Lebaka Leo ka Lona Beibele e Lego e Šomago Mehleng ya Rena

“Lengwalo ka moka le buduletšwe ke Modimo gomme le ka dirišwa ka tsela e holago . . . bakeng sa go hlahla maphelo a batho.”—2 TIMOTHEO 3:16, The Jerusalem Bible.

GO THEOŠA le nywaga-kgolo, Beibele e tutueditše batho ba ditšo tše dintši go fetoša tsela ya bona ya bophelo gore e be kaone. Lengwalo leo le tsopotšwego ka mo godimo le hlalosa lebaka leo ka lona Beibele e lego e atlegago ka tsela ye—bohlale bja yona bo tšwa go Modimo. Gaešita le ge e ngwadilwe ke batho, Beibele e re botša dikgopolo tša Modimo. Beibele e hlalosa ka gore: “Batho ba boletše se se tšwago go Modimo ge ba be ba išwa ke moya o mokgethwa.”—2 Petro 1:21.

Beibele e nea tlhahlo e šomago bonyenyane ka ditsela tše pedi. Ya pele, e nea pono e kwagalago mabapi le tsela e kaone ya bophelo. Ya bobedi, e na le matla a go tutueletša batho go dira diphetogo tše di nyakegago bakeng sa go fihlelela tsela yeo e kaone ya bophelo. A re ahla-ahleng ditsela tše tše pedi.

Temogo ya go Bea Dipakane tše Bohlale

Ka Beibeleng, Modimo o dirile kholofetšo ye: “Ke tlo Xo lemôša ka Xo ruta tsela ye O tl’o xo e swara, ka Xo eletša mahlô a-ka à Xo ukametše.” (Psalme 32:8) Ela hloko gore Modimo ga a nee keletšo feela eupša o nea le temogo, e lego bokgoni bja go bona dikarolo ka moka tša boemo. Go ba le bokgoni bja go lemoga dipakane tšeo di nago le mohola e le ka kgonthe go ka re šireletša go senyeng maphelo a rena ka go phegelela dilo tša lefela.

Ka mohlala, batho ba bantši ba ipeela dipakane tša go phegelela bophagamo le mahumo. Dipuku tšeo di neago batho keletšo di tletše ka tsebišo ya kamoo o ka hwetšago botumo le mahumo ka go hlalefetša ba bangwe. Ka lehlakoreng le lengwe, Beibele e re botša gore: ‘Tša ge motho a tsebafela wabo, ke tša lefeela, le go phuthela moya ka kobo.’ “E a rataxo mahumô xa a hore ka ôna.” (Mmoledi 4:4; 5:9) Na keletšo yeo e ka re hola lehono?

Go bontšha kamoo keletšo ya Beibele e lego e šomago ka gona, a re eleng hloko seo se diragaletšego Akinori wa kua Japane. Ka go fenya phadišano e thata, Akinori o ile a fihlelela pakane ya gagwe ya go aloga yunibesithing ya maemo a godimo le go hwetša mošomo femeng e atlegilego le yeo e tsebjago kudu. Dilo ka moka di be di bonagala di mo sepela gabotse. Lega go le bjalo, katlego ya gagwe ga se ya mo tlišetša lethabo leo a bego a le nyaka. Go e na le moo, kgateletšego le go lapa di ile tša senya boemo bja gagwe bja tša maphelo.  Bagwera ba gagwe ba mošomong ba be ba sa mo kgothatše gakaalo. Ka baka la kgateletšego, o ile a lemalela dino-tagi a ba a nagana le go ipolaya. Ke moka, o ile a thoma go ithuta Beibele le Dihlatse tša Jehofa. Seo a ithutilego sona se ile sa fetoša pono ya gagwe mabapi le seo se lego bohlokwa bophelong. Go se go ye kae, malwetši a gagwe ao a bego a bakwa ke kgateletšego a ile a thoma go fola. Go e na le go tutuetšwa ke boikgogomošo le go nyaka go tuma, Akinori o ile a bona therešo ya seo seema sa Beibele se se bolelago ge se re: “Pelo-thšweu ké ’phelô bya mmele.”—Diema 14:30.

