Na o Aga Godimo ga Lešabašaba Goba Godimo ga Lefsika?

NA O thabela go bala Beibele? Na o bile o ipha nako ya go ithuta Beibele ka mehla le yo mongwe wa Dihlatse tša Jehofa? Ge e ba go le bjalo, gona ga go na pelaelo gore o ikwa gore tsebo yeo o e hweditšego e go thušitše go kwešiša gakaone lebaka leo ka lona lefase le le tletšego mathata. (Kutollo 12:9, 12) Go oketša moo, ditemana tše dintši tša Beibele di go neile khomotšo dinakong tša mathata gotee le kholofelo bakeng sa bokamoso.—Psalme 145:14; 147:3; 2 Petro 3:13.

Go hwetša tsebo e nepagetšego ya Beibele ke mogato o bohlokwa go bao ba kganyogago go ba balatedi ba Kriste. Eupša na ke ona mogato o nnoši? Aowa. E le gore morutwana wa Beibele a dule e le Mokriste wa therešo—kudu-kudu ge tumelo ya gagwe e lekwa—o swanetše go gata mogato o mongwe o bohlokwa. Ke ofe? E le gore re hwetše karabo, anke re hlahlobeng ka boripana Thuto ya Thabeng, thuto yeo e neilwego ke Jesu thabeng kua Galilea.—Mateo 5:1, 2.

Dintlo tše Pedi di a Lekwa

Na o tlwaelane le mantšu a Thuto ya Thabeng? O ka hwetša thuto ye e tsebjago kudu Diebangeding tša Mateo le Luka. (Mateo 5:1–7:29; Luka 6:20-49) Go tšea feela metsotso e 20 go bala thuto yeo ka moka. Lega go le bjalo, e tletše ka ditsopolo tše fetago 20 tša Mangwalo a Seheberu le dika-polelo tše fetago 50. Seka-polelo se tee—seo se bolelago ka go agwa ga dintlo tše pedi—ke seo se kgethegilego kudu ka gobane Jesu o se dirišitše e le phetho ya thuto ya gagwe. Ge e ba o kwešiša seo se bolelwago ke seswantšho seo sa mafelelo, o tla thušwa go bona kamoo o ka tšwelago pele o tiile bjalo ka molatedi wa Kriste go sa šetšwe diteko le ge e le dife tša tumelo tšeo o ka kopanago le tšona.

Jesu o itše: “Ka gona, yo mongwe le yo mongwe yo a kwago dipolelo tše tša-ka gomme a di dira o tla swantšhwa le monna yo a nago le temogo, yo a agilego ntlo ya gagwe godimo ga lefsika. Pula ya tšhologa le meetse-fula a tla le diphefo tša tšutla tša wela ntlo yeo, eupša ya se buragane, gobane e be e theilwe godimo ga lefsika. Go feta moo, yo mongwe le yo mongwe yo a kwago dipolelo tše tša-ka gomme a sa di dire o tla swantšhwa le monna wa lešilo, yo a agilego ntlo ya gagwe lešabašabeng. Pula ya tšhologa le meetse-fula a tla le diphefo tša tšutla tša wela ntlo yeo gomme ya buragana, go wa ga yona ya ba mo gogolo.”—Mateo 7:24-27.

Monna yo “a Epilego a Iša Tlase”

Ke therešo efe e bohlokwa yeo Jesu a e rutilego barutiwa ba gagwe ka go diriša seswantšho se sa baagi ba babedi? E le gore o tsebe seo, ela hloko mantšu a Jesu. Ke’ng seo o se lemogago ka dintlo tše tše pedi? Bobedi bja tšona di ile tša lebeletšana le dikotsi tše swanago. Mohlomongwe dintlo tše di ka ba di be di swana. Go ka direga gore di be di agilwe lefelong le tee—mohlomongwe di bapelane. Lega go le bjalo, e nngwe e be e agilwe godimo ga lešabašaba gomme e nngwe e agilwe godimo ga lefsika. Seo se be se ka direga bjang? Ka gobane, go etša ge go boletšwe ka Ebangeding ya Luka, monna yo bohlale o ile a ‘epa a iša tlase’ e le gore a fihle godimo ga lefsika. (Luka 6:48) Ka baka leo, ntlo ya monna yo bohlale e ile ya ema e tiile.

 Ke ntlha efe yeo Jesu a bego a nyaka go e gatelela? Jesu o boletše seswantšho se go gatelela mediro ya baagi, e sego ponagalo ya dintlo, lefelo leo di agilwego go lona goba go tia ga dilo tšeo di agilwego ka tšona. Monna yo mongwe o ile a epa go iša tlase mola yo mongwe a sa ka a dira bjalo. O ka swana bjang le monna yo bohlale gomme wa epa go iša tlase? Jesu ka boyena o akareditše ntlha ya seswantšho seo ka gore: “Ka gona, ke ka baka la’ng le mpitša ‘Morena! Morena!’ eupša le sa dire dilo tše ke di bolelago? Yo mongwe le yo mongwe yo a tlago go nna a kwa mantšu a-ka gomme a a dira, ke tla le bontšha yo a swanago le yena: O swana le motho . . . yo a epilego a iša tlase gomme a thea motheo godimo ga lefsika.”—Luka 6:46-48.

