Tema Yeo e Kgathwago ke Maria Morerong wa Modimo

NAKONG ya bodiredi bja Jesu, mosadi yo mongwe o ile a phagamišetša lentšu la gagwe ka godimo ga lešata leo le bego le bakwa ke lešaba gomme a re: “Go thaba popelo yeo e go rwelego le matswele ao o a antšego!” Ge e ba Jesu a be a nyaka gore mmagwe a rapelwe, se e be e tla ba sebaka se sebotse sa gore a kgothaletše batho go dira bjalo. Go e na le gore a dire bjalo, o ile a araba ka gore: “Aowa, go e na le moo, Go thaba bao ba kwago lentšu la Modimo gomme ba le boloka!”—Luka 11:27, 28.

Jesu ga se a ka a hlompha mmagwe ka tsela le ge e le efe e kgethegilego; le gona ga se a ka a botša balatedi ba gagwe gore ba dire bjalo. Se se dumelelana bjang le kgodišo yeo badumedi ba bantši ba botegago ba e neago Maria? Anke re ahla-ahleng tše dingwe tša dithuto tšeo di atilego tša mabapi le mmago Jesu re diriša Beibele.

“Yo a Tletšego Botho,” “O Šegofaditšwe Gare ga Basadi”

Morongwa Gabriele o ile a botša Maria tema yeo a tlago go e kgatha morerong wa Modimo. Lebakeng leo, o ile a mo dumediša ka gore: “Dumela, wena yo a ratilwego kudu, Jehofa o na le wena.” (Luka 1:28) Phetolelo e nngwe ya tumedišo yona yeo e re: “Dumela wena yo a tletšego botho, Morena o na le wena.” Kapejana ka morago ga moo, Elisabetha o ile a dumediša Maria ka mantšu a rego: “O šegofaditšwe gare ga basadi, le seenywa sa popelo ya gago se šegofaditšwe!” (Luka 1:42) Na dipolelwana tše ga di bontšhe gore re swanetše go hlompha Maria ka tsela e itšego e kgethegilego?

 Ge e le gabotse ga go bjalo. Gaešita le ge mantšu a e le karolo ya thapelo yeo Makatholika a e lebišago go Maria, Beibele ka boyona ga e lokafatše go rapelwa ga Maria. Gabriele le Elisabetha ba ile ba lemoga boemo bjo bo kgethegilego bja Maria bjalo ka yo a bego a tla belega Mesia, eupša kgopolo ya go mo rapela ga e tšwelele ka Mangwalong. Go fapana le moo, ge barutiwa ba Jesu ba be ba mo kgopela gore a ba rute go rapela, o ile a bontšha gore dithapelo di swanetše go lebišwa go Tatagwe. Ge e le gabotse, thapelo ya Jesu ya mohlala e tsebjago kudu e thoma ka mantšu a rego: “Tatago rena wa magodimong.”—Mateo 6:9.

Yo Mongwe wa Babuši

Thuto e nngwe e tlwaelegilego ya mabapi le Maria ke ya gore ga bjale go thwe ke Kgošigadi ya legodimo. Beibele ga e mo nee sereto se bjalo. Lega go le bjalo, e bontšha gore o na le boemo bjo bo kgethegilego thulaganyong ya Modimo ya legodimong. Boemo bjoo ke bofe?

Jesu o bontšhitše gore ba bangwe ba barutiwa ba gagwe ba botegago ba tla buša le yena Mmušong wa gagwe. (Luka 22:28-30) Jesu o tla nea bao ba kgethilwego bolaodi bja go buša bjalo ka “baperisita ba Modimo wa rena, gomme ba tla buša e le dikgoši godimo ga lefase.” (Kutollo 5:10) Beibele e re lebiša ka mo kwagalago phethong ya gore Maria o gare ga bao ba neilwego boemo bjo bjo kgethegilego. Ke ka baka la’ng re ka bolela bjalo?

O tla gopola gore ka morago ga lehu la Jesu, Maria o be a “phegelela thapelong” a e-na le barutiwa le bana babo Jesu. Batho ba ka bago 120 ba be ba kopane bakeng sa morero wo, go akaretša le “basadi ba bangwe.” (Ditiro 1:12-15) Beibele e re ge “monyanya wa Pentekoste [o] tšwela pele, ka moka ga bona ba be ba le gotee lefelong le tee” ge moya wa Modimo o mokgethwa o be o tšhollelwa godimo ga bona gomme o ba nea bokgoni bja go bolela maleme a šele.—Ditiro 2:1-4.

Taba ya gore Maria o be a le gare ga bao ba ilego ba šegofatšwa ka tsela ye, e bontšha gore yena gotee le basadi ba bangwe bao ba amogetšego moya o mokgethwa ba kgethetšwe go ba karolo ya Mmušo wa Jesu wa legodimong. Ka gona, re na le mabaka ka moka a go dumela gore ga bjale Maria o dutše le Jesu letagong la legodimong. (Baroma 8:14-17) Ela hloko a mangwe a maemo a kgethegilego ao yena gotee le ba bangwe bao ba tlago go buša le Jesu ba tlago go ba le ona go phethagatšeng merero ya Modimo.

Go Fetišetša Ditšhegofatšo tše di Kgahlišago Bathong

Puku ya Beibele ya Kutollo e re batho ba 144- 000 ba tla tsošetšwa letagong la legodimong gomme ba hlankela gotee le Jesu bjalo ka baperisita, baahlodi le dikgoši. (Kutollo 14:1, 4; 20:4, 6) Bjalo ka baperisita, ba tla tšea karolo go dirišeng mehola ya sehlabelo sa Jesu go batho ka moka ba kwago, ba dira gore ba kgone go rapela Modimo ka tsela e phethagetšego gomme ba phethagale boitshwarong le mmeleng! *

Maria o bapetše karolo go phethagatšeng morero wa Modimo e bile o sa dutše a e bapala. O swanelwa ke go ekišwa ka baka la boikokobetšo, tumelo, go kwa le boineelo bja gagwe bjalo ka mma, re se sa bolela ka kgotlelelo ya gagwe ka tlase ga diteko. O swanelwa ke go hlompšha kudu ka baka la karolo yeo a e bapetšego ka go belega Mesia le go fetišetša ditšhegofatšo tša ka mo go sa felego bathong.

Lega go le bjalo, thuto ya bohlokwa yeo re ithutago yona go Maria ke gore yena gotee le bahlanka ba bangwe ka moka ba botegago ba Modimo o rapela Jehofa, e sego modimo le ge e le ofe. Maria gotee le babuši-gotee le Kriste ba bangwe kua legodimong ba phagamiša mantšu a bona go bolela gore: “Go Yo a dutšego sedulong sa bogoši [Jehofa Modimo] le go Kwana [Jesu Kriste] a e-be tšhegofatšo, kgodišo, letago le matla go iša mehleng ya neng le neng.”—Kutollo 5:13; 19:10.

[Mongwalo wa tlase]

[Ntlhakgolo go letlakala 10]

Boikokobetšo, tumelo le go kwa ga Maria di swanelwa ke go ekišwa