araba.

Go be go se bonolo go dira diphetogo tseleng ya-ka ya bophelo. Go tlogela sehlopha seo go be go le thata. Sehlopha seo ke bego ke le setho sa sona se be se thibetšwe go ya mafelong a mangwe gomme go be go sa kgonege gore ke fete go ona gaešita le ge ke se sa le setho sa sehlopha seo. Ka dinako tše dingwe, ke ile ka swanela ke go iphihla e le gore ke se bonwe ke bao e kilego ya ba bagwera ba-ka, ka gobane ba be ba tla nnyaka gomme ba leke go mpušetša mekgweng ya-ka ya kgale.

Ka mo go fapanego, ge ke be ke thoma go ya dibokeng le Dihlatse Holong ya Mmušo, ke ile ka hwetša phuthego e le borutho e bile e e-na le lerato. Ke ile ka kgahlwa ke gore batho ba, ba be ba e-na le tumelo e tiilego le gore ba be ba phela ka go dumelelana le seo ba se rutago. E be e le boemo bjo bo fapanego ka mo go feletšego le bjoo ke bego ke bo tlwaetše.

KAMOO KE HOLEGILEGO KA GONA: Ga bjale ke na le nywaga e lesome ke kolobeditšwe bjalo ka yo mongwe wa Dihlatse tša Jehofa. Ke leka ka thata go diriša dithuto tša Beibele bophelong bja-ka. Ka baka leo, lapa lešo le boetše le a ntlhompha. Ga bjale ba ntseba ke le motho yo a šomago ka thata e bile ke kgonne go ba thuša ka tša ditšhelete. Mma o ile a thoma go ithuta Beibele gomme ga bjale ke yo mongwe wa Dihlatse tša Jehofa. Tate le yena o dira diphetogo tseleng ya gagwe ya bophelo. Bontši bja ba lapa lešo ga se Dihlatse tša Jehofa, eupša ka morago ga go bona diphetogo tšeo ke di dirilego, ba a dumela gore Beibele e ka thuša motho go kaonefatša bophelo bja gagwe.

PEGO YA BOPHELO BJA GAGWE

LEINA: YAYOI NAGATANI

NYWAGA: 50

NAGA: JAPANE

BOPHELO BJA PELE E E-BA MOKRISTE: MOSADI YO A ATLEGILEGO GO TŠA KGWEBO

BOPHELO BJA-KA BJA NAKONG E FETILEGO: Ke goletše torotswaneng ya naga-magaeng yeo e nago le batho ba nago le bogwera. Tate o be a e-na le lebenkele le legolo ka toropong leo go lona go bego go šoma batho ba lesome. Legae lešo le be le le kgaufsi le lebenkele, ka gona gaešita le ge tate le mma ba be ba swaregile, ke be ke sa lewe ke bodutu.

 Ke nna yo mogolo go banenyana ba bararo gomme ke ile ka tlwaeletšwa go tšwetša pele kgwebo ya lapa ke sa le yo monyenyane. Ke ile ka nyalwa ke sa le yo monyenyane. Monna wa-ka o ile a tlogela mošomo wa gagwe pankeng gomme a tla go re thuša kgwebong ya lapa. Re ile ra ba le bana ba bararo bao ba bego ba latelana kgaufsi. Mma o be a ba hlokomela ge a dutše a dira mešomo ya ka gae, mola nna ke be ke šoma lebenkeleng go tloga mesong go fihla bošego. Lega go le bjalo, re be re sa dutše re e-ba le nako yeo re bego re e fetša re le gotee bjalo ka lapa.

Ke moka, dikgwebo di ile tša kgongwa ke go phuhlama ga tša boiphedišo gomme kgwebo ya rena e ile ya thoma go fokola. E le gore re lwantšhe boemo bjo, re ile ra phetha ka go bula lebenkele la ditlabakelo tša go lokiša dintlo kgaufsi le tsela e kgolo ya lephefo. Ka letšatši le lengwe pele ga mokete wa go thoma modiro wa go aga, tate, yo e bego e le mopresidente wa khamphani, o ile a wela fase ka baka la bolwetši bjo bo sa letelwago bja bjoko. O ile a se sa kgona go bolela, ka gona ke ile ka šala le boikarabelo bja go hlokomela lebenkele le lefsa. Monna wa-ka o ile a šala a hlokometše lebenkele la kgale. Re ile ra swarega kudu bophelong.