Ka kgonthe, go fo theetša dithuto tša Beibele goba go bala Beibele ka gae go swana le go aga ntlo godimo ga lešabašaba—ga go nyakege gore motho a epe. Eupša go dira goba go diriša dithuto tša Kriste ke tlhohlo. Go akaretša gore o epe go iša tlase go fihla lefsikeng.

Ka gona, go ema o tiile bjalo ka molatedi wa Kriste go ithekgile ka ge e ba o diriša seo o se kwago goba o sa se diriše. Ge o diriša seo o ithutago sona thutong ya Beibele bophelong bja letšatši le letšatši, o swana le monna yo bohlale yo a epilego go iša tlase. Ka baka leo, morutwana yo mongwe le yo mongwe wa Beibele o swanetše go ema go se nene gomme a ipotšiše gore, ‘Na ke mokwi goba ke modiri? Na ke fo bala le go ithuta Beibele goba ke latela ditaelo tša Beibele ge ke dira diphetho?’

Mehola ya go Epa go Iša Tlase

Ela hloko seo se diragaletšego José. Batswadi ba gagwe ba ile ba mo ruta gore a hlomphe melao ya boitshwaro ya Beibele, eupša ga se a ka a ithuta Lentšu la Modimo gore le mo hole. José o re: “Ge ke be ke tloga gae, ke ile ka leka go ba motho yo botse, eupša ke be ke tlwaelane le batho ba babe. Ke ile ka thoma go diriša dihlare-tagi, ka kopanela mekgweng e gobogilego ya thobalano gomme ke be ke dula ke e-lwa le batho.”

Mafelelong, José o ile a dira phetho ya go fetoša tsela ya gagwe ya bophelo gomme a thoma go ithuta Beibele ka phišego. José o re: “Selo se sengwe seo se nthušitšego go fetoga e bile go bala le go kwešiša Thuto ya Jesu ya Thabeng. Eupša go tšere nako gore ke dire diphetogo semelong sa-ka le tseleng ya-ka ya bophelo. Mathomong ke be ke boifa seo batho bao ke bego ke re ke bagwera ba-ka ba tlago go se nagana ka nna, eupša ke ile ka fenya poifo yeo. Ke ile ka kgaotša go bolela maaka le go diriša polelo ya maroga gomme ka thoma go ya dibokeng tša Dihlatse tša Jehofa. Ke ithutile gore, go etša ge Jesu a holofeditše, go phela bophelo bjo bonolo le go diriša keletšo ya Beibele go tliša lethabo la ka mo go sa felego e le ka kgonthe.”—Mateo 5:3-12.

Mafelelo e tla ba afe ge o epa go iša tlase e le gore o age godimo ga lefsika—ke gore, ge o katanela go diriša seo o se balago ka Lentšung la Modimo? Jesu o itše: “Ge meetse-fula a tsoga gomme  noka e tšhologela ntlong yeo, yona ya se be le matla a lekanego go ka e šišinya, gobane e agilwe gabotse.” (Luka 6:48) Ka kgonthe, ge e ba o aga gabotse ka go diriša seo o ithutago sona, diteko tše bjalo ka madimo di ka se palelwe feela ke go senya tumelo ya gago, eupša di ka se kgone le go e šišinya. Ruri yeo ke kgopolo e homotšago!

Morutiwa Jakobo, e lego ngwanabo Jesu yo e sego wa madi, o bolela ka tšhegofatšo e nngwe gape ya barutwana ba Beibele bao e sego bakwi feela eupša e lego badiri ba kgonthe ba Lentšu le ngwadilwego la Modimo. Jakobo o ngwadile gore: “E-bang badiri ba lentšu, e sego bakwi feela . . . Yo a nyankurelago molaong o phethagetšego wo e lego wa tokologo gomme a o phegelela, motho yo gobane a fetogile modiri wa modiro, e sego mokwi yo a lebalago, o tla thabišwa ke go o dira.”—Jakobo 1:22-25.

Ka kgonthe, bao ba dirišago keletšo ya Beibele ba thaba e le ruri. Ke moka, lethabo leo le nea balatedi ba Kriste matla a go ema ba tiile kgahlanong le diteko tše bjalo ka madimo tšeo di lekago tumelo ya bona le go ba ga kgonthe ga boineelo bja bona go Modimo.

O tla Dira’ng?

Ge Jesu a nea Thuto ya gagwe ya Thabeng, o ile a gatelela gore gantši go hlankela Jehofa Modimo ga se taba ya go kgetha magareng ga selo se le sela, eupša ke taba ya go kgetha selo se goba sela. Ka mohlala, Jesu o rutile gore motho a ka ba le leihlo leo le lokilego goba a ba le le lebe, gore o hlankela Modimo goba mahumo le gore o sepela tseleng e tshesane goba e phatlaletšego. (Mateo 6:22-24; 7:13, 14) Ke moka, papišong ya gagwe ya go phetha ya baagi ba babedi, Jesu o ile a nea balatedi ba gagwe kgetho e nngwe gape ge a re: E-bang bjalo ka monna yo bohlale goba le be bjalo ka monna wa lešilo.

Ge e ba o tšwela pele go diriša seo o ithutago sona thutong ya gago ya Beibele ka pelo ka moka, o dira ka bohlale. Ee, go epa go iša tlase e le gore o age godimo ga lefsika go tla go tlišetša ditšhegofatšo gona bjale le nakong e tlago.—Diema 10:25.

[Diswantšho go letlakala 30]

Go ema ga rena re tiile go ithekgile ka gore re diriše seo re ithutago sona