Go Porofeta Bokamoso bja Rena bjo bo Lego Kgaufsi

GE A be a bolela ka bokamoso bja batho le lefase, moapostola Petro o ngwadile gore: “Go na le magodimo a mafsa le lefase le lefsa tše re di letetšego go ya ka kholofetšo ya gagwe [Modimo], gomme toko e tla aga go tšona.” (2 Petro 3:13) Kholofetšo ya “magodimo a mafsa le lefase le lefsa” e neilwe mathomong ka moporofeta Jesaya. (Jesaya 65:17; 66:22) Ka go tsopola boporofeta bjo, Petro o  bontšhitše gore mehleng ya gagwe bo be sa hlwa bo phethagala ka mo go feletšego.

Ka morago, mo e ka bago ka ngwaga wa 96 C.E., Kutullo yeo e neilwego ka moapostola Johane e ile ya tswalanya ‘lefase leo le lefsa’ le ditšhegofatšo tšeo di tla bago gona ka tlase ga Mmušo wa Modimo. (Kutollo 21:1-4) Mantšu a Jesu go akaretša le a moapostola Paulo a mabapi le maemo a pele ga go tla ga Mmušo wa Modimo a a phethagala lehono. Ka gona, re ka letela gore Mmušo wa Modimo o tla tliša lefase le lefsa kgaufsinyane. Lefase leo le lefsa le tla ba bjang? Puku ya Jesaya e a re botša.

Ditšhegofatšo Lefaseng le Lefsa

Khutšo ya Lefase ka Bophara le go Rapela Modimo re le Gotee. “Ké mo ba tl’o xo tšea dithšoša ba rula mexomá ka tšôna, ba tšea marumô ba rula maxwêtla ka ôna. Xo ka se bê le sethšaba se se tl’o xo tšwêla se sengwê lerumô; batho ba tlo lesa xo ithuta xo hlabana.”—Jesaya 2:2-4.

Khutšo Magareng ga Batho le Diphoofolo. “Phiri e tlo dula le kwanyana; nkwê e tlo hutama le putšanyana; namane le tau le pholo di tlo dula felô xotee, di xapye ke mošemanyana. Namaxadi le tau-thsadi di tlo fula xotee, bana ba tšôna ba hutame mmôxô; ’me tau e fula bya’ng bo-ka kxomo. . . . Xo ka se hlwê xo dirwa dibe, xo ka se hlwê xo senywa mo xo fêla dithabeng tše kxêthwa tša-ka, xobane xo tseba Morêna xo tlo tlala ’fase lohle bo-ka meetse xe a nabile lewatleng.”—Jesaya 11:6-9.

Motlalo wa Dijo Bakeng sa Bohle. “Morêna wa mašaba ó dirêla dithšaba ka moka monyanya thabeng yé, monyanya wa makhura, wa dinwewa tše monate, wa dinwewa tše di hlotlilwexo.”—Jesaya 25:6.

Lehu ga le sa tla ba Gona. “Lehu [Modimo] ó tlo le tloša ka xo sa felexo; Mong ’a bohle Morêna ó tlo phomola mexôkxô mahlong ohle; ’me kxoboxô ya sethšaba s’axwe ó tlo e široša dinaxeng ka moka; xobane Morêna ó r’yalo.”—Jesaya 25:8.

Bahu ba tla Tsošwa. “Bahu ba xaxo ba tlo phela, . . . Ba tlo tsoxa. Phafoxang! Hlalalang! Ba Le robetšexo leroleng . . . ’me lefase le tlo nthša ba hwilexo.”—Jesaya 26:19.

Mesia ke Moahlodi yo a Lokilego. “A ka se ahlole ka mo mahlô ’axwe a bônaxo; a ka se ripe taba ka mo ’tsêbê tš’axwe di kwilexo. Bahlaki ó tlo ba êmêla ka xo loka; lefase o tlo le ôtla ka kxati ya molomo w’axwe.”—Jesaya 11:3, 4.

Difofu le Difoa di tla Fodišwa. “Ké mo xo tl’o xo budollwa mahlô a difofu, xwa thibollwa ’tsêbê tša difoa.”—Jesaya 35:5.

Naga e Omilego e Tšweletša Dibjalo. “A xo thabe lešoka le naxa ye e omilexo; le lehanata a le hlalalê, le taxê byalo ka letšoba. Le tlo taxa ruri la hlalala, ka xo nyakalala le xo bina.”—Jesaya 35:1, 2.

 Lefase le Lefsa. “Ke tlo hlôla maxodimo a mafsa [mmušo o mofsa wa legodimong] le lefase le lefsa [lekoko le lefsa le lokilego la batho]; tša kxalê di ka se hlwê di tsebywa, le mo pelong ya motho di ka se hlwê di rotoxa. ’Me lena hlalalang Le fêlê Lè thabêla tše Nna ke tl’o xo di hlôla. . . . Nywakô ye ba e axaxo [baagi ba lefase le lefsa la Modimo leo le holofeditšwego] ba tlo dula mo xo yôna; dirapa tša merara, ba tlo lema ba ja kenyô tša tšôna. Ba ka se kê ba axa, xwa dula o šele; ba ka se kê ba lema xwa ja o šele; xobane matšatši a batho ba-ka a tlo lekana le matšatši a sehlare, ’me bahlaolwa ba-ka ba tlo phela ka tše ba itiretšexo tšôna, tša tlo bá tša ba ônalêla diatleng. Ba ka se itapiše, ’me ya ba lefêla; ba ka se tswale bana ba xo tlo hwa ka pela; xobane e tlo ba mohuta wa bašexofatšwa ba Morêna, bôná le bana ba bôná. E tlo re bà sešo ba bitša, ka ba ke šetše ke araba; e tlo re bà sa bolêla, ka ba ke šetše ke e-kwa.” “’Me moloko wa lena ó tlo dula ò le xôna; le maina a lena a tlo dula à le xôna, bo-ka lexodimo le lefase le lefsa le ke tl’o xo le dira, xe di tlo dula di le xôna pele xa-ka.”—Jesaya 65:17-25; 66:22.

Go Porofeta Bokamoso bjo bo Kgahlišago

Puku Jesaya ga se puku e nnoši ka Beibeleng yeo e bolelago ka ditšhegofatšo tša nakong e tlago. Beibele e tletše ka boporofeta bjo bontši bjo bo hlalosago dilo tše dibotse tšeo Modimo a tlago go di phetha ka Mmušo wa gagwe ka tlase ga Kriste. * Na o ka rata go phela ka tlase ga maemo a bjalo a paradeise? O ka kgona! Ikhweletše ka bowena seo Beibele e se rutago ka merero e mebotse ya Modimo ka bokamoso gomme o ithute kamoo o ka bago karolo ya merero yeo. Dihlatse tša Jehofa di tla thabela go go thuša.

[Mongwalo wa tlase]

[Seswantšho go letlakala 8]

Batho ba tla phedišana ka khutšo le go phela ka khutšo le diphoofolo

[Seswantšho go letlakala 9]

Bahu ba tla tsošwa

[Seswantšho go letlakala 10]

Lefase ka moka e tla ba paradeise