Ke’ng seo o bonago e le pakane e nago le morero kudu bophelong? Ke’ng seo se ka go tlišetšago lethabo la kgonthe? Na e tla ba go ba le lenyalo le le atlegilego? Goba na ke go nea bana ba gago mathomo-mayo a mabotse bophelong? Na ke go dira bagwera ba bantši? Na ke go ipshina bophelong? Tše ka moka ke dipakane tše di nago le morero. Ge e le gabotse, Beibele e re kgothaletša go fihlelela dilo tše, eupša e se morero wa rena o mogolo bophelong. Ka bohlale bjo bo šomago, Beibele e nea senyakwa se bohlokwa bakeng sa go hwetša kgotsofalo bophelong ge e re: “Boifa Modimo, O lôtê taêlô tša xaxwe. Ké se se swanetšexo batho bohle.” (Mmoledi 12:13) Ge re hlokomologa taelo ye, bophelo e ba bjo bo se nago morero, bjo bo gateletšago gomme bja feleletša ka go ba bjo bo nyamišago. Ka lehlakoreng le lengwe, Beibele e re kgonthišetša gore: “E a botago Jehofa o na le lehlogonolo.”—Diema 16:20, PK.

Kamoo Beibele e Tutuetšago Batho go Fetoga

Moapostola Paulo o ngwadile gore: “Lentšu la Modimo le a phela e bile ke le matla.” Go swana le tšhoša ya magale a mabedi, e kgona go phuleletša dikgopolo le maikemišetšo a ka gare-gare a motho. (Baheberu 4:12) Beibele e na le matla a go fetoša tsela yeo batho ba phelago ka yona ka gobane e ba thuša gore ba ipone ka tsela yeo ruri ba le go ka yona, e sego ka tsela yeo ba naganago gore ba ka yona. Ke moka, bao ba nago le boemo bjo bobotse bja pelo ba ka lemoga gore ba swanetše go dira diphetogo. Ka mohlala, ge a bolela ka bao ba lego ka phuthegong ya Bokriste ya Korinthe ya Bogologolo bao e kilego ya ba mahodu, matagwa, dihlotlolo, bjalo-bjalo, Paulo o itše: “Seo ke se ba bangwe ba lena le bego le le sona. Eupša le hlatswitšwe la hlweka . . . ka moya wa Modimo.” (1 Bakorinthe 6:9-11) Moya o mokgethwa wa Jehofa o sa dutše o le o šomago le o matla lehono gomme o ka tutuetša batho go dira diphetogo tšeo di nyakegago.

Mario, yo a dulago Yuropa, e be e le monna yo a ratago bošoro yo a bego a kgoga patše e bile a e rekiša. Lebakeng le lengwe, ge lephodisa le be mo amoga dihlare-tagi tša gagwe, o ile a galefa kudu moo a ilego a hlasela lephodisa leo gomme a senya koloi ya lona. Go oketša moo, Mario o be a sa šome gomme a e-na le dikoloto tše dintši. Ge a lemoga gore o be a ka se kgone go rarolla mathata a gagwe ka boyena, o ile a amogela thuto ya Beibele. Ge a dutše a dira tšwelopele, Mario o ile a fetoša ponagalo ya gagwe, a kgaotša go diriša le go rekiša dihlare-tagi gomme a kgaotša le bošoro. Ba bantši bao ba bego ba tseba mekgwa ya gagwe ya pele ba ile ba makala. Ba ile ba mo emiša gomme ba mmotšiša gore, “Mario, na ruri ke wena?”

Ke’ng seo se tutuetšago batho bao ba swanago le Akinori le Mario go fetoša maphelo a bona le go hwetša kgotsofalo ya kgonthe le lethabo bophelong? Go molaleng gore ke tsebo ya bona e mpsha ka Modimo yeo ba e hweditšego ka go ithuta Beibele. Ke Modimo feela yo a ka re neago tlhahlo e šomago yeo e nyakegago bakeng sa go atlegiša maphelo a rena gona bjale le go ba le tebelelo ya bophelo bjo bo sa felego nakong e tlago. Bjalo ka Tate, Jehofa Modimo o bolela le rena a diriša Beibele ge a re: “Ngwan’a-ka! Theetša, O amoxêlê mantšu a-ka; O tlê O atêlwê ke mengwaxa ya xo phela. . . . X’O ka swara ka yôna, ’naô tš’axo xa di tanywe; x’O kitima, O ka se kê wa kxopya. Xomarêla thutô! Se e lahlê! E bolokê. Ké yôna bophelô bya xaxo.” (Diema 4:10-13) Ke keletšo efe e ka šomago e le ka kgonthe go feta gore re nyake tlhahlo ya Mmopi wa rena?

