Lesolo la go Nyaka Tlhahlo e Šomago

GE E ba o nyaka keletšo, e hwetšagala ka bontši. Kgwebo ya go nea batho keletšo ke nngwe ya dikgwebo tšeo di golago ka lebelo mo lefaseng. Mafelong a fapanego kudu a swanago le Brithania, Latin Amerika, Japane le United States, dipuku tša go nea batho keletšo ke tšona di rekwago kudu. Dibidio, diseminari le mananeo a thelebišene ao a neago keletšo a thekgwa ke batho ba bantši. Seo se dirago gore dikeletšo tša ona di ipiletše ke kgopolo ya gore o ka kgona go lebeletšana le mathata a gago ntle le go kgopela thušo go setsebi sa tša monagano, moeletši wa manyalo goba moruti. Dikeletšo tše di akaretša ditaba dife?

Kgotsofalo bophelong, go hwetša kgotsofalo leratong le go godiša bana ke tše dingwe tša dihlogo tšeo go bolelwago ka tšona kudu. Go lebeletšana le kgateletšego, go hwelwa le ditla-morago tša tlhalo ke tše dingwe tša dihlogo tšeo di tlwaelegilego. Batho ba bantši ba nyaka keletšo mabapi le go lwantšhana le go ja ka mo go feteletšego, go kgoga le go nwa kudu. Na keletšo yeo e a šoma? Ka dinako tše dingwe e a šoma, eupša gantši ga e šome. Ka gona, ke gabohlale go ela hloko temošo ya Beibele e rego: “Lešilo le dumêla ’taba tšohle; mohlale ó hlatha dikxatô.”—Diema 14:15.

Dipuku tša go nea batho keletšo di fapane kudu le dipuku tša ditaelo tšeo di rutago batho bokgoni bjo bjalo ka go tšea diswantšho, thuto ya diakhaonto goba go ithuta leleme le itšego. Dipuku tše bjalo di ka dirišwa e le mokgwa o atlegago le o sa bitšego wa go ithutela mošomo o itšego. Dipuku tša go nea batho keletšo—e ka ba tabeng ya tša kgwebo, lenyalo, botswadi goba boemo bja tša monagano—di a fapana. Gantši di kgothaletša go phela ka tsela e itšego goba di thekga difilosofi tše itšego. Ka gona, ke gabohlale go botšiša gore: ‘Ke mang yo a neago keletšo ye? Mothopo wa tsebišo ya gagwe ke ofe?’

Ga se gantši ditsebi di theago dikgopolo tša tšona bohlatseng bjo bo kgobokeditšwego ka kelohloko. Ba bangwe ba ka ngwala dipuku tša go nea keletšo tšeo di tlago go rekwa kudu, ba tseba  gore ba tla dira tšhelete e ntši kudu ka go botša batho seo ba nyakago go se kwa. Ge e le gabotse, nageng e nngwe feela, intaseteri ya dipuku tša go nea batho keletšo e dira mo e nyakilego go ba diranta tše dimilione tše dikete tše 75 ka ngwaga!

Dipuku tša go Nea Batho Keletšo di Šoma Gakaaka’ng?

Ge o bala dipuku tša go nea batho keletšo, o nagana gore o tla hwetša keletšo e šomago. Lega go le bjalo, ka dinako tše dingwe, seo o se hwetšago ke keletšo e sa tsenelelago goba ya boikgopolelo. Gantši, dikeletšo tše bjalo di go botša gore: ‘Ge o ka fo nagana ka tsela e swanetšego o tla atlega. Selo le ge e le sefe seo o se nyakago, e ka ba tšhelete, boemo bjo bobotse bja tša maphelo goba tswalano e kgotsofatšago, o tla ba le sona ge fela o ka nagana ka tsela e swanetšego.’ Na keletšo ya mohuta wo e a šoma? Na e tla go thuša go lebeletšana le mathata le manyami bophelong?

Ka mohlala, nagana ka dipuku tšeo di bolelago ka ditswalano tša batho ka kakaretšo gotee le ditswalano tša lenyalo, e lego tše dingwe tša dihlogo tšeo di tlwaelegilego kudu. Na di thuša batho go aga malapa a tiilego le a thabilego? E sego ka mehla. Go ya ka mosekaseki yo mongwe, mongwadi wa dipuku tša go nea batho keletšo mabapi le ditaba tša lerato tšeo di ilego tša atlega kudu kua Latin Amerika o “eletša babadi mabapi le kamoo ba ka bago le ditswalano tše di kgahlišago le kamoo ba ka agago boitlhompho ka gona.” Mongwadi o bolela gore go dula tswalanong yeo e se nago lerato ke tsela e nngwe ya go se ipotegele. Kgwekgwe ya taba ke gore motho o swanetše go dira seo se mo thabišago go e na le gore a lemoge mathata a gagwe le go leka go a lokiša.

Ke therešo gore dipuku tša go nea batho keletšo di ka ba di hupere keletšo e botse. Lega go le bjalo, gape di ka nea keletšo e gobatšago. Setsebi se ka nea tšhišinyo e šomago tabeng e itšego mola keletšo ya sona tabeng e nngwe e ka dira gore dilo di mpefale. E ka ba mo go sa kgonegego go kgethologanya dikgopolo tše dintši, le tšeo gantši di ganetšanago, tšeo di newago ke dipuku tše. O ka bota keletšo ya mang? Ipotšiše gore: ‘Na keletšo ye e nyakišišitšwe gabotse goba na e theilwe kgopolong ya mongwadi? Go phegelela mahumo le bophagamo ga mongwadi go tutueditše potego ya gagwe go fihla bokgoleng bofe?’

Puku yeo e itlhatsetšego e e-na le mohola ka nako e telele ke Beibele. E nea keletšo e šomago ditabeng tše dintši tšeo dipuku tša go nea batho keletšo di di ahla-ahlago le tše dingwe tše dintši. E dirile gore batho ba dimilione ba dire dilo ka go dumelelana le keletšo e rego: “Le mpshafatšwe matleng a tutuetšago monagano wa lena, le apare motho yo mofsa.” (Baefeso 4:23, 24) Beibele e re nea tsebišo e bohlale ya mabapi le seo se re bakelago mathata gomme e re ruta le kamoo re ka lebeletšanago le mathata ao ka gona. Se bohlokwa le go feta, e nea mabaka a matla a go dira seo se lokilego. Sehlogo se se latelago se tla ahla-ahla kamoo se se kgonega ka gona.