Lebenkele la rena le lefsa le ile la atlega kudu. Ke be ke ikgantšha ka dilo tšeo ke di fihleletšego gomme ke ile ka itima boroko e le gore ke šome. Gaešita le ge ke be ke rata bana ba-ka, selo feela seo ke bego ke se nagana e be e le mošomo. Ke be ke boledišana le monna wa-ka ka sewelo, gomme ge e ba re boledišana, re be re ngangišana kudu. E le gore ke lebeletšane le kgateletšego, ke ile ka thoma go nwa bjala le bagwera ba-ka gotee le bašomi-gotee mo e ka bago bošegong bjo bongwe le bjo bongwe. Selo feela seo ke bego ke se dira e be e le go šoma, go nwa le go robala. Ke be ke atlegile ka tša ditšhelete eupša ke be ke sa thaba gomme ke be ke sa kwešiše gore ke ka baka la eng.

KAMOO BEIBELE E FETOTŠEGO BOPHELO BJA-KA: Ge ke be ke thoma go ithuta Beibele le Dihlatse tša Jehofa, ke mangwalo a mararo a Beibele ao a ilego a nkgoma ka mo go tseneletšego. Ke ile ka lla kudu ge ke be ke thoma go kwešiša seo se bolelwago ke Mateo 5:3 yeo e rego: “Go thaba bao ba lemogago go nyaka ga bona dilo tša moya, ka ge mmušo wa magodimo e le wa bona.” Temana ye e ile ya hlalosa lebaka leo ka lona ke bego ke ikwa ke se selo gaešita le ge ke be ke atlegile ka tša ditšhelete e bile ke hlompšha ke bao ke šomago le bona. Ke ile ka lemoga gore ke feela ka go lemoga dinyakwa tša-ka tša moya le go di kgotsofatša moo ke bego nka thaba e le ka kgonthe.

Ka nako ye, boemo bja tša boiphedišo bja Japane bo be bo phuhlame, gomme ke ile ka bona gare ga bašomi-gotee le nna therešo ya seo se bolelwago ke 1 Timotheo 6:9 ge e re: “Bao ba ikemišeditšego go huma ba wela molekong le molabeng le dikganyogong tše dintši tša go hloka tlhaologanyo le tše gobatšago, tšeo di phonkgetšago batho tahlegong le tshenyegong.” Ke ile ka kwa eka mantšu a Jesu ao a ngwadilwego go Mateo 6:24 ao a rego “le ka se be makgoba a Modimo le a Mahumo” a šoma go nna, ka gona ke ile ka phetha ka go dira diphetogo bophelong bja-ka.

Ke ile ka lemoga gore ke be ke hlokomologile batswadi ba-ka, monna wa-ka le bana ba-ka. Le gona, go ile gwa ba molaleng gore ke be ke thoma go ba le mekgwa e itšego e sa kgahlišego. Ke be ke thoma go ikgogomoša. Ke be ke felela batho pelo. Le gona, ke be ke galefa gabonolo. Mathomong, ke be ke nagana gore go ka se kgonege gore ke fetoge gomme ka ba Mokriste. Lega go le bjalo, ke be ke tloga ke rata bana ba-ka gomme ke ile ka lemoga gore ge ke be ke diriša keletšo ya Beibele go dirišaneng le lapa la-ka, bana ba-ka ba be ba arabela gabotse. Ke be ke fetša nako e ntši le bona e bile ke e-ya le bona dibokeng tša Bokriste.

KAMOO KE HOLEGILEGO KA GONA: Go tseba morero wa bophelo le go hlankela Modimo gotee le go phela bophelo bjo bo mo kgahlišago, go nneile lethabo la kgonthe le kgotsofalo. Ga ke sa etiša mošomo wa-ka pele ga lapa la-ka gomme ke na le boitlhompho gape.

Ka morago ga gore mma a bone kamoo semelo sa-ka se kaonefetšego ka gona ge ke dutše ke diriša melao ya motheo ya Beibele, o ile a tutueletšega go ithuta Beibele gomme a ba Mokriste. Se se kgahlišago ke gore tate le monna wa-ka ga se ba ganetša diphetho tša rena. Ke na le tswalano ya kgaufsi kudu le bana ba-ka gomme ga bjale ke thabela bophelo bja lapa bjo bo thabilego e le ka kgonthe.

PEGO YA BOPHELO BJA GAGWE

LEINA: MIKHAIL ZUYEV

NYWAGA: 51

NAGA: RUSSIA

BOPHELO BJA PELE E E-BA MOKRISTE: MOREKIŠI WA DIBETŠA TŠE DI SEGO MOLAONG

 BOPHELO BJA-KA BJA NAKONG E FETILEGO: Motse wa gešo wa Krasnogorsk, o dikologilwe ke dimela tše ditalana. Noka ya Moscow e elela borwa. Go ya ka bodikela le leboa, metse e nyakile e khupeditšwe ke dithokgwa.

