Na o be o Tseba?

Bamangwalo bao ba bego ba ganetša Jesu e be e le bomang?

Nakong ya bodiredi bja gagwe, Jesu o ile a gahlana le bamangwalo e sego feela Jerusalema eupša le ditorotswaneng le metsaneng. Ka ntle ga Jerusalema—gaešita le ditšhabeng tša Bajuda tša ka ntle ga Palestina—banna ba bjalo e be e le bahlankedi ba banyenyane ba mmušo, bao ba bego ba tseba Molao, bao ba ka bago ba be ba hlankela e le bangwalolodi goba baahlodi ba motseng.—Mareka 2:6; 9:14; Luka 5:17-21.

Kua Jerusalema, bamangwalo ba be ba šoma kgaufsi kudu le mmušo wa Bajuda. (Mateo 16:21) The Anchor Bible Dictionary e bolela gore, karolo ya bona moo “go bonagala e be e le ya go šoma kgaufsi le baperisita, ditabeng tša boahlodi le go gatelelweng ga metlwae ya Sejuda le melao, gotee le mediro ya ka mehla ya Sanhedrine.” Bjalo ka barutiši ba tumilego ba Molao, ba bangwe ba bamangwalo ba ge e le gabotse e be e le ditho tša Sanhedrine, goba kgoro-kgolo ya tsheko ya Bajuda. Ba be ba hlankela gotee le baperisita ba bagolo le Bafarisei.

Gantši go bonagala bamangwalo e le baganetši ba Jesu ba bodumedi. Lega go le bjalo, ba bangwe ba be ba sa mo ganetše. Ka mohlala, yo mongwe wa bamangwalo o ile a botša Jesu gore: “Ke tla go latela kae le kae mo o tlago go ya gona.” Jesu o ile a bolela le yo mongwe wa bona gore: “Ga o kgole le mmušo wa Modimo.”—Mateo 8:19; Mareka 12:28-34.

Ke’ng seo se bego se bolelwa ke gore motho o tloditšwe?

Kua Bohlabela bja Magareng mehleng ya Beibele, go tlotša motho hlogo ka makhura e be e le leswao la go mo amogela goba tiro ya go bontšha moeng gore o amogelegile. Ka tlwaelo, makhura ao a bego a dirišwa e be e le a mohlware ao a tswakilwego ka senkgiša-bose. Baheberu gape ba be ba tšhela motho makhura hlogong goba go mo tloša, ge a be a fiwa maemo a kgethegilego a bolaodi semmušo. Ka mohlala, Arone o ile a tlotšwa ge a be a kgethelwa gore a hlankele bjalo ka moperisita yo a phagamego. (Lefitiko 8:12) Tabeng ya Kgoši Dafida, “Samuele a swara lenaka la makhura a mo tlotša . . . Mohla woo môya wa Modimo wa tlêla Dafida wa dula mo xo yêna.”—1 Samuele 16:13.

Lelemeng la Seheberu, lentšu leo le dirišitšwego bakeng sa go tlotša mo go bjalo ke la ma·shachʹ, leo lentšu ma·shiʹach, goba Mesia, le tšwago go lona. Lentšu le le sepedišanago le lona la Segerika ke la khriʹo, leo lentšu khri·stosʹ, goba Kriste, le tšwago go lona. Ka gona, Arone le Dafida ba ka bitšwa bo-mesia, goba batlotšwa. Moše le yena o bitšwa kriste, goba motlotšwa, ka kgopolo ya gore Modimo o mo kgethile gore a hlankele e le moemedi wa Gagwe.—Baheberu 11:24-26.

Jesu wa Natsaretha o ile a kgethwa ke Modimo ka boyena a mo fa matla a magolo kudu a taolo. Go e na le gore a tlotšwe ka makhura a kgonthe, Jesu o ile a tlotšwa ka moya o mokgethwa wa Modimo. (Mateo 3:16) Bjalo ka Motlotšwa yo a kgethilwego wa Jehofa, Jesu o bitšwa ka mo go swanetšego gore ke Mesia, goba Kriste.—Luka 4:18.