Batamela Kgaufsi le Modimo

Jehofa o Tšeela Boleta Godimo

Numeri 12:1-15

BOIKGOGOMOŠO, lehufa le go nyaka maemo. Dika tše bjalo ke tše tlwaelegilego go bao ba nyakago go atlega lefaseng le. Eupša na dika tše swanago le tšeo di re batametša go Jehofa Modimo? Ka mo go fapanego, Jehofa o nyaka gore barapedi ba gagwe e be ba boleta. Se se bonagala pegong yeo e lego go Numeri kgaolo 12. Tiragalo ye e diregile lešokeng la Sinai, ka morago ga gore Baisiraele ba phološwe Egipita.

Miryama le Arone ba ‘fela ba tsota’ moratho wa bona, e lego Moše. (Temana 1) Go e na le gore ba bolele le Moše, ba ile ba mo tsota, mohlomongwe ba phatlalatša dingongorego tša bona moo kampeng. Miryama, yoo go boletšwego ka yena pele, go bonagala e le yena yo a bego a etelela pele. Lebaka la mathomo la go ngongorega e be e le gore Moše o be a nyetše mosadi wa Mokuše. Na Miryama mohlomongwe o be a hufega ka gobane setšhaba se be se ka se mo tšeele godimo go swana le mosadi yo—yoo e bile e sego Moisiraele?

Lebaka la go ngongorega e be e le le le tseneletšego. Miryama le Arone ba be ba fela ba re: “Afa Morêna ó bolêla ka Mošê fêla? A xa a bolêle le ka rena?” (Temana 2) Na maikemišetšo a kgonthe a go ngongorega e be e le go kganyoga go ba le matla a oketšegilego a taolo le botumo?

Pegong yeo, Moše ga se a arabela dingongoregong tšeo ka boyena. Go bonagala a ile a kgotlelela tshwaro yeo e mpe ka setu. Go arabela ga gagwe ka go se fele pelo go ile gwa gatelela seo Beibele e se hlalosago ka yena ge e re e be “e le monna yo bolêta ruri xo fetiša batho ka moka” ba lefase. * (Temana 3) Moše ga se a ka a swanelwa ke go ikemelela. Jehofa o be a theeditše, gomme o ile a thekga Moše.

Jehofa o ile a lebelela dingongorego di le kgahlanong le Yena. Go ba gona, Moše o be a kgethilwe ke yena. Ge a kgalemela bangongoregi bao, Modimo o ile a ba gopotša gore o be a e-na le tswalano ya moswana-noši le Moše ka gore: “Ke bolêla le yêna rè lebantše difahloxô.” Ke moka Jehofa o ile a botšiša Miryama le Arone gore: ‘Ke ka baka la’ng le sa ka la boifa go bolela Moše gampe?’ (Temana 8) Ka go bolela kgahlanong le Moše, ge e le gabotse ba be ba e-na le molato wa go ngongorega kgahlanong le Modimo. Ka go se bontšhe hlompho mo go bjalo, ba be ba tla lebeletšana le kgalefo ya Modimo.

Miryama, yo go bonagalago e le mmaki wa dingongorego tšeo, o ile a otlwa ka lephera. Gatee-tee Arone o ile a lopa Moše gore a kgopelele Miryama tebalelo. Akanya feela—go fola ga Miryama bjale go be go ithekgile ka gore ba kgopelelwe tebalelo go yoo ba mo fošeditšego! Moše ka boleta o ile a dira seo a bego a kgopetšwe go se dira. Ge a bolela la mathomo pegong ye, Moše o ile a lopela kgaetšedi ya gagwe go Jehofa. Miryama o ile a fodišwa, eupša o ile a swanelwa ke go lebeletšana le kgobošo ya go tswalelelwa matšatši a šupago.

Pego ye e dira gore re lemoge dika tšeo Jehofa a di tšeelago godimo le tšeo a sa di ratego. Ge e ba re nyaka go batamela go Modimo, re swanetše go katanela go tumola modu le ge e le ofe wa boikgogomošo, lehufa le wa go nyaka maemo woo re ka o bonago ka go rena. Jehofa o rata ba boleta. O holofetša ka gore: “Ba bolêta e tlo ba bôná beng ba naxa; ba tlo thaba ka botlalô bya moláô.”—Psalme 37:11; Jakobo 4:6.

[Mongwalo wa tlase]