Batamela Kgaufsi le Modimo

Moahlodi yo a Kgomarelago se se Lokilego

Numeri 20:2-13

BAAHLODI ba batho ba ka ahlola ka tsela e hlokago toka goba ka tsela e feteletšego, eupša ga go bjalo ka Jehofa Modimo—‘yo a ratago toko.’ (Psalme 37:28.) Gaešita le ge a sa fele pelo, ga a tlogelele dilo. O kgomarela se se lokilego. Ela hloko kamoo a ilego a arabela ka gona ge go be go tsoga moferefere le borabele, bjalo ka ge Numeri kgaolo 20 e bega.

Kgaufsi le bofelo bja leeto la bona la lešokeng, Baisiraele ba ile ba lebeletšana le tlhaelelo ya meetse. * Batho ba ile ba thoma go ngongorega kgahlanong le Moše le Arone ba re: “Ké ka ’baka la’ng xe Le tlišitše phuthêxô ya Morêna fá lešokeng lé, xore re hwêlê xôna, rena le dikxomo tša rena!” (Temana 4) Batho ba ile ba ngongorega ka gore lešoka e be e le “felô mo xo šoro” moo go bego go se na ‘mego le merara’ gotee le digaranata—dienywa tšona tšeo dihlodi tša Baisiraele di ilego tša tla le tšona ge di be di e-tšwa Nageng ya Kholofetšo nywaga pele ga moo—le gore “meetse a xo nwa xa a xôna.” (Temana 5; Numeri 13:23) Ge e le gabotse, ba be ba bea Moše le Arone molato ka gobane lešoka le be le sa swane le naga e enywago kudu yeo moloko o fetilego wa bangongoregi o ilego wa gana go tsena go yona!

Jehofa ga se a ka a lahla bangongoregi bao. Go e na le moo, o ile a laela Moše gore a dire dilo tše tharo: gore a sware molamo, a kgobokanye phuthego le gore a “bolêlê le lefsika bà lebeletše; ké mo le tl’o xo [ba] nea meetse a lôna.” (Temana 8) Moše o ile a latela ditaelo tše pedi tša mathomo, eupša a palelwa ke go latela ya boraro. Go e na le gore a bolele ka tumelo le lefsika, o ile a bolela le phuthego a ferekane, a re: “Kwang lena dinganga-tenang! Afa re ka Le nthšetša meetse mo lefsikeng lé?” (Temana 10; Psalme 106:32, 33) Ke moka Moše o ile a itia lefsika gabedi gomme “xwa tšwa meetse a mantši.”—Temana 11.

Ka go rialo, Moše le Arone ba ile ba dira sebe se segolo. Modimo o boletše le bona a re: “Le nyaditše Lentšu la-ka.” (Numeri 20:24) Ka go dira seo se lego kgahlanong le taelo ya Modimo lebakeng le, Moše le Arone ba ile ba fetoga seo ba bego ba latofatša phuthego ka sona—dinganga goba marabele. Kahlolo ya Modimo e be e kwagala: Moše le Arone ba be ba ka se tsenye Isiraele Nageng ya Kholofetšo. Na kahlolo ye e be e le e feteletšego? Aowa, ka baka la mabaka a mmalwa.

La pele, Modimo ga se a ka a laela Moše gore a bolele le batho, re se sa bolela selo ka go ba ahlola ka gore ke marabele. La bobedi, Moše le Arone ba ile ba palelwa ke go nea Modimo letago. Modimo o itše: ‘Lena ga se la ka la ntira e mokgethwa.’ (Temana 12) Ka go bolela gore “re ka Le nthšetša meetse,” Moše o boletše eka yena le Arone—e sego Modimo—e be e le bona bao ba neilego phuthego meetse ka mohlolo. La boraro, kahlolo e be e sepedišana le dikahlolo tšeo di dirilwego nakong e fetilego. Modimo ga se a ka a dumelela moloko wa peleng wa marabele go tsena Kanana, ka gona o ile a dira se se swanago ka Moše le Arone. (Numeri 14:22, 23) La bone, Moše le Arone e be e le baetapele ba Isiraele. Bao ba nago le boikarabelo bjo bogolo ba ikarabela kudu go Modimo.—Luka 12:48.

Jehofa o kgomarela se se lokilego. Ka ge a rata toka, ga a kgone go ahlola ka tsela e hlokago toka. Go molaleng gore Moahlodi yo bjalo o swanelwa ke potego le tlhompho tša rena.

[Mongwalo wa tlase]