Ke Ithutile Kamoo Bophelo bo Lego Bohlokwa ka Gona

E BE E LE MESONG YA APRIL 16, 2007. Ge ke be ke bataletše sekhutlong sa ofisi yeo e lego lebatong la boraro la moago wa Norris Hall kua Virginia Polytechnic Institute and State University, goba Virginia Tech, ke ile ka gopola gape kamoo re swanetšego go leboga ka gona bakeng sa letšatši le lengwe le lengwe le bohlokwa leo re phelago ka lona.

Ke be ke le ka ofising ya-ka ke itokišetša go ya lebatong la bobedi go yo tšea mangwalo a-ka. Moporofesara yo mongwe o ile a tla go tlo nkgopela gore ke ye ofising ya gagwe go mo thuša ka bothata bjo a bego a e-na le bjona khomphutheng. Ge re tsena ka ofising ya gagwe re ile ra kwa medumo ya dithunya go tšwa lebatong la bobedi. Ka ge re be re sa tsebe seo se diregago, re ile ra akgofela ka ofising ya gagwe, ra notlela mojako gomme ra leta ka go tshwenyega re sa tsebe seo se tlago go re diragalela. Ke ile ka iphihla sekhutlong gomme ka rapela Jehofa Modimo go tšwa pelong, ke mo kgopela tlhahlo ya go lebeletšana le selo le ge e le sefe seo se bego se letše ka pele.

Ge re be re letile, ke ile ka gopola tiragalo yeo e diregilego nywageng e 15 e fetilego. Ke be ke šoma lefelong la go lokiša dikoloi. Pane e nyenyane yeo e bego e-na le peterole yeo mošomi-gotee le nna a bego a e swere e ile ya tuka. Ka letšhogo, o ile a tšhollela peterole yeo e tukago sefahlegong sa-ka! Ke ile ka hema muši wa peterole yeo gomme ka fsa o šoro karolong ya ka godimo ya mmele wa-ka. Ke ile ka išwa ka helikoptara sepetleleng seo ka mo go kgethegilego se hlokomelago batho bao ba fselego gomme ka bewa ka phapošing ya tlhokomelo e tseneletšego ka dikgwedi tše tharo le seripa, ke le makgatheng a lehu le bophelo. Ka morago ga go alafša le go thušwa gore ke boele sekeng ka dikgwedi tše hlano, ke ile ka kgona go boela gae, ke leboga gore ke a phela. Tiragalo yeo e nthutile go lebelela letšatši le lengwe le lengwe e le la bohlokwa. Le gona, e matlafaditše boikemišetšo bja-ka bja gore ke diriše bophelo bja-ka tirelong ya yo a nneilego bjona, e lego Jehofa Modimo—ke le yo mongwe wa Dihlatse tša gagwe.—Psalme 90:12; Jesaya 43:10.

Ka ge ke be ke se sa kgona go šoma bjalo ka molokiši wa dikoloi ka baka la dikgobalo tša-ka, ke ile ka ithuta go šoma ka dikhomphutha gomme ka thwalwa Virginia Tech. Ke ka baka leo ke bego ke le moagong wa Norris Hall mesong yeo.

Ge medumo ya dithunya e dutše e tšwela pele, re be sa lemoge le gatee gore go bolawa ga batho ka dithunya ka tsela e sehlogo kudu historing ya U.S., go be go kgatlampana lebatong la ka tlase. Polao yeo e ile ya fela ge monna yo a bego a thuntšha a ipolaya ka morago ga go bolaya batho ba 32 ba se nago molato. Mo e ka bago metsotso e 20 ka morago ga tiragalo yeo, re ile ka kwa maphodisa a le ka moagong. Re ile ra ba goeletša gomme ba re iša lefelong leo le šireletšegilego.

Tiragalo ye e boifišago e nthutile kamoo bophelo bo fetago ka pela le kamoo bo sego bja kgonthišega ka gona. (Jakobo 4:14) Ruri go bohlokwa gore re bote Monei-bophelo, Jehofa Modimo, le go lebelela letšatši le lengwe le le lengwe e le mpho e bohlokwa e tšwago go yena!—Psalme 23:4; 91:2.

[Mothopo wa Seswantšho go letlakala 30]

AP Photo/The Roanoke Times, Alan Kim