 [Box/​Picture on page 7]

Keletšo e Šomago Lehono

Beibele e nea melao ya motheo e šomago yeo e ka re hlahlago dikarolong ka moka tša bophelo bja lehono. Mehlala e mengwe še:

• Go thabela ditswalano tše dibotse le ba bangwe

“Ka baka leo, dilo tšohle, tše le nyakago batho ba le dira tšona, le lena ka mo go swanago le ba dire tšona.”—Mateo 7:12.

“Yo a itshwarago bjalo ka yo monyenyane gare ga lena, ke yena yo mogolo.” —Luka 9:48.

“Latelang tsela ya go amogela baeng ka borutho.”—Baroma 12:13.

• Go fenya mekgwa yeo e senyago

“Šika le bahlale O hlalefê; mokxônana-le-mašilo ó tlo thsereana.”—Diema 13:20.

“O se kê wa tlwaêlana le dihori tša sebelá.”—Diema 23:20.

“O se kê wa tlwaêlana le monna wa sebefedi.”—Diema 22:24.

• Go aga lenyalo le le tiilego

“Yo mongwe le yo mongwe wa lena ka noši a rate mosadi wa gagwe bjalo ka ge a ithata; ka lehlakoreng le lengwe, mosadi o swanetše go ba le tlhompho e tseneletšego go monna wa gagwe.”—Baefeso 5:33.

“Aparang maikwelo a borutho a bonolo a lešoko, botho, monagano o ikokobeditšego, boleta le bopelotelele. Tšwelang pele le kgotlelelana gomme le lebalelana ka bolokologi.”—Bakolose 3:12, 13.

• Go thuša bana

“Ngwana mo eteletše tsela y’axwe; ké mo a tl’o xo tšofala à sa ka a e lahla.” —Diema 22:6.

“Lena bo-tate, le se ke la befediša bana ba lena, eupša tšwelang pele le ba godiša ka tayo le tlhahlo ya monagano ya Jehofa.” —Baefeso 6:4.

• Go phema diphapano

“Phetolô e bolêta e phohliša dipêfêlô; lentšu la xo fêrêlêla le tsoša boxale.” —Diema 15:1.

“Go bontšhaneng kgodišo, etelelang pele.”—Baroma 12:10.

Gaešita le gare ga bagwera, dingangišano mabapi le tša kgwebo gantši di phengwa ka go ngwala ditumelelano fase. Ke ka baka leo mohlanka wa Jehofa e lego Jeremia a ngwadilego gore: “Ka ngwala le lengwalô la thêkô, ka le xatiša ka seká sa-ka, ka bitša dihlatse ka mo êlêla dithšêlêtê tšeo ka seêlô.”—Jeremia 32:10.

• Go hlagolela boemo bjo bobotse bja kgopolo

“Dilo le ge e le dife tša therešo, . . . tše di rategago, . . . tšeo go bolelwago gabotse ka tšona, dilo le ge e le dife tša bokwala le selo le ge e le sefe se se tumišegago, tšwelang pele le naganišiša ka dilo tše.”—Bafilipi 4:8.

Beibele e kgahlanong le go lebiša tlhokomelo dikgopolong tše di fošagetšego e bile e kgalemela “babelaedi ba belaelago ka kabelo ya bona bophelong.” E re: “Thabang kholofelong.”—Juda 4, 16; Baroma 12:12.

Go diriša melao ye e mebotse ya motheo go ka se re kgontšhe feela go thabela khutšo le kgotsofalo gona bjale, eupša gape go tla re thuša go dira dilo ka go dumelelana le seo Modimo a se nyakago go rena le go amogela ditšhegofatšo tša gagwe. Beibele e re: “Baloki e ba beng ba naxa, ba dula mo xo yôna ka mehla le ka mehla.”—Psalme 37:29.

[Diswantšho go letlakala 5]

Akinori ge e be e sa le rakgwebo (ka go le letshadi) gotee le mosadi wa gagwe ba thabela go bolela ka ditherešo tša Beibele lehono