GO Tswalwa Gape​—Na ke Tsela ya go Hwetša Phološo?

O BE o ka araba bjang potšišo e rego, “Na o tswetšwe gape?” Badumedi ba dimilione lefaseng ka bophara ba be ba ka araba ka kgodišego gore, “Ee!” Ba dumela gore go tswalwa gape ke leswao la Bakriste ba therešo ka moka le gore ke tsela e nnoši ya go hwetša phološo. Ba dumelelana le pono ya baetapele ba bodumedi ba bjalo ka rathutatumelo Robert C. Sproul, yoo a ngwadilego gore: “Ge e ba motho a se a tswalwa gape, . . . gona ga se Mokriste.”

Na le wena o yo mongwe wa bao ba dumelago gore go tswalwa gape go go tsenya tseleng ya go hwetša phološo? Ge e ba go le bjalo, ka ntle le pelaelo o ikemišeditše go thuša ba geno le bagwera ba gago go hwetša tsela yeo le go thoma go sepela ka yona. Lega go le bjalo, gore ba dire bjalo ba swanetše go kwešiša phapano magareng ga motho yo a tswetšwego gape le yoo a sego a tswalwa gape. O ka ba hlalosetša bjang gore go tswalwa gape go bolela’ng?

Ba bantši ba dumela gore polelwana e rego “go tswalwa gape” e bolela ka motho yoo a dirago kholofetšo ya gore o tla hlankela Modimo le Kriste gomme a feleletša ka go fetoga go tloga boemong bja go ba yo a se nago tswalano le Modimo go ya go bja go ba le tswalano le yena. Ge e le gabotse, pukuntšu ya morago bjale e hlalosa motho yo a tswetšwego gape e le “Mokriste yoo gantši a mpshafaditšego goba a tiišitšego boitlamo bja gagwe bja tumelo kudu-kudu ka morago ga tiragalo e kgomago maikwelo ya bodumedi.”—Merriam-Webster’s Collegiate Dictionary—Eleventh Edition.

Na o be o ka makatšwa ke go kwa gore Beibele ga e dumelelane le tlhaloso yeo? Na o ka rata go tseba seo ge e le gabotse Lentšu la Modimo le se rutago mabapi le go tswalwa gape? Ruri o tla holwa ke go hlahloba taba ye ka kelohloko. Ka baka la’ng? Ka gobane kwešišo e nepagetšego ya mabapi le seo se bolelwago ke go tswalwa gape e tla kgoma bophelo bja gago gotee le ditebelelo tša gago ka bokamoso.

Ke Eng Seo Beibele e se Rutago?

Ka Beibeleng ka moka, polelwana e rego “go tswalwa gape” e hwetšwa feela go Johane 3:1-12, yeo e hlalosago poledišano e tsošago kgahlego ya magareng ga Jesu le moetapele wa bodumedi kua Jerusalema. O tla hwetša pego yeo ya Beibele e tsopotšwe ka botlalo lepokising leo le sepelago le sehlogo se. Re go kgothaletša gore o e bale ka kelohloko.

Pegong yeo, Jesu o bontšha dikarolo tše mmalwa tša go ‘tswalwa lefsa.’ * Ge e le gabotse, poledišano ya Jesu e re thuša go araba dipotšišo tše tše hlano tše bohlokwa:

▪ Go tswalwa lefsa go bohlokwa gakaaka’ng?

▪ Na re ka ikgethela go tswalwa lefsa?

▪ Morero wa go tswalwa lefsa ke ofe?

▪ Motho o tswalwa lefsa bjang?

▪ Ke phetogo efe ya tswalano yeo e tlišwago ke go tswalwa lefsa?

Anke re ahla-ahleng dipotšišo tše ka e tee ka e tee.

[Mongwalo wa tlase]

 [Box/​Picture on page 4]

“Le Swanetše go Tswalwa Gape”

“Bjale go be go e-na le monna yo mongwe wa Bafarisei, leina la gagwe e be e le Nikodemo, mmuši wa Bajuda. Yo o tlile go yena e le bošego, a re go yena: ‘Rabi re tseba gore wena bjalo ka morutiši o tšwa go Modimo; gobane ga go motho yo a ka dirago dipontšho tše tše o di dirago ka ntle le ge Modimo a e-na le yena.’ Jesu ge a araba a re go yena: ‘Ruri-ruri ke re go wena, Ka ntle le gore motho a tswalwe gape, a ka se ke a bona mmušo wa Modimo.’ Nikodemo a re go yena: ‘Motho a ka tswalwa bjang ge a tšofetše? A ka se ke a tsena popelong ya mmagwe la bobedi gomme a tswalwa, na a ka dira bjalo?’ Jesu a araba a re: ‘Ruri-ruri ke re go wena, Ka ntle le gore motho a tswalwe ka meetse le ka moya, a ka se ke a tsena mmušong wa Modimo. Se se tswetšwego ke nama ke nama, gomme se se tswetšwego ke moya ke moya. O se ke wa makala gobane ke go boditše gore le swanetše go tswalwa gape. Phefo e fokela mo e ratago, gomme o kwa modumo wa yona, eupša ga o tsebe moo e tšwago gona le moo e yago gona. Go bjalo le ka yo mongwe le yo mongwe yo a tswetšwego ke moya.’ Nikodemo ge a araba a re go yena: ‘Dilo tše di ka direga bjang?’ Jesu ge a araba a re go yena: ‘O ka re o le morutiši wa Isiraele fela wa se tsebe dilo tše? Ruri-ruri ke re go wena, Re bolela seo re se tsebago gomme re hlatsela seo re se bonego, eupša lena ga le amogele bohlatse bjo re bo neago. Ge e ba ke le boditše dilo tša lefaseng fela la se dumele, le tla dumela bjang ge e ba ke le botša dilo tša legodimong?’”—Johane 3:1-12.