Ge ke be ke sa le yo monyenyane, ke be ke rata go lwa ka matswele le go bapala ka dibetša. Ke be ke fetša nako e ntši ke itšhidulla. Le gona, ke be ke dira dithunya, dibetša le dithipa tše di sego molaong. Ge nako e dutše e e-ya, se e ile ya ba kgwebo ya-ka. Kgwebo ya-ka e be e rulagantšwe gabotse e bile ke atlega go rekišetšeng disenyi dibetša tšeo ke bego ke di dira.

KAMOO BEIBELE E FETOTŠEGO BOPHELO BJA-KA: Mathomong a bo-1990, ke ile ka kopana le Dihlatse tša Jehofa, eupša mathomong ke be ke sa di bote. Go ya ka nna di be di botšiša dipotšišo tše dintši.

Ka letšatši le lengwe, yo mongwe wa tšona o ile a mpalela Baroma 14:12 yeo e rego: “Yo mongwe le yo mongwe wa rena o tla ikarabela go Modimo.” Ke ile ka ipotšiša gore ke be ke tla reng go Modimo. Lengwalo le le ile la ntutueletša gore ke ithute seo Modimo a se nyakago go nna.

Ke ile ka leka ka thata gore ke diriše keletšo ya Beibele yeo e ngwadilwego go Bakolose 3:5-10 yeo e rego: “Ka gona, bolayang ditho tša lena tša mmele tše di lego lefaseng mabapi le bootswa, go se hlweke, kganyogo ya botona le botshadi, kganyogo e gobatšago le go duma tša ba bangwe, e lego borapedi bja medimo ya diswantšho. Kgalefo ya Modimo e a tla ka baka la dilo tšeo. . . . Di lahleleng ka moka kgole le lena, kgalefo, pefelo, bobe, polelo e gobošago le polelo e lešago dihlong e tšwago molomong wa lena. Le se ke la forana. Hlobolang motho wa kgale le ditlwaelo tša gagwe, gomme le apare motho yo mofsa.”

Ke ile ka hwetša go le thata go dira diphetogo tše bjalo. Bao e kilego ya ba “bareki ba dibetša tša-ka” ba ile ba tšwela pele ba mpha tšhelete ba nyaka dibetša, gomme ke ile ka hwetša go le thata go itshwara ge batho ba nkgalefiša. Gaešita le ge go le bjalo, ke ile ka fediša mokgobo wa-ka o mogolo wa dibetša tša bohlokwa. Ge ke be ke ithuta ka lerato leo Modimo le Kriste ba mpontšhitšego lona, ke ile ka tutueletšega go ba rata. Ke ile ka phegelela thutong ya-ka ya motho ka noši ya Beibele, ka ba gona dibokeng phuthegong ya lefelong la gešo gomme ka rapelela thušo ya Modimo.

KAMOO KE HOLEGILEGO KA GONA: Ganyenyane-ganyenyane, ka go katana kudu le ka thušo ya bana bešo ba Bakriste, ke hlagoletše semelo se sekaone. Go tseba gore Jehofa Modimo o hlokomela yo mongwe le yo mongwe wa rena, gaešita le bahu, go a nthabiša. (Ditiro 24:15) Ke tšeela godimo kudu go botega go tšwa pelong moo ke go bonago go Dihlatse tša Jehofa. Le gona, ke leboga kgahlego ya kgonthe yeo di mpontšhitšego yona e bile ke tšeela godimo go botegela ga tšona Modimo.

Mathomong, ba bangwe ba lapa lešo le bagwera ba be ba ganetša bodumedi bja ka bjo bofsa. Eupša ba ile ba ikhomotša ka gore go be go le kaone gore ke be karolo ya bodumedi go e na le gore ke be yo mongwe wa disenyi. Ke thabile ka gore ga ke sa neetše bophelo bja-ka go rekišeng dibetša tša ntwa eupša ke bo neetše go thušeng ba bangwe go ithuta ka Modimo wa khutšo.

[Seswantšho go letlakala 27]

Ke ile ka tšea karolo ditirelong tša Khatolika e le gore ke se ke ka ikwa ke le molato

[Seswantšho go letlakala 28]

Ke be ke atlegile ka tša ditšhelete eupša ke sa thaba